Éxodo 18 - Dios Iwene

Moisés öjaba Jetro Moisésnö edö ichina jawa

¹ Moisés öjaba, Madián jojo Jetro mikwo̧, Diostjö jojodötjö ö'weje pjabato̧ma okobe jwiinö Dios Moisésnö pjaatina yötjawi̧ a̧ja̧kwijetö. Ja̧danö, a̧ja̧kwijetö Isabenö Jo̧ iteda ömöledö Israel jojodönö, Egiptotjö latjebobö pjaatina yötjawi̧ma.

² Ja̧danö, Moisésma belö Egiptotjö latjebaja̧ tupakwö ilekwo Séforanö webijetö jabe'do ejube jȩwa̧jobö, tji̧tji̧mu̧kwö. Jo̧kwaijayonö babema Jetroma Séforanö öbibö ichijetö Moisés ö̧jobekwö.

³ Ji̧tji̧mu̧ ömadö du̧ju̧tajanöbi öbibö ichijetö Jetroma. Abönö pöema Gersón mikwijetö, Moisésma jo̧banö midö jö̧a̧linobetjö̧ ötjöma jelobetjö ichö ju'wedö tjitebonö jo̧sa, jö̧ba̧lö.

⁴ Ja̧danö, ikena itji̧ma Eliezer, mikwijetö Moisésma jo̧banö midö jö̧a̧linobetjö̧, chabe'do uluwo̧ Diosma faraóntjö chö̧jibinö pjaatinobe, jö̧ba̧lö, midijetö.

⁵ Ja̧danö, Jetroma Moisés, Israel jojodö tjabekwajobekwö ichijetö, jojodö deobema, mö'ösa'o Horeb mikwa'o, Dios ö̧ja'o yö̧neawinö tjö̧jena. Moisés ilekwonö, i̧tji̧mu̧ ömadö du̧ju̧tajanö öbibö ichijetö Jetroma Moisés, Israel jojodö tjö̧jobekwö.

⁶ Ja̧danö, jelo̧nö webijetö tjabönö i̧'yobö Moisés ö̧jobekwö jobadö tjichobe yöawobö Moisésnö. Weajökwema ichö Moisésnö yöba̧lijetö, kwöjaba Jetro ichobe, kwilekwokwö, kwi̧tji̧mu̧ ömadö du̧ju̧tajakwö, jö̧ba̧lö.

⁷ Jejenö yöa̧liökwe ö̧jelö labebö 'yi̧jetö Moisésma öjaba ichobe öbadekwajobö. Jo̧banö 'ya̧wibö u̧yu̧jukijunö bamatö öba bȩbachibijetö nijakwö uunö. Ikenama ibekasa'wonö du̧batijetö. Jemi ikenama yöba̧lakwawijadötö, Otiwanö kwö̧jiji̧, jö̧ba̧lö. Ikenama abekwajobekwö 'ya̧nö tebachijadötö eju okwa, isa̧dotjö debatö tjotidinejuma.

⁸ Ikenama Moisésma Jetronö yöbawijetö okobe jwiinö Isabenö Jo̧ faraónnö, ja̧danö Egipto jojodönö lȩebina jawa, Israel jojodönö pjabatö. Ja̧danö, yöbawijetö okobe jwiinö jobadönö labi̧ jawa baledinama Egiptotjö labebö tji̧'yobe. Ja̧danö, yöbawijetö Isabenö Jo̧ jobadönö tjö̧jibinö pjaatinama labi̧ jawa baledena.

⁹ Ja̧ Moisés yöawi̧, Israel jojodönö pjaatina yöawi̧ a̧ja̧kwö jwiinö ösödö yöba̧lijetö Jetroma: —

¹⁰ Ötjöma Isabenö Jo̧nö chösöda, jo̧bama jwiinö otiwo̧. Jo̧bada ökwödönö Faraóntjö, iteda ömöayedö Egipto jojodötjö kwö̧jibaduwinö otiwanö pjaatinobe.

¹¹ Jejenö Egipto jojodötjö kwö̧jibaduwinö pjaatinobetjö̧ babeda chöwaisachiba, Isabenö Jo̧ma ju'wedö tjo̧'wo jawa tjöwa̧na̧lawö̧nötjö̧ o̧penönö juluwo̧, jö̧ba̧lö. Egipto jojodöma tjo̧'wo sulabenö edö, Israel jojodötjö bajalekwönönöbedösa, jö̧ba̧lö, ökwödönö tjujuluwobö jö̧tja̧lijayonö Isabenö Jo̧da jobadötjö kwö̧jibaduwinö pjaatinobe— ösödö yöba̧lijetö Jetroma.

¹² Ikenama Jetro, Moisés öjabama Diosnö juwö tjiyakwo̧nö ichejebijetö, okobe jwiinö tjujuwakwo̧nöma, Diosnö iyö. Ju'wedönöbi Diosnö iyawedönö juwö iyijadötö Diosnö ösödö. Ja̧danö ichijadötö Aarónma, Israel jojodö okobe deinö la'aka luwedöma Jetrokwö ko̧ko̧kwö tjukwobö, Diosnö juwö iyawemi badeibö.

Jetro Moisésnö pjabatö yöawina jawa

¹³ Ju'wi dewachö Moisésma jojodö wene juna̧ladö yötja̧lakwawi̧ a̧ja̧kwö bi̧jetö, diteda jweinö omukatojobö, diteda jelobekwö omukwatojobö, jö̧ba̧lö. Ba̧kwȩlö̧jatebö ichö ji̧abijadötö wene juna̧ladöma Moisés öbajale a'o, yȩayi jamatö yi̧bena baibanö ju'wedöbi, ju'wedö, wene tjujuna̧li̧ma yötja̧lakwawobö.

¹⁴ Ja̧danö, Moisés öjabama Moisés jojodönö ba̧kwȩlö̧jatebö yötja̧lakwawi̧ a̧ja̧kwö pjaatobe edemi, otiwökö jö̧ba̧lö, yöba̧lijetö Moisésnö: —Moisés ¿tajawedö jejenö ba̧kwȩlö̧jatebö jojodönö a̧ja̧kwö pjakatobeda? ¿Tajawedö jo̧dawa'ye ökwöda jojodö yötja̧lakwawi̧ a̧ja̧kwö kwö̧bobeda ba̧jekwadö ichajadönö, yȩayi̧ jamatö yi̧bena baibanö? Jejenö jo̧dawa'yema otiwökö— yöba̧lijetö Moisés öjabama.

¹⁵ Jejenö yöa̧lökwe: —Chöjaba, jojodöma, Dios wei̧ma tajida, jö̧ba̧lö, kabatökönö ötjönö abebö tjichobetjö̧ ba̧nö yötawobe.

¹⁶ Ja̧danö, bakwo̧kwö jelo̧kwö wene tjujuna̧lena ötjönö yöba̧lakwawö tjichobe, dite jweinö omukwatojobö, dite ö'öbönö omukwatojobö, jö̧ba̧lö ötjöda omukwatö chujunobö. Cha̧ja̧kwaja̧ ikena omukwatö chujunobe, biteda jweinö omukwato̧, ja̧danö biteda ö'öbönö omukwato̧, jö̧ba̧lö. Ja̧danö, Dios weina jawabi, dakwö ja̧bö dö̧jobö yöawina jawabi tjomukwatobö yötawobe— atadijetö Moisésma öjaba Jetronöma.

^17-18 Jejenö atadökwe: —Jejenö otiwökö. Jo̧dawa'ye möle baledibanö ökwöda ba̧nö a̧ja̧kwö, ikena omukwatö kwujunoböma nöobe. Jejenö nöobetjö̧ me'dawachibö 'dö̧kachibena. Jojodöbi lekwe te'ada̧lö tjö̧jobetjö̧ 'dö̧tjachibena.

¹⁹ Babema a̧ja̧kwitjö otiwanö kwö̧jobö pjabatö yötawi̧ma. Yötawi̧danö kwö̧jitjö̧ma Diosma ökwökwö ö̧jakwo̧. Ökwöda Diosnö akebo jojodönöma pjaatobö. Ja̧danö, jojodö wene tjujuna̧li̧ma ökwöda Diosnö yöbawö akebo.

²⁰ Ja̧danö, ökwöma jojodönöma kwö̧ba̧jado Dios weina jawabi, Dios yöawina jawabi. Jojodönöma pjakato jweinö tji̧'yakwa̧ tjöwaisachibanö, ja̧danö otiwanö omukwatö tjö̧jakwa̧, Dios wei̧danö.

²¹ Ja̧danö, ju'wi jawabi yötawakwö: kwömöledötjö ju'wedönö 'da̧batö kwujuno ökwönö pjabatadönö, wene juna̧ladö yötja̧lakwawi̧ a̧ja̧kwö omukwatö tjujunakwedönö. 'Da̧batö kwujunawö̧ma jweinö omukwatö kwujuno, Diosnö yebabinö ösödadönöda. Ja̧danö, jojodö tjösödawö̧nöda, jweinö omukwatadö, jö̧ba̧lö, 'da̧batö kwujuno. Ja̧danö, balada tjemobö omöna yöba̧löködönöda kwujuno. Jobadönöma wene junala̧dö yötja̧lakwawi̧ a̧ja̧kwö, omukwatö tjujunobö weköbo. Ja̧danö, jobadö 'da̧batö kwujunajawö̧tjö ju'wedöma tjömöledö domulatajabedö tjuluwedö batjibanö, tjömöledö wene juna̧ladö yötja̧lakwawi̧ a̧ja̧kwö omukwatö tjujunobö 'da̧batö kwujuno. Ja̧danö, ju'wedönö kwujuno, cincuentabedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö kwujuno, cienbedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö kwujuno, milbedö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö.

²² Jobadö 'da̧batö kwujunawö̧nö weköbo ba̧kwȩlö̧jatebö wene juna̧ladö yötja̧lakwawi̧ a̧ja̧kwö, omukwatö tjujuni̧ma yötjawobö, biteda jweinö omukwato̧, biteda ö'öbönö omukwato̧, jö̧ba̧lö. Ja̧danö, wene tjujuna̧li̧ omukwatö tjujunoböma jwiinö waiyitjö̧ma ökwönöda kwa̧ja̧kwobö atjebena. Jo̧kwaijayonö jo̧kwada wene jawa juna̧ladönöma idöda a̧ja̧kwö omukwatö tjujunobö weköbo. Jejenö pjatjatakobe ökwönöma, kwotidawa nöökakobetjö̧.

²³ Moisés, Diosma jejenö ju'wedönö pjatjatobö 'da̧batö kwujunobö webo̧. Jo̧kwaobetjö̧ jejenö 'da̧batö kwujunitjö̧ma otiwanö kwö̧jena, me'dawachibö 'dö̧kachibökakobe. Ja̧danö, ju'wedöma pjatjatitjö̧ma, wene juna̧ladö yötja̧lakwawi̧ a̧ja̧kwö, wene juna̧ladöma lekwema te'ada̧lökönö wene jwiinö tjȩwa̧jakobe— jö̧ba̧lijetö Moisés öjaba Jetroma, Moisésnö yöbawö pjabatö.

²⁴ Ja̧danö, Moisésma öjaba pjabatö yöawi̧ma ösödobetjö̧ okobe jwiinö yöawi̧danö ja̧bijetö.

²⁵ Israel jojodötjö ju'wedönö 'da̧batö junijetö jojodö tjuluwedö batjibanö, wene juna̧ladö yötja̧lakwawi̧ a̧ja̧kwö omukwatö tjujunobö. Jweinö omukwatö yebaböködönöda 'da̧batö junijetö. Ja̧danö, jobadötjö ju'wedönöma 'da̧batö junijetö domulatajabedö tjuluwedö batjibanö, tjömöledö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö 'dabatö junijetö cincuentabedö tjuluwedö batjibanö, tjömöledö yötja̧lakwawi̧ a̧ja̧kwö omukwatö tjujunobö. Ja̧danö, ju'wedönö 'dabatö junijetö milbedö tjuluwedö batjibanö, tjömöledö yötja̧li̧ a̧ja̧kwö omukwatö tjujunobö.

²⁶ 'Da̧batö ujunajawö̧ma ba̧kwelöjatebö wene juna̧ladö yötja̧lakwawi̧ a̧ja̧kwö omukwatö junadijadötö, diteda jweinö omukwatojobö, diteda ö'öbönö omukwatojobö, jö̧ba̧lö. Ja̧danö, jwiinö waiyi̧ wene tjujuna̧li̧ma Moisesda a̧ja̧kwobö abebijadötö, jo̧bada omukwatö junö. Jo̧kwaijayonö waiyökö wene jawama idödada omukwatö junijadötö.

²⁷ Ikenama Moisés öjaba Jetro, tjo̧wi̧ chȩwa̧ja̧, jö̧a̧lökwe, Jao otiwanö da̧ji̧, jö̧ba̧lijetö Moisésma.