Éxodo 23 - Dios Iwene

Isabenö Jo̧ weina jawa, Okobe deinö, kwömöledönöbi, kwömöledö tja̧jwi̧munöbi otiwanö omukwatö kwö̧jaduwobö jo̧be, jö̧ba̧lö,

¹ Ina Isabenö Jo̧ma Moisésnö webijetö, weawa wene ujunobö Israel jojodönö a̧ja̧kwö tjö̧jobö, baikwö: —Ju'wedönöma omöna yöka̧laduwoko. Wanedö yötawa: Bakwo̧, sulabenö ja̧bo̧nöma ötjibobe lȩekwa omukwatö junadö tjöbajale a'o tjujunobö. Ja̧danö, omukwatö junadöma ökwönö jo̧banöma yöka̧lobö aeba̧litjö̧ma jweinöda yöka̧lo. Omönama yöka̧loko jo̧banö pjakatobö, ja̧danö jo̧banöma lȩtjebokobö. Jweinöda yöka̧lo.

² Ja̧danö, ju'wi wanedö yötawa: Ökwödötjö ju'wedöma, ba̧jȩkwadö sulabenö ja̧tja̧kwa̧ yöba̧lakwawö junö tjö̧jitjö̧ma ökwödöma wainö kwö̧jaduwo, jobadökwö pjabacha̧lö ko̧ko̧kwökönö. Ja̧danö, ju'wi wanedö yötawa. Ökwödöma lȩekwa omukwatö junadönö yöka̧laduwena, jelo̧ sulabenö ja̧inojobö, sulabenö ja̧inokojobö jö̧ba̧lö, ju'wedöma ömöna yöka̧laduwobö atjebena, lȩekwa omukwatö junadöma lȩtjebokobö tjöbajale a'o jo̧nöma. Jejenö atjebitjö̧ma kwa̧ja̧kwaduwoko. Lȩekwa omukwatö junadöma jweinö omukwatö tjujunakobetjö̧ jweinö yöka̧laduwobö jo̧be.

³ Ja̧danö, ba̧kwelö̧jatebö jweinö yöka̧laduwo lȩekwa omukwatö junadönö. Wanedö yötawa: Bakwo̧ balada, tea jwibo̧ma lȩekwa omukwatö juna̧ladö tjöbajale a'o ö̧jobe, sulabenö ja̧ojobö, ja̧okokobö edö. Ja̧danö, ökwödönöma atjebena, bitema sulabenö ja̧ojobö, sulabenö ja̧okojobö, yöka̧laduwobö. Jo̧ba jwibo̧nö lȩlö̧jinö edö, ¡ayö, usulaso̧! jö̧ba̧lö, omöna yöka̧laduwena jo̧banö pjabatö. Sulabenö ja̧inajayonö jweinöma yökawaduwökena, jo̧banö lȩtjebökakobetjö̧. Jejenö kwomukwataduwoko, ja̧danö, jwibo̧nö lȩlö̧jinö kwedaduwijayonö omöna yöka̧laduwoko lȩekwa omukwatö junadönöma.

⁴ Ja̧danö, ju'wi wanedö yötawa. Ökwödönö öpöjödo̧ ajwi bakayabi, bulubi di̧atökökwe jelobekwö döibajobe. Ja̧danö, döbibajo̧nö kwedaduwitjö̧ma döibajobekwö ökömanö 'ya̧nö jo̧banö di̧batibö öbibö kwe'ewaduwobö jo̧be, a̧ji̧kwo̧ ö̧jobekwö. Aji̧kwo̧ma ökwödönö öpöjödijayonö jejenö pjakataduwobö jo̧be.

⁵ Ja̧danö, ju'wi wanedö yötawa: Ökwödönö öpöjödo̧nö kwedaduwobe, iteda ajwi bulunö öbibö i̧'yobe. Ja̧danö, buluma jwiinö ömöki̧ jawa oma'anö e'edobetjö̧ nijakwö meobe. Jejenö meobe kwedaduwitjö̧ma kwomukwataduwoko, Iteda jawa, pjadatökö, jö̧ba̧lö. Pjakataduwobö jo̧be jo̧banöma, ajwi bulunö a̧la̧ibobö. Ja̧danö, ökwödönö öpöjödo̧ijayonö pjakataduwonö— webijetö Isabenö Jo̧ma Moisésnöma, weawa wene ujunobö Israel jojodönö a̧ja̧kwö tjö̧jobö.

Lȩekwa omukwatö junadö tjöbajale a'onö ja̧nö jweinöda yöka̧laduwo, jö̧ba̧lö, weawa wene

⁶ Ina webijetö Isabenö Jo̧ma: —Ju'wi wanedö yötawa, lȩekwa omukwatö junadönö weti̧ma: Bakwo̧ usulaso̧ma lȩekwa omukwatö junadö tjöbajale a'o atada̧lö ö̧jena, lȩekwa omukwatö junadöma jo̧banö nijakwönönö tjedoböma jwiya. Kwomukwataduwo, bitema usulaso̧, sulabenö omukwatö ja̧inena, jö̧ba̧lö. Jejenömaökö. Jo̧ba yöa̧li̧ otiwanö a̧ja̧kwö, jweinö omukwatö tjujunobö jo̧be, ö'öbönö omukwatö lȩtjebapji jö̧ba̧lö.

⁷ Ja̧danö, ju'wi wanedö yötawa: Ökwödöma jelo̧nö, sulabenö ja̧ököjayonö waneda̧löma yöka̧laduwoko, lȩekwa omukwatö juna̧dönöma, bitema sulabenö ja̧bo̧, jö̧ba̧lö. Lȩekwa omukwatö junadöma ö'öbönö omukwatö lȩtjebapji, jö̧ba̧lö, bitenöma kwabö lotjobö omukwatö dujuna, jö̧ba̧lö, jweinöda yöka̧laduwo. Omöna yöbalo̧nöma ötjöda balekwa mikwa lȩtebakwo̧sa, debö i'yobö.

⁸ Ja̧danö, ju'wi wanedö yötawa: Lȩekwa omukwatö junadö tjöbajale a'o ja̧nö, jelo̧ma ökwödönö aeba̧lena, omöna yöba̧lö pjakatitjö̧ma balada chimidakwö, jö̧ba̧lö. Jejenö aeba̧litjö̧ma kwa̧ja̧kwaduwoko. Ja̧ balada kwemobö omöna yöka̧litjö̧ma lȩekwa omukwatö junadö tjöbajale tjewawö̧ edöködödanö wajwitjena isabenö baledinama. Jejenöobetjö̧ sulabenö omukwatö ja̧bö̧kö̧nöda lȩtjebakobe, sulabenö ja̧ököjayonö— jejenö webijetö Isabenö Jo̧ma Moisésnö, weawa wene ujunobö Israel jojodönö.

Ju'wi weawa wene, jelobetjö̧ ichinadönö lȩlö̧jinö kwedaduwobö jo̧be, jö̧ba̧lö

⁹ Ina webijetö Isabenö Jo̧ma Moisésnöma: —Ja̧danö, jelobetjö ichinadönö, kwiteboduwinö ju̧kwadönö usula tjemawoböma weköbaduwoko. Kwöwaisaduwa jelobetjö ichö ja̧kwawa, ökwödöbi Egiptonö jelobetjö ichö kwuju̧kwaduwinobetjö̧. ¡Kwomukwataduwo!— webijetö Isabenö Jo̧ma Moisésnö, weawa jawa ujunobö.

Batjo otidö̧kö̧ o̧babi, ja̧danö, otidö̧kö̧ mölebi weawa wene

¹⁰ Ina webijetö Isabenö Jo̧ma Moisésnöma: —Oba̧ jelemutjö̧ bakwöta jawa o̧biyama batjonö junö kwotidaduwo, ja̧danö, kwujunaduwina jawatjö 'wibö kwemaduwo.

¹¹ Jo̧kwaijayonö, o̧ba jelemutjö̧ dötölataja jawa o̧biya baledena batjo kwotidaduwoko. Jayutjö jo̧kwada pokwitjö̧ma usulasedöda 'wibö tjemobö jo̧be, tjukwakwa̧ma. Ja̧danö, tebo kwebachadö tjukwobö jo̧be u'yukwaja̧ma. Uba batjobi, ja̧danö oliva batjobi jejenö .

¹² Ja̧danö, jelemutjö bakwöta mölȩ baledibanö kwotidaduwi̧ma kwotidaduwo. Jo̧kwaijayonö jelemutjö dötölataja mölȩ, sábado mölȩ baibena kwö'wachaduwo, otidökönö. Jejenö otidökönö kwö'wachaduwo kwajwi ba̧ka̧yö̧bi, bu̧lu̧döbi otidökönö tjö'wachakobetjö̧. Ja̧danö midö eminoko jitji̧bi, ja̧danö jelobetjö̧ ichinadö tjotidobö midö kwiyaduwawö̧bi ö'wachö tjotidokobetjö̧, ja̧danö yemidanö tjujuluwakobetjö̧ ja̧ mölȩma otidökönö kwö'wachaduwo, okobe deinö.

¹³ Okobe jwiinö bi̧ya weawa wene yötawi̧ma ö'wöyawakwawalö̧jinö a̧ja̧kwö kwö̧jaduwo. Ja̧danö, ötjönöda akebaduwo. Ju'wedö tjo̧'wo jawa tjöwa̧na̧lawö̧nöma akebaduwoko jobadönö pjatjatobö, ja̧danö tjo̧'wo tjö̧wa̧na̧lawö̧ tjimibiyabi yöka̧laduwoko— webijetö Isabenö Jo̧ma Moisésnöma.

Ba'ali tjujuni̧ weawa wene

¹⁴ Ina webijetö Isabenö Jo̧ma: —Bakwöta o̧bakwena ba'ali wa̧pötakwa kwujunaduwo, ötjönö ösödö.

¹⁵ Ajayinö ba'ali pan 'ye'yeachö̧kö̧ ba'ali, jö̧ba̧lö, mikwobe. Egiptotjö lakebaduwakwa̧ abönö wetinadanö, ja̧ ba'ali kwujunaduwo bakwöta o̧bakwena, abib mikwo̧ ja̧wo̧nö. Jo̧ba ja̧wo̧nö Egiptotjö lakebaduwinobetjö̧ jo̧ba ja̧wo̧nö kwujunaduwo pan 'ye'yeachö̧kö̧ ba'alima. Ja̧danö, ja ba'alima jelemutjö dötölataja mölȩ baledibanö ba'ali. Pan 'ye'yeachö̧kö̧da kwukwaduwobö jo̧be ja̧ ba'alima. Ja̧danö, ötjönö ösödö ja̧ ba'ali kwanö ichadöma iyawa kwichejebaduwo, ötjönö ösödö kwiyaduwobö.

¹⁶ Ikena ba'alima batjonö kwujuninaduwitjö ajayinö wa̧ji̧ 'dökebaduwi̧ ba'ali, jö̧ba̧lö, mikwobe. Ja̧ ba'alima kwujuninaduwatjö ajayinö pokwi̧ 'witji̧ma ötjönö ösödö kwiyaduwobö jo̧be. Ja̧danö, ikena ba'alima bajaleapo wa̧ji̧tjö̧ 'dökebaduwi̧ ba'ali, jö̧ba̧lö, mikwobe. Ja̧ ba'ali bakwöta o̧bakwena kwujunaduwo, batjonö kwujuninaduwatjö bajaleapo pokwima 'wiköbaduwena.

¹⁷ Ja̧ wa̧pötakwa ba'ali kwujunaduwena okobe deinö ömadöma ötjönö, Isabenö Jo̧ Diosnö ösödö kwo̧ko̧ko̧kwaduwo.

Isabenö Jo̧nö tjiyakwa̧ weawa wene

¹⁸ Ja̧danö, ötjönö juwö iyawo̧nö kwabö lotjajökwenö kwiyaduwena pan 'ye'yeachi̧kwö panma bakwobe kwiyaduwoko. Ja̧danö, juwö kwiyaduwökwe o̧tema okobe jwiinö tjujuwobö jo̧be, ja'yubebi u'yukwökönö ju'wi dewachöma.

¹⁹ Ja̧danö, batjo kwujuninaduwatjö ajayinö pokwi̧tjö̧ iyö kwe'ewaduwo ötjönö kwösödaduweju jo̧bekwö, Isabenö Jo̧nö, kwösödaduwökwe Diosnö kwösödaduweju jo̧bekwöma. Ja̧danö, ju'wibi weta baikwö: Chiwo itji̧nö, ja̧danö, obeja itji̧nö, ja̧danö bakaya itji̧nö kwukwaduwobö toköbaduwena, ojo'do o̧do̧'bi̧sobutjöma toköbaduwoko— webijetö Isabenö Jo̧ma Moisésnöma, Israel jojodönö weawa wene ujunobö.

Isabenö Jo̧ Israel jojodönö yöbawö ujunina jawa

²⁰ Ikenama, Isabenö Jo̧ma Moisésnö yöbawijetö: —Moisés, ¡a̧ja̧kwitjö! Ötjöma ángelso̧nö wetocha ökwödö kwi̧'yaduwobe kwabönöduwi, ökwödönö ite'ada̧lö, ökwödönö 'da̧batö chujuninemi otiwanö kwichibaduwakobetjö̧.

²¹ Jo̧ba ángelso̧ wei̧ ö'wiyawakwalö̧jinö kwa̧ja̧kwaduwo. Jelobekwö kwomukwataduwoko, jo̧ba wei̧ a̧ja̧kwökönö, ötjö weti̧da webo̧obetjö̧. Jo̧ba wei̧ kwa̧ja̧kwaduwökötjö̧ma jwiinö ölabikobe ökwödönöma.

²² Jo̧kwaobetjö̧ wetökwe ángelso̧ wei̧ ö'wöyawakwawalö̧jinö a̧ja̧kwö, ötjö weti̧da okobe jwiinö kwösödaduwitjö̧ma kwöpöjojodöduwinö lȩtebakwo̧sa, ja̧danö ökwödönö pjabatadönö pjatatakwo̧sa.

²³ Ja̧danö, wetökwe ángelso̧ma, kwabönöduwi 'yo̧ma ju'wedö tjiteboduwi tebachö öibakwo̧, Amorreo jojodö tjitebonö, heteo jojodö tjitebonö, ferezeo jojodö tjitebonö, cananeo jojodö tjitebonö, heveo jojodö tjitebonö, jebuseo jojodö tjitebonö. Ötjöma okobe deinö jobadönöma jwiinö söbebö lotakwo̧sa.

²⁴ Jobadö tjitebonö tebachajadö kwö̧jaduwena jobadö tjo̧'wo̧ jawa ösödiatji̧danö kwösödaduwoko, tjöba a'otjö nijakwö kwöbaduwi bȩbachibö. Ja̧danö, jobe ju̧kwadö omukwatiatji̧danö, do̧'wo̧ jawa döwa̧na̧lawö̧ wetji̧ da̧ja̧kwaduwo, jö̧ba̧lö, kwomukwataduwoko. Tjo̧'wo̧ jawa otikwa tjöwa̧na̧lawö̧nöma söbebö loköbaduwo okobe jwiinö. Ja̧danö, tjösödemi inawiya ödöi̧ inawiya a̧la̧pedö tjujuninawiyama jwiinö pjeikwena 'dalö loköbaduwo.

²⁵ Ötjönö, Isabenö Jo̧nöda kwösödaduwo, kwösödaduwökwe Diosnöda. Jejenö ötjönöda kwösödaduwitjö̧ma kwukwaduwakwa̧, kwowaduwakwa̧ iyö pjatatakwo̧sa. Ja̧danö, kwö'wöchaduwokobö pjatatakwo̧sa, ötjönöda kwösödaduwitjö̧ma.

²⁶ Ja̧danö, ötjönöda kwösödaduwitjö̧ma pjatatakwo̧sa ya̧dö metu'wadönöma, tjemunö 'debawö lotjokobö. Ja̧danö, okobe deinö Israel jojodö ya̧döma tjemunö tjemakwedö, bakwujubi tjemunö debö̧kö̧ju tjö̧jinö. Ja̧danö, lekwe mölȩ kwö̧jaduwobö pjatatakwo̧sa.

²⁷ Ja̧danö, ju'wedö tjuju̧kwitenia kwichibaduwena, jobe ju̧kwadöma ötjönö omukwatö jwiinö yetjabikobe ¡ayö¡ juluwo̧ pjaatinawö̧, jö̧ba̧lö. Jejenö yebabinö ja̧nö jobadö kwöpöjojodöduwima ¿taji ja̧dakwa̧jö? jö̧ba̧lö omukwatöködödanö batjibakwedö. Ikenama, jwiinö yetjabobetjö̧ ökwödö kwö̧jaduwelö, ja̧danö, tjitebotjö 'dötjibakwedö.

²⁸ Jao, jwiinö yebabidö batjibanö, ja̧danö jwiinö omukwatöködödanö batjibanö ja̧tobetjö̧ jobadö heveo jojodö, cananeo jojodö, heteo jojodö tjiteboteniatjö latjebakwedö.

²⁹ Jo̧kwaijayonö okobe deinö bakobe, bakwöta o̧ba baledibajena latjebobö ja̧tökakwo̧sa, jobema jojodö ba̧jekwadöma detjobetjö̧ tebonö ju̧kwadö ba̧jekwachajadö ichö ökwödönö 'yö̧yö̧tja̧pji jö̧ba̧lö.

³⁰ Jo̧kwaobetjö̧ tjo̧'omanö latjebobö ja̧takwo̧sa kwöpöjojodönöma, ökwödöma kwöba̧jȩkwachaduwenanö kabatö, ja̧danö, chiyemima kwemaduwenanö kabatö, bemima ökwödö ditebo, jö̧ba̧lö.

³¹ Ja̧danö, kwiteboduwi chiyakwemima jalobe, u'dakwöchobe o̧pesobu duwobutjö a̧li̧kwöchobekwö o̧pesobu mediterraneosobu mikwobu ichibö. Jao, kwiteboduwi chiyakwemima jalobe, ja̧wo̧ meobe Sinai mejetjö ja̧wo̧ laebobekwö Éufrates ojwe mikwödö ichibö. Ökwödöma okobe deinö jobe ju̧kwadönöma kwujuluwaduwobö pjatatakwo̧sa, jobadönö a'dewö lobö, ökwödö kwiteboduwida baibanö.

³² Ja̧danö, wetaduwakwö: Jobadökwö bakobe omukwatö yöba̧lö kwujunaduwoko. Ja̧danö jobadö tjösödawö̧kwöbi bakobe omukwatö yöba̧lö kwujunaduwoko.

³³ Ja̧danö, jobadö kwiteboduwinö tjuju̧kwoböma weköbaduwoko jobadö tjösödawö̧nö ökwödöbi kwösödaduwobö 'daliwadanö junö meköbaduwobö ötjibapji jö̧ba̧lö. Jejenö, jobadö tjösödawö̧nö kwösödaduwitjö̧ma, ötjö weti̧ a̧ja̧kwökönö ötjönö sulabenö ja̧bö kwö̧jaduwena.