Éxodo 24 - Dios Iwene

Israel jojodö Isabenö Jo̧ weina a̧ja̧kwö tjösödina jawa

^1-2 Ja̧danö Isabenö Jo̧ma Moisésnö webijetö: —Moisés, bi'o mö'ösa'o yemidanö kwönöcho Aarónkwö, Aarón i̧tji̧mu̧ Nadabkwö, Abihúkwö, ja̧danö Israel jojodö la'aka luwedöbedötjö setentakwö. Jobadökwöda kwönöcho, ju'wedö Israel jojodö tjönöchökönö. Jo̧kwaijayonö ötjö chö̧jobekwö ökwönöda weta, kwönöchobö. Ju'wedö, ökwökwö nöchajadöma tjuju̧kwibakwedö, ödökwönönö tjöba bȩbachibö nijakwö tjuunö ötjönö tjösödobö— webijetö Isabenö Jo̧ma Moisésnöma.

³ Ja̧danö, yutubajo̧ Moisésma yöbawijetö Israel jojodönö okobe jwiinö Isabenö Jo̧ yöawaja̧ma, domulataja weawa jawabi, ju'wi weawa wenebi, Israel jojodönö a̧ja̧kwö tjö̧jobö weawama. Ja̧ weawa a̧ja̧kwö okobe deinö Israel jojodöma bakobe ösödö yöba̧lijadötö ¡Jao otiwa! Isabenö Jo̧ wei̧da a̧ja̧kwö duju̧kwakwedösa, jö̧ba̧lö.

⁴ Ja̧danö, Moisésma okobe jwiinö Isabenö Jo̧ yöawaja̧, weawa wenema wȩyudijetö. Ju'wi dewachöma, yȩayi̧ wilubö alaibö juwö iyawemi otidijetö, mö'ösa'o la'akanö. Ja̧danö, inawiya, ödöi̧ öwiyama a̧la̧pedö junijetö, a̧li̧nösamutjö döbalataja öwiyama, Israel jojodö a̧li̧nösamutjö dosolatajabedö wanekwachö.

⁵ Ikenama Moisésma webijetö ömöayedötjö ju'wedönö tja̧jwi̧mu̧tjö, Isabenö Jo̧nö juwö iyawedötjö ju'wedönö juwö iyawobekwö öbibö tji̧'yobö. Jobetjö tjö̧kwö̧la̧ 'wibebö lotjajawö̧nö juwö iyawena wa̧nö okobe jwiinö ubinö iyijadötö, Isabenö Jo̧nö ösödö. Ja̧danö, ju'wi iyawabi juwö iyijadötö, ba̧ka̧ya̧tjö ju'wedönöma, ja'öda juwö. Ja̧ iyawama wanekwachijetö, Isabenö Jo̧kwö ösökwö dö̧ja, jö̧ba̧lö.

⁶ Ja̧danö, Moisésma tjö̧kwö̧la̧ 'witjebajawö̧ tjökwösobutjö ja'ö deja'di̧ju nöi̧ o'di̧junö tochawajo̧ wainö junijetö. Ja̧danö, otochaja̧ okobe u'yukwajobu tjökwösobuma juwö iyawapjonö sa̧sa̧bijetö.

⁷ Ikenama Isabenö Jo̧ weawa wene iwȩyudajöjama emibö 'bobebö yöba̧lijetö Israel jojodönö. Ja̧ Isabenö Jo̧ weawa wene yöa̧liawö̧, ¡Jao otiwa! Isabenö Jo̧ wei̧da a̧ja̧kwö duju̧kwakwedösa, ja̧danö, jo̧ba wei̧da ja̧dakwedösa, ösödijadötö Israel jojodöma.

⁸ Ikenama Moisésma deja'di̧junö tjökwösobu otochaja̧'di̧junö emibö Israel jojodönö sa̧sa̧bijetö bakwo̧nökwena. Sa̧sa̧bö yöba̧lijetö: —¡Edaduwi! Bibu tjökwösobuma wanekwachobe, Isabenö Jo̧ ökwödönö wei̧danö a̧ja̧kwö ju̧kwadösa, jö̧ba̧lö. Ida̧ökö jamatobe jo̧ba wei̧ a̧ja̧kwö dö̧ji̧ma— yöba̧lijetö Moisésma Israel jojodönöma.

⁹ Ikenama Moisés, Aarón, Nadab, Abihúkwö,ja̧danö Israel jojodötjö la'aka luwedö setentanö mö'ösa'obe nöchijadötö.

¹⁰ Nöchajadöma idöda, Israel jojodö tjösödökwe Diosnö edijadötö. Ja̧danö, Dios ömasapa teebekwöchobe, nijakwö ö̧jatemi zafiro mikwawa inawiyama nijinö bijetö, ja̧linö. Ja̧ ö'wiyama mölejȩbe wajuwanö ö'dö̧wi̧danö ö̧'döwinö öwawijetö.

¹¹ Ja̧danö, okobe deinö nöchajadöma Moisés, Aarón, Aarón itji̧mu̧, Israel jojodötjö la'aka luwedö Diosnö tjedijayonö tjedaja̧ mikwama lȩbebijökötö Diosma. Ja̧danö, nöchajadöma bakobe ba̧nö kwanöbi kwijadötö, ja̧danö owöbi owijadötö.

Moisés Sinai mikwa'o wa̧pekwa'o jo̧dawa'ye önöchina jawa, Isabenö Jo̧ wei̧danö

¹² Ikenama Isabenö Jo̧ma webijetö Moisésnö: —Moisés, ötjö chö̧jobekwö nöchi, wa̧pekwa'obekwö, jobeda kwö̧jo. Jobetjö ökwönö chiyocha inabiya döbölataja jawa öbiya, ötjöda weti̧ wȩyukwa öbiyama. Ja̧danö, ju'wi weawa wenebi, ja̧danö ökwödö a̧ja̧kwö kwö̧jaduwobö weti̧bi chiyocha. Ökwönö chiyocha Moisés, jojodönö kwö̧ba̧jadobö— webijetö Isabenö Jo̧ma Moisésnö.

^13-14 Ikenama Moisésma jö̧ba̧lijetö Israel jojodötjö la'aka luwedönö: —Tjo̧wi̧, Josuékwö chi̧'ya wa̧pekwa'obekwö nöchö. Benada ji̧baduwi tjedachajenanö kabatö. Ja̧danö, Aarón, Hur ökwödökwö pjabatö tjö̧ja. Di̧'yaja̧ okobema ökwödötjö ju'wedöma wene kwujuna̧laduwitjö̧ma Aarónnö, Hurnö yötja̧lobö jo̧be— jö̧ba̧lijetö Moisésma. Ikenama nöchijetö ja'o Dios ö̧ja'o, jö̧ba̧lö, tjimidina'o wa̧pekwa'obekwö.

¹⁵ Ikenama, Moisésma nöchijetö mö'ösa'o wa̧pekwaobekwö. Jobema ojwiyo'wo li̧jetö, mö'ösa'ö wa̧pekwaobe.

^16-17 Ja̧danö, jobe wa̧pekwaobema Isabenö Jo̧ salöinö idejati̧ma i̧sekwijetö. Okobe deinö Israel jojodöma jobe möakwö edinö, Isabenö Jo̧ salöinö dejatö i̧sekwi̧ma ubi̧danö ubinö edijadötö, okobe jwiinö jobe ubinö. Ja̧danö, mö'ösa'o wa̧pekwaobema ojwiyo'wo li̧jetö jelemutjö bakwöta möle baledibanö. Jemi ikenama, jelemutjö dötölataja mölema ja'wotjö jwö̧bijetö Isabenö Jo̧ma Moisésnöma.

¹⁸ Jwöökwe ja'wo ojwiyo'wo okwa tebachibijetö Moisésma, mö'ösa'o wa̧pekwa'o la̧'wo okwa. Jobema cuarenta möle, cuarenta yö̧te ji̧jetö Moisésma.