Éxodo 19 - Dios Iwene

Isabenö Jo̧ Israel jojodönö yöbawö ujunina jawa

^1-2 Ja̧danö, Israel jojodöma Refidimtjö labeibö 'ya̧jadö mejenö mö'ösa'o Sinaí mikwa'o yö̧neawinö ichibijadötö. Jobe tjabobö tjejubiya isa̧do̧tjö debatö otidijadötö, Sinaí mö'ösa'o badeibö. Jobadö Egiptotjö latjebinatjö̧ baikwöma ja̧wo̧dö du̧ju̧taja baledaja̧ ikena mölema Sinaí mikwa'o jo̧be ichibijadötö.

³ Ja̧danö, Moisés ja'o nöchijetö Diosnö öbadekwajobö. Önöchena jwöbijetö Isabenö Jo̧ma wa̧pekwa'otjö baikwö jö̧ba̧lö: —Baikwö yökawo Israel jojodönö, Jacobtjö tupadanö jojodönöma:

⁴ Ökwödöma ökwödöda kwöbajaleduwinö kwedaduwijatö Egipto jojodönö ötjö, Isabenö Jo̧ labinö lȩtebi̧ma. Ja̧danö, kwedaduwijatö ökwödönö chite'ada̧li̧ma, baikwö ötjö chö̧jobekwö kwichaduwobö öbibö. Wanedö yötawa: Bole itji̧ ajayinö apatjö labebö köa̧lena abe'doma otiwanö ite'ada̧lobe, itji̧ köa̧lobe teebe kö̧ba̧lö owo̧jo̧pi̧ya jebata̧lö. Jejenö itji̧ me'dawachibö meenama abe'do o̧wo̧jo̧pi̧yanöda mebö wamato̧. Ikenama abe'doma itji̧ wamato̧nö otiwanö e'ewö ȩwa̧jo̧ iteda o̧wo̧jo̧pi̧yanö. Jejenö ötjöma ökwödönö te'ada̧lö ötibajabe, Egipotjö labebö baikwö, ötjö chö̧jobekwö kwichibaduwobö.

⁵ Jo̧kwaobetjö̧ ötjö weti̧ma ö'wi̧yawakwawalö̧jinö a̧ja̧kwö, ja̧danö, yöbawö junö chiwene a̧ja̧kwö, weti̧danö ja̧bö kwö̧jaduwitö̧ma okobe deinö böjȩnö jukwadö jojodötjö ökwödönöda 'da̧batö chujunena, ötjö cha'dȩlawö̧, jö̧ba̧lö. Jejenö 'da̧batö chujunena, ötjödasa okobe jwiinö böje luwo̧chobetjö̧, ja̧danö,okobe deinö böjȩnö ju̧kwadö tjuluwo̧chobetjö̧.

⁶ Ja̧danö, ökwödöma ötjö chömöayedö baibanö kwö̧jaduwakwedöja, ja̧danö, Israel jojodöböködönö ötjönö tjöwaisachibanö yöbawö pjakataduwakwedöja. Ja̧danö, ökwödönöma wainö chujunawö̧ja, ötjönöda kwösödaduwobö. Moisés, jejenö yökawo Israel jojodönö— webijetö Isabenö Jo̧ Moisésnö, wa̧pekwa'otjöma.

⁷ Jo̧kwaobetjö̧ Moisésma mö'ösa'otjö yutubajö jwöbijetö okobe deinö Israel jojodötjö la'aka luwedönö tjichobö. Ichajadönö yöbawijetö okobe jwiinö Isabenö Jo̧, Israel jojodönö yökawo, jö̧ba̧lö weaja̧ma.

⁸ Israel jojodöma ja̧ Isabenö Jo̧ yöawaja̧ a̧ja̧kwö ösödijadötö, Otiwa, jö̧ba̧lö, okobe jwiinö Isabenö Jo̧ weaja̧danö da̧ja̧kwedösa, jö̧ba̧lö. Ja̧danö, Moisés Isabenö Jo̧ ö̧jobekwö nöchö yöbawijetö Isabenö Jo̧nö jojodö tjatadaja̧, okobe jwiinö Isabenö Jo̧ weaja̧danö da̧ja̧kwedösa, jö̧ba̧lö, tjatadaja̧ma.

Moisés Israel jojodönö Isabenö Jo̧nö tjöbadekwajobö pjaatina jawa

⁹ Ikenama, Isabenö Jo̧ma jö̧ba̧lijetö Moisésnö: —¡A̧ja̧kwitjö! Ötjöma ojwiyo'wo böa'wo okwa öwawachibö ja'wotjöda yöta̧locha ökwönöma. Ökwönö yötali̧da jojodöma tja̧ja̧kwakobe. Jejenö tja̧ja̧kwobetjö̧ jemi tupakwöma ökwö yökawi̧ma ba̧kwȩlö̧jatebö tjösödakwedö, Jweinö yöbawo̧, jö̧ba̧lö, ötjö yöta̧li̧da tja̧ja̧kwobetjö̧— yöbawijetö Isabenö Jo̧ma Moisésnöma. Ikenama Moisésma mö'ösa'obetjö yutubajö jojodönö Isabenö Jo̧ yöawaja̧ yöbawijetö. Yöawaja̧ ikena, yemidanö nöchijetö, jojodö tjatadaja̧ yöawobö Isabenö Jo̧nöma.

¹⁰ Ikenama Isabenö Jo̧ma webijetö Moisésnö: —Yemidanö yutubaji̧ jojodönö pjakato babe mölebi itekwayibi otiwanö tjotikwo, ja̧danö tjö̧kamisibi tjidicha̧lo.

¹¹ Ja̧ tjotikwi̧ma, ja̧danö tjökamisi tjidicha̧li̧bi itekwayi dewachöma tjo̧wi̧ katjatakwawo ja̧ mölȩma ötjönö tjedakobetjö̧. Ja̧ mölema ötjö Isabenö Jo̧ma Sinai mö'ösa'o wa̧pekwa'onö jwitachocha okobe deinö jojodö tjeda̧lonö.

¹² Ja̧danö, Moisés mö'ösa'o la'akanö tjökebo jojodö tjöbaledibapji jö̧ba̧lö. Ja̧danö, yökawodönö mö'ösa'o la'aka yö̧nema tjichiboko, ja̧danö nöchöbi tjönöchoko, maböbi matjoko mö'ösa'oma. Bakwo̧ mö'ösa'o la'aka mabo̧nöma kwabö loköbaduwobö jo̧be.

¹³ Bakwo̧ jojobi, jojodö tjajwibi mö'ösa'o mabo̧nöma jo̧banö mabökönöda inawiyanö ikwawöda ja̧danö, nayununö 'böböda kwabö loköbaduwobö jo̧be. Jo̧kwaijayonö obeja i'yekanö pjuawa labinö ökwöenada mö'ösa'o la'akakwö tjichoböma otiwa. Jejenö yökawodönö— webijetö Isabenö Jo̧ma Moisésnöma.

¹⁴ Jo̧kwaobetjö̧ Moisésma mö'ösa'otjö yutubajö jojodönö tjotikwobö pjabatijetö. Ja̧danö, jojodöma tjö̧kamisi dicha̧lijadötö.

¹⁵ Ja̧danö, webijetö Israel jojodönö: —Chömöledö, dötölataja mölȩ kwotikwaduwi̧ma kwotikwaduwajabe, ja̧danö kamisi dichöbi kwidicha̧laduwajabe. Ja̧danö, ikena möle, Itekwayi dewachöma ida̧ökö otikwibö kwuju̧kwaduwo. Ja̧danö, babe möle tupakwöma kwilekwamuduwikwöma kwö̧jaduwoko— webijetö Moisésma.

Isabenö Jo̧ Sinaí mö'ösa'o wa̧pekwa'onö öwawachina jawa

¹⁶ Ja̧danö, ja̧ möletjö dötölataja möle baledajena, dewachenama böba labinö ökwödijetö, ja̧danö, jwiinö nebödanö kwabawijetö. Ja̧danö, ojwiyo'wo yȩa'wo lo̧be mö'ösa'onöma. Ja̧danö, obeja i'yekanö pjuawama labinö ökwöijetö. Jejenö, böba, nebö kwaawobe, ojwiyo'wo yȩa'wo lo̧be, pjutji̧ labinö ökwöobe balediawö̧ jwiinö yebabinö tjö̧bawijadötö okobe deinö Israel jojodöma.

¹⁷ Ikenama Moisésma Israel jojodönö tjö̧jemitjö öbibö 'yi̧jetö Diosnö tjedobö. 'Ya̧jadöma mö'ösa'o la'akanö jamatijadötö.

¹⁸ Sinaí mö'ösa'oma okobe jwiinö imiyu'woda li̧jetö, Isabenö Jo̧ mö'ösa'onö ökwöla nöola ubi̧danö jwiachajabetjö̧. Ubi̧ma labinö kaamijetö ökwöla ubi̧ kaamidanö, letiyatjö otikwa juawakatjö ökwöla ubi̧ kaamidanö. Ja̧danö, okobe jwiinö mö'ösa'oma labinö tjö̧ebijetö.

¹⁹ Ja̧danö, obeja i'yeka pjuawa ökwöi̧ma ökwöaja̧ bajalekwönönö labinö ökwöijetö. Ja̧danö, ökwöaja̧ bajalekwönönö labinö ökwöonö Moisésnö, Isabenö Jo̧nö yöbalo̧nö, atadijetö Isabenö Jo̧ma, iwene labinö, böba ökwödi̧danö.

²⁰ Ja̧danö, Isabenö Jo̧ma jwibachibö ja̧matijetö mö'ösa'o wa̧pekwa'onö. Yutubajö jwöbijetö Moisésnö, chö̧jobekwö nöchi, jö̧ba̧lö. Jwöökwe nöchijetö Moisésma, Isabenö Jo̧ ö̧jobekwö.

²¹ Ichibo̧nö yöbawijetö Isabenö Jo̧ma: — Yutubaji jojodönö yökawo tjöekwemi o̧pema tjöbalediboko ötjönö tjedobö, jobadötjö ba̧jekwadö debö tji̧'yapji jö̧ba̧lö.

²² Ja̧danö, ötjötjö jojodötjö 'da̧denö pjabatadönö, ötjö chö̧jobekwö kabatökönö yö̧ne ichadönöbi yökawo, tjichakwa̧ abönö otiwanö tjotikwo, jobadönö lȩtebapji jö̧ba̧lö— yöbawijetö Isabenö Jo̧ma Moisésnöma.

²³ Ikenama Moisésma jö̧ba̧lijetö Isabenö Jo̧nö: —Jojodöma mö'ösa'o tjö̧nöchoböma jwiobe ökwödönö weköbajabetjö̧, mö'ösa'o la'akanö tjökebaduwo wainö ji̧da jakobetjö̧ tjöbaledibökönö, jö̧ba̧lö—

²⁴ jö̧a̧lökwe: —Moisés tjo̧wi̧ yutubaji̧ yemidanö kwönöcho Aarónnö öbibö. Jo̧kwaijayonö jojodötjö ötjötjö 'da̧denö pjabatadöbi, ju'wedö jojodönöbi tjöekwemi o̧pema tjöbalediboko. Ötjö Isabenö Jo̧ chö̧jobekwö tjö̧nöchoko jobadönö lȩtebapji jö̧ba̧lö— weökwe

²⁵ Moisésma yutubajö jojodönö yöbawijetö Isabenö Jo̧ weaja̧ma.