Éxodo 20 - Dios Iwene

Dios Israel Jojodönö domulataja jawa weawa yöawina jawa

¹ Ikenama Diosma Israel jojodönö, mö'ösa'o tjöekwemi badeibö ja̧dönöma baikwö yöba̧lijetö:

² —Ötjöma Isabenö Jo̧sa, Kwösödaduwökwe Diossa. Ötjödasa Egiptotjö lakebaduwinö pjabatinama, Egipto jojodö wetjawö̧ otidö kwö̧jaduwitjö. Baikwö wetaduwakwö:

³ Ötjönöda kwösadaduwo. Ju'wedönö kwösödaduwoko.

⁴ Ja̧danö, kwotidaduwoko kwo̧'wo̧duwi jawa kwösödaduwawö̧nöma, mölejebi ju̧kwadö tjo̧'wo̧ jawabi, böjenö jukwadö tjo̧'wo̧ jawabi, böje teebe ojwe okwa ju̧kwadö tjo̧'wo̧ jawabi.

⁵ Ja̧jaye otikwa tjöba a'otjö kwöbaduwi bȩbachibö nijakwö kwuuduwinö kwösödaduwoko ötjöda Isabenö Jo̧chobetjö̧, Kwösödaduwökwe Dioschobetjö̧. Ile nibebo̧sa ökwödönöma, Ötjönöda kwösödaduwo, jö̧ba̧lö. Isabenö, o̧'wo jawa ösödadönöma lȩtebakwo̧sa, ja̧danö jobadönödamaö̧kö̧, ba̧kwȩlö̧jatebö̧ lȩtebakwo̧sa jobadötjö tupadanö jojodönöbi. Jao, ötjönö öpöjödö o̧'wo jawa ösödadö tji̧tji̧munöbi, tjö̧'dö̧dönöbi, ja̧danö tjö̧'dö̧dö tji̧tji̧munöbi, ja̧danö tupakwö, tjö̧'dö̧dö tjö̧'dö̧dönöbi lȩtebakwo̧sa.

⁶ Jo̧kwaijayonö ötjönö ösödadötjö, ötjö weti̧ a̧ja̧kwadötjö tupadanö jojodönöma, ba̧kwelö̧jatebö balewachökönö chösödakwo̧sa.

⁷ Ja̧danö, ju'wibi wetaduwakwö: Ötjö chimima sulabenö omukwatö yöka̧laduwoko, ötjöma Isabenö Jo̧chobetjö̧, ökwödö Kwösödaduwökwe Dioschobetjö̧. Ötjö chimi sulabenö omukwatö yöba̧lo̧nö lȩtebakwo̧sa.

⁸ Ja̧danö, ju'wibi wetaduwakwö: Jojodö otikwö̧kö̧ mölȩ, wainö kwujunaduwi̧ mölȩ, inesö mölȩma kakatibaduwoko. Ja̧ mölȩ wainö kwujunaduwo, inesö mölȩ, jö̧ba̧lö, ötjönö kwömukwataduwobö.

⁹ Ja̧danö, jelemutjö bakwöta mölȩ baledibanö okobe jwiinö kwotidawaduwi̧ma kwotidaduwo.

¹⁰ Jo̧kwaijayonö jelemutjö dötölataja mölȩ, sábado mölȩ baibenama kwö'wachaduwo, ötjö Isabenö Jo̧nö, ökwödö Kwösödaduwökwe Diosnö omukwatö kwö̧jaduwobö. Ökwödö otidökönö kwö̧jaduwobö jo̧be, ja̧ mölȩma. Ja̧danö, kwi̧tji̧muduwi ömadöbi ya̧döbi otidökönö tjö̧jobö jo̧be. Ja̧danö kwömöayedöduwi ömadöbi ya̧döbi otidökönö tjö̧jobö jo̧be. Ja̧danö kwa̧jwi̧mutjö otidadöbi otidökönö tjö̧jobö jo̧be, kwa̧jwi̧mu̧bi tjö'wachakobetjö̧. Ja̧danö ju'wedö jelobetjö ichinadö kwiteboduwinö ju̧kwadönöma tjotidobö weköbaduwoko.

¹¹ Ötjö, Isabenö Jo̧ma jelemutjö bakwöta mölȩ baledibanö mölejȩ mölejȩnö lö̧jadönö, ja̧danö böjȩ böjȩnö ju̧kwadönö, ja̧danö ojwe nöödö, ojwe nöödönö ju̧kwadönö chotidijatö. Ja̧danö, chotidawatjö okobe jwiinö katatakwawajabetjö̧ ju'wi dewachö möle, jelemutjö dötölataja mölema chö'wachijatö ötjöma, otidökönö. Jo̧kwaobetjö̧ ja̧ mölȩma omukwatö dösölö̧jinö edö jö̧ta̧lijatö̧, Biya̧ mölȩma wainö chujuna inesö mölȩ baibanö, jö̧ba̧lö.

¹² Ja̧danö, ju'wibi wetaduwakwö: Kwabe'donö, kwojo'donö otiwanö omukwatö yebabinö kwö̧jaduwo. Jejenö otiwanö kwomukwataduwo lekwe kwuju̧kwaduwakobetjö̧ niji chiyakwemi ja̧nö, ötjö Isabenö Jo̧, Kwösödaduwökwe Dios kwiteboduwi baibanö chiyakwemima.

¹³ Ja̧danö, ju'wibi wetaduwakwö: Bakwo̧ jelo̧nö kwabö loköbaduwoko.

¹⁴ Ja̧danö ju'wibi wetaduwakwö ömadönö: Jelo̧ ilekwokwö sulabenö ja̧bö kwalewaduwoko. Ja̧danö ya̧dönö wetaduwakwö: Kwilekwebö̧kö̧kwö sulabenö ja̧bö kwalewaduwoko.

¹⁵ Ja̧danö, ju'wibi wetaduwakwö: Kwönaukwaduwoko.

¹⁶ Ja̧danö ju'wibi wetaduwakwö: Kwömöledöso̧, wene juna̧lo̧ma omukwatö juno̧ luwo̧ öbajale a'otjö ja̧nö kwatadaduwobö aebitjö̧ma omöna yöka̧laduwoko.

¹⁷ Ja̧danö ju'wibi wetaduwakwö: Kwömöledöso̧ eju ösödöma kwedaduwoko, ötjö cheju baibanö chösöda, jö̧ba̧lö. Ja̧danö, kwömöledöso̧ ilekwonöma ösödöma kwedaduwoko, chösödoko, jö̧ba̧lö. Ja̧danö kwömöledöso̧ ömöayo̧nöbi ömöayujunöbi, ötjöda chömöayedö batjibanö chösöda, jö̧ba̧lö kwedaduwoko. Ja̧danö a̧jwi̧mu̧ pa̧kayönöbi a̧jwi̧mu̧ bu̧lu̧dönöbi ju'wi jayebi kwömöledöso̧ ujunani̧ma ösödama kwedaduwoko, ötjöda chajwimu batjibanö chösöda, ja̧danö iteabi ötjö chitea baibanö chösöda, jö̧ba̧lö— jejenö domulataja jawa weawa yöbawijetö Isabenö Jo̧ma.

Israel jojodö Dios ujulu i̧sebi̧ edö yetjabinö tjö̧jina jawa

¹⁸ Ja̧danö, Israel jojodöma böba ökwödi̧ a̧ja̧kwijadötö. Ja̧danö böba nei̧ edijadötö. Ja̧danö obeja i'yeka pjuawa labinö ökwöi̧bi a̧ja̧kwijadötö. Ja̧danö, Sinaí mö'ösa'o ökwöla imuyu'wo lo̧obe edijadötö. Jejenö baledi̧ edö jwiinö yebaibijadötö, tjö̧bawinö. Jo̧kwaobetjö̧ mö'ösa'o la'akatjö ödönönöda ja̧nö

¹⁹ yöba̧lijadötö Moisésnö: —Moisés, ökwöda yöka̧lo ökwödönöma, Diosmakö̧. Ökwö yökawi̧ma isabenö da̧ja̧kwedösa. Jo̧kwaobetjö̧ pjabatidönö Dios yöa̧lökakobetjö̧ ökwödönöma debö di̧'yapji jö̧ba̧lö— abebijadötö Israel jojodöma Moisésnöma.

²⁰ Jejenö atjebökwe: —Yekabiduwa. Diosma ökwödönö edö ichajabe, itenö yebabö jweinö kwomukwataduwojobö jö̧ba̧lö. Ja̧danö, jejenö itenö ba̧kwelö̧jatebö yebabö kwomukwataduwobö ösöda Diosma, sulabenö ja̧köbaduwökakobetjö̧— Moisés yöba̧lijetö Israel jojodönö.

Dios weawa jawa, juwö iyawemi otikwa

²¹ Ja̧danö, Israel jojodö ödönönö tjuju̧kwibonö Moisésma yȩa'wo lo̧obekwö, Dios ö̧ja'wo lo̧obekwö yö̧öne 'yi̧jetö.

²² Ichibena Isabenö Jo̧ma webijetö Moisésnö: —Moisés baikwö yökawo Israel jojodönö, ötjö yöta̧li̧ jobadönöma: Ötjö, Isabenö Jo̧ ökwödönö mölȩjȩbetjö yötalaja̧ma kwa̧ja̧kwaduwatö.

²³ Wetatö ökwödönö: Kwo̧'wo̧duwi jawa kwösödaduwawö̧nöma, platatjö, orotjö kwotidaduwoko. Ötjönö kabatibö ju'wedönö, kwo̧'wo̧ jawa kwösödaduwobö kwotidaduwoko. Sule, ötjönöda kwösadaduwo.

²⁴ Ja̧danö, ju'wi jawabi wetaduwakwö: Niji yudö kwotidaduwo juwö iyawemima. Jelöda juwö kwiyaduwo o̧bȩja̧dönöbi pa̧ka̧yö̧nöbi okobe jwiinö juwö. Ja̧danö, ju'wibi jelö iyawemi wa̧nö kwiyaduwobö jo̧be, o̧bȩja̧dönöbi pa̧ka̧yö̧nöbi, okobe jwiinö juwökönö. Ja̧ kwiyaduwi̧ma wanekwachobe, kwömöledökwö wene kwujuna̧laduwi̧tjö tjo̧wi̧ wene jwiinö kwö̧jaduwobe, jö̧ba̧lö. Ja̧danö ötjönö kwösödaduwobö jelobe 'ya̧jadö, jelobe 'ya̧jadö wetenama, Isabenö Jo̧nö dösöda, jö̧ba̧lö kwösödaduwotjö. Jejenö ötjönö kwösödaduwitjö̧ma ichö dösölö̧jinö edö pjatatocha otiwanö kwö̧jaduwobö— yöba̧lijetö Isabenö Jo̧ma Moisésnö, Israel jojodönö yöawobö.

²⁵ Ina, yöawobö webijetö: —Yökawodönö: Juwö iyawemi inawiyatjö kwotidaduwitjö̧ma 'dalöma kwotidaduwoko . Jejenö inawiya 'dalö kwotidaduwitjö̧ma ötjönö juwö iyawemima sulemi baibena, ötjönö kwösödaduwobö jwiemi baibanö.

²⁶ Ja̧danö, nöchawama kwotidaduwoko ötjönö juwö iyawemi nöchö kwichibaduwobö, kwönöchaduwena kwökamisiduwi teebe ju'wedöma a̧do jwiköbaduwi̧ma tjedapji jö̧ba̧lö.