Éxodo 39 - Dios Iwene

Diostjö jojodötjö tjö'da̧denö pjabatadö 'dutjawa o̧diju tjotidina jawa

¹ Bezaleel, Aholiab, ju'wedö 'dö̧bijadötö jwiinö otiwi̧ jawa 'duawakwa̧, Diostjö jojodötjö tjö'da̧denö la'aka pjabato̧ 'duawakwa̧ o̧di̧ju̧ma. Ja̧ o̧di̧ju̧ma Isabenö Jo̧ eju okwa teachakwo̧ 'dubawö o̧di̧ju̧, Isabenö Jo̧ weina otidö. Ja̧ 'duawakwa̧di̧ju̧ma i̧sa̧do̧tjö 'dö̧bijadötö, ö̧'dö̧wi̧ opjiyakwö, duwayuwi̧ o̧pjiyakwö, duwi̧ opjiyakwö luledö tjiti̧laja̧di̧ju̧tjö. Ja̧danö, Aarón 'duawakwa̧di̧ju̧ma Isabenö Jo̧ Moisésnö 'dö̧tjobö weinadanö 'dö̧bijadötö.

² Ja̧danö, 'duawakwa̧do̧ ja'önönö la̧do̧ma o'wijutjö 'dö̧bijadötö, ju'wi opjiya ju'wi opjiyabi luledö jwiinö otiwanö ti̧lawado̧. Orotjö otikwa opjiya, ö̧'dö̧wi̧ opjiya, duwayuwi̧ opjiya, duwi̧ opjiya, ja̧danö jwiinö otiwa jawa lino mikwi̧tjö otikwa opjiya luledö ti̧lawa o'wijutjö 'dö̧bijadötö.

³ Ja̧danö, orotjö otikwapjiyama orotjö 'dobö jalinö sedachibö 'wibijadötö öpjiya. Ja̧ orotjö otikwapjiyama tilawa waiso̧ma otiwanö tilijetö ö̧'dö̧i̧pjiyakwö, duwayuwapjiyakwö, duwapjiyakwö, ja̧danö jwiinö otiwa jawa linotjö otikwapjiyakwö.

⁴ Ja̧danö, ja̧do̧ a̧kwa̧ka̧linö la̧kwa̧do̧ 'dö̧bijadötö abuekwöchobebi o̧ma̧'a̧pekwöchobebi bakwainö ji̧nö.

⁵ Ja̧danö, di̧atakwawado̧ma otiwanö 'dö̧bijadötö 'döawa jwiinö waisadöma, ja'önönö la̧do̧ ö̧dö̧lö̧'a̧ bakwachakwadanö pjöa̧linö di̧atakwawado̧. Bakwainö opjiyatjö jwiinö otiwanö ti̧lijadötö, orotjö otikwa opjiyakwö, ö̧'dö̧wi̧pjiyakwö, duwayuwapjiyakwö, duwapjiyakwö, ja̧danö jwiinö otiwa jawa lino mikwi̧tjö otikwapjiyakwö luledö. Isabenö Jo̧ Moisésnö 'dö̧tjobö weinadanö 'döbijadötö ja̧do̧ di̧atakwawado̧ma.

⁶ Ja̧danö, inawiya onice mikwi̧ öwiya, döwölataja oledö otidijadötö. Tjoledaja jawa öwi̧yanö 'dȩbö wȩyudijetö, 'dȩbö wȩyukwa waiso̧ma, bakwawakwena Israel i̧tji̧mu̧, a̧li̧nösamutjö̧ duju̧tajanö tjimibiyama. Jemi ikenama bakwawakwena orotjö otikwa öte öpöchijetö.

⁷ Ikenama ja'önönö la̧do̧ öböbe'onö nönijetö inawiyama bakwachakwadanö. Jejenö Aarónma Israel i̧tji̧mu̧ tjimibiya, Israel jojodö a̧li̧nösamutjö dosolatajabedönö wanekwachi̧ imibiyama ba̧kwȩlö̧jatebö öwanalakobe öböbe'onö. Jejenö Aarónma, Isabenö Jo̧ eju teachena Isabenö Jo̧ma omukwatakobe Israel jojodönö.

⁸ Ja̧danö, Diostjö jojodötjö la'aka pjabato̧ 'duawakwa̧do̧, omukosa̧do̧ma ja'önönö la̧do̧danö otiwanö 'dö̧bijadötö. Ja̧danö, orotjö otikwapjiya, ö̧'dö̧i̧pjiyakwö, duwayuwapjiyakwö, duwapjiyakwö, jwiinö otiwi̧ jawa linotjö otikwapjiyakwö luledö tilawado̧tjö otiwanö 'dö̧bijadötö.

⁹ Ja̧do̧ma melekwö 'duawado̧, veintidós centímetros wayobekwö, ja̧danö bakwainö veintidós centímetros jakwölakwobekwö baibanö isa̧do̧ imelena.

¹⁰ Ja̧danö, ja̧do̧nö pjöbebö nönijetö inawiyama, ö'wejemu jawa isamanö, bakwamakwena wa̧pöwakwa inawiyama. Abönö isama inawiyama biwa: Sárdica, topacio, carubunclo inawiyama.

¹¹ Jadanö, ja̧matjö nijakwöchobe isama inawiyama biwa: esmeralda, zafiro, diamonte inawiyama.

¹² Ja̧danö ja̧matjö nijakwöchobe isama inawiyama biwa: jacinto, ágata, amatista inawiyama.

¹³ Ja̧danö, ja̧matjö nijakwöchobe isama inawiyama biwa: berilo, ónice, jaspe inawiyama. Ja̧danö, bakwawakwena orotjö otikwa öte öpöchijetö.

¹⁴ Ja̧danö, a̧li̧nösamutjö̧ döwölatajanö inawiya bakwawakwenanö 'dȩbö wȩyukwa waiso̧ma Jacob i̧tji̧mu̧tjö̧ bakwo̧ imi 'dȩbö wȩyudijetö, seyu 'dȩbö wȩyukwadanö, a̧li̧nösamutjö dujutaja jojodö tjimibiyama. Ja̧danö, Jejenö Israel jojodö, a̧li̧nösamutjö dosolatajabedöma wanekwachakobe.

¹⁵ Ja̧danö, la'aka pjabato̧ ö̧ka̧mi̧ji̧do̧ ja'önönö la̧do̧ma omukosado̧kwö dötewanö akwatakobetjö̧ lawo opjiya orotjö otidijadötö dopjolataja, bakwopjakwena wiawa opjiyama, .

¹⁶ Ja̧danö, orotjö ötebiya dadijadötö dötelatajanö, ja'önönö la̧do̧ öböbe'onö öpöchakobetjö̧. Ja̧danö, o̧ki̧ju̧bi do̧ko̧lataja orotjö dadijadötö, la'aka pjabato̧ omukosa̧do̧ 'do̧'do̧kwetenia 'dö̧tjobö.

¹⁷ Ja̧danö, lawo opjiya bajalenö o̧ki̧ju̧nö akwatijadötö omukosa̧do̧ 'do̧'do̧kwetenia 'dö̧tjaja̧ o̧ki̧ju̧nö.

¹⁸ Ja̧danö, ja̧ opjiya möakwö la'aka pjabato̧ ka̧mi̧ji̧do̧ ja'önönö la̧do̧ öböbe'onö orotjö otikwa ötebiyanö akwa̧linö dadijadötö. Jejenö omukosado̧kwö teebesado̧kwö dötewinö ji̧jetö.

¹⁹ Ja̧danö, ju'wi o̧ki̧ju do̧ko̧lataja orotjö dadijadötö. Ikenama, ja̧ o̧ki̧ju̧ma omukosa̧do̧ okwakwöchobe la'aka 'do̧'do̧kwetenia dötewinö 'dö̧bijadöto.

²⁰ Ja̧danö, ju'wi o̧'ki̧ju̧ dokolataja orotjö dadijadötö. Ikenama ja̧ o̧ki̧ju̧ma ja'önönö la̧do̧ abuekwöchobe la'akanö 'dö̧bijadötö, di̧atakwawado̧ möakwö.

²¹ Ikenama, ö'dö̧wi̧ opjiyanö omukosa̧do̧ o̧ki̧ju̧nö teebesa̧do̧ o̧ki̧ju̧kwö di̧batijadötö. Jejenö omukosa̧do̧ teebesa̧do̧kwö dötewanö li̧jetö, di̧atakwawado̧ möakwö. Jejenö otidijadötö, Isabenö Jo̧ Moisés tjotidobö weinadanö.

²² Ja̧danö, 'dö̧bijadötö la'aka pjabato̧ 'duawakwa̧do̧, möakwönönö la̧do̧ma okobe jwiinö ö'dö̧wi̧sado̧tjö 'dö̧bijadötö,

²³ Ja̧do̧ma aa ji̧nö 'dö̧bijadötö, aa ö'öbinö 'dö̧bö kȩ'achajö̧kakobetjö̧.

²⁴ Ja̧danö, towinö wa̧ji̧ granada mikwi̧ opobiyadanö ichejekwi̧nö 'dö̧bijadötö opjiyatjö, ö̧'dö̧wi̧, duwayuwi̧, duwi̧ opjiyakwö luledö. Ja̧ opobiyadanö ichejekwinö ji̧ma kamijido̧ oto'obe nönabijadötö.

^25-26 Ja̧danö, ja̧ opobiya 'da̧denö ka̧pa̧na o'di̧ju̧, pjei̧ orotjö otikwa o̧'di̧ju̧ nönabijadötö, opo 'da̧denö, Isabenö Jo̧ weina otidö teachena 'duawakwado̧nö. Jejenö otidijadötö, Isabenö Jo̧ Moisés tjotidobö weinadanö.

²⁷ Ja̧danö, Aarón, Aarón i̧tji̧mu̧ ömadö 'dutjawakwa̧do̧bi 'dö̧bijadötö, ödöado̧ma. Ja̧do̧ma jwiinö otiwi̧ jawa lino opjiyatjö tjiti̧lajado̧tjö 'dö̧bijadötö. Ja̧danö, ubutjawa'wobi, jwiinö otiwi̧ jawa lino opjiyatjö tji̧ti̧lajadötjö 'dö̧bijadötö.

²⁸ Ja̧danö, tjubutjawa'wobi, tja̧di̧ju̧bi jwiinö otiwi̧ tji̧ti̧la̧ja̧do̧tjö 'dö̧nijadötö, lino opjiyatjö tji̧ti̧laja̧do̧tjöma.

²⁹ Ja̧danö, di̧atakwawado̧bi otiwi̧ jawa lino opjiyatjö, ö̧'dö̧i̧pjiyakwö, duwayuwapjiyakwö, duwapjiyakwö luledö tji̧ti̧lajado̧tjö 'dö̧bijadötö. Ja̧do̧ di̧atakwawado̧nö, 'dö̧awa waisoma otiwi̧ jawa ju'wi jawabi ju'wi jawabi 'dö̧bijetö. Jejenö 'dö̧bijadötö Isabenö Jo̧ Moisésnö 'dö̧tjobö weinadanö.

³⁰ Ja̧danö, bakwai̧ orotjö 'dobö otidijadötö ö̧sö̧pö̧. Ja̧danö, 'dȩbö wȩyukwa waiso̧ma jö̧pö̧nö 'dȩbö wȩyudijetö, seyu wȩyukwadanö baikwö: Isabenö Jo̧ wei̧danö cha̧ja̧kwobö 'da̧batö junawo̧sa, jö̧ba̧lö.

³¹ Jö̧pö̧ma la'aka pjabato̧ uunö ubutjawado̧ ö'öbönö di̧atakwawijetö isa'bo ö̧'dö̧wa'bonö, Isabenö Jo̧ Moisésnö tjotidobö weinadanö.

³² Jejenö Israel jojodöma idöda tjotidawatjö okobe jwiinö kabatakwawijadötö, Isabenö Jo̧ inesöeju, jobadökwö tjö̧'da̧denö ö̧jakweju otikwa jawama. Okobe jwiinö Isabenö Jo̧ Moisésnö iteda eju tjotidobö weinadanö otidijadötö Israel jojodöma.

³³ Ja̧danö, eju otikwa jawa okobe jwiinö ji̧ma, o'wiju, ja̧danö ju'wi jawa, ju'wi jawabi, ö̧ki̧ya, ötebiya, ö'diya, okwi'iju, ja̧danö la'aka pjaeba̧li̧ o'iju ichejebijadötö.

³⁴ Ja̧danö, ichejebijadötö eju muchekwa o'wiju, muchekwa isȩdi̧ju̧, o̧bȩja̧dö ömadö i̧sȩdi̧ju, 'duwi̧ baibanö bu̧datinaja̧di̧ju̧ma, ja̧danö jwai balawa okwa ju̧kwadö tji̧sȩdi̧ju̧bi. Ja̧danö, ichejebijadötö tjöekwado̧, la'akasȩko̧tjö inesö la'akasȩko̧tjö tjöekwado̧ma.

³⁵ Ja̧danö, isapjo, Isabenö Jo̧ domulataja jawa weawa wȩyu̧kwa öbiya a̧ja̧kwapjo, ja̧danö, ja̧pjo e'ewakwawa ö'i̧ya̧, ja̧danö japjo muchekwapi̧ ichejebijadötö.

³⁶ Ja̧danö, pan wanawöte mesasötema, jöte e'ewakwawö'i̧ya̧ , ja̧danö, okobe jwiinö mesasöte lödawa dȩja̧pi̧ya̧bi, deja̧'di̧ju̧bi ju'wi jawabi ichejebijadötö. Ja̧danö, inesö ji̧ pan, Isabenö Jo̧nö iyawa pan ichejebijadötö.

³⁷ Ja̧danö, dȩju̧wa'yu o̧'di̧ju̧ ja̧ka, bakwai̧ orotjö tjotidinaka, ja̧ka o̧tesobu a̧ja̧sa̧'do̧, okobe jwiinö ja̧ka otikwa jawa, okobe jwiinö 'dö̧tedakwawa o̧tesobu ichejebijadötö.

³⁸ Ja̧danö, isapjo söinö 'dö̧ekwa'be juwawapjo ichejebijadötö. Ja̧danö, o̧tesobu, Diostjö jojodötjö tjö'da̧denö pjabatadönö tjuunö tjotjebakwobu, ja̧danö, söinö 'dö̧ekwa'be juwawa'be ichejebijadötö. Ja̧danö, jeju teachakwawemi tjöekwado̧ ichejebijadötö.

³⁹ Ja̧danö, juwö iyawapjo, broncetjö otikwapjo, Isabenö Jo̧ eju apetunö junawapjo ichejebijadötö. Japjo okwa ja'önö pjaeba̧laka broncetjö tjotidinaka ichejebijadötö. Ja̧danö japjo e'ewakwawa ö'iyabi ichejebijadötö. Ja̧danö, okobe jwiinö japjo wame juwawa tjotidakwa̧ jawabi ichejebijadötö, balde'diju, ja̧danö, palapibiya, ja̧danö ö̧ki̧ya̧. Ja̧danö, dichawa'do, ja̧'do la'aka sa'o ichejebijadötö.

⁴⁰ Ja̧danö, eju apetu okwi'iju tjujunaduwakwa̧ o'iju ichejebijadötö, ja̧danö la'aka pjaeba̧li̧ o'ijubi. Ja̧danö, a̧petu tjujunaduwaka̧ okwi'ijunö tjö̧naduwakwa̧ o'wijubi, ja̧danö a̧petu teachakwawemi apjude tjö̧naduwakwa̧ o'wijubi ichejebijadötö. Ja̧danö, bö'ödakwawa ö̧'i̧ya̧, ja̧ ö̧'i̧ya̧ bajale di̧tjatakwa̧ a̧la̧chi'bo ichejebijadötö. Ja̧danö, ichejebijadötö okobe jwiinö jeju a̧petu ji̧ma, jeju okwa ji̧ma, Isabenö Jo̧nö omukwatö tjösödakwa̧, jojodö tjö̧'da̧denö ö̧jakweju ji̧ma.

⁴¹ Ja̧danö, Aarón, Aarón itji̧mu ömadö 'dutjawakwa̧ o̧di̧ju̧ ichejebijadötö, otiwanö 'dö̧tjaja̧di̧ju̧, wainö ji̧ o̧di̧ju̧ma. Ja̧diju 'dubawajadöma, Aarón, Aarón i̧tji̧mu̧ Isabenö Jo̧ eju, inesö ejunö tjetjachakwedö, Isabenö Jo̧ wei̧ tjotidobö.

⁴² Jadanö, Isabenö Jo̧ Moisés tjotidobö weinadanö otidijadötö Israel jojodöma, okobe jwiinö otiwanö.

⁴³ Moisésma edemi, okobe jwiinö otiwanö kwotidaduwajabe, jö̧ba̧lö, jobadönö ösödö, Isabenö Jo̧nö abebijetö, bidönö otiwanö edö pjakatodönö, jö̧ba̧lö.