Éxodo 16 - Dios Iwene

Israel Jojodö jwötjeba̧lina jawa, kwakwawa jwiiawö̧

¹ Jemi ikenama, okobe deinö Israel jojodöma Elimtjö labebajadö Sin meje mikwena ichibijadötö. Jemi Elim nijitjö̧ Sinaí mikwa'o jelö 'da̧deemi. Jobadöma Egiptotjö latjebaja̧ möletjö ja̧wo̧dö dujutaja a̧li̧nösamutjö bakwamu möle baibena ichibijadötö Sin mejenö.

² Jobe mejenö ja̧nö a̧wi̧chö̧lö̧jiawö̧ okobe deinö Israel jojodöma Moisésnö Aarónnö jwöbeba̧lijadötö:

³ —Isabenö Jo̧ma ökwödönö Egiptotjö kwabö loinatjö̧ma otiwena, bai mejenö ja̧nö a̧wi̧chitjö wodökakobetjö̧. Jobe Egiptotjöma itebiya palaka'donö toawa ba̧nö kwiadijatö. Panbi domeawinö kwiadijatö jobetjöma. Jo̧kwaijayonö baima yelösöda jwiobe. Moisés, ökwödöma okobe deinö a̧wi̧chitjö wodotö jö̧ba̧lö kwichejebaduwajabe bai mejema— jwöbeba̧lijadötö.

⁴ Ikenama Isabenö Jo̧ma yöba̧lijetö Moisésnö: —A̧ja̧kwitjö. Ötjöma mölekwena kwakwawa mölejebetjö nijakwö tjoduwobö wetocha, ökwödö pan kwukwaduwi̧danö kwukwaduwobö. Jojodönö weköbo kwakwawa tjoduwena tjejutjö labebö tje'do mölekwena ja̧ möle tjukwi̧da, u'yudökönö. Jejenö ötjö weti̧ tja̧ja̧kwojobö, tja̧ja̧kwokojobö chedocha.

⁵ Ja̧danö, jelemutjö̧ bakwöta möle baibena, semanakwena, tje'dakwa̧ma dötölataja möle jawa tje'do weköbo, ju'wi dewachö tjukwakwa̧bi tjujuno, otikwö̧kö̧ mölȩ tjukwakwa̧ma— yöba̧lijetö Isabenö Jo̧ma Moisésnöma.

⁶ Jo̧kwaobetjö̧ Moisés, Aarón Israel jojodönö jö̧ba̧lijadötö: —Makö yi̧bena jweinö kwöwaisachibaduwakobe Egiptotjö lakebaduwobö pjabatinama, bakwo̧da Isabenö Jo̧da, jö̧ba̧lö. Ökwödömakö̧, Isabenö Jo̧da lakebaduwobö pjabatinama.

⁷ Ja̧danö, ju'wi dewachöma kwedaduwakobe Isabenö Jo̧ iteda salöinö dejatö i̧sekwi̧ma. Jo̧banö jwökeba̧laduwi̧ a̧ja̧kwajabetjö iteda salöinö idejati̧ma i̧sekwakobe, bena chö̧ja, jö̧ba̧lö. Chömöledö, jo̧banöda, Isabenö Jo̧nöda jwökeba̧laduwobe, ökwödönömaö̧kö̧. Ökwödöma sule jo̧ba ömöayedösa— jö̧ba̧lijadötö.

⁸ Ikenama Moisés jö̧ba̧lijetö: —Yi̧benakwena Isabenö Jo̧ma itebiya kukwaduwobö iyakobe. Ja̧danö, yȩayikwena kwakwawa iyakobe, ökwödö pan kwukwaduwi̧danö kwomeawaduwinö kwukwaduwobö jwökeba̧laduwi̧ a̧ja̧kwajabetjö̧. Isabenö, jo̧banöda jwökeba̧laduwobe, ökwödönömaö̧kö̧. Sule Isabenö Jo̧ ömöayedöbedösa ökwödöma— jö̧ba̧lijetö.

⁹ Ikenama Moisés webijetö Aarónnö: — Chöpöe, okobe deinö Israel jojodönö jwöbi baikwö tjicho Isabenö Jo̧ öbajale a'o tjo̧ko̧ko̧kwo, jo̧banö jwötjeba̧li̧ a̧ja̧kwajabetjö̧— webijetö Moisésma Aarónnöma.

¹⁰ Weökwe jwöawö̧ ichijadötö okobe deinö Israel jojodöma. Aarónma jobadönö yöa̧lonö tupakwö jojodö deobekwö tjedemi ¡ayö! Isabenö Jo̧ salöinö idejatobe edijadötö ojwiyo'wotjö, jobadönö öbibö 'ya̧'wotjöma.

¹¹ Ikenama Isabenö Jo̧ma Moisésnö yöba̧lijetö:

¹² —Israel jojodö jwötjeba̧li̧ma cha̧ja̧kwajabe. Jo̧kwaobetjö̧ jobadönö baikwö yökawo: Makö yi̧bena itebiya kukwaduwakobe. Ja̧danö, itekwayi dewachö kwakwawa, pan kwukwaduwi̧danö kwukwaduwakobe, kwomeaduwinö. Jejenö baledobetjö̧ kwöwaisachibaduwakobe, isabenö, ökwödönö pjabato̧ma Isabenö Jo̧da, ökwödö Duluwo̧ Diosda, jö̧ba̧lö. Jejenö yökawodönö— yöba̧lijetö Isabenö Jo̧ma Moisésnöma.

¹³ Ikenama yi̧benakwö pji̧yu̧ma ba̧jekwadö nijinö mebijadötö, nijibi öwawökönö. Ja̧danö, ju'wi dewachö yȩayima a̧dedö tjo'yoli 'yoliwijetö isa'yema.

¹⁴ Ja̧ a̧dedö tjo'yoli kököachibena ¡ayö! okobe jwiinö niji wame dewi̧, 'da̧jö̧ki̧ ö̧pi̧ ba̧jijetö.

¹⁵ Israel jojodöma tjedemi wajwibö, tajijö jö̧ba̧lö, yöba̧lakwawijadötö, ja̧ ichejekwi̧ jawadanö la'akatjöda edaitjokobetjö̧. Ja̧danö, Moisés jö̧ba̧lijetö: —Ja̧ma kwakwawa, pan kwukwaduwi̧danö ja̧ ö̧pi̧bi̧ya kwukwaduwakwa̧. Isabenö Jo̧ma ökwödönö iyajabe kukwaduwobö.

¹⁶ Ja̧danö, baikwö wea Isabenö Jo̧ma ökwödönö: Okwödö bakwasokwena jojodötjö bakwo̧ma iteda ömöledö bakwo̧nökwena tjukwakwa̧ e'dobö jo̧be, bakwo̧nökwena dos litros. Jejenö wea Isabenö Jo̧ma ökwödönöma— jö̧ba̧lijetö Moisésma Israel jojodönö.

¹⁷ Ikenama Israel jojodöma Isabenö Jo̧ weaja̧danö a̧ja̧kwijadötö. Ju'wedökwenama nöinö ja̧danö, ju'wedökwenama ja'yubeda e'dijadötö.

¹⁸ Ja̧danö, e'dajadö tje'daja̧kwena ba̧ja̧dö tjedemi nöinö e'dajadöbi ja'yubenö e'dajadöbi tjukwakwa̧da e'dijadötö. Nöinö e'dajadöma tjukwakwa̧da baibijetö u'yukwökönö. Ja̧danö, ja'yubenö e'dajadöma okobe deinö tjukwakwa̧ma baibijetö, bakwo̧bi kwö̧kö̧ deinö. Bakwo̧nökwena ömöledö tjukwakwa̧da e'dijadötö.

¹⁹ Ja̧danö, Moisés webijetö jobadönö: —Ja'yubebi u'yudaduwökönuwi itekwayi dukwakwa̧ jö̧ba̧löma— webijetö.

²⁰ Jejenö weijayonö jobadötjö ju'wedökwenama a̧ja̧kwijöködötö. Pjei̧kwena u'yudijadötö ju'wi dewachö dukwakwa̧ jö̧ba̧lö. Ja̧ tju'yudaja̧ma wobibö sa̧duibijetö, jwiinö sulabenö omewinö. Jejenö tja̧ja̧kwiökökwe labijetö Moisésma, jobadönöma.

²¹ Ja̧danö, yȩayikwena bakwasokwena jojodötjö bakwo̧ ja̧ möle tjukwakwa̧ e'dijadötö. Ja̧danö, yada nijinö u'yukwaja̧ma ja̧wo̧ tubinö dejatibenama ja̧ ö̧pi̧bi̧yama isobuda baibanö jwiibi baibijetö.

²² Ja̧danö, tje'daja̧ jamatö möletjö̧ jelemutjö bakwöta möle baibenama bakwo̧nökwena dötölataja möle jawa e'dijadötö cuatro litros jenanö, ju'wi dewachö tjukwakwa̧ tjujunobö. Ja̧danö, Israel jojodötjö la'aka luwedöma jejenö tje'daja̧ ikena Moisésnö yöbawijadötö, tjo̧wi̧ de'dajabe, jö̧ba̧lö.

²³ Jejenö yötja̧lökwe: — Baikwö weobe Isabenö Jo̧ma ökwödönöma: Itekwayima otidökönö kwö'wachaduwakwa̧ möle ja̧kobe, Isabenö Jo̧nö kwomukwataduwobö wainö ji̧ mölema. Jo̧kwaobetjö̧ babe möleda balöbi kwöbaladuwo toböbi toköbaduwo dötölataja möle kukwaduwakwa̧. Makö kukwaduwemi u'yukwi̧ma kwujunaduwo itekwayi kukwaduwakwa̧ma— webijetö Moisésma.

²⁴ Jejenö weajawö̧ tjukwemi u'yukwi̧ma junijadötö ju'wi dewachö jenanö. Ja̧danö, tju'yudaja̧ma woibijökötö, sa̧duwibi sa̧duwijökötö.

²⁵ Ja̧danö, ja̧ mölȩma jö̧ba̧lijetö Moisésma: —Babe mölȩ e'dökönö mada kwanö kwu'yudinaduwama kwaduwi, babe mölȩma Diosnö omukwatö wainö ji̧ möleobetjö̧. Tjoduwi̧ kwakwawama nijinö ba̧jokobe babe mölȩ, jwiya.

²⁶ Jejenö jelemutjö bakwöta möle jenanö kwe'daduwo, mölekwena. Jemi ikena möle, jelemutjö dötölataja möle baibena tjoduwi̧ kwakwawama nijinö ba̧jokobe, ja möle kwö'wachaduwi̧ möleobetjö̧— jö̧ba̧lijetö Moisésma.

²⁷ Yayonö ja̧ möle jojodötjö ju'wedökwenama e'dö labebijadötö. Labebö tjedemi nijinö ba̧jijökötö kwakwawa.

²⁸ Jemi ikenama Isabenö Jo̧ma Moisésnö jö̧ba̧lijetö: —Israel jojodönö baikwö yöbawi: ¿Tajawedö kwa̧ja̧kwaduwokobeda ötjö weti̧ma? Ja̧danö, kwö̧jaduwobö yötawi̧bi ¿tajawedö a̧ja̧kwökönö kwö̧jaduwobeda?

²⁹ Omukwataduwi, ötjö, Isabenö Jo̧ma ökwödönö pjabatö kwö'wachaduwi̧ möle 'da̧batö chujunijatö. Jejenö chujunajobetjö̧ jelemutjö bakwöta möle baibena kwakwawa chiyocha, dötölataja möle kukwaduwakwa̧ma. Jejenöobetjö̧ jelemutjö dötölataja möle baibena kwejuduwi okwa, bakwo̧bi labeböknö. Jejenö yökawo Israel jojodönö— webijetö Isabenö Jo̧ma Moisésnö.

³⁰ Ja̧danö, Israel jojodöma Dios wei̧danö a̧ja̧kwijadötö. Jelemutjö bakwöta mölema otidökönö ö'wachijadötö.

³¹ Ja̧danö, Dios iyi̧ kwakwawama Israel jojodöma maná, jö̧ba̧lö, öbabijadötö. Ja̧ kwakwawama dewi̧, 'da̧jö̧ki̧, inebiya pjei̧ inebiyadanö ichejekwi̧, cilantro mikwi̧ inebiyadanö. Ja̧danö, wa̧yo̧kwö pjabatö otikwa galletadanö o̧tinö ja̧ kwakwawama.

³² Ja̧danö, Moisés jö̧ba̧lijetö Israel jojodönöma: —Dios wei̧ yötawaduwakwö: Bi̧ya kwakwawa kwe'daduwatjö dos litros jenanö i̧sa̧yu̧nö anö kwujunaduwo, ökwödötjö tupadanö jojodö ju'wi möle tjedobö. Jejenö tjedakobe ökwödönö chiyina kwakwawa, mejenö kwö̧jaduwena, lakebaduwobö pjatataja̧ ikena. Jejenö weatö Isabenö Jo̧ma ökwödönöma. —yöbawijetö Moisésma, Dios wei̧.

³³ Ikenama webijetö Aarónnö: —Anawayu̧ emaji kwano dos litros jenanö ja̧ kwakwawa mana̧ mikwi̧tjö. Ikenama jayu̧ kwujuno Isabenö Jo̧ öbajale a'o, okobe deinö ökwödötjö tupadanö jojodö ba̧kwȩlö̧jatebö tjedakobetjö̧— webijetö.

³⁴ Ja̧danö, ja̧yuma ju'wi mölema Aarónma ujunakwa̧yu Dios eju okwa, isapjo badeibö, inabiya döbölataja Dios wei̧ iwȩyudina öbiya a̧japjo badeibö.

³⁵ Ja̧danö, Israel jojodöma lekwe möle, cuarenta o̧bi̧ya̧ baledibanö mölekwena kwiabijadötö ja̧ kwakwawa, maná mikwi̧ma, jojodö tjuju̧kwobekwö, Canaán niji ö'öbö tjichibenanö kabatö.

³⁶ Ja̧danö, ja̧ möle ba̧ja̧di̧ma, bakwöta efa, jö̧ba̧lö, ba̧ja̧diabijetö jelemutjö̧ dötölataja litros.