Éxodo 15 - Dios Iwene

Moisés Isabenö Jo̧nö ösödö, otiwanö pjaatajabe, jö̧ba̧lö, lo̧ina jawa

¹ Ikenama, Isabenö Jo̧ Egipto jojodötjö tjö̧jibinö pjaatiökwe ösödö lo̧bijetö Moisésma Isabenö Jo̧nö. Ja̧danö, okobe deinö Israel jojodöbi Moisés loi̧danö lo̧bijadötö. Baikwö lo̧bijetö Moisésma: Isabenö Jo̧nö lo̧ta döpöjojodönö jwiinö ujuluwajabetjö̧. Ökwödönö lubajadö ka̧ba̧yu̧dönö wa̧jadönö, ja̧danö tjö̧wajawö̧ ka̧ba̧yu̧dönöbi o̧pesobunö o̧bebö jabö loajabe.

² Isabenö Jo̧ma ötjönö chujulu iyo̧. Jo̧banöda omukwatö lo̧ta. Isabenö Jo̧ma chöpöjojodötjö chö̧jibinö pjabato̧. Jo̧bama ötjö Chuluwo̧ Dios, ja̧danö jo̧banö chösöda, jwiinö otiwo̧, jö̧ba̧lö. Ja̧danö, jo̧bama chabe'do Uluwo̧ Dios, ja̧danö jo̧banö chösöda, jwiinö juluwo̧, jö̧ba̧lö.

³ Isabenö Jo̧ma ölakwabikwawö juluwo̧, ja̧danö, iteda imima Isabenö Jo̧, jö̧ba̧lö.

⁴ Jo̧bama faraón itea kolukiya o̧pesobunö meajinö jabö loajabe. Ja̧danö, faraón ömöayedö 'böawa waisadönö o̧bebö jabö loajabe o̧pesobunö. Ja̧danö, iteda 'da̧batö ujuninawö̧, 'böawa jojodötjö la'aka luwedöbi o̧pesobu duwobu mikwobunö o̧bawö debö tji̧'yajabe.

⁵ Jobadöma o̧pesobu jwiinö da̧kwobu okwa mȩtja̧jabe, nijibe tjö̧bamatinö, inawa ömökawa meaji̧danö.

⁶ Isabenö Jo̧ kwömamu kwöwaisachamuma jwiinö juluwamu. Jamu jwiinö juluwamunö pjebebö loköbajabe kwöpöjöjödönö.

⁷ Jwiinö kwujuluwajabe kwöpöjojodönö, jwiinö juluwo̧köbobetjö̧. Jobadönö jwiinö kwölabobetjö̧ ökwöla ubö meje'ye jwiinö ubi̧danö jwiinö söbebö loköbajabe jobadönöma.

⁸ Kwi̧su̧nö kwimiyupjo labeibö o̧pesobu wame dobibajö ö'weje 'da̧bachibö jamatajabe, dobulataja jamatinö, da̧kwobunö 'diinö jinö, isuwökönö.

⁹ Kwöpöjojodöma yötja̧lakwawinobe, Israel jojodönö lubö döbadekwajo, jö̧ba̧lö. Jobe ichibö tjiteatjö okobe jwiinö dösödi̧da emibö diyabikwobe, jö̧ba̧lö yötja̧lakwawinobe. Ja̧danö, yötja̧lakwawinobe, ikenama dökwölöte'iju töbekwö bulabinö lododönö, jö̧ba̧lö. yötja̧lakwawinobe. Jejenö omukwatö junö yötja̧lakwawinobe kwöpöjojodöma ökwödönöma.

¹⁰ Jo̧kwaijayonö ökwö, Isabenö Jo̧ma jobadönö kwimiyupjo pjuköbajabe. Pjuköbemi o̧pesobuma okwatibajabe jobadö mȩtja̧jinö. O̧pesubu okwa mȩtja̧jabe, nijibe tjö̧bamatinö, inawa ömökawa meaji̧danö.

¹¹ Isabenö Jo̧, ju'wedö tjo̧'wo jawa tjösödawö̧tjö ökwödajayo̧ma deobe. Ökwödajayo̧ma ¿tida? Deobe, bakwo̧da wainö juluwo̧ja, ökwö Isabenö Jo̧da. Deobe ökwödajayo̧, yebabinö tjösödökwema, Deobe ökwödajayo̧, jwiinö ujulu i̧sebo̧ma.

¹² Isabenö Jo̧, ökwöma kwömamu kwöwaisamunö kabebö kwi̧sebemi nijima ökatibajabe kwöpöjojodönöma.

¹³ Ja̧danö, Isabenö Jo̧, ökwödönö kwösödi̧ma balewachökönö ökibajabe ökwödönö, döpöjojodötjö dö̧jibinö pjakatajawö̧nöma. Ja̧danö, ökwödönö kwujulunö öbibö kwi̧'yobe ökwö wainö kwujuninemi niji jobekwö.

¹⁴ Ju'wedö jojodöma tjo̧wi̧ kwujulu kwisȩbaja̧ yötjawi̧ tja̧ja̧kwajabe. Ja̧ yötjawi̧ a̧ja̧kwö yebabinö tjö̧bawadö. Ja̧danö, filisteo jojodöma jwiinö yebabinö ju̧kwadö.

¹⁵ Ja̧danö Edom jojodötjö la'aka luwedöbi jwiinö yebabidö, kwujulu kwisȩbaja̧ yötjawi̧ a̧ja̧kwö. Ja̧danö, Moab jojodötjö la'aka luwedöbi jwiinö yetjabobetjö̧ tjö̧tja̧wobe. Ja̧danö, okobe deinö Canaán nijinö ju̧kwadöma jwiinö yetjabobetjö̧ me'dawadöda tjuju̧kwobe.

¹⁶ ¡Ayö! jö̧ba̧lö, okobe deinö Canaán nijinö ju̧kwadöma yebabidöda tjuju̧kwobe, kwujulu kwisȩbaja̧ yötjawi̧ tja̧ja̧kwajabetjö̧, jwiinö juluwo̧, jö̧ba̧lö. Jejenö, yebabinö tjuju̧kwobetjö̧ jobadö tjuju̧kwemi döbaledena wi̧inö tjö̧jobe, inawa wi̧achawa ji̧danö. Isabenö Jo̧, ökwödö, ökwö kwömöledö, Egiptotjö dö̧jibinö pjabatö lakebinawö̧ma jobadö tjuju̧kwemi döbaledenanö kabatö jejenö, wi̧inö tjö̧jobe.

¹⁷ Isabenö Jo̧, ökwöma ökwödönö, kwömöledönöma öbibö kwi̧'yakwo̧ja mö'ösa'o ökwö kwö̧ja'obe, jobe dö̧jobö. Isabenö Jo̧, ja'otjöma kwö̧jakweju kwotidinobe. Ja̧danö, Chuluwo̧ Dios, jejuma wainö kwujuninobe, bejuma chömöledö ötjönö tjösödakweju, jö̧ba̧lö.

¹⁸ Isabenö Jo̧, ökwöma ba̧kwȩlö̧jatebö inesö la'aka luwo̧köbakwo̧ja— jejenö lo̧bijetö Moisésma.

Moisés, Aarón tjöpöo María Isabenö Jo̧nö lojina jawa

¹⁹ Ja̧danö, ja̧ mölȩma Faraón a̧jwi̧mu̧ ka̧ba̧yu̧dö, kolukiya, ka̧ba̧yu̧dönö wa̧nö 'ya̧dö o̧pesobu petjibobö tji̧'yajemi Isabenö Jo̧ma webijetö o̧pesobu kököachajemi yemidanö okwatibobö jobadö o̧pesobu okwada metja̧jinö. Jejenö baledijayonö Israel jojodöma otiwanö pebibijadötö o̧pesobu ö'wejenö kököbachibö lamatajena.

²⁰ Ikenama Moisés Aarón öpöo María mikwuju, Dios yöawi̧ yöbawujuma la̧tijayu chabö döbijotö Isabenö Jo̧nö ösödö. Jökömanö okobe deinö ya̧döma Isabenö Jo̧nö ösödö la̧tijayubiya chabö döbijadötö.

²¹ Ja̧danö, Maríama baikwö lo̧bijotö Isabenö Jo̧nö ösödö: —Isabenö Jo̧nö lo̧do öpöjojodönö jwiinö ujuluwajabetjö̧. Ka̧ba̧yu̧dönöbi, ka̧ba̧yu̧dönö wa̧jadönöbi o̧pesobunö o̧tja̧winö jabö loajabe— lo̧bijotö Maríama.

Isabenö Jo̧ ojwiyo o̧'dobu otiwobu baibanö otidina jawa

²² Ikenama Moisésma Israel jojodönö öbibö 'yi̧jetö o̧pesobu duwobu mikwobutjö tupakwö mejebe, Sur meje mikwobekwö. Ja̧danö, wa̧pötakwa möle kwebachö 'yi̧jadötö ojwese'do jwiena, ojwiyo owökönö.

²³ Ja̧danö, tupakwö 'ya̧nö Mara mikwobe ichibö ojwese'do ji̧jayonö jwiinö o̧'di̧awö̧ tjowoböma jwiijetö. Je'dotjö ojwiyoma o̧'dobetjö̧ jobema Mara, jö̧ba̧lö, mikwinemi.

²⁴ Jejenö ji̧awö̧ Israel jojodöma Moisésnö jwöbeba̧lijadötö, ¿Taji dowakwa̧da? jö̧ba̧lö.

²⁵ Jo̧kwaiökwe Isabenö Jo̧nö budekwö abebijetö Moisésma. Aebiökwe Isabenö Jo̧ma Moisésnö isȩbijetö towinö. Moisésma jowitjö ötjebiya tjebö lobijetö ojwese'do okwa. Loemi ojwiyo o̧'dajobuma otiwobu baibijetö. Jobema Isabenö Jo̧ma Israel jojodönö tjö̧ji̧ weawa jawa junijetö, ja̧ weawa a̧ja̧kwö tjö̧jobö. Ja̧danö, jo̧ba wei̧ tja̧ja̧kwojobö edobö

²⁶ yöba̧lijetö jobadönö: —Ötjöma Isabenö Jo̧sa, ökwödö kwuluwo̧duwi Diossa. Ökwödöma ötjö yötawi̧ma tjöbeba̧lakwawö a̧ja̧kwö kwö̧jaduwitjö̧ma, ja̧danö, ötjö jweinö omukwatö kwö̧jaduwobö chösödi̧danö ja̧bö kwö̧jaduwitjö̧ma, ja̧danö ötjö weti̧ tjöbeba̧lakwawö omukwatö, ja̧ weawa a̧ja̧kwö kwö̧jaduwitjö̧ma la'akatjöda Egipto jojodönö wotjinö lȩtebinadanöma lȩtebökakobe ökwödönöma. Kwo̧'wo jwikibaduwoko. Ötjödasa Isabenö Jo̧ma, ökwödö kwö'wöchaduwiökönö otiwanö bakibaduwinö pjabato̧sa—yöba̧lijetö Isabenö Jo̧ma Israel jojodönöma.

²⁷ Jobe Maratjö labebajadöma Elim mikwemi ichibijadötö. Jobema ojwese'diju a̧li̧nösamutjö do'dolataja jemi ji̧jetö. Ja̧danö, jemima wa̧cha̧ ö̧yi̧ setentanö ö̧yi̧ ji̧jetö. Israel jojodöma jena isa̧do̧tjö tjejudanö debatö otidijadötö, jenada tjabobö.