Éxodo 28 - Dios Iwene

Diostjö jojodötjö tjö'da̧de la'aka pjabato̧ 'duawina jawa

¹ Ina webijetö Isabenö Jo̧ma Moisésnöma: —Moisés ökwö kwöpöe Aarónnö, ja̧danö jo̧ba i̧tji̧mu̧ Itamarnö, Nadabnö, Abihúnö, Eleazarnö okobe deinö Israel jojodötjö omudawö chujuninawö̧ ötjötjö jojodötjö dö'da̧de pjabatadö batjibanö tjotidobö, ötjö weti̧ a̧ja̧kwö. Jo̧kwaobetjö̧ jobadönö kwö̧jobekwö tjichobö jwököbo.

² Ja̧danö, weköbo 'dö̧awa waisadönö kwöpöe Aarón 'duawakwa̧ o̧di̧ju̧ 'dö̧tjobö, wainö o̧di̧ju̧, jwiinö otiwi̧ jawa o̧dijuma. Ja̧ 'duawakwa̧ o̧di̧ju̧ma ötjöda omudawö chujuninökwe 'duawakwa̧ o̧di̧ju̧, jojodöma jo̧banö edö, Isabenö itema la'aka luwo̧, wainö bo̧, jö̧ba̧lö, tjomukwatakobetjö̧. Ja̧danö, ja̧ 'duawakwa̧ o̧di̧ju̧ma jwiinö otiwa jawa o̧di̧ju̧.

³ Ja̧danö, weköbo 'dö̧awa jwiinö waisadönö, ötjöda 'dö̧awa tjöwaisobö pjatatawö̧nö Aarón 'duawakwa̧ o̧di̧ju̧ 'dö̧tjobö. Ja̧danö, jo̧banö, ja̧ o̧di̧ju̧ 'duawakwo̧nöma wainö tjujunakobe, bitema Isabenö Jo̧ 'da̧batö ujuninökwe Diostjö̧ jojodötjö tjö'tja̧denö la'aka pjabato̧ baibanö, jö̧ba̧lö.

⁴ Baikwö 'dö̧tjakobe ötjötjö jojodötjö dö'da̧denö la'aka pjabato̧ 'duawi̧ o̧di̧ju̧ma: Abönö 'duawakwa̧do̧, okwasado̧ma ödöado̧, opjiya ju'witjöbi ju'witjöbi ti̧lawado̧ma. Ja̧do̧ wame jȩlȩdo̧, möakwönönö la̧do̧ 'duawakobe. Ja̧do̧ wame, jeledo̧ ja'önönö la̧do̧. Ja̧danö, ja̧do̧ wame, la'aka pjabato̧ omukoemi jȩlȩdo̧ 'duawakobe. Ja̧danö, butjawakwawado̧bi ubutjawakobe, uunö kwabawö. Ja̧danö, di̧atakwawado̧bi önawakobe. Jejenö weköbo 'dö̧tjo wainö 'dutjawakobetjö̧, kwöpöe Aarón, jo̧ba i̧tji̧mu̧ 'dutjawakwa̧ o̧diju, ötjö weti̧ a̧ja̧kwö ötjötjö jojodötjö dö'da̧denö pjabatadö 'dutjatawakwa̧ o̧di̧ju̧ma.

⁵ Ja̧danö, 'dö̧awa waisadönö o'wiju tjiyakobe, orotjö otikwa opjiya, luledö, ö̧'dö̧yuwi̧, duwi̧ opjiyakwö luledö ti̧lawa o'wijuma. Ja̧ o'wijutjö 'dö̧awa waisadöma 'dö̧tjo la'aka pjabato̧ 'duawakwa̧ o̧di̧ju̧ma.

Wamesa̧do̧, otikwa jawa

⁶ Ja̧danö, 'duawakwa̧do̧ ja'önönö la̧do̧ma o'wijutjö 'dö̧tjo, ju'wi opjiya ju'wi opjiyabi luledö ti̧lawado̧. Orotjö otikwa opjiya, ö̧'dö̧wi̧, duwayuwi̧, duwi̧ opjiya, ja̧danö jwiinö otiwa jawa linotjö otikwa opjiya luledö ti̧lawa o'wijutjö 'dö̧tjakwa̧do̧. Jwiinö waisadöda ja̧do̧ma 'dö̧tjo.

⁷ Ja̧danö, ja̧do̧ a̧kwa̧ka̧linö la̧kwa̧do̧ ti̧lawa o'wijutjö 'wibebö 'dö̧tjo abuekwöchobebi o̧ma̧'a̧kwöchobebi bakwainö ji̧nö.

⁸ Ja̧danö, di̧atakwawado̧ma bakwainö opjiyatjö ti̧lawa'wotjö 'dö̧tjo, 'döawa jwiinö waisadöda. Ja̧ di̧atakwawado̧ma kamiji̧do̧ ö̧dö̧lö̧'a̧ bakwachakwadanö pjöa̧linö 'dö̧tjo.

⁹ Ja̧danö, inawiya onice mikwi̧ öwiya, döwölataja oledö tjotido. Oledö tjotidaja̧nö 'dȩbö iwȩyudo 'dȩbö wȩyukwa waiso̧ma. Bakwawakwena 'dȩbö iwȩyudo Jacob i̧tji̧mu̧, a̧li̧nösamutjö̧ du̧ju̧tajanö tjimibiyama.

¹⁰ Bakwawanöma jelemutjö bakwo̧nö tjimibiya 'dȩbö iwȩyudo, abönö pöe imi, jemi ikena jo̧ba öjawo̧ imi, jemi ikena, jo̧ba öjawo̧ imi, jejenö jelemutjö bakwo̧nö tjimibiya. Ja̧danö, jelewanöbi bakwainö bajaliya luwo̧ iminö kabatö.

¹¹ Jo̧ba 'dȩbö wȩyudo̧ma ja̧ otikwa jwiinö waiso̧da otidakobe, seyu 'dȩbö wȩyukwadanö. Ikenama, bakwawakwena orotjö otikwa öte öpöcho.

¹² Ikenama, inawiya, orotjö otikwa öte öpöchaja̧ öwiyama kamijido̧ wamesado̧ öböbe'onö ö̧no bakwachakwadanö. Jejenö Aarónma Jacob i̧tji̧mu̧ tjimibiya, Israel jojodö a̧li̧nösamutjö dosolatajabedönö wanekwachi̧ imibiyama ba̧kwȩlö̧jatebö öwanalakobe öböbe'onö. Jejenö, Aarónma ötjönö juwö iyö teachena ötjö, Isabenö Jo̧ma chomukwatocha Israel jojodönö, a̧li̧nösamutjö dosolatajabedönöma.

¹³ Ja̧danö, inawiyanö öpöchakwa̧ ötebiyama orotjö tjotido.

¹⁴ Ja̧danö, lawo opjiyabi tjotido orotjö, dopjolataja opjiyama. Bakwopjakwena wibö tjotido. Ja̧danö, ja̧ lawo opjiyama bakwopjakwena akwato orotjö otikwa ötenö, inawiya pöchawa ötenöma— webijetö Isabenö Jo̧ma Moisésnöma.

Jojodötjö Diostjö tjö̧'da̧de La'aka Pjabato̧ wame omukosado̧ 'dö̧tjobö weina jawa

¹⁵ Ina webijetö Isabenö Jo̧ma: —Moisés weköbo bakwo̧ 'dö̧awa waiso̧nöma la'aka pjabato̧ 'duawakwa̧do wame omukosado̧ 'dö̧tjo, melebö. Ja̧do̧ma wanekwachakobe, Dios wei̧ i̧sebö la̧do̧, jö̧ba̧lö, tu̧da'wo okwa inawiya ikwawö alewakwawa öwiya a̧jobetjö̧, Dios wei̧ tjöwaisobö alewakwawa öwiyama. Ja̧do̧ma, ja'önönö la̧do̧danö tjiti̧lo, orotjö otikwa opjiyatjö, ö̧'dö̧wi̧ opjiyatjö, duwayuwi̧ opjiyatjö, duwi̧ opjiyatjö, linotjö otikwa opjiyatjö luledö.

¹⁶ Ja̧danö, ja̧do̧ma imelebo veintedós centímetros wayobekwö, ja̧danö bakwainö veintidós centímetros jakwölakwö.

^17-21 Ja̧danö, inawa otikwa waiso̧ma inawiya a̧li̧nösamutjö̧ döwölatajanö inawiyama orotjö otikwa ötebiyanö öpöchakobe, bakwamakwena. Ja̧danö, a̧li̧nösamutjö̧ döwölatajanö inawiya bakwawakwenanö Jacob i̧tji̧mu̧tjö̧ bakwo̧ imi 'dȩbö iwȩyudo, seyu 'dȩbö wȩyukwadanö, a̧li̧nösamutjö dujutaja jojodö tjimibiyama. Jejenö Israel jojodö, a̧li̧nösamutjö dosolatajabedöma wanekwachakobe. Ja̧danö, ja̧ öwiya, bakwawakenanö Jacob i̧tji̧mu̧tjö̧ bakwo̧ imi 'dȩbö iwȩyudaja̧ öwiyama, la'aka pjabato̧ 'duawakwa̧do̧ omukosado̧nö ömiyanö, ö'wejemu jawa ömiyanö öpöcho, ja̧kwölakwösa̧manö. Bakwamakwena wa̧pöwakwa öpöchakobe. Abönösama ö̧nakwa̧ öwiyama biya: Sárdica, topacio, carubunclo mikwi̧ öwiya. Jadanö, nijakwöchobesama ö̧nakwa̧ öwiyama biya: esmeralda, zafiro, diamonte. Ja̧danö nijakwöchobesama ö̧nakwa̧ öwiyama biya: jacinto, ágata, amatista. Ja̧danö, bajaleaposa̧manö ö̧nakwa̧ öwiyama biya: berio, ónice, jaspe. Okobe jwiinö inawiyama orotjö otikwa ötebiya öpöchakobe. Ja̧danö, bakwawakwena Israel jojodö bakwasokwena tjimi 'dȩbö iwȩyudo.

²² Ja̧danö, la'aka pjabato̧ ö̧ka̧mi̧ji̧do̧ ja'önönö la̧do̧ma omukosado̧kwö dötewanö ji̧nö baikwö otido: lawo opjiya dopjolataja tjotido, orotjö otikwa opjiyama, bakwopjakwena wiawa opjiya.

²³ Ja̧danö, o̧ki̧ju̧ do̧ko̧lataja orotjö tjödado. Ja̧ o̧ki̧ju̧nö la'aka pjabato̧ omukosa̧do̧ möakwöchobe 'do̧'do̧kwetenia 'dö̧o.

²⁴ Ja̧danö, lawo opiya la'akanö omukosado̧ möakwöchobe 'dö̧aja̧ o̧ki̧ju̧nö akwato.

²⁵ Ja̧danö, ja̧ opiya bajalenö la'aka pjabato̧ ka̧mi̧ji̧do̧ öböbe'onö orotjö otikwa ötebiyanö akwato. Jejenö omukosado̧kwö teebesado̧kwö dötewinö ja̧kobe.

²⁶ Ja̧danö, ju'wi o̧ki̧ju do̧ko̧lataja orotjö tjödado. Ja̧ o̧ki̧ju̧ma omukosa̧do̧ okwakwöchobe la'aka 'do̧'do̧kwetenia dötewinö 'dö̧o.

²⁷ Ja̧danö, ju'wi o̧'ki̧ju̧ dokolataja orotjö tjödado. Ja̧ o̧ki̧ju̧ma akwaka̧linö la̧kwa̧do̧ la'akanö 'dö̧o, di̧atakwawado̧ möakwö.

²⁸ Ikenama, ö'dö̧wi̧ opjiyanö omukosa̧do̧ o̧ki̧ju̧nö teebesa̧do̧, akwaka̧linö la̧kwa̧do̧ o̧ki̧ju̧kwö di̧tja̧to. Jejenö omukosa̧do̧ teebesa̧do̧kwö dötewanö 'diinö nönö ja̧kobe, di̧atakwawado̧ möakwö.

²⁹ Ja̧danö, Aarón, la'aka pjabato̧ma omukosado̧ 'dubawajo̧ inesö la'akasȩko̧nö teachena Israel jojodö bakwaso̧kwena tjimibiyakwö iteda omuko wame, iteda omajade wame teachakobe. Jejenö Aarón ötjö, Isabenö Jo̧ chö̧jȩko̧nö teachena Israel jojodö tjimibiya iteda omajade wame nönö ötjöma Israel jojodönö ba̧kwȩlö̧jatebö chomukwatakwo̧sa.

³⁰ Ja̧danö, Aarón omukosado̧ tu̧da'wonö inawiya döwölataja kwano. Ja̧ öwiya ikwö alewena Aarónma öwaisakobe ötjö weti̧, jojodö ja̧tjobö weti̧ma. Jejenö, Aarónma ötjö chö̧jȩko̧nö teachena ja̧ inawiya iteda omajade wame ba̧kwȩlö̧jatebö a̧jakobe— yöbawijetö Isabenö Jo̧ma Moisésnö.

Jȩlȩdo̧ Diostjö jojodötjö tjö'da̧de la'aka pjabato̧ ökamijido̧ jawa

³¹ Ina webijetö Isabenö Jo̧ma Moisésnö: — Ötjötjö jojodötjö dö'da̧de la'aka pjabato̧ akwaa̧linö la̧kwa̧do̧ teebesado̧, möakwönönö la̧do̧ma ö'dö̧wi̧sado̧tjö dö̧tjo, okobe jwiinö.

³² Ja̧danö, ja̧do̧ma aa ji̧nö 'dö̧tjo. Ja̧do̧ aa ö'öbönö 'dö̧tjo kȩ'achajö̧kakobetjö̧.

³³ Ja̧danö, towinö wa̧ji̧ granada mikwi̧ opobiyadanö ichejekwi̧nö 'dö̧tjo opjiyatjö, ö̧'dö̧wi̧, duwayuwi̧, duwi̧ opjiyakwö luledö. Ja̧ opobiyadanö ichejekwinö ji̧ma kamijido̧ oto'obe tjö̧nabikwa̧ma.

³⁴ Ja̧danö, ja̧ opobiya 'da̧denö ka̧pa̧na o'di̧ju̧, pjei̧ orotjö otikwa o̧'di̧ju̧ 'tjö̧no, opo 'da̧denö.

³⁵ Jejenö Aarónma cheju okwa ötjö weti̧ a̧ja̧kwö teachena ka̧pa̧na o'di̧ju̧ ökwöakobe. Ja̧danö, jwiinö inesösȩko̧nö ötjö Isabenö Jo̧ chöba a'onö juwö iyö teachenabi laebenabi ka̧pa̧na o'di̧ju̧ ökwöakobe. Jejenö, ötjö weti̧ a̧ja̧kwobö jo̧be, debö i̧'yapji jö̧ba̧lö —webijetö Isabenö Jo̧ma Moisésnöma.

³⁶ Ina webijetö: —Ja̧danö, bakwai̧ orotjö 'dobö tjotido ö̧sö̧pö̧, ubutjawado̧nö di̧atakwawö̧pö̧ma. Ja̧danö, 'dȩbö wȩyukwa waiso̧ma jö̧pö̧nö 'dȩbö iwȩyudo seyu wȩyukwadanö baikwö: Isabenö Jo̧ 'da̧batö ujuninökwesa, iteda wei̧ a̧ja̧kwo̧ baibanö, jö̧ba̧lö.

³⁷ Jö̧pö̧ma ubutjawado̧ ö'öbönö di̧atakwawakobe isopja ö'dö̧wopja̧nö, la'aka pjabato̧ öbanö li̧nö.

³⁸ Aarónma ba̧kwȩlö̧jatebö ubutjawobö ja̧kobe, jö̧pö̧ öbanö li̧nö, Isabenö Jo̧ wei̧ a̧ja̧kwö 'da̧batö ujuninökwesa iteda wei̧ a̧ja̧kwo̧ baibanö, jö̧ba̧lö, wȩyu̧kwö̧pö̧ma. Jejenö ubutjawobetjö̧ Aarónma i̧sebakobe, Israel jojodö ötjönö weti̧danö tjiyökötjö̧ma, jo̧ba Aarónda jojodö ötjökwö wene tjujuna̧lakwali̧ma iteda ko̧ko̧dö emibena, ötjöda jawa, jö̧ba̧lö. Jejenö ko̧ko̧dö emobetjö̧ jojodöma ötjö weti̧danö tjiyököjayonö jobadö tji̧yi chemocha, wene jwiya, jö̧ba̧lö.

³⁹ Ja̧danö, abönö 'duawakwa̧do̧, ödöado̧, okwasa̧do̧ma jwiinö otiwi̧ lino mikwi̧ opjiyatjö tji̧tilo. Ja̧danö, ubutjawa'wobi jwiinö otiwa jawa linotjö otikwa opjiyatjö tjiti̧lo. Ja̧danö, diatakwawado̧nö 'dö̧awa jwiinö waisadöma ju'wi jawa, ju'wi jawabi jwiinö otiwi̧ jawama 'dö̧tjo— webijetö Isabenö Jo̧ma Moisésnöma.

Ju'wedö Isabenö Jo̧tjö̧ jojodötjö tjö'da̧denö pjabatadö 'dutjawakwa̧di̧ju̧

⁴⁰ Ina webijetö Isabenö Jo̧ma: —Aarón i̧tji̧mu̧ ömadö 'dutjawakwa̧bi 'dö̧tjo, okwasado̧ ödöado̧, diatakwawado̧, tjubutjawa'wo. Ja̧ 'dutjawakwa̧ma wainö ji̧ o̧di̧ju̧, jwiinö otiwi̧ jawa o̧dijuma. Ja̧danö ja̧ 'dutjawakwa̧ o̧di̧ju̧ma ötjöda omudawö chujuninawö̧ 'dutjawakwa̧ o̧di̧ju̧, jojodöma jobadönö edö, Isabenö la'aka luwedö, wainöbedö, jö̧ba̧lö, tjomukwatakobetjö̧.

⁴¹ Ja̧danö, Moisés, ja̧ kamisi 'dubatö kwujuno kwöpöe Aarónnöbi, jo̧ba i̧tji̧mu̧nöbi. Ikenama 'dukatawö̧nö tjuubiyanö o̧tesobu tokebo bakwo̧nökwena jobadönö kabebö i̧sebö, Bidöma 'da̧batö chujunawö̧, Diostjö jojodötjö tjö'da̧de pjabatadö batjibanö, jö̧ba̧lö.

⁴² Ja̧danö, jobadö ötjötjö jojodötjö dö'da̧denö pjabatadö tja̧di̧ju̧bi 'dö̧tjo linotjö opjiya tjiti̧lajado̧tjö. Ja̧ o̧di̧ju̧ma tjijȩ'bonönö lö̧ji̧ muchebinö o̧diju.

⁴³ Ja̧danö, Aarón, iteda i̧tji̧mu̧ ömadö ötjö cheju tetjachenabi, ja̧danö inesö la'akasȩko̧ juwö iyawemi jo̧be tjichenabi ja̧ tja̧di̧ju̧ma 'dutjawobö weta. Isabenö, jejenö weti̧ tja̧ja̧kwobö jo̧be suli̧ juna̧ladö batjibanö 'debö tji̧'yapji jö̧ba̧lö. Jejenö weta jobadönöma, ja̧danö jobadötjö tupadanö jojodönöbi ba̧kwȩlö̧jatebö jejenö 'dutjawobö ötjö cheju okwa tetjachena.