Éxodo 14 - Dios Iwene

Isabenö Jo̧ Moisésnö weina jawa, Israel jojodönö tjebachajö, o̧pesobu lo̧bekwö tji̧'yobö weköbo, jö̧ba̧lö

¹ Ja̧danö, Israel jojodö Etam nijinö tjö̧jena Isabenö Jo̧ma jö̧ba̧lijetö Moisésnö:

² —Moisés, kwömöledönö weköbo jweinö 'yö̧kö̧nö jelobekwö tji̧'yo, o̧pesobu lo̧bekwö, Pi-hahirot comunidad pjeanö tjichibobö. Jobetjö isa̧do̧tjö tjejudanö debatö tjotido weköbo. Jobema Migdol comunidadtjö o̧pesobutjö 'da̧denö jemi, Baal-zefón comunidad badeibö. Jenada kwejuduwidanö debatö kwotidaduwo, o̧pesobu ö'öbö.

³ Ja̧danö, faraónma jobekwö kwi̧'yaja̧duwa omukwatibö, Israel jojodöma Egiptotjö labebö tji̧'yobö wajwibö jelobeda kwetjachena, jö̧ba̧lö, omukwatena. Dakwö latjebobö, jojodö deemi nijima jobadö latjebobö tjöeba̧lobe, jö̧ba̧lö, omukwatena faraónma.

⁴ Jejenö omukwatinö yemidanö jo̧ba omajade 'diinö wetobetjö̧ ömöayedö 'böawa jojodökwö ökwödönö lubö i̧'yakobe. Ikenama faraónnö, okobe deinö iteda ömöayedö 'böawa waisadönö chujuluwobetjö̧ jojodöma ötjönö otiwanö tjomukwatakobe, Isabenö Jo̧da jwiinö juluwo̧ma, jö̧ba̧lö. Ja̧danö, okobe deinö Egipto jojodöma ötjönö tjöwaisachibakobe, webo̧ma Isabenö Jo̧da, jö̧ba̧lö— yöbawijetö Isabenö Jo̧ma Moisésnö. Ja̧danö, Moisésma Isabenö Jo̧ wei̧danö yöawawö̧ a̧ja̧kwijadötö, Israel jojodöma.

Egipto jojodö 'böawa waisadö Israel jojodönö lutjina jawa

⁵ Ja̧danö, faraónma Israel jojodö 'dötjibaja̧ yötjawi̧ a̧ja̧kwena jo̧bama, iteda ipjea ömöayedöbi Israel jojodönö latjebobö katjatakwawaja̧ jelobekwö omukwatö yöba̧lakwawijadötö: —¡Ayö! tajawedö omukwatökönö latjebobö wedajada, ökwödö wedi̧ tjotidobö weba̧lajidawö̧nöma. Jweinö domukwatijökötö— yöba̧lakwawijadötö.

⁶ Jejenö omukwatobetjö̧ faraónma Israel jojodönö lutjobö omukwatö, a̧jwi̧mu̧ ka̧ba̧yu̧dönö tötjaka kolukiyanö tjakwatobö webijetö. Ja̧danö, jwöbijetö okobe deinö iteda ömöayedö 'böawa waisadönö tjichobö, Israel jojodönö lubö tji̧'yakobetjö̧.

⁷ Ka̧ba̧yu̧dö tötjaka ko̧lu̧ki̧yatjö jwiinö otiwi̧ jawa ö̧ki̧ya̧, seiscientos jawa omudawö junijetö faraónma. Ja̧danö, ju'wi ka̧ba̧yu̧dö tötjaka jawa ö̧ki̧ya̧bi junijetö, okobe jwiinö Egiponö jawa ö̧ki̧ya. Ja̧danö, faraónma 'böawa waisadötjö ju'wedönö 'da̧batö junijetö ko̧lu̧ka̧bi̧yanö a̧jö 'ya̧dönö la'aka luwedö batjibanö.

⁸ Ja̧danö, Isabenö Jo̧ma faraónnö omajade 'diinö weiökwe Israel jojodönö yebabökönö labebajadönö lubö 'yi̧jetö, ömöayedö 'böawa waisadökwö.

⁹ Jejenö lubö 'yi̧jadötö Egipto jojodötjö 'böawa waisadöma okobe deinö ka̧ba̧yu̧dö tjötji̧ kolukiyanö a̧jadöbi, ja̧danö ka̧ba̧yu̧dönö wa̧jadöbi, ja̧danö tjömasapanö 'ya̧jadöbi. 'Ya̧jadö Israel jojodönö badekwajijadötö o̧pesobu ö'öbönö tjö̧jobe, Pi-hahirot comunidad pjeanö, Baal-zefón comunidad badeibö.

¹⁰ Ja̧danö, Israel jojodöma tjedemi ¡ayö! ökwödönö lubö tjicha Egipto jojodöma, jö̧ba̧lö, jwiinö yebaibijadötö. Yebabinö budekwö abebijadötö Isabenö Jo̧nö ¡pjabati! jö̧ba̧lö.

¹¹ Ja̧danö, Moisésnö jwöbeba̧lijadötö: —¿Egiptonöma wobale lödawemima jwiobetjö̧ baikwö mejetjö wodobö öbibö kwichinaji̧? Sulabenö öbibö kwichinobe ökwödönöma.

¹² Isabenö yöda̧lijatö ökwönö Egiptonö dö̧jena, Wainö ja̧dösa, Egipto jojodö wetji̧ma otidö. Pjakatoböma döpöjöda, jö̧ba̧lö. Dedemi Egipto jojodö wetji̧ dotidinatjö bajalekwönönö otiwa belö mejetjö wodi̧ma— tjo̧'wo sulawö̧ jwöbeba̧lijadötö Israel jojodöma Moisésnö.

¹³ Jejenö jwötjeba̧lökwe: —Chömöledö yekabiduwa. Kwo̧'woduwi 'dibachibö ja̧duwi. Makö kwedaduwakwedöja Isabenö Jo̧ ökwödö kwö̧jibaduwinö pjaati̧ma. Ja̧danö, kwö̧jibaduwinö pjaatobetjö̧ idö Egipto jojodö ichadö, babe kwedaduwawö̧nöma yemidanöma kwedaduwökakwawö̧.

¹⁴ Isabenö Jo̧da kwöpöjojodönö ölakwabikwawö juluwo̧ma. Ökwödöma sule ölakwabikwawökönö wi̧inö kwö̧jaduwo.

Isabenö Jo̧ Egipto jojodönö o̧tjawinö weina jawa

¹⁵ Ikenama Isabenö Jo̧ma Moisésnö jö̧ba̧lijetö: —¿Tajawedö kabatökönö budekwinö akebobeda ötjönöma, Pjabati, jö̧ba̧lö? Israel jojodönö yökawo, te'ada̧lökönö tjejubiya ejatibö tupakwö tji̧'yo, jö̧ba̧lö.

¹⁶ Ja̧danö, kwotokwa'o do̧ba̧lö kabebö o̧pesobukwö kwisȩbo, o̧pesobu wamenö wanekwachö. Jejenö kwisȩbemi o̧pesobu ö'weje 'da̧abachibö mana baibakobe ökwödöma jenada, o̧pesobu ö'wejenöda nijinö pekibaduwakobetjö̧, o̧pesobu 'da̧abachibö dobulataja möinö jamatajobu ö'wejenöma.

¹⁷ Ja̧danö, ötjöma Egipto jojodönöma tjomajade 'ditjinö wetocha lutjobö ökwödönö, ötjö jobadönö chujuluwobö. Ja̧danö, faraónnö, okobe deinö iteda ömöayedö 'böawa waisadönö chujuluwobetjö̧ jojodöma ötjönö otiwanö tjomukwatakobe, Isabenö Jo̧da jwiinö juluwo̧ma, jö̧ba̧lö.

¹⁸ Ja̧danö, jobadönö chujuluwobetjö̧ okobe deinö Egipto jojodöma ötjönö tjöwaisachibakobe, okobe jwiinö webo̧ma Isabenö Jo̧da, jö̧ba̧lö.

¹⁹ Ikenama Dios weajökwe ángel, Israel jojodö tja̧bönö 'yajo̧ma tjö̧kamakwö babibijetö. Ja̧danö, jobekwö jojodö tjö̧kamakwö, ojwiyo'wo ja'da'daa'wobi tja̧bönö 'ya̧ja'woma Israel jojodö tjö̧kömakwö baibijetö,

²⁰ Egipto jojodö tjuju̧kwemitjö Israel jojodö tjuju̧kwemitjö 'da̧denö. Ja'wotjöma yȩijetö yöte baledibanö Egipto jojodö tjö̧jemima. Jo̧kwaobetjö̧ Egipto jojodöma Israel jojodö tjuju̧kwobekwö ichibijöködötö, ja̧danö Israel jojodöma egipto jojodö tjuju̧kwobekwö ichibijöködötö. Ja̧danö, ja̧ yö̧tema ja'wotjö Egipto jojodö tjö̧jemima yȩijayonö Israel jojodö tjö̧jemima ja'wotjö dewijetö.

²¹ Jemi ikenama Moisés otokwa'o do̧ba̧lö ömamu kabebö i̧sebijetö o̧pesobu wame i̧sebi̧danö wanekwachö. I̧sebemi Isabenö Jo̧ma webijetö jwa̧lȩ'ȩpjo labinö ichobö ja̧wo̧ laebobekwötjö yö̧te baledibanö jwa̧lȩ'ȩwobö. Labinö jwa̧lȩ'ȩwemi o̧pesobu ö'weje 'da̧bachibö dobulataja baibanö lamatijetö möinö, öwejenö mana li̧nö.

²² Ikenama Israel jojodöma o̧pesobu kököbachibö lamatajena pebibijadötö. Wajwitjobekwöbi tjöwaisobekwöbi o̧pesobuma 'da̧bachibö dobulataja jamatajobu baibijetö möinö.

²³ Jemi ikenama Egipto jojodöma Israel jojodö tjö̧kamanö lubijadötö okobe deinö ka̧ba̧yu̧dönö wa̧jadöbi, kolukiyanö a̧jö 'ya̧döbi, kolukiyanö jwebeba̧ladöbi.

²⁴ Ja̧danö, ina yȩa'o̧ayi Isabenö Jo̧ma ojwiyo'wo ökwöladanö uba'wotjö edö webijetö Egipto jojodönöma jwiinö yebaibö 'dötjibajobö ja̧tjinö baibanö.

²⁵ Ja̧danö, 'dötjabajemi kolukiya jawa o'ijubiyanöbi lete'di pöawibanö webijetö Isabenö Jo̧ma, kolukabiya yö̧kö̧nö. Jejenö balediawö̧ jö̧ba̧lijadötö: —¡Ayö! Isabenö Jo̧ma Israel jojodönö tjö̧jibinö pjabatö ölakwabikwawö ujuluwijayonö ökwödönöma öpöjödö kwabö lobo̧. ¡Belöma dȩwa̧ja̧duwo— jö̧ba̧lijadötö.

²⁶ Ikenama Isabenö Jo̧ma Moisésnö webijetö: —Yemidanö kwotokwa'o do̧ba̧lö kwömamu kabebö i̧sebi, o̧pesobu wame kwisȩbi̧danö wanekwachö. Kwisȩbemi o̧pesobu ö'wejenö 'da̧bachibö dobulataja baibajemima yemidanö tjebachajö o̧pesobuda baibakobe. Jejenö baibobetjö̧ Egipto jojodöma o̧tja̧wakobe, okobe deinö kolukiyanö a̧jadöbi ka̧ba̧yu̧dönö wa̧jadöbi—

²⁷ weökwe dewachena ömamu kabebö i̧sebemi o̧pesobuma yadakwödanö o̧pesobuda baibijetö. Jejenö baibobetjö̧ Egipto jojodöma ida̧ökö kököemi tji̧'yajemima o̧pesobuda li̧jetö. Tjetjachibo jö̧tja̧lijayonö Isabenö Jo̧ma jobadönöma o̧pesobu okwa o̧bebö lobijetö.

²⁸ Jejenö o̧pesubuma yadakwödanö okwatibanö kolukiyanö a̧ja̧döbi, ka̧ba̧yu̧dönö wa̧jadöbi, ja̧danö okobe deinö faraón ömöayedö 'böawa jojodö, Israel jojodönö lubibajadöma o̧bawö debö 'yi̧jadötö. Bakwo̧bi ji̧bijöködötö.

²⁹ Jo̧kwaijayonö Israel jojodöma abönö kököenada 'ya̧nö pebibijadötö, o̧pesobu 'da̧bachibö dobulataja baibanö wajwitjobekwöbi, tjöwaisobekwöbi ö'weje mananö.

³⁰ Ja̧ mölema, Isabenö Jo̧ma jejenö Israel jojodönö Egipto jojodötjö tjö̧jibinö pjabatijetö. Ja̧danö, Israel jojodöma edijadötö Egipto jojodö o̧bawö wobajadö, o̧pesobu ö'öbönö lö̧jadönö.

³¹ Israel jojodöma Isabenö Jo̧ iteda ujulunö Egipto jojodönö lȩebi̧ma edö, yebabinö omukwatijadötö Isabenö Jo̧nöma, Jwiinö juluwo̧, jö̧ba̧lö. Ja̧danö, Isabenö Jo̧nöbi, Isabenö Jo̧ ömöayo̧ Moisésnöbi tjo̧'wo wa̧na̧lijadötö.