Éxodo 33 - Dios Iwene

Isabenö Jo̧ Israel jojodönö Sinaí mikwawa'o jobetjö latjebobö weina jawa

¹ Isabenö Jo̧ma Moisésnö webijetö: — Moisés, jojodönö, Egiptotjö öbibö lakebinawö̧nö betjöma öbibö kwi̧'yo damötjö̧ Abrahamnö, Isaacnö, Jacobnö ötjöda chiwene yöbawö chujuninemikwö. Jobadönö ötjöda chiwene yöbawö chujunijatö. Bemi nijima ökwötjö tupadanö jojodönö chiyocha, jö̧ba̧lö. Jobekwö kwömöledönö öbibö kwi̧'yo.

² Ja̧danö, ötjö wetökwe ángelma kwabönöduwinö i̧'yakwo̧. Ja̧danö, kwi̧'yaduwobema a'dewö lotocha ju'wedönö, jobe ju̧kwadönöma, cananeo jojodönö, amorreo jojodönö, heteo jojodönö, ferezeo jojodönö, heveo jojodönö, jebuseo jojodönö.

^3-5 Kwi̧'yaduwakwemima jwiinö otiwobe, ja̧danö, a̧ji̧kwakwawedönö tjöbötjatemi otiwobe, ja̧danö batjo kwujunaduwakwemibi otiwobe. Jo̧kwaijayonö ökwödökwö chi'yökö, jojodöma tjuu 'dibadötjobetjö̧. Ja̧danö, jobadöma tjuu 'diinö yemidanö sulabenö ja̧tji̧tjö̧ ja̧danö, jobadönö cho̧'wo sulinö edö söbebö lotapji jö̧ba̧lö, chi̧'yökö ökwödökwö. Ja̧ yötawi̧ma jojodönö yökawo Moisés. Ja̧danö, ju'wibi yökawo jobadönöma: otikwökönö tjö̧jo, jwiinö otiwi̧ kamisi 'dubawökönö, ja̧danö, ju'wi jawabi ju'wi jawa la̧wo̧sopja, tjime'asakosopja, tjötjö'asa̧ki̧ju̧ nönökönö. Ikenama jejenö tjö̧jobe edö omukwatö chujunocha ökwödönö lȩtebakwa̧ma— webijetö Isabenö Jo̧ma Moisésnöma, Israel jojodönö yöawobö. Ja̧danö, Moisésma jobadönö Isabenö Jo̧ yöa̧li̧ yöawiawö̧ jwiinö tjo̧'wo̧ tjo̧bekwö ju̧kwijadötö. Ja̧danö, tju̧kwa kamisi jwiinö otiwi̧ jawa kamisima 'dubawijökötö, ja̧danö ju'wi jawabi ju'wi jawa nönaakwawa jawama ölawi lawijöködötö.

⁶ Ja̧danö, ja̧ mölȩtjö, Sinai mö'ösa'otjö latjebemitjö̧ tupakwöma Israel jojodöma jwiinö otiwi̧ jawa kamisima 'dubawijöködötö, ja̧danö ölawi lawijöködötö.

Moisés Isabenö Jo̧kwö yöa̧lakwawejunö teachina wene

⁷ Ja̧danö, Israel jojodöma kwebachö 'ya̧jadö jelobe, jelobebi ichö tjejubiya i̧sa̧do̧tjö̧ debatö juniabijadötö. Ja̧danö, Moisésma tjejubiyanö tjuju̧kwemitjö ödönönö jeleju i̧sa̧do̧tjö debatö junijetö. Jejuma, wainöseju, Isabenö Jo̧kwö yöda̧lakwaweju, jö̧ba̧lö, öbabijetö Moisésma. Ja̧danö, bakwo̧ Isabenö Jo̧nö aebobö jö̧alena jeju jo̧bekwö 'yi̧abijetö, jojodö tjuju̧kwemitjö ödönönö.

⁸ Ja̧danö, Moisésma jeju jobekwö i̧'yena okobe deinö jojodöma tjejukwena apjudenö eda̧liabö ji̧abijadötö jejunö teachobema.

⁹ Ja̧danö, Moisésma jeju okwa teachena ojwiyo'wo ja'da'daa'woma mölejebetjö jwibachö jamatiaijetö eju teachakwawemi. Ja'wotjö Isabenö Jo̧ma Moisésnö yöba̧liaijetö.

¹⁰ Ja̧danö, jojodöma ja'wo edö okobe deinö idöda tjejukwena apjudenö ja̧matö tjöba bȩbachibö nijakwö tjuunö Isabenö Jo̧nö ösödiabijadötö.

¹¹ Ja̧danö, Isabenö Jo̧ma Moisésnö jweinö jöba̧liabijetö,bakwo̧ iteda yö̧ne ömöledöso̧nö dösölö̧jinö yöa̧li̧danö. Yöba̧lö kabatibö Moisésma ȩwa̧jijetö Israel jojodö tjuju̧kwobekwö. Jo̧kwaijayonö Moisés ömöayo̧, Josué mikwo̧ma, ȩwa̧jökönö jejunöda ji̧abijetö.

Isabenö Jo̧ Moisésnö yöbawö ujunina jawa, chömöledökwö chö̧jakwo̧sa, jö̧ba̧lö, ja̧danö, ötjö salöinö dejatö chi̧sekwi̧ kwedaduwakobe, jö̧ba̧lö

¹² Ja̧danö, Moisés yöba̧lijetö Isabenö Jo̧nö: — Ökwöma weköbijatö ötjönö bidö Israel jojodönö belö labebö öbibö chi̧'yobö jelobe, kwi̧sebakwemima. Ja̧danö, yöka̧lijatö, Moisés chöwaisa ökwönöma, omudawö chujunökweja, jö̧ba̧lö, jö̧ba̧lö. Jejenö yöka̧lijayonö ötjönö pjabatö i̧'yobö weköbökwema ¿tida? Yöka̧lijökötö.

¹³ Jo̧kwaobetjö̧ ökwönö ateba: Isabenö ötjönö edö, otiwanö omukwato̧, jö̧ba̧lö, kwösöditjö̧ma ja̧köbakwa̧ kwomukwati̧ma yöbawitjö, ökwönö chöwaisemitjö̧ bajalekwönönö chöwaisakobetjö̧. Ja̧danö, ba̧kwȩlö̧jatebö kwösödi̧danö otiwanö omukwatö chö̧jakobetjö̧ yöbawitjö ja̧köbakwa̧ kwomukwati̧ma. Ja̧danö, omukwati: Ökwödö Israel jojodöma ökwöda omudawö kwujuninawö̧sa, ökwöda kwömöledö badibanö— yö̧ba̧lijetö Moisésma Isabenö Jo̧nö.

¹⁴ Ja̧danö, Isabenö Jo̧ma Moisésnö atadijetö: — Moisés ötjödasa ökwönö öbibö i̧'yakwo̧ma. Ja̧danö, pjatatocha kwo̧'wo̧ tjo̧bekwökönö kwi̧'yobö— atadijetö Isabenö Jo̧ma.

¹⁵ Ja̧danö yöba̧lijetö Moiséma: —Isabenö Jo̧, otiwanö yöka̧la, ökwönö öbibö chi̧'yocha, jö̧ba̧lö. Ökwödökwö kwi̧'yökötjö̧ma betjö ladebobö weköboko.

¹⁶ Ökwödönö öbibö kwi̧'yo ju'wedöma edö tjöwaisakobetjö̧, Isabenö Jo̧ma Moisésnö, ja̧danö okobe deinö Israel jojodönö dösölö̧jinö edo̧, jö̧ba̧lö. Ja̧danö, ökwödökwö kwi̧'yitjö̧ma ju'wedöma tjomukwatena, Aaa, Idöma ju'wedö böjȩnö ju̧kwadötjö wainö ju̧kwadö, jö̧ba̧lö— yöba̧lijetö Moisésma.

¹⁷ Ja̧danö, Isabenö Jo̧ma Moisésnö atadijetö: —Moisés, ökwö akebi̧danö ökwödönö öbibö chi̧'yakwo̧sa, ökwönö dösölö̧jinö chedobetjö̧, ja̧danö, ökwönö chöwaisobetjö̧, omudawö chujuinökwe, jö̧ba̧lö— atadijetö Isabenö Jo̧ma Moisésnöma.

¹⁸ Ikenama Moisés abebijetö Isabenö Jo̧nö: —Isabenö Jo̧, ökwönö ateba, ökwö salöinö kwidejati̧ma chöba a'otjö baledö kwi̧sekwo—

¹⁹ aebiökwe: —Moisés, kwöba a'otjö chöbaledocha ötjö jwiinö chotiwi̧ma kwedobö. Ja̧danö, baledö ötjö chimi jweinö jwöbebö yöta̧locha ökwönöma, Isabenö Jo̧ mikwawo̧sa, jö̧ba̧lö. Ja̧danö, ötjöma dösölö̧jinö edö pjatatökwenö dösölö̧jinö edö pjatatakwo̧sa, ja̧danö lȩlö̧jinö edö pjatatökwenö lȩlö̧jinö edö pjatatakwo̧sa.

²⁰ Jo̧kwaijayonö ötjö chöba kwedoböma jwiya Moisés, debö kwi̧'yapji jö̧ba̧lö. Bakwo̧ ötjö chöba editjö̧ma debö i̧'yakwo̧.

²¹ Jo̧kwaobetjö̧ ¡a̧ja̧kwi! ötjö chipeanö inaba nöaba jo̧be. Chöbaledena jawanö kwöjamato.

²² Ja̧danö, ötjö salöinö dejatö i̧sekwö chöbaledena inaba 'da̧lanö chotojocha, ja̧danö kwöbabi chumuchebocha chömamunö kwedokobö chöbaledenanö kabatö.

²³ Chöbaledaja̧ ikena chömamu katekwocha, choma'ada kwedinö. Jo̧kwaijayonö chöba kwedökakobe.