Éxodo 32 - Dios Iwene

Israel jojodö pakaya itji̧danö ichejekwo̧ tjo̧'wo̧ jawa tjotidajökwenö tjösödina jawa

¹ Moisésma mö'ösa'onö lekwe yutubajökönö ö̧jiawö̧ Israel jojodöma Aarón ö̧jobekwö 'ya̧wibö abebijadötö: —Moisés, ökwödönö Egiptotjö labebö öbibajinama dea. Taji waekwinajö wajwida. Jo̧kwaobetjö̧ do̧'wo̧ jawa juluwanö kwotido dökömanö öbibö 'yo̧nö— abebijadötö Israel jojodöma Aarónnö.

² Jejenö atjebökwe: —Jao kwatjö̧ma, o̧'wo jawama orotjö otikwo̧obetjö̧ okobe jwiinö orotjö otikwa kwujunala̧duwi sasiyuma jebatö kwiyaduwo, kwilekwoduwi ju̧kwabi kwi̧tji̧mu̧ ömadö, ya̧dö tju̧kwabi— weawö̧

³ a̧ja̧kwijadötö. Okobe deinö orotjö otikwa sasiyubiyama jȩbatö e'ewijadötö Aarónnö iyö.

⁴ Ikenama Aarónma ja̧ orotjö otikwa tjiyaja̧ ökwölanö tubinö tobajo̧ isobuma tjobebijetö isa'onö, pakaya itji̧danö ichejekwo̧ o'wo jawa baibanö. Jejenö otidijetö Aarónma pakaya itji̧danö ichejekwo̧ o̧'wo̧ jawa. Israel jojodöma Aarón otidajökwenö edö jö̧ba̧lijadötö: — Ökwödö Israel jojodö dösödökwe dios biteda. Biteda Egiptotjö ladebinö öbibö pjabatinama— jö̧ba̧lijadötö.

⁵ Ja̧danö, Aarónma jobadö tjo̧'wo̧ jawa tjösödobe edena juwö iyawemi otidijetö, pakaya itji̧ o̧'wo̧ jawa badeibö, o̧'wo jawa ösödö tjiyobö. Ikenama yöba̧lijetö okobe deinö: —Itekwayima ba'ali̧ Isabenö Jo̧nö ösödö— yöba̧lijetö.

⁶ Ja̧danö, ju'wi dewachö, yȩayi wiluibö jojodöma a̧ji̧kwakwawedönö öbibö 'yi̧jadötö juwö iyawobekwö, a̧ji̧kwakwawedönö juwö iyö. Ja̧danö, ju'wedö tjiyawö̧nöbi juwö iyö öbibö 'yi̧jadötö Isabenö Jo̧kwö wene jwiinö tjö̧jakobetjö̧ iyawama. Juwö tjiyaja̧ ikena bamatijadötö tjukwobö, ja̧danö o̧'do̧bu̧ tjowobö. Kwanö owö katjataja̧ ikenama sulabenö obö baile 'döbijadötö.

Isabenö Jo̧ Israel jojodönö jwiinö ölabina jawa

⁷ Ja̧danö, Isabenö Jo̧ma, ina Moiséskwö mö'ösa'onö ja̧nö yöbawijetö Moisésnö: —Moisés bi'otjö yutubaji̧ kwömöledönö kwedo. Jobadö Egiptotjö lakebinawö̧ma tjomajadenö jwiinö sulabenö omukwatö tjö̧jobe.

⁸ Ida̧kö ötjö wetina a̧ja̧kwökönö lotjajabe. Jobadöma orotjö otikwa ökwölanö tubinö tobajadö isobu isa'onö tjotjebinobe, pakaya itji̧danö ichejekwo̧ laebinö. Jemi ikenama o'wo jawa ösödö juwö tjiyajabe a̧ji̧kwakwawedönöma. Ja̧danö, yötjalobe, Ökwödö Israel jojodö dösödökwe dios biteda, jö̧ba̧lö. Biteda Egiptotjö ladebinö öbibö pjabatinama, jö̧ba̧lö, yötja̧lobe— yöbawijetö Isabenö Jo̧ma Moisésnöma. Ina yöbawijetö:

⁹ —Moisés, jobadö kwömöledönö chöwaisawö̧, yelösöda tjuu 'dibadö.

¹⁰ Ötjöma cho'wo sulinö cheda jobadönöma, söbebö lotakwawö̧, jö̧ba̧lö. Akeboko ötjönöma, kwo̧'wo̧ sulinö kwedoko jobadönö,ja̧danö söbebö lököboko, jö̧ba̧lö. Söbebö lotobö chösöda, ökwöda kwö̧jibinö. Moises ökwötjö tupadanö jojodöda tjitebotjö kwö̧ba̧jekwachaduwinö, ja̧danö juluwadö batjibanö pjatatakwo̧sa, juluwadö baibanö— yöbawijetö Isabenö Jo̧ma Moisésnöma.

¹¹ Jejenö yöawiökwe Moisésma Isabenö Jo̧nö, iteda ösödökwe Diosnö, budekwabinö abebijetö: —Isabenö Jo̧, ¿tajawedö kwo̧'wo sulinö kwedobeda kwömöledönö, Egiptotjö jwiinö kwujulunö latjebinö pjakatinawö̧nöma?

¹² Jobadönö söbebö loköbitjö̧ma Egipto jojodöma sulabenö yötja̧lena, Israel jojodö tjösödökwe Diosma jobadönö mö'ösa'ijunö söbebö lootö jö̧ba̧lö öbibö i̧'yinobe, böjȩnöma detjakobetjö̧, jö̧ba̧lö. Isabenö Jo̧, kwo̧'wo̧ sulinö kwedoko, ja̧danö jobadönö söbebö loköbobö kwomukwati̧ kabatibö kwöbalewo, jobadönö söbebö lobökönö.

¹³ Omukwati ajayinö da'dödöminenö yöbawö junö yöka̧linama, kwömöayedö Abrahamnö, Isaacnö, Jacobnö. Ökwöma kwiminöda wanedö yöbawö kwujuninobe jobadönö, ökwödötjö tupadanö jojodönö mölejȩbe lö̧jadö si̧li̧'i̧dödanö tjöba̧jekwachinö pjatatakwo̧sa, jö̧ba̧lö. Ja̧danö yöbawö kwujuninobe, okobe jwiinö nijima, chiyocha ökwödötjö tupadanö jojodönö ba̧kwȩlö̧jatebö idöda tjitebo baibanö. Isabenö Jo̧, omukwati ja̧ yöbawö kwujuninama Abrahamnö, Isaacnö, Jacobnö. Kwömöledönö söbebö loköboko— budekwabinö abebijetö Moisésma Isabenö Jo̧nöma.

¹⁴ Ja̧danö, Isabenö Jo̧ma, iteda omukwati̧ kabatibö balewö lobijetö, ömöledönö söbebö lobökönö.

Moisés Isabenö Jo̧nö aebina jawa, Israel jojodönö söbebö lököboko, ötjönöda söböbö lobi, jö̧balö

¹⁵ Ikenama, Moisésma Isabenö Jo̧ ö̧jelö jalachibö yutubajijetö mö'ösa'otjö. Öbiya döbölataja jawa öbiya, bakwabakwena bakwachabanö Isabenö Jo̧ wei̧ wȩyukwa öbiya e'ewö yutubajijetö.

¹⁶ Ja̧ öbiyama Diosda 'dobö otidinabiya, ja̧danö Diosda wȩyudijetö iteda wei̧ma ja̧ öbiyanö.

¹⁷ Ja̧danö, Josué mö'ösa'o ja'ö te'ada̧lö jo̧ma Israel jojodö labinö jwötjeba̧lobe a̧ja̧kwijetö. Jo̧kwaobetjö̧, Moisés yutubajö ichenama jo̧banö yöba̧lijetö: —Moisés, dömöledö tjö̧jobema labinö jwötjeba̧lobe, ju'wedöma ölabikwawö tjichajena— yöba̧lijetö.

¹⁸ Ja̧danö, jejenö yöalökwe Moisésma: —Jao ötjöbi cha̧ja̧kwa, jo̧kwaijayonö tjujuluwi̧ jwötjebi̧danö ökwöokobe, ja̧danö, tjujuluwawö̧ budekwinö jwötjeba̧li̧danö ökwöokobe. Cha̧ja̧kwemi lo̧böda labinö lo̧tjobe— atadijetö Moisésma.

¹⁹ Ikenama, Moisésma Israel jojodö tjö̧jobe ichibö pakaya itji̧danö ichejekwo̧ o̧'wo̧ jawa, ja̧danö jojodö baile 'dötjobe edö o̧'wo̧ jwiinö sulachibijetö. O̧'wo̧ jwiinö sulachibajobetjö̧ jobe mö'ösa'o la'akatjö öbiya döbölataja jawa öbiya nijakwö labinö ikwö 'dabebijetö.

²⁰ Ikenama, tjotidajökwe pakaya itji̧danö ichekwo̧ o̧'wo̧ jawa tötöbö ökwölanö lobö juwijetö, oroma isobuda baibanö. Jemi ikenama jobu tiyuwachajena pjewö̧ko̧pja̧da baibanö 'do'dobijetö. Jo̧pja̧ lilibijetö ojwe ja'yuwödönö. Lilibö kabatö webijetö Israel jojodönö jödötjö tjowobö.

²¹ Ikenama Moisés abebijetö Aarónnö: —Chöpöe, ¿tajawedö yökawinököda jojodönöma, sulabenö ja̧köbaduwoko, jö̧ba̧lö? ¿Taji ja̧tjaja̧da ökwönöma ja̧ jwiinö suli̧ jawa ja̧tjobö weköbobö? —abebö a̧ja̧kwökwe:

²² —Chuluwo̧, kwo̧'wo sulinö kwedoko ötjönöma. Kwöwaisa jobadönöma, idöda sulabenö omukwatö tjujuni̧danö ja̧tjobö isakwadö.

²³ Ötjönö atjebijatö, do̧'wo̧ jawa juluwanö kwotido dökömanö öbibö 'yo̧nö, jö̧ba̧lö. Ja̧danö jö̧ba̧lijadötö, Moisés, ökwödönö Egiptotjö labebö öbibajinama dea. Taji waekwinajö wajwida.

²⁴ Jo̧kwaobetjö̧ wetijatö, okobe jwiinö orotjö otikwa kwujuna̧laduwi̧ sasiyuma jȩbatö kwichejebaduwiotjö. Jejenö wetiawö̧ orotjö otikwa tjujuna̧laduwi sasiyu jȩbatö tjichejebijatö ötjönö iyö. Ja̧ sasiyu ökwölanö lotaja̧ ikena ¡ayö! ite pakaya itji̧danö ichejekwo̧ o̧'wo̧ jawa laebijatö— jö̧ba̧lijetö Aarónma Moisésnöma.

²⁵ Ja̧danö, Moisésma Israel jojodönö edö ¡ayö! Aarónma jobadönö jweinöma öibinokobe, obadöda batjibanö. Ja̧danö, döpöjojodö bidönö edö, omukwatöködödanö ichejekwadö, jö̧ba̧lö, tjomukwatena.

²⁶ Ikenama Moisésma jojodö tjuju̧kwobe teachakwawemi jamatö yöba̧lijetö: —Chömöledö, Isabenö Jo̧nöda ösödadöma baikwö ichibaduwi— webijetö. Jejenö weiawö̧ okobe deinö Levisaso ju̧kwadöma Moisés ö̧jobekwö 'ya̧wibö ko̧ko̧kwijadötö Moiséskwö. Sule jobadöda Moisékwö 'ya̧wibö ko̧ko̧kwijadötö.

²⁷ Ja̧danö, Moisésma yöbawijetö jobadönöma: —Isabenö Jo̧, ökwödö dösödökwe Diosma weobe ökwödönö baikwö: Bakwo̧nökwena kwölöte'obiya a̧ja̧tjo̧nö yubibö kwi'yaduwo kwö̧jaduwemi okobe jwiinö, bemi teachakwawemitjö, jelemi teachakwawobekwö, jelemi teachakwawobekwö, okobe jwiinö. Ja̧danö, jobe 'ya̧nö tibatö loköbaduwo okobe deinö kwömöledö ömadönö, kwöja̧wo̧dönöbi, kwejubiya pjeanö ju̧kwadönö ömadönöbi— weiawö̧

²⁸ Levisaso jojodöma Moisés wei̧danö a̧ja̧kwö ja̧ mölȩma tres mil jenanö tjömöledö ömadönö tibatö lobijadötö.

²⁹ Ikenama Moisésma jö̧ba̧lijetö jobadönö, Levisaso jojodönöma: —Chömöledö Isabenö Jo̧ma ökwödönö weajabe ökwödöda kwömöleduwinö kwabö loköbaduwobö. Jejenö weawö̧ yö̧ne kwömöledötjijayonö kwabö loköbajabe jobadönöma, Isabenö Jo̧ wei̧ a̧ja̧kwadösa, jö̧ba̧lö. Jo̧kwaobetjö̧ babe mölȩ jejenö Isabenö Jo̧ wei̧ kwa̧ja̧kwaduwajabetjö̧ ökwödöma kwi̧sebaduajabe, Isabenö Jo̧ 'da̧batö ujuninawö̧sa, iteda wei̧ a̧jakwö dotidobö, jö̧ba̧lö. Jejenö kwa̧ja̧kwaduwajiökwe Isabenö Jo̧ma ökwödönö dösölö̧jinö edö pjaatakwo̧— jö̧ba̧lijetö Moisésma.

³⁰ Ju'wi dewachö Moisés yöba̧lijetö Israel jojodönö: —Chömöledö, ökwödöma jwiinö sulabenö ja̧köbajabe, kwo̧'wo̧ jawa ösödö. Jo̧kwaobetjö̧ babema yemidanö mö'ösa'o chönöchaja Isabenö Jo̧nö abebö, ökwödönöma. Jo̧banö atebitjö̧ma sulabenö ja̧köbaduwaja̧ söbebö loena.

³¹ Jo̧kwaobetjö̧ Moisésma mö'ösa'o nöchajo̧, Isabenö Jo̧ ö̧jobekwö ichö jö̧ba̧lijetö: —Isabenö Jo̧, chömöledöma jwiinö sulabenö ja̧tjajabe, orotjö otikwa tjo̧'wo̧ jawa tjotidökwenö ösödö.

³² Jo̧kwaobetjö̧ babema ökwönö ateba, jobadö sulabenö ja̧tji̧ söbebö lobi, jö̧ba̧lö, kwösöditjö̧ma. Ja̧danö, jobadö sulabenö ja̧tji̧ söbebö loköbobö kwöpöjöditjö̧ma, ökwö kwömöledö tji̧mi̧ wȩyukwa'yetjö sule ötjö chimi ¡söbebö lobi!— abebijetö Moisésma Isabenö Jo̧nöma.

³³ Jejenö aebiökwe: — Sule ötjönö sulabenö ja̧badöda tjimi söbebö lota chömöledö tjimi wȩyukwa'yetjö, ökwö kwimi söbebö lotökö— atadijetö Isabenö Jo̧ma Moisésnöma.

³⁴ Ina yöba̧lijetö: —Ja̧danö, babema yutubaji jojodönö öbibö kwi̧'yo jelobe, ökwönö yöta̧linemi jobekwö. Isabenö, ötjö wetökwe ángelma ökwödö kwabönöduwinö i̧'yakwo̧, jö̧ta̧linemi nijibe otiwanö kwichibaduwobö. Ja̧danö, jobe kwichibaduwobö pjatatijayonö kwömöledötjö sulabenö ja̧bajadönö lȩtebakwo̧sa salabenö ja̧tji̧ balekwa mikwanö.

³⁵ Jemi ikenama Isabenö Jo̧ma labinö tjö'wöchi̧ jawa webijetö Israel jojodönö, pakaya itji̧danö ichejekwo̧ o̧'wo jawa otidobö wetjinobetjö̧ Aarónnöma, ja̧ o̧wo jawa tjösödobö.