Éxodo 25 - Dios Iwene

Isabenö Jo̧ Moisésnö weina jawa, jojodönö weköbo wainöseju tjotidobö, ökwödö kwö'da̧deduwinö chö̧jakweju

¹ Ja̧danö, Isabenö Jo̧ma Moisésnö, ojwiyo'wo okwa tebachajo̧nö webijetö baikwö:

² —Moisés, Israel jojodönö weköbo tju̧kwa teatjö tjoko̧ko̧dobö, ötjönö tjiyakwa̧ma. Bakwo̧nökwena tjomajadenö tjösödinö meitjö̧ma tjiyo jö̧ba̧lö. Ikenama ötjönö tjiyaja̧ma ökwödada emö kwujuna̧lo.

³ Ötjönö tjiyakwa̧ma biya̧ jawa: Oro, plata, bronce tjiyo.

⁴ Dölawa oyubiya tjiyo, biya̧: O̧bȩja̧dö tjöwö'yetjö tjödölawaja'yema wainö tjubu̧dato ö̧'dö̧wi̧, ö'dö̧yuwi̧, duwi̧ baibanö. Ikenama, tjubudatjaja'ye oyubiya tjiyo. Ju'wi oyubiya, jwiinö otiwi̧ jawa oyubiya, lino mikwi̧tjö̧ dölawa oyubiya tjiyo. Ja̧danö, chi̧wo̧dö tjöwö'yetjö dölawa oyubiya tjiyo.

⁵ Tjiyakwa̧ i̧sȩdi̧ju̧ biya̧: O̧bȩja̧dö ömadö tjisȩdi̧ju̧, duwi̧ o̧di̧ju̧ baibanö bu̧datibö tjiyo. Ja̧danö, jwai̧ balawa okwanö kwöba̧lö lö̧jadö tji̧sȩdi̧jubi tjiyo. Ja̧danö, towi ötebiya, acacia towi ötebiyatjö löbö tjiyo.

⁶ Ja̧danö, oliva o̧tesobu dȩju̧wa̧'yu̧bi̧ya̧ ichejekwi̧, pjei̧ o̧'yu̧bi̧ya̧ dejatakwawa tjiyo. Ja̧danö, söinö 'dö̧ekwi̧ ösötjetjö 'döbebö, oliva o̧tesobukwö bakobe wiwodö totjebakwobu tjiyo. Towisa'betjö söinö 'dö̧ekwa'betjö tjujuwakwa̧'be tjiyo Jejenö tjiyo weköbodönö, tjomajadenö tjösödinö meitjö̧da— webijetö Isabenö Jo̧ma Moisésnöma.

⁷ Ina webijetö: —Ja̧danö, tjiyakwa̧ma inawiyabi tjiyo, biya̧: Nöinö mikwawi̧ inawiya onice mikwi̧ tjiyo. Ja̧danö, ju'wi nöinö mikwawi̧ öwiyabi tjiyo. Ja̧ inawiya, onice mikwi̧ inawiya, ju'wi inawiya ötjötjö jojodötjö dö'tja̧denö la'aka pjabato̧ ökamijido̧ wamesado̧ öböbe'o bakwachakwadanö akwacha̧lö la̧kobe. Ja̧danö, ja̧do̧ wame jeledo̧, omuko̧sado̧ la̧kobe, melekwado̧. Ja̧donöbi nöjakobe inawiyama—webijetö Isabenö Jo̧ma Moisésnöma.

⁸ Ina webijetö: —Moisés, weköbo jojodönö wainöseju tjotidobö ökwödö kwö'da̧deduwinö chö̧jakwejuma.

⁹ Ja̧danö, jejuma jelobe 'ya̧nöbi jelobe 'ya̧nöbi ejata̧lö kwe'ewabiduwakweju, ökwödö kwö'da̧deduwinö chö̧jakwejuma. Jeju tjotidobö weköbo jojodönö. Ja̧danö, ökwönö chi̧sebi̧danö bakwainö tjotido. Ja̧danö, jeju okwa ju̧kwi̧bi ökwönö chi̧sebi̧danö bakwainö tjotidobö weköbo— webijetö Isabenö Jo̧ma Moisésnöma.

Isabenö Jo̧ eju okwa, jwiinö inesösȩko̧nö isapjo tjotidobö weina jawa

¹⁰ Ina webijetö Isabenö Jo̧ma Moisésnö: — Moisés jojodönö weköbo isapjo, acacia towi ötebiyatjö tjotidobö baikwö: Wayobekwöma un metro diez centímetrosnö, ja̧danö jakwölakwöma sesenta y cinco centímetrosnö, ja̧danö möakwöma sesenta y cinco centímetrosnö.

¹¹ Japjo wame okobe jwiinö bakwai̧ orosapitjöda pötjebo o̧pekwöchobenöbi okwakwöchobenöbi. Ja̧danö, isapjo mö ö'öbö okobe jwiinö bakwai̧ orotjöda ö'öbösö'bönö tjödado.

¹² Ja̧danö, oro isobu baibanö tobajadö isa̧ko̧nö totjebo, o̧ki̧ju̧ baibanö, ö'wejemu jawa ö̧ki̧juma. Ja̧ o̧kijuma isapjonö pöbebö tjödado, ö'wejemu jawa o̧ki̧ju̧ isapjo bakwachakwadanö do̧ko̧lataja o̧ki̧ju̧ma.

¹³ Ja̧danö, acacia towi ö'i̧ya̧tjö dö'i̧lataja tjubulo. Bulaja̧dö ja̧ ö'i̧yama orosapitjö tjo'bo̧dato.

¹⁴ Ja̧ ö̧'i̧ya̧ma ba̧kwö̧'a̧kwena bakwachakwadanö o̧ki̧ju̧nö tjuyutebo, isapjo tje'ewobö.

¹⁵ Ja̧danö, ja̧ ö̧'i̧ya̧ma ba̧kwȩlö̧jatebö o̧ki̧ju̧nö yutebö 'diinö ja̧kobe, töekwokobe.

¹⁶ Ja̧danö Moisés, japjo isapjo okwa kwanakobe ökwönö chiyakwa̧ öbiya döbölataja, domulataja weawa jawa weti̧ wȩyukwa öbiyama— webijetö Isabenö Jo̧ma Moisésnöma.

¹⁷ Ina webijetö: —Ja̧danö, weköbo Israel jojodönö isapjo muchekwapi tjotidobö, bakwai orotjöda. Ja̧pima wayobekwöma un metro diez centímetros ja̧danö, jakwölakwöma sesenta y cinco centímetros tjotido.

¹⁸ Ja̧danö, orotjö 'dobö jalinö sedatö tjotido du̧ju̧tajanö mu̧yȩka̧dönö, tjo̧wa̧ja̧pa̧ lö̧jinö ju̧kwadönö, querubines mikwadönö. Jobadönö tjujuno isapjo muchekwapi wamenö, Dios jojodö tjusuli̧ tjumuchebemi wanekwachapi wamenö. Ja̧pi wamenö wajwitjobekwö bakwo̧nö tjöwaisobekwö bakwo̧nö mu̧yȩka̧dö querubines mikwadönö tjujuno.

¹⁹ Ja̧danö, jobadö tjujunawö̧ma muchekwapinö dötewanö tjujuno.

²⁰ Jobadöma idödada badekwakwanö tjö̧jinö, ja̧danö muchekwapikwö eda̧lö tjujukwinö tjotido. Ja̧danö, tjo̧wa̧ja̧piya kabeba̧lö ja̧nö muchekwapi̧ tjöbeba̧lö tjujukwinö tjotido.

²¹ Ja̧danö, ökwönö chiyocha inabiya döbölataja, domulataja jawa weawa weti̧ wȩyukwa öbiyama. Ja̧ öbiyama isapjonö kwano. Kwanaja̧ ikena isapjo muchekwapi, Dios jojodö tjusuli̧ tjumuchebemi wanekwachapima kwumuchebo.

²² Moisés, jobeda, ökwönö yöba̧lö chichocha, ö̧tjö weti̧ wȩyukwa öbiya a̧ja̧pjo muchekwapi wamenö. Ja̧pi wamenö ja̧dö, queribines mikwadö tjö'da̧denö chichocha. Jobetjöda ökwönö yötawocha kwö̧jaduwobö weti̧ma, Israel jojodönö yökawobö— webijetö Isabenö Jo̧ma Moisésnö.

Mesasöte, pan iyawa wanawöte tjotidobö Isabenö Jo̧ weina jawa

²³ Ja̧danö, mesasöte, acacia towi ötetjö tjotidobö weköbo. Jötema wayobekwöma noventa centímetrosnö, ja̧danö ja̧kwölakwöma cuarenta y cinco centímetrosnö, ja̧danö möakwöma sesenta y cinco centímetrosnö tjotido.

²⁴ Ja̧danö, jöte wamenö bakwai orosapitjö pötjebo. Ja̧danö, jöte mö ö'öbö okobe jwiinö bakwai̧ orotjöda ö'öbösö'bönö tjödado.

²⁵ Jemi nijakwöchobe ö'öbönö towi ö'diyatjö isa'bo li̧nö tjotido, siete centímetrosnö jakwölakwöma. Ja̧danö, jemi nijakwöchobe okoke jwiinö ö'öbösö'banö orotjö tjödado.

^26-28 Ja̧danö, orotjö o̧ki̧ju̧ tjotido, ö'wejemu jawa o̧ki̧ju. Ja̧ o̧ki̧ju̧ma mesasötesa'onö tjödado bakwachakwadanö. Ja̧danö, acacia towi ö'i̧ya̧tjö dö'i̧lataja tjubulo. Bulaja̧dö ja̧ ö'i̧yama orosapitjö tjo̧'po̧dato. Ja̧ ö̧'i̧ya̧ma ba̧kwö̧'a̧kwena bakwachakwadanö o̧ki̧ju̧nö tjuyutebo, mesasöte tje'ewobö.

²⁹ Ja̧danö, mesasötenö tjödakwa̧ dȩja̧pi̧ya̧bi, deja'di̧ju̧bi, bakwai orotjö tjödado. Ja̧danö, ubasobu o'do̧bu pe'awa'do, ja̧danö tjipe'akwa̧ o̧'di̧ju̧ bakwai orotjö tjödado, ötjötjö jojodötjö dö'da̧denö pjabato̧ ötjönö ösödö tobebö iyakwa̧ma.

³⁰ Ja̧danö, mesasötenö ba̧kwȩlö̧jatebö pan wa̧jakobe, ötjönö ösödö kwiyaduwakwa̧ma— webijetö Isabenö Jo̧ma Moisésnöma, jojodönö weobö.

Isabenö Jo̧ dȩju̧wa'yu o̧'di̧ju̧ ja̧ka tjotidobö weina jawa

^31-35 Ina webijetö Isabenö Jo̧ma: —Moisés jojodönö weköbo dȩju̧wa'yu o̧'di̧ju̧ ja̧ka tjödadobö, bakwai orotjö. Ja̧danö, dȩju̧wa'yu o̧'di̧ju̧ ja̧kama baikwö ichejekwinö tjödado: Bakwai orotjö 'dobö la'aka isa'o tjödado, ja̧danö, bakwainö la'aka isa'otjö dötewanö okwi'o ji̧nö tjödado, bakwai orotjö 'dobö. Ja̧danö, ja'otjöda dötewinö tjödado o̧bu̧bi̧ya̧danö ichejekwinö, almendra mikwi̧ i̧sa̧bu̧danö ichejekwinö. Ö'wejemu jawa o̧bu̧bi̧ya̧danö ichejekwinö tjödado. O̧bubi̧ya la'aka ji̧nöbi, o̧bubi̧ya̧ ji̧nöbi tjödado, dȩju̧wa'yu okwi'otjö bakobe 'diinö dötewanö. Ja̧danö, abönö wa̧pöbukwa o̧bubi̧yatjö bakwabukwenatjö̧ öjabi̧ya ji̧nö tjödado, o̧bu̧tjö laebi̧danö öjabiyama, isa'o bakwachakwadanö wa̧pöjakwa möakwö wi̧so̧inö. Ja̧danö, öjabi̧ya bakwöjakwenanö almendra o̧bu̧bi̧ya ji̧nö wa̧pöbukwa o̧bubi̧ya ji̧nö tjödado, o̧bubiya la'aka ji̧nöbi o̧bubi̧ya̧ ji̧nöbi. Öjabiya isa'o bakwachakwadanö laebi̧ öjabiyatjö tjödado o̧bubiya ji̧nö wa̧pöbukwa bakwöjakwena.

³⁶ Ja̧danö, okobe jwiinö dȩju̧wa'yu o̧'di̧ju̧ ja̧kama bakwai orotjö 'dobö bakobe dötewinö tjödado, o̧bu̧bi̧ya la'aka ji̧nabi, ö̧jabiya ji̧nabi.

³⁷ Ja̧danö öjabiya ji̧na bajale bakwöjakwena o̧'di̧ju̧ ja̧kobe, okobe jwiinö jelemutjö do'do̧latajanö, o̧tesobu okwakwa̧ o̧'di̧ju̧. Ja̧ o̧'di̧ju̧tjö̧ jȩko̧ okwa dewinö dejatakobe ubemi badeibö.

³⁸ Ja̧danö, isa̧wu̧ ubaja̧wu̧ pji̧bebö loawaka bakwai̧ orotjö tjödado. Ja̧danö, dȩja̧pa̧ ubajo̧pja̧ wa̧bebö loawapabi bakwai̧ orotjö tjödado.

³⁹ Okobe jwiinö dȩju̧wa'yu o̧'di̧ju̧ ja̧ka jawa bakwai orotjö 35 kilo jenanö tjödado.

⁴⁰ Moisés, ötjö bi'o mö'ösa'onö ja̧nö ökwönö weti̧danö tjotidobö jo̧be, bakweminö ötjö weti̧danö tjotidobö weköbodönö— webijetö Isabenö Jo̧ma Moisésnö, jojodönö weobö.