Éxodo 37 - Dios Iwene

Isabenö Jo̧ eju okwa tjotidina jawa

¹ Ja̧danö, Bezaleel otidijetö isapjo acacia towi ötetjö. Wayobekwöma un metro diez centímetrosnö, ja̧danö jakwölakwöma sesenta y cinco centímetrosnö, ja̧danö möakwöma sesenta y cinco centímetrosnö otidijetö.

² Ja̧danö, japjo wame okobe jwiinö bakwai̧ orosapitjöda pöbebijetö, o̧pekwöchobenöbi okwakwöchobenöbi. Ja̧danö, japjo mö ö'öbö okobe jwiinö bakwai̧ orotjöda ö'öbösö'bönö dadijetö.

³ Ja̧danö, oro isobu baibanö tobajo̧ isa̧ko̧nö tobebijetö o̧ki̧ju̧ baibanö, ö'wejemu jawa ö̧ki̧juma. Ja̧ o̧kijuma isapjonö pöbebö dadijetö, ö'wejemu jawa o̧ki̧ju̧ isapjo bakwachakwadanö do̧ko̧lataja o̧ki̧ju̧ma.

⁴ Ja̧danö, acacia towitjö ö'i̧ya̧ dö'i̧lataja bulijetö. Bulajo̧ ja̧ ö'i̧yama orosapitjö 'bo̧datijetö.

⁵ Ja̧ ö̧'i̧ya̧ma ba̧kwö̧'a̧kwena isapjonö bakwachakwadanö o̧ki̧ju̧nö yutebijetö, isapjo tje'ewakobetjö̧.

⁶ Ja̧danö, isapjo muchekwapi̧ otidijetö, bakwai orotjöda. Ja̧pi̧ma wayobekwöma un metro diez centímetros ja̧danö, jakwölakwöma sesenta y cinco centímetros.

^7-8 Ja̧danö, orotjö 'dobö jalinö sedatö dadö otidijetö du̧ju̧tajanö mu̧yȩka̧dönö, tjo̧wa̧ja̧pa̧ lö̧jinö ju̧kwadönö, querubines mikwadönö. Jobadönö junijetö isapjo muchekwapi wamenö, Dios jojodö tjusuli̧ tjumuchebemi wanekwachapima. Wajwitjobekwö bakwo̧nö tjöwaisobekwö bakwo̧nö junijetö jobadönöma. Ja̧danö, jobadö tjujunawö̧ma muchekwapinö dötewanö dadö junijetö.

⁹ Jobadöma idödada badekwakwanö tjö̧jinö, ja̧danö muchekwapikwö eda̧lö tjujukwinö otidijetö. Ja̧danö, tjo̧wa̧ja̧piya kabeba̧lö muchekwapi̧ tjöbeba̧lö tjuju̧kwinö otidijetö.

¹⁰ Ja̧danö, mesasöte, acacia towi ötetjö otidijetö. Jötema wayobekwöma noventa centímetrosnö, ja̧danö ja̧kwölakwöma cuarenta y cinco centímetrosnö, ja̧danö möakwöma sesenta y cinco centímetrosnö otidijetö.

¹¹ Ja̧danö, jöte wamenö bakwai orosapitjö pöbebö otidijetö. Ja̧danö, jöte ö'öbönö okobe jwiinö ö'öbösö'bönö dadijetö orotjö.

¹² Jemi nijakwöchobe ö'öbönö towi ö'diyatjö isa'bo li̧nö otidijetö siete centímetrosnö jakwölakwöma. Ja̧danö, jemi nijakwöchobe okobe jwiinö ö'öbönö orotjö dadijetö.

^13-15 Ja̧danö, oro isobu baibanö tobajo̧ isa̧ko̧nö tobebijetö o̧ki̧ju̧ baibanö, ö'wejemu jawa ö̧ki̧juma. Ja̧ o̧ki̧ju̧ma mesasötesa'onö dadijetö bakwachakwadanö. Ja̧danö, acacia towitjö ö'i̧ya̧ dö'i̧lataja bulijetö. Bulajo̧ ja̧ ö'i̧yama orosapitjö 'Bo̧datijetö. Ja̧danö, ja̧ ö̧'i̧ya̧ma ba̧kwö̧'a̧kwena mesasötesa'o bakwachakwadanö o̧ki̧ju̧nö yutebijetö, mesasöte tje'ewobö.

¹⁶ Ja̧danö, mesasötenö tjödakwa̧ dȩja̧pi̧ya̧bi, deja'di̧ju̧bi, bakwai orotjö dadö otidijetö. Ja̧danö, ubasobu o'do̧bu tjipe'akwa̧ o̧'di̧ju̧bi, ja̧danö jobu pe'awa'dobi, bakwai orotjö dadijetö, Diosnö ösödö totjebakwa̧ jawama.

^17-21 Ja̧danö, deju̧wa'yu o̧'di̧ju̧ ja̧ka dadijetö, bakwai orotjö. Ja̧danö, dȩju̧wa'yu o̧'di̧ju̧ ja̧kama baikwö ichejekwinö dadijetö: Bakwai orotjö 'dobö la'aka isa'o dadijetö, ja̧danö, bakwainö la'aka isa'otjö dötewanö okwi'o ji̧nö dadijetö, bakwai orotjö 'dobö. Ja̧danö, ja'otjöda dötewinö dadijetö, o̧bu̧bi̧ya̧danö ichejekwinö, almendra mikwi̧ i̧sa̧bu̧danö ichejekwinö. Ö'wejemu jawa o̧bu̧bi̧ya̧danö ichejekwinö dadijetö. Ja̧danö, o̧bubi̧ya la'aka ji̧nöbi, o̧bubi̧ya̧ ji̧nöbi dadijetö, dȩju̧wa'yu okwi'otjö bakobe 'diinö dötewanö. Ja̧danö, abönö wa̧pöbukwa o̧bubi̧yatjö bakwabukwenatjö̧ öjabi̧ya ji̧nö dadijetö, o̧bu̧tjö laebi̧danö öjabiyama, isa'o bakwachakwadanö ji̧nö, wa̧pöjakwa möakwö wi̧so̧inö. Ja̧danö, öjabi̧ya bakwöjakwenanö almendra o̧bu̧bi̧ya wa̧pöbukwa o̧bubi̧ya ji̧nö dadijetö, o̧bubiya la'aka ji̧nöbi o̧bubi̧ya̧ ji̧nöbi. Öjabiya isa'o bakwachakwadanö laebi̧ öjabiyatjö dadijetö, o̧bubiya ji̧nö wa̧pöbukwa bakwöjakwena.

²² Ja̧danö, okobe jwiinö dȩju̧wa'yu o̧'di̧ju̧ ja̧kama bakwai̧ orotjö 'dobö bakobe dötewinö dadijetö, o̧bu̧bi̧ya la'aka ji̧nabi, ö̧jabiya ji̧nabi.

²³ Ja̧danö, öjabiya ji̧na bajale bakwöjakwena o̧'di̧ju̧ dadö otidijetö, bakwai̧ orotjö, okobe jwiinö jelemutjö bakwa'do̧nö, oliva o̧tesobu toekwakwa̧ o̧'di̧ju̧. Jenanö, dȩju̧wa'yu o̧'di̧ju̧ ja̧ka okwi'o bajalenöbi deja'do̧ bakwa'do̧ dadö otidijetö. Ja̧danö, isa̧wu̧ ubaja̧wu̧ pji̧ekwaka dadijetö, bakwai̧ orotjö. Ja̧danö, dȩja̧pi̧ya̧ ubajo̧pja̧ wa̧bebö loawapiya̧bi bakwai̧ orotjö dadijetö.

²⁴ Okobe jwiinö dȩju̧wa'yu o̧'di̧ju̧ ja̧ka jawa bakwai orotjö treinta y cinco kilos jenanö dadijetö.

²⁵ Ja̧danö, acacia towisötetjö isapjo otidijetö, söinö 'dö̧ekwa'be juwö tjiyakwa̧pjo. Baikwö otidijetö: Wayobekwöbi, ja̧kwölakwöbi bakwainö, cuarenta y cinco centímetros. Ja̧danö, möakwöma noventa centímetros otidijetö. Ja̧danö, ö'wejemu jawa ö'yekiya ichejekwi̧ jawa ökiyama japjo 'do̧'do̧kwetenia dadijetö, isapjonö dötewanö, obeja ö'yeki̧ya̧ möakwö isȩkwa̧li̧danö.

²⁶ Japjo okobe jwiinö, wamenöbi, okobe jwiinö japjobi bakwai̧ orosapitjö pöbebijetö. Ja̧danö ö'yekiya ichejekwi̧ jawabi, 'po̧datijetö, bakwai̧ orosapitjö. Ja̧danö, isapjo ö'öbökwöchobe okobe jwiinö bakwai̧ orotjöda dadijetö.

²⁷ Ja̧danö, orotjö o̧ki̧ju̧ doko̧lataja o̧kijuma isapjonö pöbebö dadijetö ja'önönö, isapjo bakwachakwadanö bakwako̧kwena. Ja̧danö, ja̧ o̧ko̧biyanö, bakwako̧kwena isö̧'a̧ yutebijetö, japjo tje'ewakobetjö̧.

²⁸ Ja̧ ö'i̧ya̧ma acacia towitjö dö'i̧lataja bulijetö. Bulajo̧ ja̧ ö'i̧yama orosapitjö 'po̧datijetö.

²⁹ Ja̧danö, söinö 'dö̧ekwi̧ jawakwö oliva o̧tesobukwö wiwodö söinö 'dö̧ekwasobu otidijetö. Jobuma inesö ji̧ jawasobu, Diostjö jojodötjö tjö'da̧denö pjabatadönö tjuunö totjebakwa̧sobu, jobadönö kabebö tjö̧wanakwa̧ mölȩma. Ja̧danö, towitjö isa'betjö otidijetö söinö 'dö̧ekwi̧ jawasa'be, tjujuwakwa̧'bema. Ja̧danö, totjebakwa̧sobubi, tjujuwakwa̧'bebi ja̧ otikwa waiso̧ otidi̧danö otidijetö.