Éxodo 26 - Dios Iwene

Isabenö Jo̧ iteda eju tjumuchebakwa̧ tjotidobö weina jawa

^1-2 Ina, Isabenö Jo̧ma Moisésnö webijetö: —Moisés, jojodönö weköbo o̧do wamenö muchekwa o'wiju tjiti̧lo, kwö'da̧deduwinö chö̧jakweju, wainöseju, jelobe jelobebi kwe'ewaduwakweju wamenö tjumuchebakwa̧ o'wijuma. Baikwö tjiti̧lo weköbodönö: Ajayinöma domulataja jawa o'wiju tjiti̧lo. Bakwa'wokwena wayobekwö doce metros y medio ja̧danö, ja̧kwölakwö dos metros tjiti̧lo. Ja̧danö, ja̧ o'wijuma jwiinö otiwi̧ jawa, lino mikwi̧ dölawa opjiyatjö tjiti̧lo. Ju'wi opjiyakwö luledö tjiti̧lo, ö̧'dö̧wayutjö, ö̧'dö̧yuwayutjö, duwayutjö. Ja̧danö, tjiti̧laja̧ o'wijunö bakwa̧'wokwena bakwo̧ 'dö̧awa waiso̧ma queribines mikwadö tjo̧'wo̧ jawa 'dö̧o.

³ Ikenama, ja̧ o'wiju do̧mu̧lataja jawa o'wijutjö bakwamu jawa 'dö̧awa o'wiju 'da̧batö bakwa̧'wokwena wayobekwö ö'öbönö tjo̧beba̧lö 'dö̧tjo, bakwa'wo jala'wo baibanö. Ja̧danö, ju'wi o'wiju, bakwamu jawa o'wiju ja̧danö wayobekwö ö'öbönö tjo̧beba̧lö 'dö̧tjo, bakwa'wo jala'wo baibanö. Jejenö ja̧li̧ o'wiju do'wolataja ja̧kobe, bakwa'wokwena bakwamu jawa 'dö̧awa o'wijutjö tjo̧beba̧lö 'dö̧awama.

^4-5 Ja̧danö, jȩlȩdo̧ ö'dö̧wa̧do̧tjö̧ o̧ki̧ju̧ 'wibö 'dö̧tjo, ciennö jawa o̧ki̧ju̧. Ja̧ o̧ki̧ju̧ma do'wolatajatjö bakwa'wokwena wayobekwö ö'öbönö o'wijunö 'dö̧tjo. Cincuentanö jawa o̧ko̧ bakwa'wokwena wayobekwö ö'böbönö o'wijunö 'dö̧tjo. Bakwa'wokwena bakweminö 'dö̧tjo, ja̧ o'wijuma bakwainö tjakwatakobetjö̧.

⁶ Ja̧danö, weköbo akwatakwawa ö̧ki̧ya̧ tjödadobö orotjö, cincuentanö jawa ö̧ki̧ya, ö'dö̧wa̧do̧tjö̧ o̧ki̧ju̧nö ti̧lawa o'wiju do'wolataja o'wijunö wayobekwö ö'öbönö dötewinö tjakwatakobetjö̧. Jejenö bakwa'wo ji̧nö muchekwa̧lakobe cheju wamema.

⁷ Ja̧danö, ja'wo wame jȩlȩ'wo muchekwa'wo tjumuchebobö weköbo, kwö'da̧deduwinö chö̧jakweju wame muchekwa'woma. Ja'woma chi̧wo̧dö tjöwö'ye dölawa opjiyatjö tjiti̧lo, a̧li̧nösa̧mu̧tjö̧ bakwa'wo o'wiju.

⁸ Bakwa'wokwena wayobekwöma trece metros y medio, ja̧danö ja̧kwö̧lakwöma dos metros, bakwa'wokwena bakwainö.

⁹ Ja̧danö, ja̧ ti̧lawa o'wijutjö bakwamu jawa o'wiju wayobekwö ö'öbönö tjo̧beba̧lö 'dö̧tjo, jala'wo baibanö. Ja̧danö, jele'wo jelemutjö̧ bakwa'wonö jawa ti̧lawa o'wiju bakwa'wokwena wayobekwö ö'öbönö tjo̧beba̧lö 'dö̧tjo, ja̧la'wo baibanö. Ja'wotjö cheju teachakwawemi wamenö melebö tjö̧nakwa̧'wo.

¹⁰ Ja̧danö, isa̧do̧ ö'dö̧wa̧do̧tjö̧ o̧ki̧ju̧ 'wibö 'dö̧tjo, ciennö jawa o̧ki̧ju̧. Ja̧ o̧ki̧ju̧ma bakwa'wokwena wayobekwö ö'öbönö o'wijunö 'dö̧tjo, cincuentanö jawa o̧ko̧. Ja̧danö jele'wonöbi bakweminö 'dö̧tjo, ja̧ o'wijuma bakwainö tjakwatakobetjö̧.

¹¹ Ja̧danö, weköbo akwatakwawa ö̧ki̧ya̧ tjödadobö broncetjö, cincuentanö jawa ö̧ki̧ya, o̧ki̧ju̧nö tjakwatobö, do'wolataja o'wijunö dötewinö tjakwatakobetjö̧. Jejenö bakwa'woda muchekwa̧lakobe cheju wamema.

¹² Ja̧danö, ja̧ chi̧wo̧dö tjöwö'yetjö ti̧lawa o'wiju cheju o̧pekwöchobe ösada̧linö muchekwa̧lakobe, un metro jenanö.

¹³ Ja̧danö, ja̧ o'wo cheju bakwachakwadanö wayobekwö medio metro jenanö ösada̧linö muchekwa̧lakobe.

¹⁴ Ja̧danö, ja'wo wame o̧bȩja̧dö ömadö tjisȩdi̧ju̧, duwi̧ o̧di̧ju̧ baibanö bu̧datibö tjumuchebo. Ja̧danö, ju'wi bajaleapo muchekwakwa̧ma jwai balawa okwa kwöba̧lö lö̧jadö tji̧sȩdi̧ju. Weköbo jojodönö ja̧ o̧di̧ju̧ cheju wame tjumuchebo— jejenö webijetö Isabenö Jo̧ma Moisésnö Israel jojodönö weobö, iteda eju wame tjumuchebakwa̧ma.

Ötebiya löbö tjotidobö Isabenö Jo̧ weina jawa

¹⁵ Ina webijetö Isabenö Jo̧ma Moisésnöma: —Moisés, ökwödö kwö'da̧deduwinö chö̧jakwejuma baikwö tjotidobö weköbodönö: Acacia towitjö ötebiya löbö tjotido.

¹⁶ Ja̧ ötebiyama bakwötekwena möakwöma cuatro metros y medio, ja̧danö ja̧kwölakwöma sesenta y cinco centímetros lötjo.

¹⁷ Bakwötekwena la'akatjö ötebiya ji̧nö, dötölatajanö, o̧do la'aka nijibe pjaeba̧li o'iju ojubiyanö 'dieba̧linö jinö tjujunobö.

^18-21 Ja̧danö, ötebiyama veintenö ötebiya tjujuno o̧do waiyobekwö, tjöwaisobekwöbi veintenö, wajwitjobekwöbi veintenö. Ja̧danö, bakwötekwena ötebiya la'aka ötenö dötölataja ja̧kobe. Ja̧danö la'aka pjaeba̧li̧ o'ijubi ja̧kobe o̧do waiyobekwö, tjöwaisobekwöbi cuarentanö, wajwitjobekwöbi cuarentanö. Ja̧danö, ötebiyanö la'aka ötenö nijibe pjaeba̧li o'onö 'dieba̧linö tjujunakobe. Ja̧danö, la'aka pjaeba̧li̧ o'ijuma platatjö 'ditjato. Bakwa'okwena ojubiya jinö, la'aka ötebiya ojubiyanö 'dibebö tjujunobö.

²² Ja̧danö, ötebiya jelemutjö bakwötenö lötjo, o̧do omapekwöchobe, ja̧wo̧ meajobekwö tjujunobö.

²³ Ja̧danö, ju'wi ötebiyabi dötelatajanö lötjo, o̧do omapekwöchobe 'do̧'do̧kwetenia tjujunobö, o̧do tjöwaisobekwö bakwöte, wajwitobekwö bakwöte.

²⁴ Jejenö 'do̧'dokweteniama dötelataja ötebiya ba̧kobe, la'akanöbi mönöbi 'diinö ji̧nö. Ja̧danö, ötebiya bakwötekwena bajalenö, 'diinö jena, o̧ki̧ju̧ orotjö otikwa tjö̧no. Do̧'do̧kwetenia bakwachakwadanö jejenö tjotido.

²⁵ Jo̧kwaobetjö̧, o̧do o̧mapekwöchobe ötebiyama okobe jwiinö jelemutjö wa̧pötekwanö tjujunakwa̧ ötebiya. Ja̧danö, la'aka pjaeba̧li̧ o'iju dieciséisnö tjödakwa̧ o'ijuma. Ötebiya bakwötekwena la'aka ötebiyatjö bakwöte la'aka pjaeba̧li̧ o'ijunö 'dibebö, ja̧danö la'aka ötebiyatjö jelöte pjeanö la'aka pjaeba̧li̧ lödawa'onö 'dibebö tjujuno. Jejenö bakwötekwenama la'aka pjaeba̧li̧ o'onö, do'olatajanö 'dibebö tjujunakobe.

^26-27 Ja̧danö, acacia towi ö'i̧ya̧tjö a̧li̧nösamutjö bakwamu jawa ö'i̧ya̧ tjubulo. Ja̧ ö'i̧yama o̧do tjujunakwa̧ ötebiyanö wayobekwö o̧ki̧ju̧nö tjuyutebo, ötebiya 'diinö do̧a̧lobö. Ja̧danö, cheju waiyobekwö bakwachakwadanö tjöwaisobekwöchobebi bakwamu jawa ö̧'i̧ya̧, ja̧danö, wajwitjobekwöchobebi bakwamu jawa ö̧'i̧ya, ja̧danö̧ cheju o̧pekwöchobebi bakwamu jawa ö̧'i̧ya o̧ki̧ju̧nö tjuyutjebakobe.

²⁸ Ja̧ ö̧'i̧ya̧ma baikwö tjuyutebo: Bakwö̧'a̧ o̧do ötebiya o'wolobe o̧ki̧ju̧nö tjuyutebakobe. Ja̧danö, jö̧'a̧ nijakwö jelö̧'a̧, ja̧danö jö̧'a̧ nijakwö ö'wejesö̧'a̧, jö̧'a̧ ö'wejesö̧'a̧ nijakwö jelö̧'a̧, ja̧danö ikenama la'akasö̧'a̧, okobe jwiinö ö̧'i̧ya̧ma o̧ki̧ju̧nö 'diinö tjuyutebakobe. Ja̧danö, ö'wejesö̧'a̧ma ötebiya okwanö yutekwö̧'a̧, cheju waiyobekwö bakwachakwadanö tjöwaisobekwöbi wajwitjobekwöbi, ja̧danö̧ o̧pekwöchobekwöbi, 'diinö jo̧bö.

²⁹ Ja̧danö, ötebiya, ö'i̧ya̧ orosapitjö tjo'bo̧dato. Ja̧danö, o̧ki̧ju̧bi orotjö tjotido.

³⁰ Moisés, ökwödö kwö'da̧deduwinö chö̧jawejuma, bi'o mö'ösa'onö ja̧nö ökwönö chi̧sebi̧da tjotidobö weköbo— webijetö Isabenö Jo̧ma Moisésnöma.

Isabenö Jo̧ iteda eju inesö la'akaseko̧ tjöekwado̧ tjiti̧lobö weina jawa

³¹ Ina webijetö Isabenö Jo̧ma Moisésnö: —Moisés, Israel jojodönö weköbo tjöekwado̧ tjiti̧lo, o̧do okwa debatö nönawado̧, inesö la'akasȩko̧ teachakwawemi tjöeba̧linö. Ja̧do̧ tjöekwado̧ma baikwö tjiti̧lo: Jwiinö otiwi̧ jawa opjiya, lino mikwi̧ dölawa opjiyatjö tjiti̧lo. Ja̧danö, ju'wi opiyakwö ö̧'dö̧wi̧, ö̧'dö̧yuwi̧, duwi̧ luledö tjiti̧lo tjöekwado̧ma. Ja̧danö, tjiti̧laja̧do̧nö bakwo̧ 'dö̧awa waiso̧ma queribines mikwadö tjo̧'wo̧ jawa 'dö̧o ja̧do̧nöma.

³² Ja̧danö, okwi'iju ö'wejemu jawa o'iju löbajadö, orosapitjö tjo̧'bo̧dato. Ja̧danö, bakwa'okwena ö̧kö̧nö 'diinö tjödado, okwi'o bajalenö. Ja̧danö, bakwa'okwena 'dibebö tjujuno la'aka pjaeba̧li o'ijunö.

³³ Ikenama ja̧do̧ tjöekwado̧ma okwi'ijunö debatö tjö̧no o̧ki̧ju̧nö akwatö. Ja̧danö, ja̧do̧ tjöekwemi o̧pesȩko̧nö, inesö la'akasȩko̧nö isapjo e'ewö tjujuno, domulataja jawa weawa weti̧ wȩyu̧kwa öbiya a̧ja̧kwapjoma. Tjöekwado̧ma la'akaseko̧tjö inesö la'akasȩko̧tjö tjöeba̧linö la̧kobe.

³⁴ Ja̧danö, jȩko̧ inesö la'akasȩko̧nö, isapjo weti̧ wȩyu̧kwa öbiya a̧ja̧kwapjo muchekwapima tjö̧wano. Jemi muchekwapi wamenö tjiyawö̧ tjökwösobu sa̧sa̧tjakobe, ötjö jojodö tjusuli̧ muchebö chujunemi wanekwachinö.

³⁵ Ja̧danö, tjöekwado̧ badeibö, la'akasȩko̧nö mesasöte, pan wa̧nawötema tjujuno, o̧do wajwitjobekwö. Ja̧danö, dȩju̧wa'yu o'di̧ju̧ ja̧kama jȩko̧nö tjujuno cheju tjöwaisobekwö.

³⁶ Ja̧danö, jȩlȩdo̧, cheju teachakwawemi tjöekwado̧ tjiti̧lo weköbo, jwiinö otiwi̧ jawa opjiya, lino mikwi̧ dölawa opjiyatjö tjiti̧lo. Ja̧danö, ju'wi opjiyakwö, ö̧'dö̧wi̧ , ö̧'dö̧yuwi, duwi̧ luledö tjiti̧lo ja̧do̧ cheju teachakwawemi tjöekwado̧ma. Ja̧danö bakwo̧nö 'dö̧awa waiso̧nö weköbo ja̧do̧nö ju'wi jawabi ju'wi jawabi jwiinö otiwi̧ jawa 'dö̧o.

³⁷ Ja̧danö, weköbo bakwamu jawa okwi'iju lötjo, tjöekwado̧ debatö tjö̧nakobetjö̧. Ja̧ o'ijunö orosapitjö tjo̧'po̧dato. Ja̧danö, bakwa'okwena orotjö otikwa o̧ki̧ju̧ 'diinö tjödado, okwi'iju bajalenö. Ja̧danö, la'aka pjaeba̧li̧ o'iju tjotido broncetjö, bronce isobu baibanö tobajadö isa̧ko̧nö tobebö.