Éxodo 35 - Dios Iwene

Isabenö Jo̧ Israel jojodönö weina jawa, tjö'wachI̧ mölȩ

¹ Moisésma okobe deinö Israel jojodönö tjoko̧ko̧kwobö webijetö. Ko̧ko̧kwajadönö yöba̧lijetö: — Chömöledö, baikwö weobe Isabenö Jo̧ma ökwödönö:

² Bakwöta semanakwena jelemutjö bakwöta mölȩ kwotidaduwo. Jo̧kwaijayonö jemi ikena mölȩma, jelemutjö dötölataja mölȩma kwotidaduwoko. Ja̧ mölȩma otidökönö kwö'wachaduwakwa̧ möle ja̧kobe, Isabenö Jo̧nö kwomukwataduwobö inesö mölema. Ja̧ mölȩma otido̧nöma kwabö loköbaduwobö jo̧be.

³ Ja̧danö, ökwöla nötedöbi kwönötedaduwoko ja̧ mölȩ, kwö'wachaduwi̧ mölȩma— yöba̧lijetö Moisésma Israel jojodönöma.

Moisés yöa̧lina jawa Israel jojodönö, Isabenö Jo̧ weina jawa ko̧ko̧dö tjiyobö

⁴ Ina Moisés yöba̧lijetö okobe deinö Israel jojodönö: —Ja̧danö, ötjönö weijatö Isabenö Jo̧ma ökwödönö wetobö, baikwö:

⁵ Kwiteaduwitjö 'da̧batö kwoko̧ko̧daduwo, Isabenö Jo̧nö kwiyaduwakwa̧, iteda weinama. Ja̧danö, bakwo̧nökwena kwomajadeduwinö kwösödaduwinö mei̧tjöda kwiyaduwo, biya: Oro, plata, bronce kwiyaduwo.

⁶ dölawa oyubiya, biya̧: O̧bȩja̧dö tjöwö'yetjö kwödölawaduwaja̧'yema wainö kwubu̧dataduwo ö̧'dö̧wi̧, duwayuwi̧ duwi̧ baibanö. Ikenama kwubu̧dataduwaja̧'ye oyubiya kwiyaduwo. Ju'wi oyubiya, jwiinö otiwi̧ jawa oyubiya, lino mikwi̧tjö̧ dölawa oyubiya kwiyaduwo. Ja̧danö, chi̧wo̧dö tjöwö'yetjö dölawa oyubiya kwiyaduwo.

⁷ Kwiyaduwakwa̧ i̧sȩdi̧ju̧ biya̧: O̧bȩja̧dö ömadö tjisȩdi̧ju̧, duwi̧ o̧di̧ju̧ baibanö bu̧datibö kwiyaduwo. Ja̧danö, jwai̧ balawa okwanö kwöba̧lö lö̧jadö tji̧sȩdi̧jubi kwiyaduwo. Ja̧danö, towi ötebiya, acacia towi ötebiyatjö löbö kwiyaduwo.

⁸ Ja̧danö, oliva o̧tesobu tjiyo dejuwa'yu ichejekwi̧, pjei̧ o̧yu̧biya dejatakwawa kwiyaduwo. Ja̧danö, söinö 'dö̧ekwi̧ ösötjetjö 'döbebö, oliva o̧tesobukwö bakobe wiwodö tokebaduwakwobu kwiyaduwo. Ja̧danö, towisa'betjö söinö 'dö̧ekwa'betjö kwujuwaduwakwa̧'be kwiyaduwo.

⁹ Ja̧danö, inawiyabi kwiyaduwo, biya̧: Nöinö mikwawi̧ inawiya onice mikwi̧ kwiyaduwo. Ja̧danö, ju'wi nöinö mikwawi̧ öwiyabi kwiyaduwo. Ja̧ inawiya, onice mikwi̧ inawiya, ju'wi inawiya ötjötjö jojodötjö dö'tja̧denö la'aka pjabato̧ ökamijido̧ wamesado̧ öböbe'o bakwachakwadanö akwacha̧lö la̧kobe nönawakwa̧. Ja̧danö, ja̧do̧ wame jeledo̧, omuko̧sado̧ la̧kobe, melekwado̧. Ja̧donöbi nöjakobe inawiyama.

Moisés yöa̧lina jawa Israel jojodönö, Isabenö Jo̧ weina jawa tjotidobö, iteda eju, jobadökwö tjö'da̧denö ö̧jakweju, ja̧danö jeju okwa jawabi.

¹⁰ Jo̧kwaobetjö̧ ökwödötjö ja̧ otikwa waisadöma kwotidaduwo okobe jwiinö Isabenö Jo̧ weinama— yöba̧lijetö Moisésma Israel jojodönöma.

¹¹ Ina yöba̧lijetö Moisésma, Isabenö Jo̧ tjotidobö weinama: Chömöledö, Isabenö Jo̧ weinadanö kwotidaduwo, baikwö. Iteda eju, ökwödö dö'da̧denö ö̧jakwejuma. Ja̧danö, jeju wamenö tjumuchebakwa̧ o'wiju kwotidaduwo. Ja̧danö, ö̧ki̧ya̧ dadö kwotidaduwo. Jadanö, ötebiya löbö, ja̧danö okwi'iju löbö, ja̧danö ö'i̧ya̧, eju tjujunakwa̧ ötebiyanö wayobekwö o̧ki̧ju̧nö tjuyutebakwa̧ ö'i̧ya̧ bulö kwotidaduwo. Ja̧danö, la'aka nijibe pjaeba̧li o'iju kwotidaduwo.

¹² Ja̧danö, eju okwa jawa, biya: Isapjo, isapjo e'ewakwawa ö'i̧ya̧, ja̧danö japjo muchekwapi̧ kwotidaduwo. Ja̧danö, ajayi̧sȩlo̧tjö ikenasȩko̧tjö tjöekwado̧ kwiti̧laduwo, kwönanaduwakwa̧do̧

¹³ Ja̧danö, pan wanawöte mesasöte löbö, ja̧danö, jöte e'ewakwawö'i̧ya̧ bulö kwotidaduwo, ja̧danö, okobe jwiinö mesasöte wanö lödawa dȩja̧pi̧ya̧bi, deja̧'di̧ju̧bi ju'wi jawabi kwotidaduwo. Ja̧danö, inesö ji̧ pan, Isabenö Jo̧nö iyawa pan kwotidaduwo, jötenö lödawa panma.

¹⁴ Ja̧danö, dȩju̧wa'yu o̧'di̧ju̧ ja̧ka o̧tesobu ubinö dejatakwawayuma dadö kwotidaduwo. Ja̧danö, okobe jwiinö ja̧ka tjotidakwa̧ jawabi kwotidaduwo. Ja̧danö, dȩju̧wa'yuka o̧tesobu a̧ja̧sa̧'di̧jubi dadö kwotidaduwo. Ja̧danö, oliva towi ödebiyatjö 'do'dobö, molö dȩju̧wa'yuka 'dö̧ekwa o̧tesobu kwotidaduwo.

¹⁵ Ja̧danö, isapjo söinö söinö 'dö̧ekwa'be juwawapjo löbö, ja̧danö, ö'i̧ya̧ japjo e'ewakwawö'i̧ya̧ bulö kwotidaduwo. Ja̧danö, o̧tesobu, Isabenö Jo̧tjö jojodötjö tjö'da̧denö pjabatadönö tjuunö tjotjebakwobu kwotidaduwo. Ja̧danö, söinö 'dö̧ekwa'betjö tjujuwakwa̧'be kwotidaduwo. Ja̧danö, teachakwawemi debatö nönö tjöekwado̧ ti̧lö kwotidaduwo.

¹⁶ Ja̧danö, jeju apetunö tjujunakwa̧, biya̧: Ja̧danö, isapjo, Isabenö Jo̧nö kwiyaduwajawö̧nö̧ wa̧nö juwö iyawapjoma löbö kwotidaduwo. Ja̧danö, ja̧pjo okwa anawaka broncetjö kwotidaduwo. Ja̧danö japjo e'ewakwawa ö'iya bulö kwotidaduwo. Ja̧danö, okobe jwiinö japjo juwawa tjotidakwa̧ jawa kwotidaduwo, balde'diju, ja̧danö, palapibiya, ja̧danö ö̧ki̧ya̧, itebiya tichawa ö̧ki̧ya̧ma. Ja̧danö, dichawa'do, ja'do la'aka pjaeba̧la'o isa'obi kwotidaduwo.

¹⁷ Ja̧danö, jeju apetu tjöekwi̧ma baikwö kwotidaduwo: la'aka pjaeba̧li̧ o'iju junö, ja̧danö, okwi'iju junö, ja̧danö o'wiju debatö nönö tjöekwa jawa o'ijuma. Ja̧danö, jeju teachakwawemi tjöekwado̧ eju apjudedanö debatö tjö̧nakwa̧do̧ kwiti̧laduwo.

¹⁸ Ja̧danö, bö'bödakwawa ö̧'i̧ya̧ broncetjö kwotidaduwo, ja̧danö alachi'bobi, ja̧ ö̧'i̧ya di̧kataduwakwa̧'bo dölawö wibö kwotidaduwo.

¹⁹ Ja̧danö, Aarón, Aarón itji̧mu 'dutjawakwa̧ o̧di̧ju̧ 'dö̧köbaduwo, jwiinö otiwi̧ jawa o̧di̧ju̧, wainö ji̧ o̧di̧ju̧ma. Ja̧diju 'dubawajadö Isabenö Jo̧ eju, inesö ejunö tjetjachakwedö, iteda wei̧ tjotidobö— jejenö yöba̧lijetö Moisésma Israel jojodönö.

²⁰ Jemi ikena, okobe deinö Israel jojodöma Moisés ö̧jelö labebö ȩwa̧jijadötö.

²¹ Ikenama, jobadötjö tjomajadenö tjösödinö meajawö̧ma do̧'wo luwo̧nö pjadatobö dösöda, jö̧ba̧lö, e'ewö 'yi̧jadötö Isabenö Jo̧ eju tjotidakwa̧ jawabi, ja̧danö eju okwa junawa tjötidakwa̧ jawabi iyö. Ja̧danö, Aarón, Aarón itji̧mu jwiinö otiwanö, wainö ji̧ 'dutjawakwa̧di̧ju i̧sa̧dijuma 'dö̧tjakwa̧ jawabi e'ewö yi̧jadötö, iyö.

²² Ja̧danö, okobe deinö ömadötjö, ya̧dötjö, tjomajadenö tjösödinö meajawö̧ma, Isabenö Jo̧nö diyobö dösöda, jö̧ba̧lö, omukwatadöma idöda orotjö otikwa jawa, sasiyu, lawosopja, kamijidonö yutebö tjönawa o̧ko̧bi̧ya, tjötjö'asa̧ko̧bi, ju'wi jawabi ju'wi jawabi orotjö otikwa jawa e'ewijadötö Isabenö Jo̧nö iyö.

²³ Ja̧danö, dölawa oyubiya ö̧'dö̧wi̧, ö̧'dö̧yuwi̧, duwi̧ oyubiama juna̧ladöma e'ewö 'yi̧jadötö ja̧ oyubiya iyö. Ja̧danö, jwiinö otiwi̧ jawa oyubiya lino mikwi̧tjö̧ dölawa oyu juna̧ladöbi e'ewö 'yi̧jadötö ja̧ oyubiya iyö. Ja̧danö, i̧sȩdi̧ju̧ juna̧ladöbi e'ewö 'yi̧jadötö ja̧ i̧sȩdi̧ju̧ iyö, o̧bȩja̧dö ömadö tji̧sȩdi̧ju̧ duwi̧ o̧di̧ju baibanö tjubu̧datina jawa i̧sȩdi̧ju̧ma. Ja̧danö, jwai̧ balawa okwanö kwöba̧lö lö̧jadö tji̧sȩdi̧ju̧ juna̧ladöbi e'ewö 'yi̧jadötö ja̧ i̧sȩdi̧ju̧ma iyö.

²⁴ Ja̧danö, plata, bronce juna̧ladö ja̧ma e'ewijadötö Isabenö Jo̧nö kabebö iyö. Ja̧danö, ju'wedöma acacia towisötebiya juna̧ladöma ja̧ ötebiya iyö e'ewijadötö, Isabenö Jo̧ ejubi, eju okwa junawa jawabi tjotidakwa̧ma.

²⁵ Ja̧danö, okobe deinö ya̧dö tjö̧mamijunö opjiya dölawa waisadöma do̧latijadötö. Do̧lajadöma ö̧'dö̧wi̧, duwayuwi̧ duwi̧ baibanö bu̧datijadötö. Ja̧ opjiya, ja̧danö jwiinö otiwi̧ jawa oyubiya lino mikwi̧tjö̧ dölawa oyubi e'ewö 'yi̧jadötö tjiyobö.

²⁶ Ja̧danö, 'ya̧dötjö ju'wedöma, chi̧wo̧dö tjöwö'yetjö dölawa waisadö, tjomajade tjösödinö meajawö̧ma dölawijadötö.

²⁷ Ja̧danö, Israel jojodötjö la'aka luwedöma e'ewijadötö nöinö mikwawi̧ inawiyama, onice mikwi̧ inawiyabi, ju'wi inawiyabi, orotjö otikwa ötebiyanö tjöpöchobö. Ja̧ öwiyama Diostjö jojodötjö tjö'da̧denö la'aka pjabato̧ kamisi ja'önönö la̧do̧nö, ja̧danö omukosado̧nö akwacha̧linö tjönönakwa̧ öwiyama.

²⁸ Ja̧danö, oliva o̧te e'ewö 'yi̧jadötö dȩju̧wa'yu nötekwa o̧tema. Ja̧danö, söinö 'dö̧ekwa̧pja̧bi ichejebijadötö, o̧tekwö pjatjatakwawakwa̧pja̧, Aarón, Aarón i̧tji̧mu̧ tjuunö Moisés toebakwa̧ o̧tema. Ja̧danö, ja̧ söinö 'dö̧ekwapja̧ söinö 'dö̧ekwa'bekwö, towitjö isa'bekwö pjaatakwawobö e'ewijadötö tjiyobö.

²⁹ Ja̧danö, okobe deinö Israel jojodö tjomajadenö tjösödinö meajawö̧ma, Pjadatobö dösöda, jö̧ba̧lö ömadöbi ya̧döbi ichejebijadötö Isabenö Jo̧ Moisésnö weina jawa, tjotidakwa̧ jawama, Isabenö Jo̧nö ösödö kabebö iyö.

Moisés Bezaleelnö, Aholiabnö weina jawa, Isabenö Jo̧ weina

³⁰ Ja̧danö, Moisésma yöba̧lijetö Israel jojodönö: — ¡A̧ja̧kwaduwitjö! Isabenö Jo̧ma Bezaleelnö omudawö ujuninobe, Urí itji̧nö, ja̧danö Hur ö̧'dö̧nö, Judásaso jojonöma.

³¹ Ja̧danö, Isabenö Jo̧, iteda O̧'wo̧ Luwo̧ma Bezaleelnö pjabatö öibakwo̧, o̧do otikwa jawa jwiinö otiwanö otido̧ baibanö, ja̧danö o̧do okwa jawa otikwabi. Ju'wi jawa, ju'wi jawabi o̧do otikwa jawa okobe jwiinö waisö otiwanö otido̧ baibanö ö̧jakwo̧ Bezaleelma.

³² Ja̧danö, okobe jwiinö ja̧ otikwa, jwiinö otiwi̧ jawa omukwatö ujunobö öbibö pjabato̧ Isabenö Jo̧ O̧'wo̧ Luwo̧ma jo̧banöma, orotjöbi, platatjöbi, broncetjöbi, jwiinö otiwanö otikwama.

³³ Ja̧danö, inawiya oledö, ikenama ja̧ oledaja̧ inawiyama orotjö otikwa ötebiyanö pöchö, ja̧ otikwa öwaisobö öbibö pjabato̧ Isabenö Jo̧ O̧'wo̧ Luwo̧ma. Ja̧danö, towitjö 'dȩbö otikwabi jwiinö öwaisobö öbibö pjabato̧. Ja̧danö, ju'wi jawa, ju'wi jawabi otikwa öwaisobö öbibö pjabato̧ Isabenö Jo̧ O̧'wo̧ Luwo̧ma jo̧banöma.

³⁴ Ja̧danö, Isabenö Jo̧ O̧'wo̧ Luwo̧ma Bezaleelnöbi ja̧danö Ahisamac itji̧ Aholiabnöbi, Dansaso jojonö öbibö pjabato̧, tjomajadenö ösödö ju'wedönö tjö̧ba̧jadakobetjö̧ idöda tjöwaisi̧ otikwa jawa.

³⁵ Ja̧danö, Isabenö Jo̧ O̧'wo̧ Luwo̧ma Bezaleelnö, Oholiabnö okobe jwiinö o̧do otikwa tjöwaisakobetjö̧ öbibö pjabato̧, ja̧danö, oro, plata, bronce otikwabi, pju'yebö wȩyukwabi. Ja̧danö, 'dö̧awa otikwabi jwiinö tjöwaisobö öbibö pjabato̧ Isabenö Jo̧ O̧'wo̧ Luwo̧ma. 'Dö̧tjakwa̧ abönö tjomukwati̧bi tjöwaisobö öbibö pjabato̧ Isabenö Jo̧ O̧'wo̧ Luwo̧ma. Ja̧danö, ö̧pji̧ya̧ ö̧'dö̧pjiatjöbi, duwayuwapjiatjöbi, duwapjiatjöbi, jwiinö otiwi̧ jawa lino mikwi̧ opjiyatjöbi 'dö̧tjobö ö̧bibö pjabato̧. Ja̧danö, ti̧lawa otikwabi jwiinö otiwanö tjotidakobetjö̧ öbibö pjabato̧ Isabenö Jo̧ O̧'wo Luwo̧ma jobadö tjo̧'wo luwo̧nöma.