Éxodo 30 - Dios Iwene

Isabenö Jo̧ weina jawa, söinö 'dö̧ekwa'be juwawapjo isapjo tjotido, jö̧ba̧lö

¹ Ina webijetö Isabenö Jo̧ma Moisésnöma: —Moisés, weköbo jojodönö isapjo, acacia towisötetjö tjotido, söinö 'dö̧ekwa'be tjujuwakwa̧pjo.

² Baikwö tjotidobö weköbo: Wayobekwöbi, ja̧kwölakwöbi bakwainö, cuarenta y cinco centímetros. Ja̧danö möakwöma noventa centímetros tjotido. Ja̧danö, ö'wejemu jawa ö'yekiya ichejekwi̧ jawa ökiyama japjo 'do̧'do̧kwetenia tjödado isapjonö dötewanö.

³ Japjo, wamenö bakwai̧ orosapitjö pötjebo, ja̧danö ö'yekiya ichejekwi̧ jawabi, tjo̧'po̧dato bakwai̧ orosapitjö. Ja̧danö, japjo mö ö'öbö okobe jwiinö bakwai̧ orotjöda ö'öbösö'bönö tjödado.

⁴ Ja̧danö, orotjö tjotido o̧ko̧bi̧ya, doko̧lataja. Ja̧ o̧ko̧biyama isapjo ö'weje badeibö tjödado, isapjo bakwachakwadanö bakwako̧kwena. Ja̧danö, ja̧ o̧ko̧biya, bakwako̧kwena isö̧'a̧ tjuyutebo, japjo tje'ewobö.

⁵ Ja̧ ö'i̧ya̧ma acacia towi ö'i̧ya̧tjö dö'i̧lataja tjubulo. Bulaja̧dö ja̧ ö'i̧yama orosapitjö tjo̧'Bo̧dato.

⁶ Japjoma tjujuno chö̧jakweju okwa abönö teachakwawȩko̧nö, la'akasȩko̧nö, inesö la'akasȩko̧ tjöekwado̧ badeibö. Jȩko̧ inesö la'akasȩko̧ okwa jelepjo ja̧kobe, ötjö weti̧ wȩyukwa döbölataja inabiya a̧ja̧pjoma. Jobema, ja̧pjo muchekwapi wame ökwödökwö chö̧jobö chichakwo̧sa.

⁷ Ja̧danö, inesö la'akasȩko̧ tjöekwemi badeibösapjo wame Aarónma söinö 'dö̧ekwa'be ujuwakobe. Bakwöta yȩayikwena dȩju̧wa'yu o'di̧ju̧ ja̧ka otidö teachena, ju'wibi, söinö nöekwa'be ujuwo.

⁸ Ja̧danö yi̧benabi, bakwöta yi̧benakwena tjo̧wi̧ jawo̧ meibajena Aarónma ujuwo ba̧kwȩlö̧jatebö söinö 'dö̧ekwi̧ kaamobö ötjö, Isabenö Jo̧ chö̧ba a'otjö. Ja̧danö, ba̧kwȩlö̧jatebö jejenö tjujuwobö jo̧be, okobe deinö Aaróntjö tupadanö jojodöma.

⁹ Ötjötjö jojodötjö dö'da̧denö pjabatadöma japjo wamenö ötjö weti̧ a̧ja̧kwö tjujuwobö jo̧be, 'dö̧ekwa'beda tjujuwo, ju'wi jawa wetökösa'bemakö̧. Ja̧danö, japjonöma juwö tjiyoko a̧ji̧kwakwedönö, ötjönö ösödö juwö tjiyawö̧nöma. Ja̧danö, trigotjö otikwabi juwö tjiyoko japjonöma. Ja̧danö, ubasobu o'do̧bubi sa̧sa̧köboko japjonöma. Ötjö weti̧ söinö 'dö̧ekwa'beda tjujuwo japjonöma.

¹⁰ Ja̧danö, bakwöta o̧bakwena bakwötanöda, Aarónma japjo söinö 'dö̧ekwa'be juwawapjo yemidanö suli̧ jwiapjo baibanö juwö tjiyakwawö̧ tjökwösobu, jojodö tjusuli̧ muchekwa tjökwösobuma juwö iyawapjo, a̧petube junawapjotjö emibö Dios eju okwa tebachibö söinö 'dö̧ekwa'be juwawapjo i'yekiyanö sa̧sa̧obö jo̧be. Ja̧danö, bemi tupakwöma jejenö bakwöta o̧bakwena sa̧sa̧tjobö jo̧be Aarónbi, Aaróntjö tupadanö jojodöbi ba̧kwȩlö̧jatebö— webijetö Isabenö Jo̧ma Moisésnöma.

Tjimibiya tji̧wȩyukwobö Isabenö Jo̧ weina jawa

¹¹ Ina webijetö Isabenö Jo̧ma Moisésnöma:

¹² — Moisés, ökwödötjö la'aka luwedöma jojodö tjimibiya ba̧ja̧dö tjiwȩyudena tjiwȩyudajawö̧ma bakwo̧nökwena ötjönö, Isabenö Jo̧nö imidobö jo̧be, jo̧badönö kwabö lotökakobetjö̧. Ja̧danö, jwiinö labi̧ jawa wetökakobetjö̧ ötjönö tjiyobö jo̧be, bakwo̧nökwena tjimibiya wȩyukwadöma.

¹³ Ja̧danö, bakwo̧nökwena wȩyukwadöma plata bakwamu ö̧pi̧biya tjiyobö jo̧be ötjönöma. Ja̧ ö̧pi̧biya nönö tjö̧ba̧jadena jweinö tjö̧ba̧ja̧do, jobe ju̧kwadö jweinö nönö tjö̧ba̧jadi̧danö.

¹⁴ Okobe deinö Israel jojodötjö ömadö, veinte años juna̧ladötjö tupakwö ötjönö tjimidobö jo̧be tjibibiya tjiwȩyukwena.

¹⁵ Balada juna̧ladöbi jwibadöbi bakwainö tjimido ötjönöma, sulabenö ja̧tji̧ midö ötjökwö wene jwiinö tjö̧jakobetjö̧.

¹⁶ Jobadö tjiyi̧ma idöda, Israel jojodö sulabenö ja̧tji̧ imidakobe, ötjökwö wene jwiinö tjö̧jobö. Ikenama, jobadö tjiyi̧ emö kwiyo ötjötjö jojodötjö dö'da̧denö pjabatadönö, ötjö cheju otikwabi, ja̧danö cheju te'ada̧lakwawa jawabi tjimidakobetjö̧. Ja̧danö, Israel jojodöma jejenö tjiyobetjö̧ ba̧kwȩlö̧jatebö tjomukwatakobe ötjö chöbajale a'onö, Isabenö Jo̧kwö wene jwiinö dö̧ja, jö̧ba̧lö.

Dichawa'do tjotidobö weina jawa

¹⁷ Ina webijetö Isabenö Jo̧ma Moisésnö:

¹⁸ —Dichawa'do broncetjö otikwa'do tjotidobö weköbo. Ja̧danö, la'aka pjaeba̧la'o isa'obi broncetjö tjotido. Ja'doma cheju a̧petunö tjujuno, cheju teachakwawawemitjö̧ juwö iyawapjotjö 'da̧denö. Ja̧danö, ja'donö ojwiyo totjebo.

¹⁹ Ja̧danö, Aarón, Aarón i̧tji̧mu̧ tjömamijubi, tjömasapi̧yabi tjidichawo ja'donö okwobutjö.

²⁰ Ja̧danö, ökwödö kwö'da̧deduwinö chö̧jakweju a̧petu tjichibena, ötjönö juwö tjiyakwa̧ abönö tjidichawo. Tjidichawitjö̧ma debö tji̧'yökakwedö, ötjö weti̧ tja̧ja̧kwobetjö̧.

²¹ Yötawakwö: Tjömamiju, tjömasapjiya tjidichawo, debö tji̧'yapji jö̧ba̧lö. Ja̧danö, Aaróntjö tupadanö jojodö ömadöma ba̧kwȩlö̧jatebö jejenö ötjö weti̧ a̧ja̧kwö tjömamiju, tjömasapi̧ya tjidichawobö jo̧be, debö tji̧'yapji jö̧ba̧lö— webijetö Isabenö Jo̧ma Moisésnöma.

Isabenö Jo̧ Moisésnö weina jawa, ötjötjö jojodötjö dö'da̧denö pjabatadönö kabebö i̧sebö, tjuunö o̧tesobu tokebo, jö̧ba̧lö

²² Ina webijetö Isabenö Jo̧ma Moisésnöma:

^23-24 Moisés, jojodönö weköbo oliva o̧tesobu, cuatro litroskwö ju'wi jawa söinö 'dö̧ekwi̧ jawakwö pjatjato. Ja̧danö, söinö 'dö̧ekwi̧ jawama biya̧: Isa'be mirra mikwawa'be seis kiloskwö, ja̧danö, iso̧pja̧ canela mikwawapja̧ tres kiloskwö, ja̧danö, isa'ba cálamo mikwawa'ba tres kilokwö, ja̧danö, towisa̧do̧, casia mikwawowitjö seis kilokwö. Ja̧danö, nönö tjö̧ba̧jadena jweinö nönö tjö̧ba̧ja̧do, jobe ju̧kwadö nönö tjö̧ba̧jadi̧danö, jweinö badekwachinönö tjotido.

²⁵ Ja̧danö, söinö 'dö̧ekwi̧ jawakwö oliva o̧tesobukwö wiwodö söinö 'dö̧ekwasobu tjotido, inesö ji̧ jawasobu. Jobuma ötjötjö jojodötjö dö'da̧denö pjabatadönö tjuunö tokebakwa̧sobu, jobadönö kabebö kwi̧sebakwa̧ mölȩma.

²⁶ Ja̧danö, ja̧ o̧tesobuma ökwödö kwö̧'da̧deduwinö chö̧jakwejunö sa̧sa̧köbo, bejuma wainöeju, jö̧ba̧lö. Ja̧danö, isapjonöbi, weti̧ wȩyu̧kwa öbiya a̧ja̧pjonö o̧tesobu sa̧sa̧köbo, bipjoma wainösapjo, jö̧ba̧lö.

²⁷ Ja̧danö, mesasötenö, mesasöte wanö dȩja̧pi̧ya̧nö, deja'di̧ju̧nö, ja̧danö dȩju̧wa'yu o'di̧ju̧ ja̧kanöbi, ja̧ka otikwa jawanöbi o̧tesobu sa̧sa̧köbo, Wainö ji̧ jawa, jö̧ba̧lö. Ja̧danö, söinö 'dö̧ekwa'be juwawapjonöbi o̧tesobu sa̧sa̧köbo, bipjoma wainösapjo jö̧ba̧lö.

²⁸ Ja̧danö, juwö tjiyapjopjonö, ja̧danö, iso̧pja̧ lotjakwa̧ o'diju balde'dijunö, iso̧pja̧ kilawa ö̧pjibiyanö, itebiya tichawa ö̧ki̧yanö o̧tesobu sa̧sa̧köbo, wainö ji̧ jawa, jö̧ba̧lö.

²⁹ Jejenö o̧tesobu sa̧sa̧köbo kwi̧sebakobetjö̧, beju, beju okwa jawabi, wainö chujuna, Isabenö Jo̧nö ösödö jawada, jö̧ba̧lö. Isabenö, ötjö cheju, ötjö cheju okwa jawa jwiinö inesö ji̧ jawaobetjö̧ ötjö wainö chujuninökwe, 'da̧batö chujuninökwenöda ja̧pjo maobö jo̧be.

³⁰ Ja̧danö, ja̧ oliva o̧tesobu, söinö 'dö̧ekwi̧ jawakwö pjakatajobuma Aarónnö, Aarón i̧tji̧mu̧nö tjuunö tokebo, Bidöma Isabenö Jo̧ wainö ujuninawö̧ jo̧ba wei̧ tjotidobö, Diostjö jojodötjö tjö'da̧de pjabatadö batjibanö, jö̧ba̧lö.

³¹ Ja̧danö, yökawo Israel jojodönö, baikwö: Bobu o̧tesobuma Isabenö Jo̧ totebobö weinobu. Ba̧kwȩlö̧jatebö bobuma wainö ji̧ o̧tesobu ja̧kobe, sule pjabatadö tjuunö wainö junö tobebö, ja̧danö Dios eju okwa jawanöbi wainö junö sa̧sa̧bö.

³² Ja̧danö ja̧ o̧tesobuma jo̧kwadabedönö tokebobö jwiobe, tokeboko. Ja̧danö, ja̧ o̧tesobudanöma ju'wi jawa, ju'wi jawabi tokebobö kwotidoko, ötjö weti̧da tokebobö jo̧be, ötjötjö jojodötjö dö'da̧denö pjabatadönö tokebakwa̧da. Jobuma wainö ji̧ o̧tesobu, jö̧ba̧lö kwomukwatobö jo̧be.

³³ Ökwödökwö bakwo̧ jobu o̧tesobudanö iteda ösödö otiditjö̧ma ökwödötjö a'dewö lotjökwedanö ö̧jakobe, Israel jojobö̧kö̧ baibanö. Ja̧danö, jenada bakwo̧ jobu o̧tesobuma jelo̧nö, ötjötjö jojodötjö dö'da̧de pjabato̧bö̧kö̧nö toebitjö̧ma, a'dewö lotjökwedanö ö̧jakobe, Israel jojobö̧kö̧ baibanö— webijetö Isabenö Jo̧ma Moisésnöma.

Söinö 'dö̧ekwa'be jawa

³⁴ Isabenö Jo̧ma ina webijetö Moisésnö: —Moisés, weköbo jojodönö towitjö isa'be tjemo, estacte mikwawa'be, ja̧danö, ámber mikwawa'be, ja̧danö gálbano mikwawa'be, ja̧danö incienso puro mikwawa'be. Bakwa'bekwena bakwainö tjemo.

³⁵ Ja̧danö, ja'be otidö waiso̧nö weköbo okobe jwiinö wiwodö 'doo. Ja̧danö, sayukwöbi wiwodö otido, inesösa'be, wainösa'be ja̧kobetjö̧.

³⁶ Ja̧ isa'betjö ja'yubeda iso̧pja̧ baibanö 'doo. Ikenama ja̧pja̧ e'ewö cheju okwa tebachö inesö la'akasȩko̧nö, ökwödökwö chö̧jobö chichakwȩko̧nö tekacho. Jȩko̧nö weti̧ wȩyukwa inabiya a̧ja̧pjo la'akanö lilitjo i̧so̧pja̧. Ja̧pja̧, wainöda ja̧aso̧pja̧, jö̧ba̧lö, kwomukwataduwobö jo̧be.

³⁷ Ja̧danö, jo̧pja̧danö tjotidoko jojodöma, idöda jawa tjujuna̧lobö. Jo̧pja̧ma ötjönö, Isabenö Jo̧nöda ösödö wainöso̧pja̧.

³⁸ Ökwödötjö bakwo̧ jo̧pja̧ otiditjö̧ma, iteda söinö 'döekwso̧pja̧ ujuna̧lobö ökwödötjö a'dewö lotjökwedanö ö̧jakobe, Israel jojobö̧kö̧ baibanö.