Éxodo 31 - Dios Iwene

Dios öbibö pjaatina wene iteda eju, eju okwa junawi̧ otikwa, ja̧danö jo̧batjö jojodötjö tjö'da̧denö pjabatadö 'dutjawakwa̧ kamisi 'dö̧awabi tjöwaisakobetjö̧

¹ Isabenö Jo̧ma yöba̧lijetö Moisésnö:

² — ¡Moisés a̧ja̧kwitjö! Kwömöledöso̧ Bezaleel mikwo̧nö omudawö chujunijatö, ökwödötjö Judásaso jojo, Urí itji̧, ja̧danö Hur ö'dö̧nö.

³ Ja̧danö, ötjö Cho̧'wo Luwo̧ma Bezaleel o̧'wo̧ luwo̧nö pjabatö öibobe, o̧do otikwa jawa jwiinö otiwanö otido̧ baibanö, ja̧danö o̧do okwa jawa otikwabi. Ju'wi jawa, ju'wi jawabi o̧do otikwa jawa okobe jwiinö waisö otiwanö otido̧.

⁴ Okobe jwiinö ja̧ otikwa, jwiinö otiwi̧ jawa omukwatö ujunobö öbibö pjabato̧ Cho̧'wo Luwo̧ma jo̧banöma, orotjöbi, platatjöbi, broncetjöbi, jwiinö otiwanö otidobö.

⁵ Ja̧danö, inawiya oledö, ikenama ja̧ oledaja̧ inawiyama orotjö otikwa ötebiyanö pöchö, ja̧ otikwa öwaisobö öbibö pjabato̧ Cho̧'wo̧ Luwo̧ma, Bezaleel o̧'wo̧ luwo̧nö. Ja̧danö, towitjö 'dȩbö otikwabi jwiinö öwaisobö öbibö pjabato̧ ötjö Cho̧'wo̧ Luwo̧ma. Ja̧danö, ju'wi jawa, ju'wi jawabi otikwa öwaisobö öbibö pjabato̧ Cho̧'wo̧ Luwo̧ma Bezaleelnö.

⁶ Ja̧danö, jelo̧nöbi omudawö chujunijatö Bezaleelkwö pjabatö otidobö, Aholiabnö, Ahisamac itji̧, Dansasotjö jojonöma. Ja̧danö, jo̧banö, ju'wedö ömadönöbi okobe jwiinö ökwönö wetina otiwanö tjotidobö tjöwaisakobetjö̧ pjabato̧sa.

⁷ Ja̧danö, jobadö tjotidakwa̧ma bi̧ya: Ökwödö kwö'da̧deduwinö chö̧jakweju, ja̧danö ötjö wetina inabiya wȩyukwa a̧ja̧pjo, ja̧danö japjo muchekwapi, ja̧danö okobe jwiinö cheju okwa jawa.

⁸ Ja̧danö, mesasöte, ja̧danö mesasötenö wa̧ji̧kwö, ja̧danö deju̧wa'yu o̧'di̧ju̧ ja̧ka bakwai̧ orotjö otikwaka okobe jwiinö ja̧kanö ju̧kwi̧kwö, ja̧danö isapjo söinö 'dö̧ekwi̧ juwawapjo.

⁹ Ja̧danö, jelepjo juwö iyawapjo okobe jwiinö japjo ju̧kwi̧kwö, ja̧danö tjömamiju tjömasapiya dichawa'do broncetjö otikwa'do ja'do isa'dokwö.

¹⁰ Ja̧danö, ötjötjö jojodötjö dö'da̧de pjabatadö Aarón, Aarón i̧tji̧mu̧, ötjö wetina a̧ja̧kwö otidadö 'dutjawakwa̧di̧ju̧ jwiinö otiwi̧ kamisi 'dö̧awa tjöwaisakobetjö̧ pjabato̧sa.

¹¹ Ja̧danö, jobadönö pjabato̧sa tjöwaisakobetjö̧ ötjötjö jojodötjö dö'da̧denö pjabatadönö tjuunö toekwa o̧tesobu otikwa, ja̧danö söinö 'dö̧ekwa'be otikwa, cheju inesösȩko̧ söinö 'dö̧ekwa'be juwawapjonö juwawa'bema— jejenö yöba̧lijetö Isabenö Jo̧ma Moisésnnöma.

Otikwö̧kö̧ mölȩ weina jawa

¹² Ja̧danö, webijetö Isabenö Jo̧ma Moisésnöma:

¹³ —Moisés weköbo Israel jojodönö ötjö weti̧danö a̧ja̧kwö tjotidoko otikwö̧kö̧ mölȩma. Ja̧danö, ökwödö babe ju̧kwadöbi, ökwödötjö tupadanö jojodöbi jejenö a̧ja̧kwö kwö̧jaduwobö jo̧be, otikwö̧kö̧ mölȩ otidökönö. Ja̧ mölȩ otidökönö kwö̧jaduwobetjö̧ kwöwaisachibaduwakobe, ökwödöma Isabenö Jo̧ wainö ujuninawö̧sa, ja̧danö, jo̧ba weina a̧ja̧kwadösa, jö̧ba̧lö.

¹⁴ Jo̧kwaobetjö̧ ja̧ mölȩ weti̧ jawama a̧ja̧kwö kwö̧jaduwobö jo̧be, inesö mölȩobetjö̧, ja̧danö ökwödönö pjabatö wainö chujunina mölȩobetjö̧. Ökwödötjö bakwo̧ ja̧ weti̧ kabatibö otiditjö̧ma, jo̧kwada mölȩ, jö̧ba̧lö, ökwödötjö a'dewö loköbaduwökwedanö baibobe, ötjö chömöledöso̧bö̧kö̧. Ja̧danö, jo̧banö kwabö loköbaduwobö jo̧be.

¹⁵ Semanakwena jelemutjö bakwöta mölȩ kwotidaduwo. Jemi ikena mölȩma, jelemutjö dötölataja mölȩ baibena kwotidaduwoko. Ja̧ mölȩma otidökönö kwö'wachaduwakwa̧ möle ja̧kobe, ötjö Isabenö Jo̧nö kwomukwataduwobö. Ja̧ mölȩma inesö möle, ja̧danö wainö ji̧ mölȩma ötjönö kwomukwataduwobö. Ja̧ mölȩma otido̧nöma kwabö loköbaduwobö jo̧be.

¹⁶ Jo̧kwaobetjö̧ ökwödö Israel jojodöma, ja̧danö ökwödötjö tupadanö jojodöbi otikwö̧kö̧ mölȩ wainö kwujunaduwo ba̧kwȩlö̧jatebö, ötjö weti̧ a̧ja̧kwö yöbawö kwujunaduwi̧danö.

¹⁷ Jejenö jelemutjö dötölataja mölȩ baibena kwö'wachaduwobetjö̧ kwi̧sekwaduwakobe, Isabenö Jo̧ ö'wachinadanö ö'wachadösa, iteda wei̧danö, jö̧ba̧lö. Jao chömöledö, jelemutjö bakwöta mölȩ chotidijatö böjȩbi mölöjȩbi. Ikenama, chotidawatjö okobe jwiinö katatakwawajabetjö̧ ju'wi dewachö möle, jelemutjö dötölataja mölema chö'wachijatö, otidökönö. Cho'wonö emawö̧, otiwa jö̧ba̧lö, chö'wachijatö. — jejenö yöba̧lijetö Isabenö Jo̧ma Moisésnö, jobetjö Sinai mö'ösa'onö.

¹⁸ Ikenama yöbawö kabatibö Isabenö Jo̧ma Moisésnö iyijetö inabiya döbölataja jawa öbiya, iteda wei̧ wȩyukwa öbiyama. Ja̧danö, Isabenö Jo̧ma, iteda ujulunö wȩyudijetö ja̧biyanö.