Éxodo 29 - Dios Iwene

Moisés Aarónnö, Aarón i̧tji̧mu̧nö kabebö i̧sebina jawa, bidöma Diostjö jojodötjö tjö'da̧de pjabatadö, jö̧ba̧lö

¹ Isabenö Jo̧ma ina Moisésnö webijetö: —Moisés, Aarónnö, Aarón i̧tji̧munö kabebö kwöwano ötjö weti̧ tjotidobö, ötjötjö jojodötjö dö'da̧denö pjabatadö batjibanö. Baikwö ja̧köbo: Bakaya itji̧ ina möayo̧nö, suli̧ jwibo̧nö, ja̧danö o̧bȩja̧dö ömadönö du̧ju̧tajanö, suli̧ jwibadönö 'da̧batö kwujuno.

² Ja̧danö, trigoso̧pja̧, jwiinö otiwi̧ jawatjö pan kwotidaduwo, 'ye'yeachö̧kö̧nö panma. Ja̧danö, wa̧pötakwa jawa kwotidawo, baikwö: Oliva o̧tesobu jwiinö panpjabi, ja̧danö oliva o̧tesobukwö panpjabi, ja̧danö 'da̧jö̧ki̧ galletadanö ichejekwi̧, oliva o̧te dubebö kwukwaduwakwa̧ kwotidaduwo.

³ Kwotidaja̧duwa ikena, okobe jwiinö panma wi̧lȩyu̧nö kwanaduwo. Ja̧danö, bakayanö, o̧bȩja̧dönö ötjönö juwö iyö kwichaduwena ja̧ panma ötjönö kwiyaduwobö kwichejebaduwo.

⁴ Jemi ikenama Aarónnö, i̧tji̧mu̧nö öbibö kwi̧'yo ökwödö kwö'da̧deduwinö chö̧jakweju teachakwawemi. Jobetjö ötjö chöba a'o kwichejebawö̧nö dichawiatjinadanö kwidichodönö. Ja̧ kwidichi̧ma jobadö tjusula dichö loköbi̧danö wanekwachakobe.

⁵ Ikenama kamisi, wainö ji̧ 'duaawakwa̧di̧ju̧ma 'dukato Aarónnö. Okwasa̧do̧ ödöado̧, möakwönönö la̧do̧, ja'önönö la̧do̧, omukosado̧, ja̧danö di̧atakwawado̧ 'dukato Aarónnö.

⁶ Ikenama, butjawakwawado̧ uunö kwudato. Ja̧do̧nö orotjö 'dobö otikwö̧pö̧, ubutjawado̧nö di̧kato, wȩyukwö̧pö̧ Isabenö Jo̧ wei̧ a̧ja̧kwö 'da̧batö ujuninökwesa, jö̧ba̧lö.

⁷ Ikenama, o̧tesobu toebakwawasobu emibö Aarónnö tokebo, uunö, bitema Diostjö jojodötjö tjö'da̧denö la'aka pjabato̧ baibanö kabebö chi̧sebo, jö̧ba̧lö.

⁸ Ikenama, Aarón i̧tji̧mu̧nö jwökobo kwö̧jobekwö tjicho, ötjötjö jojodötjö dö'da̧denö pjabatadö batjibanö kabebö kwi̧sebobö. Ja̧danö, jobadönö bakwo̧nökwena 'dukato kamijido̧ ödöado̧ma.

⁹ Ikenama, di̧atakwawado̧ di̧kato, ja̧danö butjawakwawado̧ kwubutjado jobadönöma. Jejenö kabebö kwi̧sebo jobadönö ötjötjö jojodötjö dö'da̧denö pjabatadö batjibanö. Ja̧danö, bemi tupakwöma Aarón, ja̧danö okobe deinö Aaróntjö tupadanö jojodö ömadöma ba̧kwȩlö̧jatebö ötjötjö jojodötjö dö'da̧denö pjabatadö tjö̧jakwedö.

¹⁰ Ikenama bakaya itji̧ ina möayo̧nö öbibö kwi̧'yo ökwödö kwö'da̧deduwinö chö̧jakweju teachakwawemi. Jobe ichibö, Aarónnö, Aarón i̧tji̧mu̧nö weköbo tjömamu bakayanö uunö 'bitjeba̧lobö.

¹¹ 'Bitjeba̧lonö bakayanö kwabö ö̧kwö̧la̧ 'wibebö loköbo ökwösobu pa̧la̧ka̧'donö jȩbatö.

¹² Ikenama, kwötö'a bajalenö ökwösobunö dobeba̧lö juwö iyawapjo ö'wejemu 'do̧'do̧kwenia jawa ö'yekiya ichejekwi̧ jawanö dukebo kwötö'anö. Ja̧danö, ökwösobu ji̧bajobuma japjo la'akanö sa̧köbo.

¹³ Ja̧danö, jo̧ba 'wibebö loköbajökwe ö'apiyu o̧te, ja̧danö okwejewatjö jwiinö söi̧ jawa, ja̧danö pjeati̧ ödebiya o̧te juwö iyawapjonö kabebö wanö kwujuwo ötjönö ösödö, imiyu'wo kaaminö.

¹⁴ Jo̧kwaijayonö, 'wibebö kwaköbajökwe itebiya, isȩdo̧, ö'apiyu okwa jawa tebokwöchobe e'ewö ötjönö iyö kwujuwaduwo. Ja tebokwöchobe juwö kwiyaduwakwa̧ma kwusuladuwi̧ chumuchebi̧ma wanekwachinö kwiyaduwakobe.

¹⁵ Ikenama, o̧bȩja̧dötjö bakwo̧nö emö weköbo Aarónnö, Aarón i̧tji̧mu̧nö obejanö uunö 'bitjeba̧lobö.

¹⁶ 'Bitjeba̧lonö obejanö kwabö, ö̧kwö̧la̧ 'wibebö loköbo ökwösobu pa̧la̧ka̧'donö jȩbatö. Jobuma kabebö juwö iyawapjonö sa̧sa̧köbo okobe jwiinö japjo ö'öbönö.

¹⁷ Ikenama, 'wibebö loköbajökwe 'wi'wibö juwö iyawapjonö kabebö kwöwanö. Ja̧danö ö'apiyu, i̧bȩjwi̧ya kwidichaja̧ ikena juwö iyawapjonö kwöwano, uu, ju'wi itebiya wame.

¹⁸ Ikenama, ötjö, Isabenö Jo̧nö ösödö okobe jwiinö kwujuwo. Kabamö 'dö̧ekwi̧ma, söinö 'dö̧ekwi̧ kaama, jö̧ba̧lö, chösödocha.

¹⁹ Ikenama, jelo̧ obejanö emö weköbo Aarónnö, Aarón i̧tji̧mu̧nö uunö 'bitjeba̧lobö.

²⁰ 'Bitjeba̧lonö obejanö kwabö, ö̧kwö̧la̧ 'wibebö loköbo ökwösobu pa̧la̧ka̧'donö jȩbatö. Ikenama kwötö'a bajalenö ökwösobunö dobeba̧lö Aarón, Aarón i̧tji̧mu̧ tjölakiyusa̧do̧ tjöwaisobekwöchobe 'dukebo, ja̧danö tjötö'a jwaibö'a jukwi̧tenianöbi tjöwaisobekwöchobe. Ja̧danö tjömasapa tjötö'a jwaibö'a ju̧kwitenianöbi 'dukebo. Ji̧bajobuma juwö iyawapjonö sa̧sa̧köbo okobe jwiinö a̧tjȩapjo.

²¹ Ikenama, tjökwösobu juwö iyawapjo sa̧ka̧köbajobu ja'yubeda, o̧tesobu, toebakwawasobukwö wiwodö sa̧sa̧köbo Aarónnö, Aarón i̧tji̧mu̧nö, ja̧danö, jobadö 'dutjawi̧ o̧di̧ju̧nöbi. Jejenö jobadönöbi, jobadö tjökamisibi wainö kwujuno ötjö weti̧ a̧ja̧kwö tjotidobö, ötjötjö jojodötjö dö'da̧de pjabatadö baibanö.

²² Ja̧danö, jo̧ba kwaköbajökwe obejama ötjönö juwö kwiyaduwakwo̧ Aarónnö, Aarón i̧tji̧mu̧nö kabebö kwi̧sebena ötjötjö jojodötjö dö'da̧denö pjabatadö batjibanö. Jo̧kwaobetjö̧ baikwö ja̧köbo: Okobe jwiinö o̧te 'wi'wibö wainö kwöwano kwujuwaduwakwa̧ma. Ja̧danö, ö'apiyu o̧tebi, öwali'bo o̧tekwöbi, okwejewatjö jwiinö söi̧ jawabi, pjeati̧ ödebiya döbelataja o̧tekwöbi wainö kwöwano. Ja̧danö, i̧bȩjwa̧ öwaisobekwöchobesa̧jwa̧bi wainö kwöwano, ötjönö ösödö juwö kwiyaduwakwa̧ma.

²³ Ja̧danö, wi̧lȩyu̧tjö, cheju okwasȩko̧ mesasötenö kwöwanajayu̧tjö pan emö wainö kwöwano, kwotidajaduwa pan, 'ye'yeachö̧kö̧ panpja̧. Oliva o̧te jwiinö panpja̧bi, ja̧danö oliva o̧tekwö panpja̧bi, ja̧danö 'da̧ö̧ki̧ galletadanö ichejekwi̧bi emö wainö kwöwano.

²⁴ Ikenama, ajayinö wainö kwöwanaja̧ma, okobe jwiinö o̧te, ö'apiyu o̧tebi, öwali'bo o̧tekwöbi, okwejewatjö jwiinö söi̧ jawabi, pjeati̧ ödebiya döbelataja o̧tekwöbi, i̧bȩjwa̧bi, ja̧danö oliva o̧te jwiinö panpja̧bi, oliva o̧tekwö panpja̧bi, 'da̧ö̧ki̧ galletadanö ichejekwi̧bi Aarónnö, Aarón i̧tji̧mu̧nö kwiyo tjömamijunö do̧tja̧lo. Ikenama, tjömamiju möakwö kabebö tji̧sebo, Isabenö Jo̧nö ösödö diya, jö̧ba̧lö.

²⁵ Ikenama, tjömamiju yemidanö nijakwö jwitjatena tjömamijutjö emö kwödo okobe jwiinö juwö iyawapjo wame kwujuwobö, ajayinö kwujuwajökwe wamenö. Ja̧ juwö kwiyaduwakwa̧bi imiyupjo kaami̧ 'dö̧ekwi̧, söinö 'dö̧ekwi̧ kaama, jö̧ba̧lö, chösödocha.

²⁶ Ikenama jo̧ba obeja 'wibebö kwaköbajökwe omukosa'o ji̧ma möakwö kabebö kwi̧sebo, ötjönö ösödö. Jejenö kwi̧sebaja̧ ikena ja̧ itebiyama ökwöda kwukwo.

^27-28 Ja̧danö, bemi tupakwöma ötjötjö jojodötjö tjö̧'da̧denö pjabatadö batjibanö 'da̧batö kwujunena 'wibebö kwaköbajawö̧ o̧bȩja̧dö du̧ju̧tajadötjö ikena obeja iteba'o omukosa'o, ja̧danö i̧bȩjwa̧sa'o, ötjönö ösödö möakwö kabebö kwi̧sebaja̧ itebiyama. Ja̧ itebiyama wainö kwöwano Aarón, Aarón i̧tji̧mu̧ tjukwakwa̧ma. Ja̧danö, ba̧kwȩlö̧jatebö Israel jojodöma jejenö tjiyobö jo̧be Isabenö Jo̧nö, Diostjö jojodötjö tjö̧'da̧denö pjabatjatadö tjukwakwa̧ma. Ja̧danö, Israel jojodöma Isabenö Jo̧kwö ösökwö tjö̧jobö iyawa tjiyenabi, ja̧ tjiyi̧tjö Aaróntjö tupadanö jojodönö, Diostjö jojodötjö tjö'da̧denö pjabatadö tjukwakwa̧ma Diosnö tjiyobö jo̧be, omukosa'o, i̧bȩjwa̧sa'o.

²⁹ Ja̧danö, Aarón ö'wö baibaja̧ ikena jo̧ba itji̧mutjö bakwo̧ Aarón otidö ö̧bajenama ö̧bamatakobe, la'aka pjabato̧ baibanö. Jo̧banö, ja̧danö jo̧batjö tupadanö otidö tjö̧ba̧ja̧dakwedönö Aarón wainö ji̧ kamisi tjiyakobe. Ja̧danö, la'aka pjabato̧ baibanö kabebö tjöwanena Aarón wainö ji̧ kamisima 'duawobö jo̧be.

³⁰ Ja̧danö, jo̧ba Aarón otidö ö̧bajena bamato̧ma ja̧ wainö ji̧ kamisima jelemutjö dötölataja mölȩ baledibanö, mölebi yö̧tebi 'duawobö jo̧be. Jejenö 'duawakobe ökwödö kwö'da̧denö chö̧jakweuju okwa, inesö la'akasȩko̧nö otidö teachena.

Diostjö jojodötjö tjö'da̧de pjabatadö juwö tjiyajökwe obeja itebiya tjukwina jawa

³¹ Ja̧danö, Aarónnö, Aarón i̧tji̧mu̧nö kabebö wanö ba'ali kwanö kwujunena, juwö kwiyajökwe obeja iteba'o omuko̧sa'o, ibejwa̧sa'o toböda wainö toköbo, ajayinö tobö iyawemi baibanö 'da̧batö kwujuninemi, bemima Diosnö Ja̧ ösödö 'da̧batö dujuna, jö̧ba̧lö.

³² Ja̧ toköbaja̧ itebiya, pan wi̧lȩyu̧nö a̧ji̧ u'yukwaja̧bi Aarón, Aaron i̧tji̧mu̧, tjukwakwa̧ ökwödö kwö'da̧deduwinö chö̧jakweju teachakwawemi ja̧nö.

³³ Ja̧danö, Aarónnö, Aarón i̧tji̧mu̧nö ötjötjö jojodötjö pjabatadö batjibanö kabebö kwöwena ötjönö kabebö kwi̧sebobe ja̧ itebiya, pan, jobadö tjusuli̧ chumuchebi̧ wanekwachö. Idöda ja̧ itebiya, pan tjukwakobe, ötjönö i̧sebö wainö kwujunobetjö̧.

³⁴ Ja̧danö, tjukwaja̧ ikena ja̧ itebiyatjö, pantjö u'yukwitjö̧ma ju'wi dewachöma tjukwoböma kwujunoko. Ja̧ u'yukwaja̧ okobe jwiinöma kwujuwaduwobö jo̧be, ötjönö i̧sebö wainö kwujunobetjö̧.

³⁵ Jejenö okobe jwiinö wetakwö Moisés, Aarónnö iteda i̧tji̧mu̧nö ötjötjö jojodötjö dö'da̧denö pjabatadö batjibanö kabebö kwöwanobö. Jelemutjö dötölataja möle baledibanö, bakwöta mölekwena ötjö weti̧danö ja̧köbobö jo̧be, jobadönö kabebö wanö.

³⁶ Ja̧danö, bakwöta mölekwena bakaya itji̧ ina möayo̧nö kwabö, ö̧kwö̧la̧ 'wibebö loköbo, ötjönö juwö kwiyakwo̧nöma. Ja̧ juwö kwiyi̧ma Aarón, Aarón i̧tji̧mu̧ tjusuli̧ söbebö loti̧ wanekwachobe. Ja̧danö, ja̧pjonö juwö kwiyobetjö̧ japjo juwö iyawapjoma chedemi, Suli̧ jwiyapjo, jö̧ba̧lö, chedobe. Ikenama oliva o̧tesobu juwö iyawapjo wame tokebo, bipjoma wainö chujuna, Diosnö juwö iyawapjo baibanö, jö̧ba̧lö.

³⁷ Jejenö juwö iyö, ja̧danö juwö iyawapjo wame o̧te tobebö, jelemutjö dötölataja mölȩ, bakwöta mölȩkwena ja̧köbo, japjoma suli̧ jwiapjo, ja̧danö wainö junawapjo baibakobetjö. Jejenö ja̧köbobetjö̧ japjo jwiinö inesösapjo,wainö ji̧ sapjo. Ja̧danö suli̧ jwiapjoobetjö̧ sule ötjö wainö chujuninökwe, 'da̧batö chujuninökweda ja̧pjo ma̧obö jo̧be. Ja̧danö, japjonö wa̧nö tjiyi̧ma sule ötjö wetinadanö wa̧nö tjiyobö jo̧be.

Mölekwena Diosnö juwö iyawa jawa

³⁸ Bakwöta mölekwena o̧bȩja̧dönö du̧ju̧tajanö, o̧ba bakwaba juna̧la̧dönö, 'wibebö loköbajawö̧nö juwö kwiyobö jo̧be, isapjonö kabebö wanö.

³⁹ Bakwo̧nö yȩayi̧, ja̧danö, bakwo̧nö yi̧bena juwö kwiyo.

⁴⁰ Yȩayi̧ juwö kwiyökwekwö, juwi jawabi kwiyo, biya: Dötölataja kilos pan otikwa kwiyo, trigoso̧pja̧, oliva o̧te jwiinö otiwi̧ jawakwö pjabata̧lö. Ja̧danö, isapjo wamenö sa̧sa̧köbo ubasobu o'do̧buma un litro, ötjönö ösödö.

⁴¹ Ja̧danö, yi̧bena juwö kwiyökwe o̧beja juwö kwiyenama bakwainö yea̧yi kwiyi̧danö kwiyo, trigosopja̧, oliva o̧tekwö pjabata̧lö, ja̧danö bakwainö ubasobu o̧'do̧bu sa̧sa̧köbo isapjonö. Jejenö okobe jwiinö juwö kwiyo, ötjö, Isabenö Jo̧nö söinö 'dö̧ekwi̧ma kaaminö.

⁴² Moisés ökwö, ja̧danö ökwötjö tupadanö jojodö jejenö ba̧kwȩlö̧jatebö ötjönö ösödö, juwö kwiyaduwobö jo̧be. Ötjö cheju apetunö, cheju teachakwawemi badeibö juwö kwiyaduwo. Jobema ökwökwö chö̧jobö, ja̧danö ökwönö yöta̧lobö chichakwo̧sa.

⁴³ Jobeda ökwödö Israel jojodökwö chö̧jakwo̧sa. Ja̧danö, ötjö salöinö dejatö chi̧sekwocha edö kwöwaisachibaduwobö, bemi Isabenö Jo̧ ö̧jemi, wainöemi, jö̧ba̧lö.

⁴⁴ Ja̧danö, jobe ja̧nö yöta̧lakwo̧sa, bejuma wainö eju, ötjönö ösödö kwichaiaduweju, ja̧danö bipjoma wainösapjo, ötjönö ösödö juwö kwiyaiaduwapjo, jö̧ba̧lö. Ja̧danö Aarónnö Aarón i̧tji̧mu̧nö wainö chujunocha ötjötjö jojodötjö dö'da̧de pjabatadö batjibanö, ötjö weti̧ otidö.

⁴⁵ Ja̧danö, ökwödö Israel jojodökwö chö̧jakwo̧sa, ja̧danö ökwödö kwösödaduwökwe Dios chö̧jakwo̧sa.

⁴⁶ Ja̧danö kwöwaisaduwakobe, Isabenö Jo̧, dösödökwe Diosma ökwödönö Egiptotjö laebinobe ökwödökwö ö̧jobö, jö̧ba̧lö. Ja̧danö, jo̧bama Isabenö Jo̧, ökwödö dösödökwe Dios, jö̧ba̧lö, kwöwaisakobe.