Éxodo 21 - Dios Iwene

Isabenö Jo̧ Israel jojodönö weina, midö tjeminawö̧ otidadö jawa

¹ Ja̧danö, Isabenö Jo̧ma Moisésnö webijetö: — Moisés, biya̧ weawa wene kwujuno ökwödönö, Israel jojodönö a̧ja̧kwö kwö̧jaduwobö:

² Wanedö yötawa. Ökwödötjö bakwo̧ Hebreo jojonö midö kwemena kwömöayo̧ baibanö, jelemutjö bakwöta o̧biyada ökwö weköbi̧ a̧ja̧kwö otidobö jo̧be. Ja̧danö jelemutjö bakwöta o̧bi̧ya̧ 'dö̧ibajena, jelemutjö dötölataja o̧bi̧ya baibanö jo̧bama weköbi̧tjö ö̧jibinö laebobö jo̧be, ökwönö midawa jwiinö.

³ Ja̧danö, jo̧ba midö eminökwema ilekwo debo̧nö emitjö̧ma jo̧dawa'ye laebakwo̧ jelemutjö dötölataja o̧biya baibena. Ja̧danö, ilekwonö juna̧lo̧nö midö eminatjö̧ma du̧ju̧taja, ömöayo̧ ilekwokwö tjö̧jibinö latjebakwedö jelemutjö dötölataja o̧biya baibena.

⁴ Ja̧danö, midö eminökwenö ilekwo̧ baibanö weinatjö̧ma, ja̧danö jobujuma ji̧tji̧munö 'yabebö jö̧jinatjö̧ma midö eminökweda ö̧jibinö laebakwo̧ jelemutjö dötölataja o̧biya baibena, jo̧dawa'yeda. Jo̧ba ilekwo, i̧tji̧mu tjuju̧kwibobö jo̧be, tjuluwo̧ midö emawö̧da jenanö.

⁵ Ja̧danö, ömöayo̧ma, Chuluwo̧nö, chilekwonö, chi̧tji̧munö ile nitebawö̧, chö̧jibinö latebökö, jö̧ba̧lö, jweinö yöa̧litjö̧ma

⁶ uluwo̧ma ömöayo̧nö öbibö i̧'yobö jo̧be, badedö edadö tjo̧bekwö. Jobe ichibö luwo̧ma ömöayo̧nö apjudesö'danö pöbebö 'da̧ebobö jo̧be ölakiyusajunö. Ja̧ 'da̧ebi̧ma i̧sekwobe, Bitema ba̧kwȩlö̧jatebö 'yaa̧lemi baibanö ötjö chömöayo̧ baibakwo̧, jö̧ba̧lö— webijetö Isabenö Jo̧ma Moisésnöma. Ja̧ weawa wene ujunobö webijetö Isabenö Jo̧ma Moisésnöma, Israel jojodönö weawa wenema.

⁷ Ina webijetö: — Biya̧ weawa wenebi kwujuno ökwödönö, Israel jojodönöma, baikwö: Wanedö yötawa: Bakwo̧ iteda itjijunö jelo̧ ömöayuju baibanö midö iyitjö̧ma jelemutjö dötölataja o̧biya baibena jö̧jibinö lajeboböma jwibuju, iso̧ midö tjeminökwe laebi̧danö.

⁸ Ja̧danö, wanedö yötawa, jobujunö baledi̧ma: Juluwo̧ma ajayinö jobujunö itedada ilekwo baibanö midö eminayonö ikena jobujunö öpöjödobe. Ja̧danö, öpöjöditjö̧ma jabe'do jobujunö midö emobö jo̧be, jobujuma jabe'dokwö tjejachajakobetjö̧. Ja̧danö, luwo̧ma jelobe ju̧kwadönö midö iyoböma jwiobe, iteda yöbawö junö iwene sulabenö kabatibö jelobekwö omukwatajabetjö̧, jobujunö öpöjödö.

⁹ Ja̧danö, ju'wi wanedö yötawa: Luwo̧ma midö eminokonö iteda itji̧nö weitjö̧ma ilekwo baibanö jobujunöma iteda itjijudanö edö pjaatobö jo̧be.

¹⁰ Ja̧danö, ju'wi wanedö yötawa: Luwo̧ma midö eminokonö iteda ilekwo baibanö eminobe. Ikenama, ju'winö jeluju midö eminokonöbi ilekwo baibanö eminobe. Jejenö jeluju eminajayonö ajayinö eminokonö ina otiwanö kwakwawabi, kamisibi iyobö jo̧be, ka̧achökwökönö. Ja̧danö jelujunö eminajayonö ina ajayinö eminokokwö bakobe baibanö ösödobö jo̧be.

¹¹ Jejenö jo̧banö wa̧pötakwa jawa weta, baikwö: Jobujunö, ajayinö eminokonö ajayinö iyi̧danö iyobö jo̧be kwawawabi, kamisibi. Ja̧danö, jobujukwö bakobe baibanö ösödobö jo̧be. Luwo̧ma jejenö ja̧ökötjö̧ma jobujunö jö̧jibinö laebobö jo̧be, jo̧banö midawa jwiinö— webijetö Isabenö Jo̧ma Moisésnöma. Ja̧ weawa wene ujunobö webijetö Isabenö Jo̧ma Moisésnöma, Israel jojodönö weawa wenema.

Kwabö lotjobö weina lȩekwa

^12-14 Ina, Isabenö Jo̧ma webijetö Moisésnöma: — Bi̧ya weawa wene kwujuno ökwödönö, Israel jojodönö, a̧ja̧kwö kwö̧jaduwobö: Wanedö yötawa: Bakwo̧ jelo̧nö o̧'wo sulinö edö, kwabö lotonö, jö̧ba̧lö, omukwatö ujunobe. Ikenama, omukwatö ujuninökwenö kwabö loobe. Isabenö, jo̧ba kwabö lobo̧nö kwabö loköbaduwobö jo̧be, ajayinö jelo̧nö kwabö loobö omukwatö ujuninobetjö̧. Jo̧bama, ötjönö juwö iyawapjo jobekwö ö̧jibobö döibajatjö̧bi jo̧banö kwabö loköbaduwobö jo̧be. Jo̧kwaijayonö bakwo̧ la'akatjö omukwatö ujuninököjayonö ikenama jo̧kwada jelo̧nö o̧'wo sulinö edö kwabö loitjö̧ma jo̧ba kwabö lobo̧nö kwabö loköbaduwobö jwiobe. Jo̧ba döbibajö i̧'yakwemima 'da̧batö chujunijatö, jo̧beda ö̧jobö.

¹⁵ Ju'wi wanedö yötawa: Bakwo̧ma abe'donöbi, ojo'donöbi kwakwaitjö̧ma isabenö jo̧banö kwabö loköbaduwobö jo̧be.

¹⁶ Ja̧danö, ju'wi wanedö yötawa: Bakwo̧ma jojonö do̧batibö töbebö jelo̧nö midö iyitjö̧ma jo̧ba iyo̧nöma kwabö lotjobö jo̧be. Ja̧danö, ina midö iyökönöbi jo̧ba do̧atajökwenö ina do̧batibö töbebajo̧kwö kwöbadekwajaduwitjö̧ma töbebajo̧nö kwabö loköbaduwobö jo̧be.

¹⁷ Ja̧danö, ju'wi wanedö yötawa: Bakwo̧ abe'donöbi ojo'donöbi sulabenö yebabökönö jwöeba̧litjö̧ma jo̧banö kwabö loköbaduwobö jo̧be— webijetö Isabenö Jo̧ma Moisésnöma. Ja̧ weawa wene ujunobö webijetö Isabenö Jo̧ma Moisésnöma, Israel jojodönö weawa wenema.

Ju'wi lȩtjebobö weina jawa

¹⁸ Ina, Isabenö Jo̧ma webijetö Moisésnöma: —Bi̧ya weawa wene kwujuno ökwödönö, Israel jojodönö, a̧ja̧kwö kwö̧jaduwobö: Wanedö yötawa: Ökwödötjö ömadö du̧ju̧taja ölakwabikwawadötjö bakwo̧ ölabökwenö inawanö 'do'doitjö̧bi, ja̧danö ömamunö 'do'doitjö̧bi baikwö baledena: Do'doajökwema debö i̧'yököjayonö kamapjonöda ö̧bena, niökweobetjö̧.

¹⁹ Ja̧danö, jo̧ba niökwema ju'winö yemidanö a̧laibö oto'kwa'o do̧ba̧lö kweachitjö̧ma, jo̧banö 'do'dobajoma wene jwiinö ö̧jena. Lȩtjebökökwe. Midöda imidobö jo̧be 'do'doinökwenöma, jo̧ba otikwa mikwawama, kamapjonö ö̧bena otidawatjö eminokobetjö̧ baladama. Ja̧danö, ju'wibi: Dötölödönö balada imidobö jo̧be, jobadö atjeba̧li̧ma niökwema yemidanö otiwanö ö̧bibajenanö kabatö.

²⁰ Ju'wi wanedö yötawa: Bakwo̧ iteda midö eminökwenö ö̧'iyanö kwakwaena kwakwajökwema woitjö̧ma luwo̧nöma lȩtjebobö jo̧be, ömöayo̧nö kwabö loajabe, jö̧ba̧lö. Ja̧danö, midö eminoko kwakwajoko wojitjö̧bi, jejenöma, luwo̧nö lȩtjȩbobö jo̧be.

²¹ Jo̧kwaijayonö kwakwajökwe juluwanö woökötjö̧ma, bakwöta mölȩ, dötölataja mölȩ baledaja̧ ikenada woitjö̧ma, jenanö kwakwaokobi juluwanö wojökötjö̧ma luwo̧nöma lȩtjebokobe. Iteda wei̧ otido̧ deobetjö̧ ida̧ökö nöinö suli̧ emawö jo̧. Jejenö nöinö usula emawobetjö̧ jo̧banö lȩtjebobö jwiobe.

^22-23 Ju'wi wanedö yötawa: Ökwödö ömadötjö ju'wedöma ölakwabikwawö jobadötjö bakwo̧ omukwatökönö metu'wo jujunö kwaitjö̧ma baikwö baledena, wanedö yötawa: Metu'wo juju kwakwaokoma tjemu jöbötjatökwenöma 'debawö lojitjö̧ma kwakwabajo̧ma jilekwenö balekwa mikwa imidobö jo̧be. Ja̧danö jilekwe kwakwabo̧nö imidobö aeba̧li̧ma lȩekwa omukwatö junadöma, Jao jweinö aeba̧la, jö̧ba̧lö, omukwatö tjujunitjö̧ma, jejenö jilekwe aȩba̧li̧danö imidobö jo̧be kwakwabo̧ma. Jo̧kwaijayinö metu'wo juju kwakwaajokoma tjemu jöbötjatökwenö 'debawö loji̧bi, ja̧danö jobujunöbi jwiinö inia tjö̧jinö baleditjö̧ma kwakwabo̧nö bakwainö inia tjöbö baledinö lȩtjebobö jo̧be. Wanedö yötawa: Jobujuma debö ji̧'yitjö̧ma kwakwabo̧nöbi kwabö lotjobö jo̧be.

²⁴ Ja̧danö, kwakwabo̧ma kwakwajoko jöbajale suli̧ jwöachitjö̧ma jo̧ba öbajale bakwainö suli̧ jwöachinö kwatjobö jo̧be. Ja̧danö, jobuju jo'yema 'deawinö kwaitjö̧ma kwakwabo̧nö o'yebi bakwainö 'deawinö kwatjobö jo̧be. Ja̧danö, jömasapa, jömamu inia tjöbö baleditjö̧ma jo̧ba kwakwabo̧nö bakwainö inia tjöjinö baibanö ja̧tjobö jo̧be.

²⁵ Ja̧danö, jobujunö jubinö ja̧atjö̧ma ubinö jabo̧nöma bakwainö ubinö ja̧tjobö jo̧be. Ja̧danö, jobujunö dȩdȩitjö̧ma dȩdȩbo̧nö bakwainö dȩdȩtjobö jo̧be. Ja̧danö, kwakwaoko ji̧sȩdo balö̧ji̧yanö baibanö baleditjö̧ma kwakwabo̧nö i̧sȩdo̧ balji̧ya̧nö baibanö kwakwatjobö jo̧be.

²⁶ Ju'wi wanedö yötawa: Bakwo̧ iteda midö eminökwenö kwakwaijökwe öbajale suli̧ jwöachitjö̧ma luwo̧ma midö eminökwenö ö̧jibinö laebobö jo̧be, öbajale suli̧ jwöachinö kwakwaajobetjö̧. Jenanö midö eminokonöbi, jejenö baleditjö̧ma.

²⁷ Ja̧danö midö eminökwenö kwakwaajiökwe o'yebi 'döitjö̧ma midö eminökwe ö̧jibinö laebobö jo̧be, luwo̧ma o'ye 'döainö kwakwaobetjö̧. Jenanö midö eminokonöbi jejenö baibitjö̧ma. Ja̧ weawa wene ujunobö webijetö Isabenö Jo̧ma Moisésnöma, Israel jojodönö weawa wenema.

Ajwi bakaya labo̧nö, ja̧danö a̧ji̧kwo̧nö lȩekwa jawa

²⁸ Ina webijetö Isabenö Jo̧ma Moisésnöma, weawa wene ujunobö Israel jojodönö a̧ja̧kwö tjö̧jobö, baikwö: —Wanedö yötawa: Bakwo̧ ajwi bakayaso̧ma iso̧nö, isujunö töbö, i'yekanö tibatö loitjö̧ma bakayaso̧nö kwabö lotjobö jo̧be, inawiya ikwawö. Ja̧danö, jo̧ba bakayaso̧ itebiyama tjukwokobö jo̧be. Ja̧danö, bakayaso̧ a̧jikwo̧nöma wene jwiinö tjedobö jo̧be, jo̧banö lȩbebökönö.

²⁹ Jo̧kwaijayonö baikwö baleditjö̧ma a̧jikwo̧nöbi kwabö lotjobö jo̧be, wanedö yötawa: Ajayinöma bakayaso̧ma yemidanö yemidanöbi jojodönö töbö i'yekanö tibatö labiainobe. Ja̧danö, a̧ji̧kwo̧nö atjeba̧linobe, Kwajwima labo̧, tjöekwaka okwa di̧batö kwujunonö, jojonö töbö i'yekanö tiatapji jö̧ba̧lö. Jejenö atjeba̧lijayonö a̧ji̧kwo̧ma a̧ja̧kwökönö a̧jwi̧ labo̧nö tjöekwaka okwa di̧batö ujuninokobe. Jejenö ujunokobetjö̧, yemidanö i'yekanö tiatitjö̧ma a̧ji̧kwo̧ jawada, ja̧danö wene juna̧lo̧. Jejenö baleditjö̧ma bakayanöbi a̧ji̧kwo̧nöbi kwabö lotjobö jo̧be inawiyanö ikwawö.

³⁰ Jo̧kwaijayonö lȩekwa omukwatö junadöma a̧ji̧kwo̧nö imikwa baibanö balekwo̧nö imidobö atjeba̧lena, a̧ji̧kwo̧ma iteda ö̧jibinö imidobö.

³¹ Ja̧danö, bakwainö baledakobe bakayaso̧ma tjemunö töbö i'yekanö tibatö loitjö̧ma, jelo̧ itji̧nö, ja̧danö itjijunö.

³² Ju'wi wanedö yötawa: Bakayaso̧ma jelo̧ midö eminökwenö, midö eminokonö töbö i'yekanö tibatö loitjö̧ma bakayaso̧ a̧ji̧kwo̧ma plata treinta ö̧pi̧bi̧ya imidobö jo̧be tibatö loökwe uluwo̧nöma. Ja̧danö, bakayaso̧nö kwabö lotjobö jo̧be inawiyanö ikwawö— jejenö webijetö Isabenö Jo̧ma Moisésnö.

^33-34 Ina webijetö: Ju'wi wanedö yötawa: Bakwo̧ ojwese'donö muchekwapi̧ kabebö ujunajapi̧ma yemidanö umuchebokobetjö̧ jelo̧ ajwi bakayaso̧, ja̧danö bulu je'do okwa mebö ö'wöchitjö̧ma ojwese'do luwo̧ma imidobö jo̧be, jo̧ba ajwi imikwa baibanö. Ikenama, ojwese'do luwo̧ mebö ö'wöchajo̧nöma emobö jo̧be. Jenanö bakwo̧ ojwese'do soaja̧ ikena umuchebokobetjö̧ jelo̧ ajwi mebö ö'wöchitjö̧ma imidobö jobe, ja̧danö ö'wöchajo̧nö emobö jo̧be.

³⁵ Ju'wi wanedö yötawa: Bakwo̧ ajwi bakayaso̧ma jelo̧ ajwi bakayaso̧nö töbö i'yekanö tibatö loitjö̧ma, tibatö labo̧ a̧jikwo̧ma iteda ajwinö midö iyobö jo̧be. Ikenama imidaja̧ baladama itedada ja'ö emobö, ja̧danö tibatö loajökwe a̧ji̧kwo̧nö bakwainö ja'ö iyobö jo̧be. Ja̧danö, tibatö loajökwe itebiyabi bakwo̧nökwena bakweminö ja'ö tjemobö jobe.

³⁶ Jo̧kwaijayonö okobe deinö jobe ju̧kwadöma tjöwaisitjö̧ma, jo̧ba bakayaso̧ma tichawö lobiabo̧jayonö a̧ji̧kwo̧ma di̧batö ujunokobe, jö̧ba̧lö, labo̧ bakayaso̧ a̧ji̧kwo̧ma imidobö jo̧be. Jo̧ba a̧jwi̧mu̧tjö̧ bakwo̧ balekwo̧nö iyobö jo̧be tibatö loökwe a̧ji̧kwo̧nöma. Ikenama bakaya tibatö lobajo̧ a̧ji̧kwo̧ma ö'wöchajo̧nö töbebö e'ewobö jo̧be— jejenö webijetö Isabenö Jo̧ma Moisésnöma. Okobe jwiinö weawa wene ujunobö webijetö Isabenö Jo̧ma Moisésnöma, Israel jojodönö ja̧ weawa wene a̧ja̧kwö tjö̧jobö.