Éxodo 38 - Dios Iwene

Isabenö Jo̧nö juwö iyawapjo tjotidina jawa

¹ Ja̧danö, Bezaleelma Isabenö Jo̧nö iyawawö̧nö juwö iyawapjo otidijetö acacia towi ötebi̧ya̧tjö. Japjoma wayobekwöbi jakwölakwöbi bakwainö dos metros y veinticinco centímetros, ja̧danö, möakwöchobema un metro y veinticinco centímetros.

² Ja̧danö, japjo 'do̧'do̧kwetenia ö'wejemu jawa i'yekiya ji̧nö dadijetö, juwö iyawapjotjö dötewanö. Ikenama, okobe jwiinö juwö iyawapjoma broncesapitjö pöbebijetö.

³ Ja̧danö, ju'wi jawa broncetjö 'dobö otidijetö, balde'diju, palapibiya, ja̧danö deja'di̧ju̧, ja̧danö, ja̧danö ö̧ki̧ya̧, ja̧danö dȩja̧pi̧ya. Okobe jwiinö broncetjö 'dobö otidijetö.

⁴ Ja̧danö, isaka, ja'önö pjaeba̧laka wa̧na̧linö otidijetö juwö iyawapjo okwa tjanakwa̧ka.

⁵ Ja̧danö, isapjo 'do̧'do̧kwetenia o̧ki̧ju̧ 'diinö li̧nö dadijetö, isapjo tje'ewobö.

⁶ Ja̧danö, ö̧'i̧ya dö'ölataja löbijetö, juwö iyawapjo e'ewakwawa ö̧'i̧ya̧. Ja̧ ö̧'i̧ya̧ma acacia towitjö löbajadö, broncesapitjö 'bo̧datijetö.

⁷ Ja̧ ö̧'i̧ya̧ bakwö̧'a̧kwena o̧ki̧ju̧nö bakwachakwadanö yutebijetö, juwö iyawapjo tje'ewakobetjö̧.

Dichawa'do broncetjö otikwa'do Betzaleel otidina jawa

⁸ Ja̧danö, ya̧dötjö ju'wedö, Isabenö Jo̧ eju teachakwawemi ja̧nö pjabatadöma iyijadötö idöda tjitea tjöba ediakwawöte, broncetjö otikwötema. Ja̧ broncetjö otidijetö Bezaleelma dichawa'do, ja̧danö, ja'do la'aka pjaeba̧la'o isa'obi.

Isabenö Jo̧ eju a̧petu tjotidina jawa

^9-11 Ja̧danö, Isabenö Jo̧ eju apetu tjöekwakwa̧ o'wiju ti̧lijadötö. Ja̧ o'wijuma jwiinö otiwi̧ jawa, lino mikwi̧ opjiyatjö ti̧lijadötö. Ja̧danö, eju a̧petu bakwachakwadanö cuarenta y cinco metros wayobekwö ja̧ o'wiju debatö nönijadötö okwi'ijunö. Ja̧danö wayobekwöma bakwachakwadanö okwi'iju veinte jawa junijadötö. Bakwa'okwena tjujunemi la'aka pjaeba̧li̧ o'iju lödijadötö, broncetjö otikwa o'iju. Ja̧danö, okwi'iju bajalenö ö̧ki̧ya̧ 'diinö dadijadötö, platatjö otikwa ö̧ki̧ya̧ma. Ja̧ ö̧ki̧ya̧nö o'wiju akwata̧lö bö'ödanö debatö nönijadötö. Ja̧danö, bakwa'okwena bajalenö ö'diya platatjö 'bo̧datö dadijetö. Ja̧danö, bakwa'otjö jamatö 'diinö dötewinö, okobe jwiinö okwi'ijunö dadijetö ö'diyama okobe jwiinö okwi'ijunö 'diinö jo̧bö.

¹² Ja̧danö, eju o̧pekwöchobe, ja̧wo̧ meajobekwöchobekwö tjöekwakwa̧ okwi'iju junawemi ja̧kwölakwöma veintidós metros y medio ji̧jetö. Jobetjö domulataja jawa okwi'iju junijadötö. Bakwa'okwena tjujunakwena la'aka pjaeba̧li̧ o'iju broncetjö otikwa o'ijuma lödijadötö. Ja̧danö, ja̧ la'aka pjaeba̧li̧ o'ijunö okwi'ijuma 'di'yö junijadötö, 'diinö junakwa̧linö. Ja̧danö, okwi'iju bajalenö ö̧ki̧ya̧ platatjö otikwa ö̧ki̧ya̧ma dadijadötö. Ja̧danö, ö'di̧ya̧bi platatjö tjo̧'bo̧dataja̧ ö̧'di̧ya̧ma okwi'iju bajalenö dadijadötö.

¹³ Ja̧danö bakwainö, eju apjudekwöchobe, ja̧wo̧ laebobekwöchobekwö tjöekwakwa̧ ja̧kwölakwöma, veintidós metros y medio ji̧jetö.

^14-15 Ja̧danö, ja̧wo̧ laebobekwöchobe tjöekwakwa̧ma, eju apetu teachakwawemima baikwö otidijadötö: Apjudetjö tjöwaisobekwö siete metros, ja̧danö apudetjö wajwitjobekwö siete metros ji̧jetö. Ja̧danö, apjudetjö tjöwaisobekwö okwi'iju wa̧pö'okwa, ja̧danö apudetjö wajwitjobekwö wa̧pö'okwa junijadötö. Ja̧danö, bakwa'okwena tjujunakwena la'aka pjaeba̧li̧ o'iju broncetjö otikwa o'ijuma lödijadötö, wa̧pö'okwa, okwi'okwena 'di'yö tjujunobö. Ja̧danö, ti̧lawa o'wiju jwiinö otiwi̧ jawa o'wiju okwi'ijunö debatö nönijadötö, eju apetu tjöekwakwa̧ma.

¹⁶ Okobe jwiinö tjöekwadiju̧ma jwiinö otiwi̧ jawa, lino mikwi̧ opjiyatjö ti̧lijadötö.

¹⁷ Ja̧danö, bakwa'okwena tjujunakwena la'aka pjaeba̧li̧ o'iju broncetjö otikwa o'ijuma lödijadötö. Ja̧danö, ö̧ki̧ya̧ma platatjö dadijadötö, ja̧danö, ö'di̧ya̧bi platatjö 'bo̧datijadötö. Ja̧danö, okwi'iju bajalebi platatjö dadijadötö. Ja̧danö, okobe jwiinö okwi'iju, bakwa'otjö jamatö 'diinö dötewinö ö'di̧ya̧ platatjö tjo'bo̧daja̧ jawa ö'di̧ya̧ dadijadötö okobe jwiinö okwi'ijunö 'diinö do̧alobö.

¹⁸ Ja̧danö, eju apetu tjeachakwawemi ti̧lawa'wo okwi'ijunö debatö nönijadötö. Ja̧'woma jwiinö otiwa'wo, lino mikwi̧tjö ti̧lawa opjiya, ö̧'dö̧wi̧, ö̧'dö̧yuwi̧, duwi̧ luledö dölawa opjiyatjö ti̧lawa'wo. Ja̧danö, ju'wi jawa ju'wi jawabi 'dö̧awa waiso̧ma jwiinö otiwi̧ jawa ja'wonö 'dö̧bijetö. Ja̧'wo wayobekwöma nueve metros, ja̧danö möakwöma dos metros tupakwö treinta centímetros, ju'wi o'wo̧ ji̧danö, apetu tjöekwa'wijudanöma.

¹⁹ Ja̧danö, apjudema okwi'iju ö'wejemu jawa o'onö junijadötö, bakwa'okwena la'aka pjaeba̧li̧ o'iju broncetjö otikwa o'ijunö 'di'yö. Ja̧danö, okwi'iju bajalema platatjö 'bo̧datö otidijadötö. Ja̧danö, akwatakwa ö̧ki̧ya̧bi platatjö dadö otidijadötö. Ja̧danö, ö'diya platatjö 'bo̧datö ö'di̧yama bakwa'otjö jamatö 'diinö dötewinö, okobe jwiinö okwi'ijunö dadijetö ö'diyama okobe jwiinö okwi'ijunö 'diinö jo̧bö.

²⁰ Ja̧danö, okobe jwiinö 'bö'ödakwawa ö̧'i̧ya̧ma broncetjö otidijadötö.

Moisés Levísaso ju̧kwadönö weina wene, Isabenö Jo̧ eju otikwa jawa ba̧ja̧dö tjujunobö

^21-23 Ja̧danö, Moisésma webijetö Levisaso ju̧kwadönö okobe jwiinö Isabenö Jo̧ eju otikwa jawa, dokwa nöinö tjujuna̧lobö, jö̧ba̧lö ba̧ja̧dö tjiwȩyudobö. Ja̧danö, jobadötjö Aarón itji̧ Ithamarnö ba̧ja̧dadö tjuluwo̧ baibanö junijetö Moisésma. Ja̧danö, Bezaleelma, Urí itji̧, Hur ö̧'dö̧, Judásaso jojoma okobe jwiinö Isabenö Jo̧ Moisésnö tjotidobö weinadanö otidijetö. Ja̧danö, jo̧ba Bezaleelkwö jelo̧, Aholiab mikwo̧, Ahisamac itji̧, Dansaso jojoma otidijetö. Jo̧bama otiwi̧ jawa otikwa waiso̧, otidakwa̧ ajayinö omukwatö junö. Ja̧danö, 'dii jawanö 'dȩbö wȩyukwabi waiso̧. Ja̧danö, ti̧lawabi waiso̧, ja̧danö o'wiju 'dö̧awabi waiso̧ jo̧ba Aholiabma. Jo̧bama jwiinö otiwi̧ jawa o'wijunö, lino opjiyatjö tjiti̧lina o'wijunö o'wijunö ju'wi ju'wibi otiwi̧ jawa 'dö̧bijetö, o̧pji̧ya̧ ö̧'dö̧wi̧tjö, duwayuwi̧tjö, duwi̧tjö.

²⁴ Ja̧danö, okobe jwiinö oro tjiyinama, Isabenö Jo̧ eju otikwa oroma mil kilos ömökijetö, ja̧ mölȩ tjö̧najitjadanö ba̧ja̧dö. Ju'wi jawabi, ju'wi jawa ja̧ tjiyina orotjö otidijadötö Isabenö Jo̧ eju otikwama.

²⁵ Ja̧danö, plata tjiyinama tres mil cuatro ciento kilos ömökijetö ja̧ mölȩ tjö̧najitjadanö ba̧ja̧dö

²⁶ Ja̧danö, tji̧mi̧biya wȩyukwa mölȩ tjiwȩyudinawö̧ma, ömadö veinte años juna̧ladötjö jemitupakwöbedönöma seiscientos tres mil quinientos cincuentanö ba̧ja̧dijadötö. Ja̧danö, ja̧ mölȩ tjimidobö atjebiatjinadanö abebijadötö jobadönöma plata medio grama jenanö tjimidobö, bakwo̧nökwena.

²⁷ Ja̧danö, Bezaleelma la'aka pjaeba̧li̧ o'iju platatjö otikwa jawa o'iju ciennö otidijetö tres mil trescientos kilos platatjö. Ja̧ o'ijuma Isabenö Jo̧ ejubi, ja̧danö eju okwa inesö la'akasȩko̧ tjöekwado̧ debatö tjönawinemibi lödijadötö.

²⁸ Ja̧danö, la'aka pjaeba̧li̧ tjotidaja̧ ji̧baja̧ platatjö, treinta kilos platatjö ö̧ki̧ya dadö, ja̧danö, okwi'iju bajale dadö, ja̧danö ö'di̧ya̧ 'po̧batö otidijadötö.

²⁹ Ja̧danö, bronce tjiyinama dos mil trescientos treinta y seis kilos ömökijetö.

³⁰ Ja̧ broncetjö eju teachakwawemi la'aka pjaeba̧li̧ o'iju otidijadötö, ja̧danö, juwö iyawapjo ja̧ broncetjö pöbebö otidijadötö. Ja̧danö, japjo okwa tjödinakabi otidijadötö ja̧ broncetjö. Ju'wi jawabi, ju'wi jawa japjo tjotidakwa̧ jawama ja̧ broncetjö dadö otidijadötö.

³¹ Ja̧danö, okobe jwiinö eju apetu tjöekwakwa̧ la'aka pjaeba̧li̧ o'iju, ja̧danö teachakwawemi la'aka pjaeba̧li̧ o'iju, ja̧danö, okobe jwiinö 'bö'ödakwawa ö̧'i̧ya̧ma apetu tjöekwa jawa ö̧'i̧ya̧bi, eju jawa ö̧'i̧ya̧bi ja̧ broncetjö otidijadötö.