Éxodo 2 - Dios Iwene

Moisés ajayinö ö̧jina jawa

¹ Ja̧ mölema Israel jojodötjö bakwo̧, Levítjö tupadanö jojoma ilekwonö emijetö. Ilekwobi Levítjö tupadanö jojosuju.

² Ja̧danö, jobujuma jitji̧nö 'yabebijotö. Ja̧danö, jemajökwenö jedemi jwiinö otiwioko tojijotö ja̧wo̧dö wamedukwa jenanö, öwawatökönö, ojwe okwa lotjapji jö̧ba̧lö. Ja̧danö, ja̧wo̧dö wamedukwa jenanö

³ jitji̧nöma ida̧ökö tojawa jwiioko, dakwö ja̧takwajö, jö̧ba̧lö wi̧lȩyu̧ ö̧jiyatjö bu̧kwawayu̧ emijotö, wa̧chadanö ichejekwi öjiyatjö. Jayu̧ma wamenö pialidanö tö'awitjö dadijotö ojwiyo okwatapji jö̧ba̧lö. Ja̧ tö'awitjö dadajaju jitji̧nö anijotö ja̧yu̧ okwa. Anajaju wi̧lȩyu̧ma nönijotö ojwenö, Nilo mikwödö ö'öbö isa'baena.

⁴ Janajökwe öpöoma jöjawo̧nö baledi̧ jöwaisobö ja'yubeda ödökwönönö ja̧nö eda̧lijotö.

⁵ Ja̧danö, faraón itjijuma jödötjö ojwe ibö 'yi̧jotö jömöayedö ya̧dökwö. Jobujuma ojwe jibonö jömöayedöma ojwe ö'öbönö kwebachijadötö. Faraón itjijuma isa'banö wi̧lȩyu̧ lo̧be edijotö, tjemu ojo'do jödajayu lo̧bema. Edö webijotö jömöayedötjö bakwujunö wi̧lȩyu̧ jemajobö.

⁶ Wejoko emibö ichejebijotö juluwuju jö̧jobekwö. Faraón itjijuma jömöayuju jichejebayu̧ po̧bebö jedemi ¡ayö! tjemu ja'yuwo̧ iso̧ budekwö a̧jo̧nö edijotö. Jo̧banö lȩlö̧ja̧chibinö edö jö̧ba̧lijotö: —Bite tjemuma hebreo jojodö tjitji̧ ichejekwo̧— jö̧ba̧lijotö.

⁷ Ja̧danö, tjemu öpöoma faraón itjiju jö̧ja̧li̧ a̧ja̧kwö jö̧jobekwö 'ya̧wibö abebö a̧ja̧kwijotö jobujunö: —¿Hebreo jojosujunö öbibö chi̧'yiji̧, tjemunö o̧do̧'bi̧ jojwobö jichobö?—

⁸ abebö ja̧ja̧kwoko: —Jao öbibaji jicho— webijotö. Jejenö wejoko tjemu öpöoma ȩwa̧jijotö jojo'donö yöjawobö. Yöjawoko 'yi̧jotö faraón itjiju jö̧jobekwö.

⁹ Ichajajunö webijotö faraón itjijuma: —Bite tjemunö emibö da̧ji kwejube kwo̧do̧'bi̧ ojwö kwöbötjatonö. Chimidocha— webijotö. Jejenö wejoko tjemunö, isuda jitji̧nö emibö ȩwa̧jijotö jo̧do̧'bi̧ ojwö jöbötjatobö.

¹⁰ Ju'winö tjemuma tjo̧wi̧ pöe baibajenama ojo'doma faraón itjijunö iyö 'yi̧jotö jo̧banö, faraón itjiju jitji̧ baibanö. Faraón itjijuma midijotö tjemunö, Moisés, jö̧ba̧lö, ojwetjö tötebajökwe, jö̧ba̧lö.

Moisés Egipto jojonö kwabö loaja̧ ikena Madiánbe döibajina jawa

¹¹ Ju'wi möle Moisés pöe babiböma iteda ömöledö hebreo jojodö tjotidobe edö 'yi̧jetö. 'Ya̧jo̧ ja̧nö eda̧lemi jwiinö usula emawö tjotidobe edijetö, webadö wetji̧ otidö. Ja̧danö, edijetö egipto jojo webo̧ma hebreo jojonö kwakwaobe, Moisés ömöledöso̧nö.

¹² Kwakwaiökwe jelobe jelobebi jalachabiabinö edemi, baima jojodö dea jö̧ba̧lö, egipto jojonö, ömöledöso̧nö kwakwabo̧nö kwabö lobijetö Moisésma. Ikenama kwabö loajökwenöma so̧bi̧ya̧pu̧nö o̧tjö lobijetö.

¹³ Ju'wi dewachö Moisésma yemidanö ömöledö tjotidobe 'ya̧jo̧ edemi ¿tajijö? du̧ju̧taja hebreo jojodöma tjölabikwawobe edijetö. Jobadötjö bakwo̧nö, ömöledöso̧nö 'do'doköbo̧nöma a̧ja̧kwijetö: —¿Tajawedö 'do'doköba kwömöledöso̧nöma?— abebö a̧ja̧kwökwe:

¹⁴ —¿Ti ujuninada ökwönöma ökwödö duluwo̧ baibanöma, sulabenö ja̧köbaduwa, jö̧ba̧lö ökwödönö lȩbebo̧ baibanöma? Ökwöma duluwo̧bö̧kö̧ja. Ja̧danö, ¿ötjönöbi kwabö loköbakwa̧ji̧, egipto jojonö kwabö loköbinadanö?— atadijetö Mosésnö. Jejenö jö̧a̧liökwe jwiinö yebaibijetö Moisésma, isabenö kwabö lotinama okobe deinö tjöwaisobewe, jö̧ba̧lö.

¹⁵ Ja̧danö, faraónma Moisés Egipto jojonö kwabö loina a̧ja̧kwö ömöayedönö webijetö Moisésnö kwabö lotjobö. Jo̧kwaijayonö Moisésma faraón ö̧jelöma döibajobetjö̧ badekwajijöködötö. Moisésma jelobe, Madián nijibe döbibajijetö, jobeda ö̧jobö. Ja̧danö Moisésma, jobe Madián niji ichibö ojwese'do sotjine'do ö'öbö bamatijetö.

Moisés Madiánnö ö̧jina jawa

¹⁶ Ö̧bobekwö ichijadötö jelemutjö du̧ju̧taja ya̧dö, bakwo̧ Reuel mikwo̧ i̧tji̧muma. Jo̧bama Madián jojodö tjuluwo̧, Diostjö jojodötjö tjö'da̧de pjabato̧. I̧tji̧muma tjabe'do a̧jwi̧mu o̧bȩja̧dönö öbibö ichijadötö je'dotjö ojwiyo wabö, tjowena sa̧tjawobö o̧bȩja̧dö tjowobö.

¹⁷ Ja̧danö, tjichajabe ökömanö ju'wedö o̧bȩja̧dönö te'ada̧ladöma ichijadötö. Jobadöma idöda tjite'ada̧lawö̧ abönö tjowobö a̧'dȩlijadötö, Reuel i̧tji̧munö jelöma a'dewö lobö. Ja̧danö, jobadönö jelöma a'dewö lotjiökwe a̧laibö pjabatijetö Moisésma, Reuel i̧tji̧munöma, idöda o̧bȩja̧dönö wabö iyö.

¹⁸ Jemi ikenama Reuel i̧tji̧muma tjejube ȩwa̧jijadötö o̧bȩja̧dönö öbibö. Juluwanö tjȩwa̧jiökwe tjabe'doma abebö a̧ja̧kwijetö: —¿Dakwö wabö kwiyaja̧duwada juluwanöma? — jö̧ba̧lö.

¹⁹ Jejenö abebö a̧ja̧kwawö̧ atadijadötö: —Dabe'do, bakwo̧ Egipto jojoma ökwödönö pjaatatö, ju'wedö te'ada̧ladö ökwödönö a'dewö lotjenama. Ikenama jo̧bama pjaatatö ojwiyo wabö, tjowena sa̧bö kwa̧jwi̧mu tjowoböma. Jejenö pjaatobetjö̧ juluwanö dewa̧ja̧tö— tjatadökwe:

²⁰ —¿Jo̧baja? ¿Tajawedö junibö kwȩwa̧jaduwaja̧da? Öbibajaduwinö icho dejutjö ukwo—

²¹ weajawö̧ öbibö 'yi̧jadötö. 'Ya̧jadö Moisésnö öbibö ȩwa̧jijadötö tjejutjö ukwobö. Ja̧danö, Moisésma jobadökwö ö̧jobö ösödobetjö̧ jobeda ji̧jetö lekwe, Reuel ejunö. Ju'winö Reuelma bakwuju itjijunö Séfora mikwujunö webijetö Moisés emobö ilekwo baibanö.

²² Ja̧danö, jobujuma ju'wi mölȩ metu'wo ji̧jotö. Ja'wo metu'woma emijotö, Moisés itji̧nö. Moisésma jemajökwenö midö: —Ötjöma jelobetjö ichö ju'wedö tjitebonö chö̧jobetjö̧ bite chitji̧nö chimida, Gersón jö̧ba̧lö— midö jö̧ba̧lijetö.

²³ Ja̧danö, lekwe o̧biya baledajena Egipto inesö la'aka luwo̧ma ö'wö baibijetö. Israel jojodöma ina Egiptonö ji̧jadötö tjuluwedö tjotidobö wetji̧ma otidö. Ja̧danö, inia tjötjinö juluwanö tjotidobö ¡ayö! usula emawö jwöbeba̧lijadötö ¡ökwödönö pjabati! jö̧ba̧lö. Ja̧danö, Diosma jwötjeba̧li̧ma a̧ja̧kwijetö.

²⁴ Usula emawö jwötjeba̧li̧ma a̧ja̧kwijetö Diosma. Ja̧danö, omukwatijetö Diosma damötjö Abrahamnö Isaacnö Jacobnö iteda iwene yöbawö ujuninama, jobadötjö tupadanö jojodönö pjatatakwo̧sa, jö̧ba̧lö.

²⁵ Ja̧danö, Diosma edijetö Israel jojodö u̧sula tjemawobema. Jobadönö lȩlö̧jinö edijetö Diosma.