Éxodo 5 - Dios Iwene

Moisés Aarón Egipto inesö la'aka luwo̧nö atjebina jawa

¹ Ikenama Moisés, Aarón Egipto inesö la'aka luwo̧ faraón ö̧jobekwö 'ya̧jadö tebachö jobadötjö bakwo̧ yöba̧lijetö: —Duluwo̧, Israel jojodö tjösödökwe Diosma ökwönö weatö baikwö: Chömöledönö kakatakwawo jojodö deobekwö tji̧'yo ba'ali kwanö— jejenö yöa̧lökwe:

² —Jo̧ba Isabenö Jo̧ma ¿tida? Jo̧ba wei̧, Israel jojodönö kakatakwawo, jö̧ba̧lö, ¿cha̧ja̧kwiji̧? ¡Cha̧ja̧wökö! Jo̧ba, Isabenö Jo̧nöma wajwitökwe. Isabenö yöta̧la: Israel jojodönö katatakwawökakobe— yöba̧lijetö faraónma.

³ Jejenö yöa̧lawö̧: —Ökwödö Hebreo jojodö dösödökwe Diosma ökwödönö öwawachö yöawijatö ökwönö yödawakwa̧. Jo̧kwaobetjö̧ adebakwö: Jojodö deobekwö di̧'yobö weköbo wa̧pötakwa möle kwebachö Isabenö Jo̧nö juwö diyobö, dösödökwe Diosnöma. Ökwödönö di̧'yobö weköbo Diosma dö'wöchi̧ jawatjöbi, ja̧danö, döpöjojodö ökwödönö tibatö lotjitjö̧bi weapji jö̧ba̧lö— yöba̧lijadötö.

⁴ Jo̧kwaijayonö tjotidawa kabatö tji̧'yoböma öpöjödijetö faraónma. Moisésnö, Aarónnö yöba̧lijetö: —Ju'wi jawa omukwatö tjotidokobö ja̧köbaduwa. Jobadönö weta ¡otidaduwi! jö̧ba̧lö.

⁵ ¡A̧ja̧kwaduwitjö! Babema bemi nijima Israel jojodöma tjö̧ba̧jekwachinobe yelösöda. Ba̧jekwadö otidadö tjuju̧kwobe. Ju'wi jawa omukwatö tjotidokobö ja̧köbaduwa — yöba̧lijetö faraónma Moisésnö, Aarónnö.

Faraón Israel jojodö tjotidobö ajayinö weinemitjö̧ o̧penönö tjotidobö weina jawa

⁶ Ja̧ möleda faraónma Israel jojodönö tjotidobö webadönö, iteda ömöayedönöbi, ja̧danö, Israel jojodö tjuluwedönöbi webijetö:

⁷ —Babema weköbaduwawö̧nö kwiyaduwoko isa'ye dȩtjina'yema blokekwö pjabatö tjotidobö, ajayi kwiyinaduwanöma. Idödada isa'ye e'dö isakwö tji̧'yo weköbaduwo.

⁸ Jo̧kwaijayonö belö bloke tjotidinadanö ka̧achökwökönö tjotido weköbaduwodönö. Jobadöma 'du̧welöjiawö̧, ökwödönö webi jojodö deobekwö dösödökwe Diosnö juwö iyö di̧'yo, jö̧ba̧lö, jwöbeba̧lö atjeba̧lobe.

⁹ Jo̧kwaobetjö̧ belö tjotidinemitjö̧ o̧penönö juluwanö tjotidobö weköbaduwodönö. Jejenö ba̧kwȩlö̧jatebö juluwanö tjotidobetjö̧ ¿dakwö tja̧ja̧kwobö tjömöledö omöna yötja̧li̧ma? Tja̧ja̧kwökena— webijetö faraónma Israel jojodönö webadönöma. Jejenö weawö̧

¹⁰ Israel jojodö tjö̧jobekwö 'ya̧nö yöba̧lijadötö tjotidobö webadöma, faraón ömöayedöbi, ja̧danö Israel jojodö tjuluwedöbi. Baikwö yöba̧wijadötö: —Farónma baikwö weatö: Babema diyokobe isa'yema ökwödönöma blokekwö pjabatö kwotidaduwobö, ajayinö diyinanöma.

¹¹ Jo̧kwaobetjö̧ ökwödöda isakwö kwi̧'yaduwobö jo̧be, isa'yema e'dö. Jo̧kwaijayonö belö kwotidinaduwadanö ka̧achökwökönö kwotidaduwobö jo̧be, ja'yubebi ka̧achökwökönö— yöbawijadötö.

¹² Jo̧kwaobetjö̧ Israel jojodöma okobe jwiinö Egiptonö isakwö isa'ye jwiinö woina'yeda e'dijadötö. Belö tjiyina'ye balewö jwiinö woina'yeda e'dö e'ewö ȩwa̧jijadötö, blokekwö pjabatö tjotidakwa̧'yema.

¹³ Webadöma ba̧kwȩlö̧jatebö labinö jwöbeba̧lö webijadötö, Okobe jwiinö kwotidawaduwa ji̧bökönö kwotidaduwo, isa'ye diyena kwotidinaduwadanö, jö̧ba̧lö.

¹⁴ Jejenö tjotidobö wetjijayonö waekwijadötö, isa'yebi tjiyokobetjö̧. Ja̧danö, wetji̧danö tjotidiököwö̧ Egipto jojodö webadöma Israel jojodö tjuluwedönö ö̧'i̧anö kwakwabijadötö, Kwömöledö weköbaduwawö̧ma ¿tajawedö tjotidokobe belö tjotidinadanöma? jö̧ba̧lo.

Faraón Israel jojodö jwötjeba̧li̧ a̧ja̧kwinökö jawa

¹⁵ Ikenama Israel jojodö tjuluwedöma faraón ö̧jobekwö 'ya̧nö jwöbeba̧lijadötö: —Duluwo̧ ¿tajawedö sulabenö ja̧köba ökwödönöma?

¹⁶ Babema isa'ye blokekwö pjabatö dotidobö tjiyököjayonö bloke kwotidaduwo, jö̧ba̧lö wetjobe kwömöayedöma. Ja̧danö, ¡ayö! ökwödönö kwakwaböbi kwakwatjobe. Jo̧kwaijayonö ökwödö jawamakö̧, kwömöayedö webadöda jawa, belö dotidinadanö dotidököma— jwötjeba̧lökwe:

¹⁷ —¡'Du̧wȩkwadöja! Ökwödöma 'du̧wȩlö̧jiawö̧ yöka̧laduwobe, ökwödönö weköbo Isabenö Jo̧nö juwö iyö di̧'yo, jö̧ba̧löma.

¹⁸ Tjo̧wi̧, kwotidaduwo da̧ja̧duwi. Isa'ye tjiyökönöbi kwotidaduwo ajayinö bloke kwotidinaduwadanö— weawö̧

¹⁹ Israel jojodö tjuluwedöma waisachibijadötö ¡ayö! isa'ye tjiyökötjö̧ma dotidökena faraón wei̧danö, jö̧ba̧lö.

²⁰ Ja̧danö, faraón ö̧jelö labebö Moisésnö, Aarónnö, te'ada̧lö ju̧kwadönö edijadötö.

²¹ Edö jö̧ba̧lijadötö Moisésnö, Aarónnö: —¡Sula! Isabenö Jo̧ma ökwödönö lȩebakwo̧, faraónnö sulabenö akeba̧laduwobe edö. Di̧'yobö weköbo, jö̧ba̧lö, akeba̧laduwiawö̧ babema faraónbi jo̧ba ömöayedöbi tjo̧'wo sulinö tjedobe ökwödönö, Israel jojodönöma, jwiinö omewadö, jö̧ba̧lö. Jo̧kwaobetjö̧ ¡ayö! dakwö tibatö lotjokoböma, jwiya, ökwödönö tibatö lotjobö tjomukwata babema— jöba̧lijadötö Israel jojodö tjuluwedöma, Moisésnö, Aarónnö.

Moisés Isabenö Jo̧nö labinö yöalina jawa

²² Ikenama Moisésma yemidanö Isabenö Jo̧nö abebö a̧ja̧kwö 'yi̧jetö, ¿tajawedö? jö̧ba̧lö. Jöba̧lijetö: — Isabenö Jo̧ ¿tajawedö sulabenö baledinö weköbobeda bidönöma? Ja̧danö ¿tajawedö weköbobeda ötjönöma baikwö ichö bidönö pjatatobö?

²³ Ökwö atebobö weköbina faraónnö atebaja̧ baikwöma jwiinö inia tjö̧tjinö baledinö weobe bidö kwömöledönöma. Ja̧danö, ja'yubebi tjö̧jibinö pjabatö̧kö̧ja— jöba̧lijetö Moisésma Isabenö Jo̧nöma.