Éxodo 36 - Dios Iwene

¹ Moisésma ina yöba̧lijetö Israel jojodönö: —Chömöledö, Isabenö Jo̧ma okobe deinö ötjö inesö cheju, ja̧danö jeju okwa junawa jawa tjotidakwedönö pjabato̧, Bezaleelnö, Oholiabnö, ju'wedönöbi. Isabenö Jo̧da jobadönö pjabato̧ o̧do otikwa waisadö batjibanö, ja̧danö ja̧ otikwa waisinö omukwatadö batjibanö. Ja̧danö, tjotidakwa̧ma Isabenö Jo̧ weinada tjotidobö jo̧be— yö̧ba̧lijetö Moisésma.

² Jo̧kwaobetjö̧ Moisésma jwöbijetö Bezaleelnö, Oholiabnö, ja̧danö, ju'wedö o̧do otikwa waisadönö tjichobö, okobe deinö o̧do otikwa waisadö batjibanö Isabenö Jo̧ pjaatawö̧nöma, ja̧danö, tjomajadenö, Isabenö Jo̧ eju dotidobö dösöda, jö̧ba̧lö, omukwatadönöma.

³ Ja̧danö, ichajadönö iyijetö Moisésma okobe jwiinö jojodö Isabenö Jo̧nö ösödö kabebö tjiyi̧ma, Isabenö Jo̧ inesö eju otikwa jawa tjiyi̧ma. Ina, bakwöta mölȩkwena yȩayi Israel jojodö iyijadötö Isabenö Jo̧ inesö eju otikwa jawama, tjomajadenö diyobö dösöda, jö̧ba̧lö.

⁴ Jejenö iyiawö̧ otikwa waisadö, Dios inesö eju otikwa ju'wi jawabi ju'wi jawabi otidadöma tjotidobetjö labeibö Moisés ö̧jobekwö 'yi̧jetö. Jo̧banö 'ya̧wibö yöba̧lijadötö:

⁵ — Moisés, jojodöma nöinö tjichejeba. Tjo̧wi̧, Isabenö Jo̧ weina dotidobö dujuna̧lemitjö̧ bajalekwönönö dujuna̧la— yötja̧liökwe

⁶ webijetö Moisésma Israel jojodö tjuju̧kwobe okobe jwiinö yötjawobö, Tjowi̧ otiwa, Isabenö Jo̧ inesö eju tjotidakwa̧ jawa kwichejebaduwoko, ida̧ökö dujuna̧la̧, jö̧ba̧lö. Jejenö webijetö Moisésma jojodönöma, kwichejebaduwoko, jö̧ba̧lö.

⁷ Isabenö, jojodö tjiyi̧ tjichejebaja̧ma tjotidobö tjujuna̧lemitjö̧ bajalekwönönö juna̧lijadötö.

Isabenö Jo̧ eju mö muchekwadi̧ju tjotidina jawa

⁸ Okobe deinö Isabenö Jo̧ inesö eju otidadöma o̧do otikwa jwiinö waisadöda otidijadötö. Ja̧danö, i̧sa̧'wo do'wolataja jawa o'wijuma muchebijadötö jejuma. Tjumuchebaja̧'woma jwiinö otiwi̧ jawa, lino mikwi̧ opiyatjö ja̧danö, ö̧'dö̧wi̧ opjiakwöbi luledö, duwayuwapjiakwöbi luledö, duwapjiakwöbi luledö tjitilina'wiju. Ja̧'wonö bakwa'wokwena bakwo̧ 'dö̧awa waiso̧ma ángeles, queribines mikwadö wanekwachadönö otiwanö 'dö̧bijetö isa'wonö.

⁹ Bakwa'wokwena wayobekwö doce metros y medio ja̧danö, ja̧kwölakwö dos metros, bakwa'wokwena bakwainö.

¹⁰ Ja̧ o'wiju domulataja jawa o'wijutjö bakwamu jawa o'wijuma 'da̧batö bakwa'wokwena wayobekwö ö'öbönö tjo̧beba̧lö 'dö̧bijadötö, bakwa'wo jala'wo baibanö. Ja̧danö, ju'wi o'wiju bakwamu jawa o'wijubi wayobekwö ö'öbönö tjo̧beba̧lö 'dö̧bijadötö, bakwa'wo jala'wo baibanö. Jejenö ja̧li̧ o'wiju do'wolataja ji̧jetö.

¹¹ Ja̧danö, bakwa'wokwena wayobekwö ö'öbönö isa̧ko̧danö ichejekwi̧ ö'dö̧wi̧sa̧do̧tjö 'dö̧tja̧ja̧ki̧ju 'dö̧bijadötö.

¹² Cincuentanö bakwa'wo ö'öbönö, ja̧danö jele'wobi bakwemida cincuentanö 'dö̧bijadötö. Bakwa̧'wokwena ö'öbö bakwemi 'dö̧bijadötö, bakweminö ja̧ o'wijuma tjakwatakobetjö̧.

¹³ Ja̧danö, akwatakwawa ö̧ki̧ya̧ cincuentanö orotjö otidajadö o'wiju do̧'wolataja dötewinö akwatijadötö, Isabenö Jo̧ eju okwa möma bakwa'woda muchekwinö.

¹⁴ Ja̧danö, ja'wo wame jȩlȩ'wo eju muchekwa'wobi ti̧lö otidijadötö, chi̧wo̧dö tjöwö'ye dölawa opjiyatjö, a̧li̧nösamutjö bakwa'wo jawa o'wijuma.

¹⁵ Bakwa'wokwena wayobekwöma trece metros y medio, ja̧danö ja̧kwö̧lakwöma dos metros, bakwa̧'wokwena bakwainö.

¹⁶ Ja̧danö, ja̧ o'wijutjö bakwamu jawa o'wiju 'da̧batö bakwa̧'wokwena wayobekwö ö'öbönö tjo̧beba̧lö 'dö̧biijadötö, bakwa'wo jala'wo baibanö. Ja̧danö, ju'wi o'wiju jelemutjö̧ bakwöta jawa o'wijuma bakwa'wokwena wayobekwö ö'öbönö tjo̧beba̧lö 'dö̧bijadötö, bakwa'wo jala'wo baibanö.

¹⁷ Ja̧danö, isa̧do̧ ö'dö̧wi̧sa̧do̧tjö o̧ki̧ju̧ 'dö̧bijadötö, ciennö jawa o̧ki̧ju̧ma. Ja̧ki̧juma jala'wo bakwa'wokwena wayobekwö tjo̧beba̧lö 'dö̧bijadötö, bakwa'wo cincuentanö, ja̧danö jele'wo bakwemida cincuentanö.

¹⁸ Ja̧danö, akwawatakwawa ö̧ki̧ya̧ otidijadötö broncetjö, cincuentanö, o'wiju do'wolataja o'wijunö dötewinö tjakwatakobetjö̧, bakwa'woda baibanö.

¹⁹ Ja̧danö, ja'wo wame, o̧bȩja̧dö ömadö tjisȩdi̧ju̧, duwi̧ o̧di̧ju̧ baibanö tjubu̧datina o'wijuma muchebijadötö. Ja̧do̧ wame jwai balawa okwa kwöba̧lö lö̧jadö tji̧sȩdi̧ju̧ muchebijadötö.

Isabenö Jo̧ eju tjotidina jawa, ötebiya junö, ja̧danö ö̧'i̧ya̧ yutebö, ja̧danö o̧ki̧ju̧ nönö

²⁰ Ikenama Isabenö Jo̧ inesö ejuma otidijadötö, ötebiya junö, acacia towitjö löbö ötebiyama.

²¹ Ja̧ ötebiyama bakwötekwena wayobekwöma cuatro metros y medio, ja̧danö sesenta y cinco centímetros jakwölakwö lödijadötö.

²² Ja̧danö, bakwötekwena la'akatjö ötebiya jinö, jeju la'aka pjaeba̧li o'iju ojubiyanö 'dieba̧linö ji̧nö junijadötö. Okobe jwiinö ötebiyama, bakwötekwena jejenö otidijadötö.

^23-26 Ja̧danö, otikwa waisadöma a̧li̧nösa̧mu̧tjö̧ domulataja jawa öte löbijadötö jeju wajwitobekwöchobe junawötebiya jenanö, ja̧danö, jeju tjöwaisobekwöchobe junawötebiya jenanöbi, a̧li̧nösa̧mu̧tjö̧ domulataja jawa öte. Ja̧ ötebiya bakwötekwena la'aka ötenö dötölataja ji̧jetö. Ja̧danö la'aka pjaeba̧li̧ o'iju lödijadötö, cuarentanö eju waiyobekwö, tjöwaisobekwö wajwitjobekwöbi cuarentanö. Ja̧ la'aka pjaeba̧li̧ o'iju do'olataja jawa o'ijuma ötebiya bakwötökwena teebe lödijadötö. Ja̧danö ötebiya la'aka ötenö la'aka pjaeba̧li o'onö 'dieba̧linö jO̧bö 'di'yö junijadötö. Ja̧danö, la'aka pjaeba̧li̧ o'ijuma do'olataja junijadötö ötebiya bakwötekwena. Ja̧ la'aka pjaeba̧li o'ijuma platatjö 'dibatö otidijadötö.

²⁷ Ja̧danö, jeju omapekwöchobe, ja̧wo̧ meobekwöchobekwö tjujunakwa̧ jawa öte löbijadötö, ötebiya jelemutjö bakwöte jawa ötebiyama.

²⁸ Ja̧danö, löbö otidijadötö ötebiya dötelataja jawa ötebiyama jeju omapekwö 'do̧'do̧kwetenia tjujunakwa̧ jawa öte.

²⁹ Ja̧ ötebiya, 'do̧'do̧kwetenia tjujunakwa̧ ötebiyama, dötelataja bakobe la'akanöbi mönöbi 'diinö do̧alinö junijadötö. Ja̧danö, ja̧ ötebiya 'do̧'do̧kwetenia tjujunakwa̧ ötebiya bajalenö o̧ki̧ju̧ orotjö otikwa nönijadötö, do̧'do̧kwetenia tjujunakwa̧ ötebiya bakwachakwadanö.

³⁰ Jo̧kwaobetjö̧, jeju omapekwöchobe ötebiyama okobe jwiinö jelemutjö wa̧pötekwa ötebiya junijadötö. Ja̧danö, bakwötekwenama, la'aka ötebiya la'aka pjaeba̧li̧ o'ijunö 'dia̧linö junijadötö. Ja̧danö, la'aka pjaeba̧li̧ o'ijuma do'olataja junijadötö ötebiya bakwötekwena.

^31-32 Ja̧danö, ö̧'i̧ya̧bi bulijadötö acacia towitjö, a̧li̧nösamutjö bakwamu jawa ö̧'i̧ya̧, jeju wayobekwö junawötebiya o̧ki̧ju̧nö tjuyutebobö, ötebiya 'diinö do̧alakobetjö̧. Ja̧danö, bakwö̧'a̧ jeju ötebiya o'wolobe o̧ki̧ju̧nö tjuyutebakobe. Ja̧danö, jö̧'a̧ nijakwö jelö̧'a̧, ja̧danö jö̧'a̧ nijakwö ö'wejesö̧'a̧, jö̧'a̧ ö'wejesö̧'a̧ nijakwö jelö̧'a̧, ja̧danö ikenama la'akasö̧'a̧ ji̧jetö.

³³ Ja̧danö, ö'wejesö̧'a̧ma ötebiya okwanö yutekwö̧'a̧, jeju waiyobekwö bakwachakwadanö tjöwaisobekwöbi wajwitjobekwöbi, ja̧danö̧ cheju o̧pekwöchobekwöbi, 'diinö jo̧bö.

³⁴ Ja̧danö, otidadöma okobe jwiinö ötebiya tjujunakwa̧ jawa ötebiyama orosapitjö 'bo̧datijadötö. Ja̧danö, i̧sa̧ki̧ju̧ orotjö otikwakiju̧ma ötebiyanö 'diinö pöa̧linö dadö otidijadötö, ö̧'i̧ya̧ ja̧ki̧ju̧nö tjuyutebakobetjö̧. Ja̧danö, ö̧'i̧ya̧ orosapitjö 'bo̧datijadötö.

Isabenö Jo̧ eju tjöekwado̧ tilö, okwi'ijunö debatö nönö tjotidina jawa

³⁵ Ja̧danö, tjöekwado̧ ti̧lijadötö jwiinö inesösȩko̧ teachakwawemi tjöekwado̧. Ja̧do̧ma jwiinö otiwi̧ jawa opiya, lino mikwi̧ opjiyatjö, ja̧danö, ju'wi opiyakwö ö̧'dö̧wi̧, ö̧'dö̧yuwi̧, duwi̧ luledö ti̧lijadötö. Ja̧danö, tjiti̧laja̧di̧ju̧nö 'dö̧awa waiso̧ma queribines mikwadö wanekwachadönö 'dö̧bijetö.

³⁶ Ja̧danö, okwi'iju ö'wejemu jawa o'iju löbajadö orosapitjö 'bo̧datijadötö. Ja̧danö, bakwa'okwena o̧ko̧nö 'diinö dadijadötö, okwi'o bajalenö. Ja̧danö, la'aka pjaeba̧li̧ o'iju ö'wejemu jawa o'ijuma otidijadötö platatjö, plata isobu baibanö tobajadö isa̧ko̧nö tobebö.

³⁷ Ja̧danö, jeju teachakwawemi tjöekwado̧bi ti̧lijadötö, jwiinö otiwi̧ jawa opjiya, lino mikwi̧ opjiyatjö, ju'wi opjiyakwö ö̧'dö̧wi̧ opjiyakwö, ö̧'dö̧yuwi opjiyakwö, duwi̧ opjiyakwö luledö. Ja̧danö 'dö̧awa waiso̧ma ja̧do̧nö ju'wi jawabi ju'wi jawa jwiinö otiwi̧ jawa 'dö̧bijetö.

³⁸ Ja̧danö, ja̧do̧ debatö tjö̧nakobetjö̧ okwi'iju, bakwamu jawa o'ijuma, okobe jwiinö orosapitjö tjo̧'bo̧dataja̧ jawa o'iju junijadötö. Ja̧danö, bakwa'okwena bajalenö o̧ki̧ju̧ 'diinö nönö dadijadötö. Ja̧danö , ö'diya, okwi'ijunö dötewinö 'diinö jo̧bö ö'diyama orosapitjö tjo̧'bo̧datijayonö la'aka pjaeba̧li̧ o'iju, bakwamu jawa o'ijuma broncetjöda otidijadötö.