Éxodo 27 - Dios Iwene

Isabenö Jo̧ weina jawa juwö iyawapjo tjotidobö

¹ Ina webijetö Isabenö Jo̧ma Moisésnö: — Moisés, jojodönö weköbo juwö iyawapjo tjotido acacia towisötetjö, baikwö: Wayobekwöbi jakwölakwöbi bakwainö dos metros y veinticinco centímetros tjotido. Ja̧danö, möakwöma un metro y veinticinco centímetros tjotido.

² Ja̧danö, japjo 'do̧'do̧kwetenia ö'wejemu jawa i'yekiya ji̧nö tjödado, juwö iyawapjotjö dötewanö. Ikenama, okobe jwiinö juwö iyawapjoma broncesapitjö pötjebo.

³ Ja̧danö, ju'wi jawa broncetjö 'dobö tjotido, balde'diju, iso̧pja̧ lotjakwa̧ o'diju, ja̧danö, palapibiya, ja̧danö deja'di̧ju̧, ja̧danö, ja̧danö ö̧ki̧ya̧, ja̧danö dȩja̧pi̧ya. Okobe jwiinö broncetjö 'dobö tjotido.

^4-5 Ja̧danö, isaka, ja'önö pjaeba̧laka tjotido juwö iyawapjo okwa tjanakwa̧ka. Ja̧danö, ja̧ka 'do̧'do̧kwetenia o̧ki̧ju̧ 'diinö li̧nö tjödado.

⁶ Ja̧danö, ö̧'i̧ya dö'ölataja tjölödo, iyawapjo e'ewakwawa ö̧'i̧ya̧. Ja̧ ö̧'i̧ya̧ma acacia towi sö'datjö lödö, broncesapi tjo̧'bo̧dato.

⁷ Ja̧ ö̧'i̧ya̧ bakwö̧'a̧kwena o̧ki̧ju̧nö bakwachakwadanö tjuyutebo, iyawapjo tje'ewakobetjö̧.

⁸ Ja̧ juwö iyawapjo, acacia towisötje otikwapjoma tjotido, bi'o mö'ösa'onö ja̧nö ökwönö chi̧sebi̧danö— webijetö Isabenö Jo̧ma Moisésnöma.

Isabenö Jo̧ eju apetu tjöekwakwa̧ tjotidobö weina jawa

^9-11 Ina webijetö: —Moisés, jojodönö weköbo cheju apetu tjöekwakwa̧ tjotido, la'aka pjaeba̧li̧ o'iju junö, ja̧danö okwi'iju junö, ja̧danö o'wiju debatö nönö, tjöekwa jawa o'ijuma. Apetu wayobekwö bakwachakwadanö, tjöwaisobekwöbi, wajwitobekwöbi bakwainö la'aka pjaeba̧li̧ o'iju, broncetjö otikwa o'ijuma veintenö, ja̧danö okwi'ijuma veintenö tjujunakobe. Ja̧danö, okwi'iju bajalenö ö̧ki̧ya̧ 'diinö tjödakobe, platatjö otikwa o̧ki̧ju̧ma. Ja̧danö, bakwa'okwena bajalenö ö'diya platatjö 'bo̧datajadö okwi'ijunö tjödadakobe, bakwa'otjö okobe jwiinö okwi'ijunö dötewinö, 'diinö jo̧bö. Ja̧danö okwi'ijunö tjö̧nakobe o'wiju, apetu tjöekwakwa̧ o'wijuma. Ja̧ jawa o'wijuma jwiinö otiwi̧ jawa, lino mikwi̧ opjiyatjö ti̧lawa o'wiju. Ja̧danö, ja̧ jawa o'wijuma okwi'ijunö nönawa o'wijuma apetu wayobekwö bakwachakwadanö bakwainö tjöwaisobekwöbi cuarenta y cinco metros ja̧kobe, ja̧danö, wajwitobekwöbi cuarenta y cuatro metros ja̧kobe.

^12-13 Ja̧danö, cheju o̧pekwöchobe, ja̧wo̧ meajobekwöchobekwö o'wiju debatö nönö apetu tjöekwakwa̧ ja̧kwölakwöma veintidós metros y medio. Ja̧danö bakwainö, cheju apjudekwöchobe, ja̧wo̧ laebobekwöchobekwö tjöekwakwa̧ ja̧kwölakwöma, veintidós metros y medio, o'wiju debatö nönö. Ja̧danö, ja̧wo̧ meajobekwöchobe tjöekwakwa̧ okwi'ijuma domulataja jawa okwi'iju tjujuno. Bakwa'okwena tjujunakwena la'aka pjaeba̧li̧ o'iju broncetjö otikwa o'ijuma tjujuno. Ja̧danö, ja̧ la'aka pjaeba̧li̧ o'ijunö ötebiya 'di'yö tjujuno, 'diinö junakwa̧linö.

^14-15 Ja̧danö, ja̧wo̧ laebobekwöchobe o'wiju debatönönö apetu tjöekwakwa̧ma, cheju apetu teachakwawemima baikwö tjotido: Apjudetjö tjöwaisobekwö siete metros, ja̧danö apudetjö wajwitjobekwö siete metros ja̧kobe o'wiju nönö apetu tjöekwakwa̧ma. Ja̧danö, apjudetjö tjöwaisobekwö okwi'iju wa̧pö'okwa, ja̧danö apudetjö wajwitjobekwö wa̧pö'okwa tjujuno, o'wiju tjö̧nobö. Ja̧danö, bakwa'okwena tjujunakwena la'aka pjaeba̧li̧ o'iju broncetjö otikwa o'ijuma tjujuno, apjudetjö tjöwaisobekwö wa̧pö'iju, ja̧danö apjudetjö wajwitjobekwö wa̧pö̧'iju, okwi'iju 'di'yö tjujunobö, 'diinö junakwa̧linö. Ja̧danö, ti̧lawa o'wiju jwiinö otiwi̧ jawa o'wiju okwi'ijunö tjö̧no, cheju apetu tjöekwakwa̧ma.

¹⁶ Ja̧danö cheju apetu tjöekwemi apjude okwi'iju ö'wejemu jawa okwi'iju tjujuno, bakwa'okwena la'aka pjaeba̧li̧ o'iju broncetjö otikwa o'ijunö 'di'yö, ö'wejemu jawa o'ijuma. Jemi teachakwawemi ti̧lawa'wo, möakwö nueve metros o'woma ötebiyanö tjö̧no. Ja̧'woma jwiinö otiwa'wo, lino mikwi̧tjö ti̧lawa opjiya, ö̧'dö̧wi̧, ö̧'dö̧yuwi̧, duwi̧ luledö dölawa opjiyatjö ti̧lawa'wo. Ja̧danö, bakwo̧ 'dö̧awa waiso̧ma ju'wi jawabi ju'wi jawabi otiwanö 'dö̧o ja̧'wonö.

¹⁷ Cheju a̧petu tjöekwakwa̧ okwi'iju bajalenö, platatjö 'bo̧datakwawa ö'di̧ya tjödado, bakwa'otjö okobe jwiinö okwi'ijunö dötewinö. Ja̧danö ö̧ki̧ya̧ platatjö tjotido. Ja̧danö, la'aka pjaeba̧li̧ o'iju broncetjö tjotido.

¹⁸ change the measurements... Okobe jwiinö cheju a̧petuma baikwö ja̧kobe: Wayobekwö cuarenta y cinco metros ja̧kobe. Ja̧danö veintedós metros ja̧kwölakwö ja̧kobe. Ja̧danö, tjöekwakwa̧ möakwöma dos metros ja̧kobe, okwi'iju, la'aka pjaeba̧li̧ o'ijunö tji'diyakwa̧ okwi'ijubi, ja̧danö akwatö debatö tjö̧nakwa̧ o'wijubi. Ja̧ o'wijuma jwiinö otiwa jawa lino mikwi̧tjö̧ dölawa opjiyatjö tjiti̧lakwa̧. Ja̧danö, la'aka pjaeba̧li̧ o'ijuma broncetjö tjotido.

¹⁹ Ja̧danö, okobe jwiinö tjotidakwa̧ma, cheju okwa jawabi, apetu jawabi orotjö otikwö̧kö̧ jawama, broncetjöda tjotido. Ja̧danö, bö'ödakwawa ö̧'i̧ya̧ma broncetjö tjotido, chejubi, cheju a̧petu tjöekwakwa̧bi 'diinö jo̧bö.

Isabenö Jo̧ weina jawa, dȩju̧wa'yu o̧'di̧ju̧ nötekwakwa̧ o̧tesobu tjichejebobö dejuwa'yu

²⁰ Ina webijetö Isabenö Jo̧ma Moisésnöma: —Moisés, Israel jojodönö weköbo oliva towi ödebiyatjö jwiinö otiwi̧ jawa o̧tesobu baibanö 'do'dobö, molö tjotidobö weköbo. Ja̧ o̧tesobu, cheju okwa dȩju̧wa'yu o̧'di̧ju̧ ja̧ka nötekwakwa̧ tjichejebobö weköbo. Ja̧danö, dȩju̧wa'yu o̧'di̧ju̧ma ba̧kwȩlö̧jatebö ubinö dejatakobetjö̧ oliva o̧tesobu tjichejebobö weköbo.

²¹ Ja̧ dȩju̧wa'yu o̧'di̧ju̧ ja̧kama cheju okwa ja̧kobe, abönösȩko̧nö, inesösȩko̧, jö̧ba̧lö, mikwȩko̧nö. Tupakwösȩko̧, jwiinö inesösȩko̧, jö̧ba̧lö, mikwȩko̧ tjöekwado̧ badeibö ja̧kobe, dȩju̧wa'yu o̧'di̧ju̧ ja̧kama. Ja̧danö, jȩko̧ tupakwösȩko̧nö, jwiinö inesösȩko̧nö ötjö weti̧ wȩyukwa öbiya a̧ja̧pjo ja̧kobe. Ja̧danö, Aarónma, ja̧danö iteda i̧tji̧mu̧ma ötjö chöbajale a'otjö dȩju̧wa'yu o̧'di̧ju̧ ja̧ka tjite'ada̧lakwedö, ba̧kwȩlö̧jatebö yö̧te baibanö ubinö dejatakobetjö̧, dewachenanö baibanö. Ju'winö Aarón woaja̧ okobema jo̧batjö tupadanö jojodö dȩju̧wa'yu o̧'di̧ju̧ ja̧ka te'ada̧ladö batjibanö tjö̧jakwedö. Ja̧danö, ötjö weti̧, dȩju̧wa'yu o̧'di̧ju̧ yö̧te baibanö dejato jö̧ba̧lö, Israel jojodöma ba̧kwȩlö̧jatebö tja̧ja̧kwobö ja̧kobe, jobadötjö tupadanö jojodöbi— webijetö Isabenö Jo̧ma Moisésnöma.