Éxodo 3 - Dios Iwene

Isabenö Jo̧ ösötjenö Moisésnö öwawachina jawa

¹ Ja̧danö, Moisésma Madiánnö ja̧nö o̧bȩja̧dönö te'ada̧liabijetö, öjaba Jetro, jobe jojodötjö Diostjö tjö'da̧denö pjabato̧ a̧jwi̧mu o̧bȩja̧dönö. Ju'wi möle Moisésma o̧bȩja̧dönö öbibö 'yi̧jetö jojodö deobekwö mejebe, ja̧wo̧ meajobekwö. Jobekwö 'ya̧nö mö'ösa'o jena ichibijetö, Horeb mikwa'o, Diosnö ösödö midö junijadötö, Dios ö̧ja'o, jö̧ba̧lö.

² Ja̧danö, baikwö baledijetö: Isabenö Jo̧ma ángeldanö ichejekwo̧ öwawachijetö Moisésnö, ösötje okwatjö ökwöla ubi̧danö ubinö. Moisésma jötje edinö ¡ayö! ötjema ubijayonö ubö lokötjeda ja̧, jö̧ba̧lö eda̧lijetö.

³ Ja̧danö, jö̧ba̧lijetö itedada: Juluwanö 'ya̧wibö chedaja jötjema. La'akatjöda ediachijökötö jejenöma. ¿Tajawedö ubijayonö ubö lokötjeda ja̧? jö̧ba̧lö.

⁴ Ja̧danö, Isabenö Jo̧ma Moisés ösötje jo̧obekwö ichobe edö jwöbijetö ösötje okwatjö ¡Moisés! ¡Moisés! jö̧ba̧lö. Jejenö jwöökwe, Jao bena chö̧ja, jö̧ba̧lö atadijetö Moisésma.

⁵ Ikenama Isabenö Jo̧ma jö̧ba̧lijetö: —Moisés baikwö yö̧nema ichibökönuwi. Ötjöma Dioschobetjö̧ bemi niji kwö̧jatemima wainöemi, ötjö chö̧jemima. Jo̧kwaobetjö̧ sapatu yo̧bekwi, ötjönö jweinö omukwatö— jö̧ba̧lijetö.

⁶ Ina jö̧ba̧lijetö: —Moisés, ötjöma kwabe'do ösödökwe Diossa. Ja̧danö, ökwö kwa'dödö tjösödökwe Diossa. Abraham, Isaac, Jacob tjuluwo̧ Diossa ötjöma— jö̧ba̧lijetö Diosma Moisésnöma. Jejenö jö̧a̧liökwe yebaibö öba muchekwijetö Moisésma, ömamunö, Diosnö cheditjö̧ma ö'wö batibena, jö̧ba̧lö.

Isabenö Jo̧ Moisésnö faraón ö̧jobekwö i̧'yobö weina jawa, faraónnö aebobö Israel jojodönö labebi, jö̧ba̧lö

⁷ Ikenama Isabenö Jo̧ma jö̧ba̧lijetö: —Isabenö chedobe ötjö chömöledönö, Egiptonö ju̧kwadönö juluwanö tjotidobö wetjobema, jwiinö inia tjötjinö. Ja̧danö, tjuluwedötjö tjö̧jibinö pjatatobö jwötjeba̧li̧ma cha̧ja̧kwobe. Chöwaisa, jwiinö usula tjemawobe, jö̧ba̧lö.

⁸ Jo̧kwaitjö̧ mölejebetjö chichatö chömöledönö pjatatobö, Egipto jojodötjö tjö̧jibinö. Ja̧danö, Egiptotjö latjebinö pjatatobö chichatö, jelobe tji̧'yobö. Tji̧'yakwemima jwiinö otiwobe, ja̧danö jalobe, ja̧danö, a̧ji̧kwakwawedönö tjöbötjatemi otiwobe, ja̧danö batjo tjujunakwemibi otiwobe. Jobema ju'wedö tjitebo: Cananeo, heteo, amorreo, ferezeo, heveo, jebuseo jojodö tjiteboma— jö̧ba̧lijetö Isabenö Jo̧ma—.

⁹ Isabenö ¡ayö! ötjö chömöledö Israel jojodö jwötjeba̧li̧ma cho̧'wo tjo̧inö cha̧ja̧kwobe. Ja̧danö, Egipto jojodö inia tjötjinö juluwanö tjotidobö wetjobema chedobe.

¹⁰ Jo̧kwaobetjö̧ Moisés, Egiptobe kwi̧'yobö wetakwö, faraónnö abebö ötjö chömöledönö, Israel jojodönö weobö, jobetjö ökwökwö latjebobö— yöba̧lijetö Isabenö Jo̧ma.

¹¹ Jejenö yöa̧liökwe atadijetö Diosnö: —Ötjöma webö̧kö̧sa. ¿Dakwö abebö chi̧'yobö jo̧banöma, webitjö Israel jojodönö belö labeibö chi̧'yo, jö̧ba̧löma? Abebö chi̧'yökena— atadijetö Moisésma.

¹² Jejenö atadiökwe: — Moisés, ötjöma ökwökwö chö̧jakwo̧sa. Ötjö Diossa ökwönö webo̧, Israel jojodönö Egiptotjö lakebobö. Ja̧danö, ökwönö kwöwaisachibobö chi̧sebocha, Isabenö ötjönö webinama Diosda, jö̧ba̧lö. Baikwö kwöwaischibobö baledakobe: Moisés, ötjö chömöledönö Egiptotjö labebö öbibö kwi̧'yaja̧ ikena bi'onöda ichibö kwösödaduwakwedöja ötjönöma— yöba̧lijetö Diosma Moisésnöma.

¹³ Ja̧danö, jö̧ba̧lijetö Moisésma Diosnö: — ¡Jao kwatjö̧ma! Egiptobe 'ya̧nö Israel jojodönö yöta̧locha, da'dödö tjuluwo̧ Diosma ötjönö weijatö ökwödönö pjabatö, jö̧ba̧lö. Jejenö yöta̧lawö̧ abebö tja̧ja̧kwena, jo̧ba Diosma ¿dakwö mikwo̧da? jö̧ba̧lö. Jejenö abebö tja̧ja̧kwena ¿dakwö chatadakwa̧da?— abebö a̧ja̧kwijetö Moisésma Diosnö.

¹⁴ Abebö a̧ja̧kwökwe: —Ötjödasa Isabenö Jo̧ mikwoma. Yökawodönö, Isabenö Jo̧ma weijatö ötjönöma ökwödönö pjabatö— yöba̧lijetö Diosma Moisésnöma.

¹⁵ Ju'wibi yöba̧lijetö Diosma Moisésnö: —Baikwö yökawo Israel jojodönöma: Isabenö Jo̧, da'dödömine tjuluwo̧ Dios, ja̧danö, Abraham, Isaac, Jacob tjuluwo̧ Diosma ötjönö weijatö ökwödönöma, jö̧ba̧lö. Moisés, ötjö chimi, Isabenö Jo̧, jö̧ba̧löma, ba̧kwȩlö̧jatebö chimikwakwo̧sa. Ökwödötjö tupadanö jojodöma ötjönö omukwatö ja chimida ötjönöma ötjabikobe, Isabenö Jo̧, jö̧ba̧lö.

¹⁶ Moisés, Egiptobe kwi̧'yo. Ichibö Israel jojodötjö damönö tjoko̧ko̧kwobö jwököbo. Ko̧ko̧kwajadönö yökawo: Isabenö Jo̧ma, da'dödömine tjösödökwe Dios, Abraham, Isaac, Jacob tjösödökwe Diosma ötjönö öwawachö ökwödönö yötawobö weijatö baikwö: Eda̧lobe Egipto jojodö ökwödönö juluwanö inia tjöbö kwotidaduwobö wetjobema. Jo̧bama weijatö ötjönö ökwödönö yötawobö.

¹⁷ Ja̧danö, ökwödönö pjaatakobe Egipto jojodö wetji̧tjö kwö̧jibaduwinö, ja̧danö jobetjö labebö jelobe 'ya̧nö kwö̧jaduwobö. Jobe kwi̧'yaduwakwemima ju'wedö tjitebo, Cananeo, heteo, amorreo, ferezeo, heveo, jebuseo jojodö tjitebo. Jobema a̧ji̧kwakwawedönö bötjatakwawemibi otiwobe, ja̧danö batjo junawemibi otiwobe. Moisés, jobekwö yökawodönö.

¹⁸ Moisés, ötjö chömöledö, Israel jojodöma ökwö yökawi̧ma ösödö tja̧ja̧kwakobe. Jo̧kwaobetjö̧ Israel jojodötjö damökwö inesö la'aka luwo̧ ö̧jobekwö kwi̧'yo. Ichibö yökawonö: Duluwo̧, ökwönö abebö dichatö. Isabenö Jo̧, ökwödö hebreo jojodö dösödökwe Diosma ökwödönö yöbawö öwawachijatö. Jo̧kwaobetjö̧ ökwönö adeba: Ökwödönö weköbo wa̧pötakwa möle kwebachö di̧'yo jojodö deobekwö, jobetjöma Isabenö Jo̧nö, dösödökwe Diosnöma ösödö juwö diyobö. Jejenö akebaduwo inesö la'aka luwo̧nö.

¹⁹ Jo̧kwaijayonö jo̧ba omukwatakwa̧ma chöwaisa. Öpöjödö yöa̧lakobe, Latjebobö wetokobe, jö̧ba̧lö. Jejenö omukwatitjö̧ ötjö jwiinö chujuluma chi̧sebocha Israel jojodönö latjebobö weobö.

²⁰ Jo̧kwaobetjö̧ chujulu i̧sebö labi jawa baledinö wetocha Egipto jojodönöma. Jejenö baledaja̧ ikena faraónma ökwödönö a'dewö loakobe jobetjöma.

²¹ Jejenö baledena Egipto jojodö ökwödönö otiwanö tjedobö chujunocha. Jo̧kwaobetjö̧ lakebaduwenama tea jwiinöma lakebaduwökakobe.

²² Ja̧ mölema ökwödötjö ya̧döma, bakwujunökwena Egiptosujunö yö̧ne jujunöma, ja̧danö jobuju jeju ju̧kwadönöbi atjebakobe platatjö otikwabi, orotjö otikwabi kamisibi tjiyobö, mikwa jwiinö. Atjebawö̧ma tjiyakobe. Ja̧danö, tjiyaja̧ma platatjö otikwa, orotjö otikwa, kwi̧tji̧muduwinö nönö, ja̧danö kamisi 'dubatö lakebaduwakobe Egiptotjö. Jejenö Egipto jojodö tju̧kwa teatjö nöinö emibö kwe'ewakobe— yöba̧lijetö Diosma Moisésnö.