Éxodo 22 - Dios Iwene

Naukwabidönö lȩtjebobö weawa jawa

¹ Ina webijetö Isabenö Jo̧ma Moisésnöma, weawa wene ujunobö Israel jojodönö a̧ja̧kwö tjö̧jobö, baikwö: —Wanedö yötawa. Bakwo̧ma jelo̧ ajwi bakayanö, jenanö obejanö naukwö kwabö loitjö̧ma jo̧bama önaukwajökwe a̧ji̧kwo̧nö balekwa mikwa iyobö jo̧be. Jenanö, önaukwaja̧ ikena jelo̧nö midö iyitjö̧ma, balekwa mikwa iyobö jo̧be. Ja̧danö, bakayanö önaukwitjö̧ma ba̧ka̧yö̧ bakwamubedönö iyobö jo̧be. Ja̧danö, obejanö önaukwitjö̧ma o̧bȩja̧dönö ö'wejemubedönö iyobö jo̧be.

^2-4 Ja̧danö, bakwo̧ naukwabo̧ma bakaya, obeja, bulu önaukwajwökwema ina jo̧bakwö ja̧nö 'yaba̧lo̧ ö̧jitjö̧ma, naukwabo̧ma önaukwajökwenö tjeatobö jo̧be a̧ji̧kwo̧nö. Ja̧danö, önaukwajökwedamaökö, jelo̧nöbi iyobö jo̧be, dujutajanö önaukwajökwe a̧ji̧kwo̧nö. Isabenö, a̧ji̧kwo̧ ajwi mikwa baibanö iyobö jo̧be. Jo̧kwaijayonö naukwabo̧ma jelo̧nö iyobö waitjö̧ma, chujuna̧lökökwe, jö̧ba̧lö, naukwabo̧ ömöledöma naukwabo̧nö mikwanö iyö lotjobö jo̧be, jelo̧ ömöayo̧ baibanö. Ja̧danö, ömöledöma naukwabo̧nö tjiyaja̧ baladama önaukwajökwe a̧ji̧kwo̧nö tjiyobö jo̧be, ajwi mikwa baibanö. Ja̧danö, ju'wi wanedö yötawa: Bakwo̧ eju luwo̧ma yö̧te ja'ö iteda ejunö önaukwobö tebacho̧nö kwaökwe ö'wöchitjö̧ma luwo̧nöma lȩtjebökakobe, wene jwiya, jö̧ba̧lö. Jo̧kwaijayonö mölȩda önaukwobö tebacho̧nö kwabö loitjö̧ma lȩtjebobö jo̧be, wene ujuna̧la, jö̧ba̧lö— webijetö Isabenö Jo̧ma Moisésnö, weawa wene ujunobö Israel jojodönö.

Israel jojodö otiwanö bakobe tjö̧jobö weawa wene

⁵ Ina webijetö Isabenö Jo̧ma Moisésnöma: —Wanedö yötawa. Bakwo̧ a̧jwi̧nö tjöbebö ujunokobetjö̧ jelo̧ öbatjobekwö, trigo tjujuninayu, uba tjujuninayu i̧'yobe. Jobe kwebachö pokwi̧tjö, ja̧danö, wa̧ji̧tjö̧ ukwitjö̧ma ajikwo̧ma balekwa mikwa iyobö jo̧be, iteda öbatjotjö, pokwi̧tjö, ja̧danö, wa̧ji̧tjö̧ jwiinö otiwi̧ jawatjö.

⁶ Ja̧danö, ju'wi wanedö yötawa: Bakwo̧ iteda öbatjo ujuwena omönanö ujuwemitjö̧ sula'wo ubibö 'ya̧nö jelo̧ öbatjobekwö 'dö̧tekwajobe. Ja̧danö, trigosa'yebi, ja̧danö ina pokwi̧ jawa trigobi, ja̧danö, okobe jwiinö trigo batjobi uibitjö̧ma, juwo̧ma okobe jwiinö ujuwaja̧ mikwanö imidobö jo̧be— webijetö Isabenö Jo̧ma Moisésnöma, weawa wene ujunobö Israel jojodönö.

⁷ Ina webijetö: —Ja̧danö, ju'wi wanedö yötawa: Bakwo̧ma ömöledöso̧nö aeba̧lobe iteda u̧kwa balada, ja̧danö ju'wi nöinö mikwawi̧ jawa ite'ada̧lobö, ömöledöso̧ eju okwa. Ikenama, ömöledöso̧ ejunö naukwabo̧ma ichö, eju okwa tebachö okobe jwiinö önaukwobe. Ja̧danö, ömöledöso̧ma naukwabo̧nö do̧atitjö̧ma jo̧ba naukwabo̧ma dötölataja jawa iyobö jo̧be, önaukwaja̧bi, ju'wibi önaukwaja̧ dötölatajanö.

⁸ Jo̧kwaijayonö naukwabo̧nö tjöbadekwajökötjö̧ma eju luwo̧ma lȩekwa omukwatö junadö tjöbajale a'o ja̧nö i̧'yobö jo̧be. Ja̧danö, jobadöma eju luwo̧ yöa̧li̧ a̧ja̧kwö lȩekwa omukwatö tjujunakwedö eju luwo̧ ömöledöso̧nö, önaukwinojobö, önaukwinokojobö, jö̧ba̧lö.

⁹ Ja̧danö, ju'wi wanedö yötawa: Jojodö du̧ju̧taja bakwo̧nökwena ö'wöyabikwawö jwötjobe, Ite bakayama ökwö kwajwimaö̧kö̧ ötjöda chajwi, ja̧danö, ite bulunöbi, obejanöbi, jenanö, ötjöda chajwimu, jö̧ba̧lö. Ja̧danö kamisibi, ju'wi jawabi jenanö, bakwo̧ iteda u̧kwa, chisakwemi jwia, jö̧ba̧lö. Jejenö ö'wöyabikwawö jwötjitjö̧ma lȩekwa omukwatö juna̧ladö tjöbajale a'o ja̧nö tji̧'yobö jo̧be, jobadönö yöba̧lö. Ja̧danö, jobadöma yötja̧lakwawi̧ a̧ja̧kwö lȩekwa omukwatö tjujunakwedö, iteda omöna yöba̧lo̧, ja̧danö, iteda jweinö yöba̧lo̧, jö̧ba̧lö. Ikenama omöna yöba̧lo̧ma iyobö jo̧be jweinö yöba̧lo̧nöma, dötölatajanö, baikwö: Jweinö yöba̧lo̧ma bakaya bakwo̧da ujuna̧litjö̧ma, omöna yöba̧lo̧ma dujutajanö iyobö jo̧be. Jenanö ökamijido̧, jweinö yöba̧lo̧ma bakwa̧do̧ ujuna̧litjö̧ma do̧do̧lataja iyobö jo̧be, omöna yöba̧lo̧ma— webijetö Isabenö Jo̧ma Moisésnöma, weawa wene ujunobö Israel jojodönö.

^10-11 Ina webijetö: —Ja̧danö, ju'wi wanedö yötawa: Bakwo̧ma iteda ajwi bakayanö, bulunö, obejanö, jelo̧nöbi, jelo̧nö ipjeanö jo̧nö ite'ada̧lobö ujunobe. Ujunajabe okobetjö ajwi̧ma ö'wöchitjö̧ma, te'ada̧lo̧ma ömöledöso̧nö yöa̧lobö jo̧be, Ötjöma Dios öbajale a'otjö isabenö yöta̧la kwajwinö chönaukwökötö, jö̧ba̧lö. Jenanö, ajwinö ujunajabe okobetjö suli̧ waekwitjö̧ma te'ada̧lo̧ma ömöledöso̧nö, Dios öbajale a'otjö isabenö yöta̧la kwajwinö chönaukwökötö, jö̧ba̧lö, yöa̧lobö jo̧be. Jenanö, jojodö tjedokonö ajwinö önaukwitjö̧ma te'ada̧lo̧ma Dios öbajale a'otjö yöbawö ujunobö jo̧be, chönaukwökötö chajwi̧nöma, jö̧ba̧lö. Jejenö yöa̧liökwe a̧ji̧kwo̧ma, Jao jweinö yöka̧la, jö̧ba̧lö, ösödobö jo̧be, balekwa mikwa imidobö abeba̧lökönö.

¹² Jo̧kwaijayonö te'ada̧lo̧ma otiwanö ite'ada̧lokobetjö̧ te'ada̧lökwenö önaukwitjö̧ma te'ada̧lo̧ma balekwa mikwa imidobö jo̧be ajikwo̧nö.

¹³ Ja̧danö, tebo luwama ajwinö pjeikwena yö̧yö̧bö loitjö̧ma, te'ada̧lo̧ma yö̧yö̧ajökwenö emibö u'yukwi̧ kwi̧sebobö jo̧be, te'ada̧lo̧ma. Jejenö i̧sebitjö̧ma balekwa mikwa imidobö jwiena.

¹⁴ Ja̧danö, ju'wi wanedö yötawa. Bakwo̧ma ömöledöso̧ ajwinö öbalewena ömöledöso̧ deonö ajwinö suli̧ waekwitjö̧ma, imikwa baibanö imidobö jo̧be ömöledöso̧nöma. Jenanö ajwinö debö i'yitjö̧ma, imikwa baibanö imidobö jo̧be.

¹⁵ Jo̧kwaijayonö, a̧ji̧kwo̧ma ö̧jonö jejenö suli̧ waekwitjö̧ma, debö i'yitjö̧bi imikwa baibanö imidoböma jwiobe. Balewakwawa mikwada imidobö jobe— webijetö Isabenö Jo̧ma Moisésnö, weawa wene ujunobö Israel jojodönö.

Ju'wi weawa wene

¹⁶ Ina webijetö Isabenö Jo̧ma Moisésnö: Ju'wi wanedö yötawa: Bakwuju möayuju jö̧jobe, ina iso̧kwö jö̧kö̧ju, ja̧danö, ina jobujunö chilekwo baibanö chemocha, jö̧balö, yöbawö juno̧nö debujuma. Ja̧danö, jelo̧ma jobujunö obö jobujukwö bakobe ö̧jitjö̧ma jobujunö ilekwo baibanö emobö jo̧be. Ja̧danö, jabe'donö jobujunö emi̧ mikwa imidobö jo̧be, iso̧nö jö̧kujunö ilekwo̧ bajibanö midaitjadanö.

¹⁷ Jo̧kwaijayonö jobuju jabe'doma öpöjöditjö̧ma, chiyökö itenöma, jö̧ba̧lö, jo̧ba jojoma jobujunö emököjayonö ina imidobö jo̧be, iso̧nö jö̧kujunö emawa midiainadanö— webijetö Isabenö Jo̧ma Moisésnö weawa wene ujunobö Israel jojodönö.

¹⁸ Ja̧danö, ju'wi wanedö yötawa: Isabenö, mea boawa jojosujunö kwabö lotjobö jo̧be.

¹⁹ Ja̧danö, ju'wi wanedö yötawa. Bakwo̧ma ajwinö, ja̧danö jelo̧ ajwinö sulabenö 'da̧'da̧bakwawö ja̧itjöma jo̧banöma kwabö lotjobö jo̧be. Ja̧danö, isujunöbi jenanö.

²⁰ Ja̧danö, ju'wi wanedö yötawa. Bakwo̧ma o̧'wo jawa tjösödökwenö ösödinö iyitjö̧ma jo̧banö kwabö lotjobö jo̧be. Ja̧danö, isujunöbi jenanö. Ötjö, Isabenö Jo̧nöda ösödinö kwiyaduwobö jo̧be.

²¹ Ju'wi wanedö yötawa: Jelobetjö ichinadönö, kwiteboduwinö ju̧kwadönö sulabenö ja̧köbaduwoko, ja̧danö, usula tjemawinö weköbaduwoko. Kwomukwataduwo: Ökwödöbi jelobetjö ichinadö kwö̧jinawobe Egiptonö.

²² Ja̧danö, ju'wi wanedö yötawa: Jilekwe woinokonö, ja̧danö tjemu abe'do, ojo'do debo̧nö, debujunö usula tjemawinö weköbaduwoko.

²³ Yötawaduwakwö: Jobadönö usula tjemawinö weköbaduwitjö̧ma, jobadö ötjönö jwötjeba̧li̧ a̧ja̧kwö pjatatakwo̧sa.

²⁴ Ja̧danö, usula tjemawinö weköbaduwitjö ökwödönö jwiinö chölabobetjö̧ balekwa mikwa lȩtebakwo̧sa ökwödönöma. Kwöpöjojodöma ökwödönö dȩdȩbö lotjobö wetakwo̧sa, kwilekwamuduwima tjilekwe debadöda batjibakwedö, ja̧danö kwi̧tji̧mu̧duwibi, tjabe'do debadöda batjibakwedö.

²⁵ Ju'wi wanedö yötawa: Ötjö chömöledötjö jwibo̧nö balada kwöbalewaduwitjö̧ma ja̧ kwöbalewaduwaja̧ bajalekwönönö imidoma akeba̧laduwoko. Ju'wedö balada balewadöma jejenö sulabenö atjebali̧danö akeba̧laduwoko.

²⁶ Ja̧danö, balada kwöbalewaduwajökwenö akeba̧lena wame jawa ökamisi ujunibobö, balada yemidanö tekatena chiyokwö, jö̧ba̧lö. Jejenö junibö ȩwa̧jitjö̧ma yemidanö tjebatö kwiyonö u̧kwa kwamisi ja̧wo̧ meakwa̧ abönö, yö̧te tiyuwachapji jö̧ba̧lö.

²⁷ Jo̧bama jeledo̧ yö̧te abawado̧ma jwiiökwe ¿tajinö jwaekwobö yö̧te tiyuwenama? Ja̧danö, ötjönö jwöeba̧litjö̧ma, pjabatitjö, jö̧ba̧lö, a̧ja̧kwö pjatatakwo̧sa, lȩlö̧jinö edo̧sachobetjö̧— webijetö Isabenö Jo̧ma Moisesnö weawa wene ujunobö Israel jojodönö.

²⁸ Ina webijetö Isabenö Jo̧ma Moisésnö: —Ötjönöma sulabenö omukwatö jwökeba̧laduwoko. Ja̧danö, kwuluwedöduwinö sulabenö baledobö weto jö̧ba̧löma akeba̧laduwoko.

²⁹ Ju'wi jawabi weta: A̧'dȩlökönö kwiyaduwotjö kwöbatjoduwitjö jwiinö otiwi̧ jawa, 'döbö kwödaja̧duwi̧ trigo, ja̧danö ubasobu o'do̧bubi, ja̧danö olivasadetjö o̧tesobubi. Ja̧danö, ju'wibi: Okobe deinö kwi̧tji̧mu̧duwi ömadötjö abönö damönö mikwa jawa midö kwiyaduwo ötjönöma.

³⁰ Ja̧danö, kwa̧jwi̧mu̧duwi ba̧ka̧yö̧, o̧bȩja̧dö tji̧tji̧mu̧ ömadötjö abönö damönö ötjönöda iyö 'da̧batö kwujunaduwo. Ja̧danö, jelemutjö dötölataja mölȩ tjojo'dokwö ojwö tjö̧jiyayonö jelemutjö wa̧pötakwa möle baibena ötjönöda kwiyaduwotjö— webijetö Isabenö Jo̧ Moisésnö weawa wene ujunobö Israel jojodönö.

³¹ Ina webijetö: Ökwödöma ötjö chömöledöja, ötjö weti̧ a̧ja̧kwö 'da̧batö chujuninawö̧ja. Jo̧kwaobetjö̧ kwajwi̧, tebonö jo̧ pjeikwena yö̧yö̧bö loökwe itebiyama kwukwaduwoko. Kwajwimu a̧wi̧li̧dönöda iyö loköbaduwo— webijetö Isabenö Jo̧ma Moisésnö, weawa wene ujunobö Israel jojodö a̧ja̧kwö tjö̧jobö.