Éxodo 40 - Dios Iwene

Isabenö Jo̧ eju junö tjotidina jawa

¹ Ikenama Isabenö Jo̧ma Moisésnö webijetö:

² —Moisés, jojodönö yökawo̧ ajayinö ja̧wo̧nö, ajayinö mölȩ baledena ötjö cheju inesö Seju, jobadökwö tjö̧'da̧denö chö̧jakweju, otidö kwujunaduwo.

³ Jeju okwa, inesö la'akasȩko̧nö inesösȩko̧nö isapjo kwujunaduwo, ötjö domulataja jawa wetina wȩyukwa öbiya a̧ja̧kwapjoma. Ja̧danö, ja̧pjo badeibö tjöekwado̧ kwö̧naduwo okwi'ijunö, japjo tjöekwa̧li̧nö.

⁴ Ja̧danö, mesasöte cheju okwa abönösȩko̧nö tebatö kwujunaduwo, jötenö wa̧ji̧kwö. Ja̧danö, dȩju̧wa'yu o̧'di̧ju̧ ja̧kabi jȩko̧nö tjujuno. Ja̧ka o̧'di̧ju̧ kwöwanaduwo ja̧ka öjabiya ji̧na bajale bakwöjakwena bakwa'do̧.

⁵ Ja̧danö söinö 'dö̧ekwa'be tjujuwakwa̧pjo, orotjö otikwapjo kwujunaduwo tjöekwado̧ badeibö, ötjö domulataja jawa wetina wȩyukwa öbiya a̧ja̧kwapjo tjöekwado̧ badeiböma.

⁶ Ja̧danö, juwö iyawapjo kwujunaduwo a̧petube, cheju teachakwawemi badeibö, ödökwönönö.

⁷ Ja̧danö, japjotjö, cheju teachakwawemi apjudetjö 'da̧denö kwujunaduwo dichawakwa̧'doma. Junajadöma ja'donö ojwiyo kwotochaduwo.

⁸ Jemi ikenama, a̧petu tjöekwa̧linö o'wiju a̧kwa̧li̧nö kwönaduwo okwi'ijunö okobe jwiinö cheju a̧petube. Ja̧danö, a̧petu teachakwawemi apjude baibanö o'wijuma akwa̧li̧nö kwönaduwo okwi'ijunö.

⁹ Ikenama tjoekwa o̧tesobuma emibö sa̧sa̧köbaduwo chejubi, ja̧danö okobe jwiinö cheju okwa ju̧kwi̧nöbi. Jejenö, jeju, jeju okwa ju̧kwi̧, Isabenö Jo̧ 'da̧batö ujunina ji̧ma, jö̧ba̧lö, kwi̧sebaduwakobe.

¹⁰ Ja̧danö, ötjönö kwiyaduwawö̧nö juwö iyawapjonöbi, ja̧danö okobe jwiinö juwö iyawa otikwa ju̧kwi̧bi tjoekwa o̧tesobu sa̧sa̧köbaduwo. Jejenö ja̧pjo, ja̧pjo otikwa ju̧kwi̧, Isabenö Jo̧ 'da̧batö ujunina ji̧ma, jö̧ba̧lö, kwi̧sebaduwakobe.

¹¹ Ja̧danö, dichawa'dobi, ja'do la'aka a'obi ja̧ o̧tesobunö sa̧sa̧köbaduwo. Jejenö, ja'do, ja'do a'o Isabenö Jo̧ 'da̧batö ujunina ji̧ma, jö̧ba̧lö, kwi̧sebaduwakobe.

¹² Ikenama, Aarónnö, Aarón i̧tji̧mu̧nö öbibö kwe'ewaduwo cheju apetube. Jobetjö̧ jobadönö kwidichaduwo, ojwiyonö.

¹³ Ja̧danö, Aarónnö 'dukato jwiinö inesö ji̧ 'duawa̧do̧nö. 'Dukatajökwenö uunö o̧tesobu tobebö kwi̧sebo, bitema Isabenö Jo̧ 'da̧batö ujuninökwe iteda wei̧ a̧ja̧kwobö, jö̧ba̧lö. Jejenö ötjötjö jojodötjö dö'da̧denö pjabato̧ baibanö otidakobe Aarónma, ötjö weti̧ a̧ja̧kwö.

¹⁴ Jemi ikenama i̧tji̧mu̧nö jwököbo, jobadönö 'dukatobö. Jobadönö bakwo̧nökwena kamisi ödöa̧do̧ inesö ji̧ kamisima 'dukato.

¹⁵ Ja̧danö, jobadönöbi tjuunö o̧tesobunö tokebo, tjabe'do uunö tokebaja̧danö. Jejenöma ötjötjö jojodötjö dö̧'da̧denö pjabatadö batjibanö tjotidakwedö, ötjö weti̧danö a̧jakwö otidö. Ja̧danö, ja̧ mölȩtjö tupakwö ba̧kwȩlö̧jatebö jobadötjö tupadanö jojodönöbi, bakwainö totjebakwawö̧ batjibanö tjö̧jakwedö, ötjötjö jojodötjö dö'da̧denö pjabatadö batjibanö.

¹⁶ Ja̧danö, Moisésma okobe jwiinö Isabenö Jo̧ wei̧danö a̧ja̧kwinobe.

¹⁷ O̧ba döbölataja baledajena, ajayinö ja̧wo̧nö, ajayinö mölȩ baibenama Isabenö Jo̧ eju, inesösejuma otidö junijadötö.

¹⁸ Moisés weajawö̧ma, Isabenö Jo̧ Moisésnö weinadanö, otidö junijadötö Isabenö Jo̧ jojodö tjö'da̧denö ö̧jakwejuma. La'aka pjaeba̧li̧ o'iju lödijadötö. Ja̧danö, ötebiyabi, okwi'ijubi junijadötö.

¹⁹ Ja̧danö, muchekwa o'wijubi, muchekwa i̧sȩdijubi mucheBijadötö Isabenö Jo̧ eju mönö, Isabenö Jo̧ Moisésnö tjumuchebobö weinadanö.

²⁰ Ja̧danö öbiya döbölataja öbiya, Isabenö Jo̧ domulataja jawa weina wȩyukwa öbiya isapjonö anijadötö. Ja̧danö, ö̧'i̧a̧bi yubebijadötö ja̧pjo o̧ki̧ju̧nö, japjo tje'ewakobetjö̧. Ja̧danö, muchekwapi̧bi muchebijadötö.

²¹ Jemi ikenama japjo Isabenö Jo̧ eju okwa e'ewö junijadötö. Ikenama japjo badeibö tjöekwado̧ debatö nönijadötö, japjo tjöeba̧linö, Isabenö Jo̧ Moisésnö weinadanö.

²² Jemi ikenama mesasöte Isabenö Jo̧ eju abönösȩko̧nö tebatö junijadötö, tjöwaisobekwöchobe, tjöekwa'wo badeibö.

²³ Ja̧danö, Isabenö Jo̧ öbajale a'otjö jötenö wanijadötö pan, Isabenö Jo̧nö iyawa panma, Isabenö Jo̧ Moisésnö weinadanö.

²⁴ Ja̧danö, dȩju̧wa'yu o̧'di̧ju̧ ja̧ka jeju okwa, tebatö abönösȩko̧nö junijadötö, jeju okwa wajwiobekwöchobekwö junö.

²⁵ Ja̧danö, Isabenö Jo̧ öbajale a'otjö ja̧ka o̧'di̧ju̧ma wanijadötö, ja̧ka öjabiyadanö ji̧nö bajale, bakwöjakwena bajale bakwa'do̧, Isabenö Jo̧ Moisés weinadanö.

²⁶ Ja̧danö, söinö 'dö̧ekwa'be juwawapjo tebatö junijadötö jeju okwa, abönösȩko̧, la'akasȩko̧nö, okwasȩko̧, inesö la'akasȩko̧ tjöekwa'wo badeibö.

²⁷ Jemi ikenama ja̧pjo wame Moisésma söinö 'dö̧ekwasa'bema wanö juwijetö, Isabenö Jo̧ weinadanö.

²⁸ Jemi ikenama debatö nönijetö tjöekwa'wo, Isabenö Jo̧ eju teachakwawemi tjöekwa'woma.

²⁹ Ja̧danö, jeju teachakwawemi badeibö a̧petube junijadötö juwö iyawapjo, tjiyajawö̧tjö okobe jwiinö tjujuwobö weinawö̧nö kabebö wanö tjujuwapjoma. Japjonö wanö juwijadötö Isabenö Jo̧nö tjiyajawö̧nö. Ja̧danö, ju'wi jawabi trigobi iyö juwijadötö ja̧pjonö. Isabenö Jo̧ Moisésnö juwö tjiyobö weinadanö juwö iyijadötö.

³⁰ Ja̧danö, dichawa'do junijadötö juwö iyawapjotjö eju teachakwemitjö 'da̧denö. Ja'donö ojwiyo wabö tochawijadötö, tjidichakwa̧ ojwiyo.

³¹ Ja̧ ojwiyotjö dichawiabijadötö Moisés, Aarón, Aarón i̧tji̧mu̧ idöda tjömamiju, tjömasapiya

³² Isabenö Jo̧ eju tetjachakwa̧ abönöbi, ja̧danö juwö iyawapjo tjujuwobö tjichakwa̧ abönöbi. Isabenö Jo̧ Moisésnö weinadanö dichawijadötö.

³³ Ja̧danö, jeju a̧petube tjöbebijadötö, jejubi, jeju a̧petubi, juwö iyawapjo jemi. Ja̧danö, a̧petu teachakwawemi apjudedanö o'wiju debatö nönijadötö o'kwijunö. Jejenö Moisésma otidö kabatijetö.

³⁴ Ikenama, ojwiyo'wo ja'da'daa'wo Isabenö Jo̧ ejunö jwibachö wame 'duwachibijetö. Ja̧danö, Isabenö Jo̧ salöinö dejatö i̧sekwi̧ma jeju okwa, okobe jwiinöda salöijetö.

³⁵ Ja̧danö, Moisésma jeju teachoböma jwiijetö ja'wo ojwiyo'wo ejunö jwiachenama, Isabenö Jo̧ saloinö jwiinö dejatö i̧sekwobetjö̧.

³⁶ Ja̧danö, Israel jojodö okobe jwiinö tji̧'yobema ja'wo jejutjö kaekwajenada tupakwö 'yi̧jadötö.

³⁷ Jo̧kwaijayonön ja'woma jejunö jwibachö lö̧jena 'yi̧jöködötö, ojwiyo'wo kaekwajenanö kabatö.

³⁸ Okobe jwiinö tji̧'yobema ja'wo ojwiyo'wo, Isabenö Jo̧ ö̧ji̧ wanekwacha'woma Isabenö Jo̧ eju jwibachö li̧a̧bijetö mölȩma, Ja̧danö, yö̧tema ökwöla ubidanö ubiabijetö ja'wo okwama, okobe deinö Israel jojodöma ja'wonö tjedakobetjö̧, Isabenö Jo̧ jobadökwö ö̧ji̧ wanekwacha'woma.