Éxodo 6 - Dios Iwene

¹ Ja̧danö, Isabenö Jo̧ma Moisésnö jö̧ba̧lijetö: —Moisés, ökwöma kwedakobe faraónnö, iteda ömöledönö baledobö wetakwa̧ma. Chujulu chi̧sebiökwe Israel jojodönö kaatakwawakobe, ja̧danö itebotjö latjebobö weakobe— jö̧ba̧lijetö.

Moisés yemidanö Israel jojodönö Isabenö Jo̧ pjaatakwa̧ yöa̧lijayonö tjöpöjödina jawa

² Ja̧danö, Diosma yöba̧lijetö Moisésnö: —Moisés, ötjöma Isabenö Jo̧ mikwo̧sa.

³ Ötjödasa kwa'dödömine Abrahamnö, Isaacnö, Jacobnö öwawachö yöba̧linama, Ötjöma Jwiinö Juluwo̧ Diossa, jö̧ba̧lö. Jejenö yöta̧lijayonö ötjö chimima Isabenö Jo̧, jö̧ba̧lö yöta̧lijökötö.

⁴ Ju'wi jawabi yöta̧la: Ja̧ möle jobadönö ötjö chiwene yöbawö chujunijatö, Canaán niji chiyocha, jö̧ba̧lö, jelobetjö ichö tjö̧jemima.

⁵ Ja̧danö, jobadötjö tupadanö jojodö, Israel jojodö usula emawö jwötjeba̧li̧ cha̧ja̧kwijatö. Egipto jojodö juluwanö tjotidobö wetjobetjö̧ jwötjeba̧li̧ma. Ja̧danö, babema chomukwatobe yöbawö chujunina chiwenema jobadönöma.

⁶ Jo̧kwaobetjö̧ baikwö yökawo Israel jojodönö, ötjö yöta̧li̧ma jobadönöma: Ötjöma Isabenö Jo̧sa. Egipto jojodö ökwödönö juluwanö kwotidaduwobö wetji̧tjö lakebaduwobö pjatatakwo̧sa, jobadö wetji̧tjö kwȩjachajaduwinö. Ja̧danö, ötjöma jwiinö chujulu i̧sebö, Egipto jojodönö jwiinö lȩbebö ökwödönö kwö̧jibaduwinö pjatatakwo̧sa.

⁷ Ja̧danö, ökwödöma ötjö chömöledö bakibaduwanö pjatatakwo̧sa. Ja̧danö, ötjöma ökwödö Kwösödaduwökwe Dios chö̧jakwo̧sa. Ötjö pjatati̧ waisachibö yöka̧laduwakwedöja, Isabenö Jo̧ma, ökwödö Dösödaduwökwe Diosma Egipto jojodö juluwanö dotidobö wetji̧tjö dö̧jibinö pjabato̧, jö̧ba̧lö.

⁸ Ja̧danö, ökwödönö ötibakwo̧sa niji otiwemi jo̧bekwö, kwa'dödömine Abrahamnö, Isaacnö, Jacobnö, Chiyocha, jö̧ba̧lö ötjöda isabenö chiwene yöbawö chujuninemima. Ökwödönö chiyocha ja̧ nijima kwiteboduwi baibanö. Ötjödasa Isabenö Joma. Moisés jejenö yökawo Israel jojodönö, ötjö yöta̧li̧ma— webijetö Isabenö Jo̧ Moisésnö.

⁹ Ja̧danö, Moisésma Israel jojodönö okobe jwiinö Dios yöawi̧ yöa̧lijayonö öpöjödijadötö. Egipto jojodö juluwanö tjotidobö wetjajiawö̧ tjo̧'wo tjo̧bekwöda ju̧kwijadötö, jo̧kwada, jö̧ba̧lö. Jo̧kwaobetjö̧ Moises yöawi̧ma a̧ja̧kwakwawa öpöjödijadötö.

Moisés Aaron faraónnö yemidanö Dios yöawi̧ yötjawina jawa

¹⁰ Ja̧danö, Isabenö Jo̧ma webijetö Moisésnö:

¹¹ —Moisés, Egipto inesö la'aka luwo̧, faraón ö̧jobekwö yemidanö 'yawi akebo, Israel jojodönö kwitebotjö̧ latjebo weo— webijetö Isabenö Jo̧ma.

¹² Jejenö weijayonö: —Atebökena. Israel jojodöbi ötjö yötawi̧ tja̧ja̧kwokobe. Jo̧kwaobetjö̧, ¿dakwö a̧ja̧kwobö faraónma ötjö yötawi̧ma? Otiwanö yöba̧lö̧kö̧sa ötjöma—

¹³ jö̧a̧liökwe Isabenö Jo̧ma Moisésnö, Aarónnö webijetö: —Yöbawajaduwi Israel jojodönöbi, Egipto inesö la'aka luwo̧ faraónöbi ökwödönö 'da̧batö chujunijatö Israel jojodönö Egiptotjö labebö ökibaduwobö— webijetö Isabenö Jo̧ma Moisésnö, Aarónnö.

Moisés Aarón tja'dödötjö ju'wedö tjimibiya ba̧ji wȩyukwina jawa

¹⁴ Böjanö wȩyukwi̧ma Moisés, Aarón tja'dödötjö ju'wedö tjimibiya ba̧ji̧ wȩyukwi̧, baikwö: Reuben, Jacob itji̧ abönö pöe i̧tji̧mu ömadöma bidö: Hanoc, Falú, Hezrón, Carmi mikwadö. Jobadötjö tupadanö jojodöma idöda tja'dö imi ötjabinawö̧, Reubén jojodö, jö̧ba̧lö.

¹⁵ Jacob itji̧ Simeón i̧tji̧mu ömadöma, abönö pöe jamatö ba̧ja̧liya luwo̧ baibanö, bidö: Jemuel, Jamín, Ohad, Zaquín, Zohar, Saúl mikwadö. Saúlma cananeosuju jitji̧. Ja̧danö, jobadötjö tupadanö jojodöma idöda tja'dö Simeón imi ötjabinawö̧.

^16-19 Ja̧danö baikwö laebobe Jacob itji̧ Leví i̧tji̧mu̧ ömadö tjimibi, ja̧danö Leví ö'dö̧dö tji̧mi̧bi. Levíma ciento treinta y siete año bo̧ ö'wö babibijetö. Jo̧batjö tupadanö jojodöma idöda tja'dö imi ötjabinawö̧, Leví jojodö, jö̧ba̧lö. Ja̧danö, Levi i̧tji̧mu ömadöma bidö: Gersón, Coat, Merari mikwadö. Leví itji̧ Gersón mikwo̧ i̧tji̧mu ömadöma bidö: Libni, Simei mikwadö. Ja̧danö, Leví itji̧ Coat mikwo̧ i̧tji̧mu ömadöma bidö: Amram, Izhar, Hebrón, Uziel mikwadö. Coatma ciento treinta y tres año bo̧ ö'wö babibijetö. Ja̧danö, Leví itji̧ Merari mikwo̧ i̧tji̧mu ömadöma bidö: Mahli, Musi mikwadö. Okobe deinö Levítjö tupadanö jojodöma idöda tja'dö imi ötjabinawö̧, Leví jojodö, jö̧ba̧lö.

²⁰ Ja̧danö, Leví ö'dö̧ Coat itji̧ Amram mikwo̧ma abe'do öjawujunö emijetö ilekwo baibanö. Jobujuma ji̧tji̧munö, ömadönö 'yabebijotö, Aarónnö, Moisésnö. Amramma ciento treinta y siete año bo̧ ö'wö babibijetö.

²¹ Ja̧danö, Coat itji̧ Izhar mikwo̧ i̧tji̧mu ömadöma bidö: Coré, Nefeg, Zicri mikwadö.

²² Ja̧danö, Coat itji̧ Uziell mikwo̧ i̧tji̧mu ömadöma bidö: Misael, Elzafán, Sitre mikwadö.

²³ Ja̧danö, Coat itji̧ Aarónma Elisabet mikwujunö emijetö ilekwo baibanö. Jobuju Elisabetma Aminada mikwo̧ itjiju, ja̧danö Naasón öpöo. Elisabetma ji̧tji̧mu ömadönö 'yabebijotö bidö: Nadab, Abiú, Eleazar, Itamar mikwadö.

²⁴ Ja̧danö, Izhar i̧tji̧ Coré i̧tji̧mu ömadöma bidö: Asir, Elcana, Abiasaf mikwadö. Jobadöma Coré jojodö ajayinö ji̧nadö.

²⁵ Ja̧danö Aarón itji̧ Eleazar mikwo̧ma ilekwonö emijetö, Futiél mikwo̧ i̧tji̧mu ya̧dötjö. Jobujuma jitji̧nö 'yabebijotö, Finees mikwo̧nö. Böjanö tjimibiya ba̧ji̧ wȩyukwi̧ma Levítjö tupadanö jojodötjö ju'wedö tjimibiya.

²⁶ Ja̧danö, Aarón, Moisés, böjanö tjimibiya ba̧ji̧ wȩyukwinadöma, jobadöda Isabenö Jo̧ weinawö̧, Israel jojodö okobe deinö bakwaso jojodönö Egiptotjö lakebaduwo, jö̧ba̧lö.

²⁷ Jobadöda, Aarón, Moisés Egipto inesö la'aka luwo̧ faraónnö abeba̧lijadötö Israel jojodönö latjebobö weobö.

Moisés faraónnö yöa̧Lobö öpöjödina jawa

²⁸ Ja̧danö, ja̧ möle Isabenö Jo̧ma Moisésnö, Egiptonö jo̧nö yöa̧lena

²⁹ baikwö yöba̧lijetö: —Ötjöma Isabenö Jo̧sa. Egipto inesö la'aka luwo̧ faraónnö yöka̧lo okobe jwiinö ökwönö yötawi̧ma— jö̧ba̧lö.

³⁰ Jo̧kwaijayonö Moisésma baikwö atadijetö Isabenö Jo̧nö: —Yöta̧lökena. Otiwanö yöba̧lö̧kö̧sa ötjöma. ¿Dakwö a̧ja̧kwobö faraónma ötjö yöta̧li̧ma?— jö̧ba̧lö.