Éxodo 34 - Dios Iwene

Isabenö Jo̧ yemidanö iteda weina wȩyukwa inabiya döbölataja jawa öbiya Moisésnö iyina jawa

¹ Isabenö Jo̧ma Moisésnö webijetö: —Moisés, inabiya döbölatajanö nöawatjö 'do'dobö kwotido, ajayinö chotidinawadanö, ökwö nijakwö ikwö 'daköbina jawa öbiyadanöma. Kwotidaja̧ ikenama ötjönö kwiyo, ja öbiyanö 'dȩbö chiwȩyudocha, ajayinö chiwȩyudinadanö.

² Jo̧kwaobetjö̧ itekwayi yȩayi wiluibö bi'o Sinai mikwa'o wa̧pekwa'obe kwönöcho, jobe ja̧nö ötjönö kwite'ada̧lobö.

³ Ja̧danö, jelo̧ ökwökwö nöchö ichoko. Bakwo̧bi deobö jo̧be bi'onöma, okobe jwiinö. Ja̧danö, kwajwi̧mu̧duwibi o̧bȩja̧dö, chi̧wo̧dö, pa̧ka̧yö ja'o la'akanö pokwina'ye tjukwoko— webijetö Isabenö Jo̧ma Moisésnöma.

⁴ Jejenö weiökwe Moisésma 'do'dobö otidijetö inabiya döbölataja jawa öbiya, ajayinö Isabenö Jo̧ otidinabiyadanö. Ja̧danö, ju'wi dewachö yȩayi ja̧ öbiya e'ewö nöchijetö Sinai mö'ösa'o, Isabenö Jo̧ weinadanö.

⁵ Ikenama Isabenö Jo̧ma ojwiyo'wo ja'da'daa'wo okwa jwibachibö jamatijetö Moisés ipjeanö. Jejenö jamatö, Isabenö Jo̧sa, jö̧ba̧lö, jwöbijetö iteda imima.

⁶ Ikenama Moisés öba a'o baledö baikwö jwöbijetö: Ötjödasa Isabenö Jo̧ma, ötjödasa Isabenö Jo̧ma. Ötjödasa lȩlö̧jinö edo̧ Diosma, ja̧danö, dö̧sölö̧jinö edö pjabato̧ Diosma. Ja̧danö, ötjödasa jojodönö juluwanö cho̧'wo sulinö edö̧kö̧ Diosma. Ja̧danö, ötjödasa jwiinö ile nibebo̧ Diosma, balewachökönö. Ja̧danö, ötjödasa yöbawö chujuni̧danö ja̧bo̧ Diosma.

⁷ Ja̧danö, jojodönö ile nitebakwo̧sa ba̧kwȩlö̧jatebö, balewachökönö. Ja̧danö, jojodö tjusuli̧ma söbebö lotakwo̧sa, okobe jwiinö sulabenö omukwatö ja̧tji̧ma. Jo̧kwaijayonö jojodöma sulabenö ja̧tjenama jobadönö lȩtebakwo̧sa. Ja̧danö, jobadönödamaö̧kö̧ lȩtebakwawö̧, jobadö sulabenö ja̧tji̧ mikwawama tji̧tji̧munöbi, tjö̧'dö̧dönöbi, tjö̧'dö̧dö tji̧tji̧mu̧nöbi lȩtebakwo̧sa— yöba̧lijetö Isabenö Jo̧ma Moisésnöma.

⁸ Jejenö yöa̧liökwe Moisésma öba bȩbachibijetö, nijakwö uunö, Isabenö Jo̧nö ösödö.

⁹ Ja̧danö, jö̧ba̧lijetö Isabenö Jo̧nö: —Isabenö Jo̧, ötjönö dösölö̧jinö kweditjö̧ma ökwödökwö kwekacho. Isabenö ökwödöma duu 'di̧badödijayonö kwicho ökwödökwö. Ja̧danö, dusuli̧ma, sulabenö omukwatö ja̧di̧ma, söbebö loköbo. Ja̧danö, ökwödönö kwemo, bidöma ötjö chömöledö, jö̧ba̧lö.

Isabenö Jo̧ yemidanö dötölataja weawa jawa iyina Israel jojodönö

¹⁰ Ikenama Isabenö Jo̧ma yöba̧lijetö Moisésnö: —Moisés ¡a̧ja̧kwitjö! Israel jojodönö yemidanö ötjöda chiwene yöbawö chujuna. Ja̧danö, jobadö okobe deinö tjeda̧lonö chujuluma chi̧sebocha böjȩ okobe jwiinö ediatjinökö jawa, ja̧danö, okobe deinö bakwasokwena jojodöma ediatjinökö jawa. Ja̧danö, okobe deinö jojodö, ökwökwö ju̧kwadöma tjedakobe ötjö, Isabenö Jo̧ chujulu chi̧sebi̧ma. Okobe deinö jojodö, kwömöledöbi ju'wedöbi tjedakobe ötjö Isabenö Jo̧ chujulu chi̧sebi̧ma. Isabenö ökwödö Israel jojodönö pjabatö juluwi̧ jawa chi̧sebakwo̧sa— yöba̧lijetö Isabenö Jo̧ma Moisésnöma.

¹¹ Ina yöba̧lijetö: —Ökwödö bakwo̧nökwena babe mölȩ weti̧ a̧ja̧kwö kwö̧jaduwobö jobe. ¡A̧ja̧kwi! Jejenö weti̧ a̧ja̧kwö kwö̧jaduwitjö̧ma ju'wedönö a'dewö lotocha kwi̧'yaduwakwemitjö, amorreo jojodönö, cananeo jojodönö, heteo jojodönö, ferezeo jojodönö, heveo jojodönö, jebuseo jojodönö.

¹² Ja̧danö, jobe tekachaja̧duwa ikena tjöbeba̧löjinö kwö̧jaduwo jobe ju̧kwadökwö. Jobadönö yöka̧laduwoko, bakobe ösödinö dö̧jobö yöba̧lakwawö dujuno, jö̧ba̧lö. Jejenö yöba̧lakwawö kwujunaduwoko, jobadö tjö̧ji̧ma 'daliwanö kwö̧libaduwi̧danö ötjibapji jö̧ba̧lö, jobadökwö pjakacha̧laduwinö.

¹³ Jo̧kwaobetjö̧ jobadö tjo̧'wo jawa tjösödi̧ jawa, juwö iyawapjobi, inawiya ödöi̧ öwiya junawa öwiyabi 'dobö loköbaduwo. Ja̧danö, towitjö otikwa Asera mikwuju o̧'wo jawa löbö loköbaduwo.

¹⁴ Ötjönö, Isabenö Jo̧nöda kwösödaduwo, ju'wedö tjo̧'wo jawa tjöwa̧na̧lawö̧nö kwösödaduwoko. Ötjö chimima, ö'wiabinö edo̧ Diossa, jö̧ba̧lö. Jo̧kwaobetjö̧ ötjönöda kwösödaduwobö weta.

¹⁵ Jo̧kwaobetjö̧ jobe ju̧kwadökwö bakobe ösödinö kwö̧jaduwobö yöba̧lakwawö kwujunaduwoko jobadökwö pjakacha̧laduwapji jö̧ba̧lö. Jobadöma ba'ali tjujunena tjo̧'wo̧ jawa tjö̧wanalawö̧nö ösödö iyö ökwödönö tja̧dedena, ökwödökwö kwaduwi, jö̧ba̧lö. Chömöledö, jobadö tjösödawö̧ tjiyaja̧ kwakwawatjö kwukwaduwapji jö̧ba̧lö, jobadökwö yöba̧lakwawö kwujunaduwoko bakobe ösödinö kwö̧jaduwoböma.

¹⁶ Ja̧danö, jobadökwö pjabacha̧lö, ösödinö kwö̧jaduwitjö̧ma jobadötjö ya̧dönö, ökwödö tji̧tji̧mu ömadönö tjilekwo batjibanö weköbaduwena. Ikenama, jobadö ya̧döma idöda tjo̧'wo jawa tjö̧wanalawö̧nöma, kwi̧tji̧mu̧nöbi tjösödobö atjeba̧lena, ötjönö kabatibö.

¹⁷ Ja̧danö, kwo̧'wo jawa kwösödaduwawö̧nö kwotidaduwoko 'diyi jawatjö isobu baibanö tobö, isa'onö tokebaduwaja̧ o̧'wo jawama— yöba̧lijetö Isabenö Jo̧ma.

Ju'wibi ju'wi jawa Isabenö Jo̧ weina jawa

¹⁸ Ina webijetö Isabenö Jo̧ma Moisésnöma: —Imiamekwena, pan 'ye'yeachö̧kö̧ ba'ali kwanö kwujunaduwo. Ja̧danö, Abib mikwo̧ ja̧wo̧ Egiptotjö lakebinaduwobetjö̧ jo̧ba ja̧wo̧ kwujuno ja̧ ba'alima. Ja̧danö, ja̧ pan 'ye'yeachö̧kö̧ ba'alima jelemutjö dötölataja mölȩ baledibanö pan 'ye'yeachi̧kwö kwukwaduwoko, Egiptotjö lakebinaduwa weti̧danö.

¹⁹ Ja̧danö, okobe deinö kwi̧tji̧mu̧duwi ömadötjö abönö damönö ötjönö kabebö kwi̧sebaduwo, ökwö weköbi̧da tjösödobö ökwönö wainö dujunawö̧, jö̧ba̧lö. Ja̧danö, kwa̧jwi̧mu̧duwibi ömadötjö abönö damönö wainö kwujunaduwo ötjönö iyawedö batjibanö. Okobe deinö pa̧ka̧yö̧ tji̧tji̧mu̧tjö̧ ömadönö abönö damönö, ja̧danö o̧bȩja̧dö tji̧tji̧mu̧tjö̧ ömadönö abönö damönö, ja̧danö chi̧wo̧dö tji̧tji̧mu̧tjö̧ ömadönö abönö damönö ötjönöda iyawedö batjibanö wainö kwujunaduwo.

²⁰ Ja̧danö, bu̧lu̧dö, Diosnö iyawö̧kö̧dö tji̧tji̧mu̧tjö abönö pöenö balekwa mikwo̧nö kwimidaduwobö jo̧be, o̧bȩja̧dö tji̧tji̧mu̧tjö bakwo̧nö iyö, obejama bulu abönö pöe balekwa mikwo̧ baibanö. Jo̧kwaijayonö obejanö bulu abönö pöe jawanö imidawobö kwöpöjöditjö̧ma, bulu abönö pöenö u̧lu̧mȩ'a̧nö 'debatö kwaköbaduwobö jo̧be. Ja̧danö, ökwödö kwi̧tji̧mu̧duwi ömadötjö abönö damönö, ötjönö kabebö kwi̧sebaduwajawö̧nö tjimikwa kwimidaduwobö jo̧be. Ja̧danö, okobe deinö ötjönö ösödö tjichena, tjiyakwa̧kwöda tjichejebobö jo̧be. Jwiböma tjichoko.

²¹ Ja̧danö, bakwöta semanakwena jelemutjö bakwöta mölȩkwena kwotidaduwo. Jo̧kwaijayonö jelemutjö dötölataja möle baibenama kwö'wachaduwobö jo̧be, otidökönö. Batjo junawa mölȩbiyabi, ja̧danö batjo kwujuninaduwatjö kwmaduwi̧ mölȩbiyabi kwö'wachaduwo otidökönö jelemutjö dötölataja mölȩ baibena, bakwöta semanakwena.

²² Ja̧danö, bakwöta o̧bakwena ba'ali kwujunaduwo, batjonö kwujuninaduwatjö ajayinö pokwi̧ 'wiawa ba'ali mikwi̧. Ja̧ ba'ali kwujunaduwena, trigo batjonö kwujuninaduwatjö ajayinö pokwi̧ kwiyaduwo ötjönö omukwatö. Ja̧danö, ju'wi ba'alibi kwujunaduwo, bajaleapo pokwi̧ 'wibö e'dawa ba'ali mikwi̧ma.

²³ Ja̧danö, ju'wi jawabi wetakwö. O̧ba Bakwabakwena wa̧ptakwanö ko̧ko̧kwaduwobö jo̧be, Israel jojodötjö okobe deinö ömadöma ötjönö, Isabenö Jo̧ Diosnö, ökwödö kwösödaduwökwe Diosnöma.

²⁴ Ja̧danö, ötjöma a'dewö lotakwo̧sa ju'wedönö, kwuju̧kwaduwakwemi babe ju̧kwadönöma. Ja̧danö, jobe kwujukwaduwakwemima jwiinö jalobe baibanö pjatatakwo̧sa. Ja̧danö, ökwödö ömadöma ötjö, Isabenö Jo̧, kwösödaduwökwe Dios chöba a'otjö kwö̧jaduwobö kwi̧'yaduwena, imiamebi, o̧babi wa̧pötakwanö, kwo̧'wo tjö̧bekwökönö kwi̧'yaduwoko, di̧'yaja̧ okobema döpöjojodöma ölakwabikwawö tjichena, jö̧ba̧lö. Tjichokobe. Deköbaduwonö pjatatocha kwöpöjojodöma ökwö kwö̧jaduwemima emö tjichokobö.

²⁵ Ja̧danö, ötjönö kwabö lotjajökwenö juwö kwiyaduwena sule pan 'ye'yeachö̧kö̧ panda bakwobe kwiyaduwo. Ja̧danö, ba'ali kwujunaduwena, damötjö̧ kwejuduwi wame chöbaledina omukwatö ba'ali̧, kwabö lotjajawö̧ o̧bȩja̧dö tjitebiyama ja'yubebi kwu'yudaduwoko ju'wi dewachö baibanöma.

²⁶ Ja̧danö, ötjö chejube kwichejebaduwo batjo kwujuninaduwatjö ajayinö wa̧ji̧tjö, ötjönö, Isabenö Jo̧nö iyö, kwösödaduwökwe Diosnöma. Ja̧danö, chiwo itji̧nö, ja̧danö, obeja itji̧nö, ja̧danö bakaya itji̧nö kwukwaduwobö toköbaduwena, kwukwaduwakwo̧ iteda ojo'do o̧do̧'bi̧sobunö toköbaduwoko— jejenö webijetö Isabenö Jo̧ma Moisésnöma.

²⁷ Ja̧danö, Isabenö Jo̧ma webijetö Moisésnö: — Moisés, ötjö weti̧ ökwönö yötawi̧ma wȩyudi. Ja̧ weti̧ma chiyobetjö̧ ökwökwö chiwenema yöbawö chujunajabe, ökwökwöbi, ja̧danö, okobe deinö Israel jojodökwöbi— yöba̧lijetö Isabenö Jo̧ma Moisésnöma.

²⁸ Ja̧danö, Moisésma jobe mö'ösa'o wa̧pekwa'o ji̧jetö Isabenö Jo̧kwö cuarenta mölȩ, cuarenta yö̧te baledibanö. Jo̧be ja̧nö kwanöbi kwijökötö, ja̧danö, owöbi owijökötö. Ja̧danö, inabiyanö 'dȩbö wȩyudijetö Isabenö Jo̧ wei̧ma, iteda yöbawö junö iwene, dötölataja weawa jawama.

²⁹ Jemi ikenama, jobetjö yutubajijetö, inabiya döbölataja iyabiyama e'ewö, dötölataja weawa jawa wȩyukwa öbiyama. Yutubajo̧ma öba salöijetö Isabenö Jo̧kwö yöa̧lajabetjö̧. Jo̧kwaijayonö Moisésma wajwibijetö öba salöi̧ma.

³⁰ Ja̧danö, Aarón, ju'wedö Israel jojodö Moisésnö tjedemi, ¡ayö! öbanö salöbo̧, jö̧ba̧lö, jo̧ba ö̧jobekwö tji̧'yawibobö yebabijadötö.

³¹ Yetjabiökwe jobadönöma, yebabökökönö ichaduwi, jö̧ba̧lö, jwöbijetö Moisésma. Jwöiawö̧ Aarón, ju'wedö Israel jojodötjö la'aka luwedö Moisés ö̧jobekwö 'yawibajijadötö. Ja̧danö, jobadönö yöba̧lijetö Moisésma.

³² Jemi ikenama okobe deinö Israel jojodöma Moisés ö̧jobekwö 'ya̧wibijadötö. 'Ya̧wibajadönö yöbawijetö Moisésma okobe jwiinö Isabenö Jo̧ jo̧banö yöawaja̧ma Sinai mö'ösa'o wa̧pekwa'onö ö̧jena.

³³ Jemi ikenama, jojodönö yöbawö kaatena, Moisésma öba i̧sa̧do̧nö muchekwa̧lijetö.

³⁴ Ja̧danö, ja̧ mölȩtjö tupakwö Isabenö Jo̧kwö yöa̧lakwawejunö teachena, öba muchekwado̧ kabekwiabijetö teachakwa̧ abönö. Jemi ikenama, jejutjö laebajena Israel jojodönö yöbawiabijetö okobe jwiinö Isabenö Jo̧ jobadönö yöawobö weaja̧ma.

³⁵ Ja̧danö, Moisés Isabenö Jo̧kwö yöba̧lö laebajena Israel jojodöma Moisésnö edemi öba salöbo̧nö edijadötö. Jo̧kwaobetjö̧ Moisésma yemidanö i̧sa̧do̧ muchekwa̧lijetö öbanö, yemidanö Isabenö Jo̧kwö yöba̧lö teachenanö kabatö.