Éxodo 13 - Dios Iwene

Isabenö Jo̧ Israel jojodönö weina jawa, Kwi̧tji̧mu̧duwi ömadötjö abönö damönö, ja̧danö, kwa̧jwi̧muduwi ömadötjö abönö damönö ötjönö wainö kwujunaduwo, jö̧ba̧lö

¹ Ikenama Isabenö Jo̧ma Moisésnö yöbawjetö:

² —Baikwö weta ökwödö Israel jojodönöma: Okobe deinö kwi̧tji̧mu̧duwi ömadötjö abönö damönö ötjönö, Isabenö Jo̧nö kabebö kwi̧sebaduwo, ökwö weköbi̧da otidobö 'da̧batö chujunökwe, jö̧ba̧lö. Ja̧danö, kwa̧jwi̧mu̧duwi ömadötjö abönö damönöbi ötjönöda iyawedö baibanö wainö kwujunaduwo— yöbawijetö Isabenö Jo̧ma Moisésnö, iteda wei̧ Israel jojodönöma.

Moisés Israel jojodönö yöawina pan 'ye'yeachö̧kö̧ ba'ali junawa jawa

³ Ja̧danö, Moisésma yöba̧lijetö Israel jojodönöma: —Babe möle, Egiptotjö lakebaduwi̧ mölema ba̧kwȩlö̧jatebö kwomukwataduwo, Isabenö Jo̧ma Egipto jojodö usula emawö kwotidaduwobö wetji̧tjö kwö̧jibaduwinö pjaatobetjö̧. Iteda ujulu i̧sebö Isabenö Jo̧ma Egiptotjö lakebaduwobö pjaatobetjö̧ ba̧kwȩlö̧jatebö̧ kwomukwataduwo. Jo̧kwaobetjö̧ bakwȩlö̧jatebö bite ja̧wo̧ badekwachena ba'ali kukwaduwo 'ye'yeachö̧kö̧ pankwö.

⁴ Ökwödöma, bite ja̧wo̧, Abib mikwo̧, Egiptotjö lakebaduwakobe.

⁵ Ja̧danö, Isabenö Jo̧ma ökwödönö niji jwiinö otiwemi jo̧bekwö öbibö i̧'yakobe. Jemi nijima kwa'dödö Abrahamnö, Isaacnö, Jacobnö, Chiyocha, jö̧ba̧lö yöbawö ujuninobe Diosma. Jobema ju'wedö tjuju̧kwobe babema, cananeo jojodö, heteo jojodö, amorreo jojodö, ferezeo jojodö, heveo jojodö, jebuseo jojodö. Jobema jwiinö otiwobe, a̧ji̧kwakwawedönö tjöbötjatemibi, ja̧danö batjo tjujunemibi otiwobe. Jobe kwuju̧kwaduwena bite ja̧wo̧ badekwachena 'ye'yeachö̧kö̧kwö pan ba'alima junö kukwaduwobö jo̧be.

⁶ Baikwö kwujunaduwo ba'alima: Jelemutjö̧ dötölataja möle baledibanö 'ye'yeachö̧kö̧ pan kukwaduwo. Ja̧ jelemutjö̧ dötölataja möletjö bajaliyapo mölema ötjönö ösödö kwo̧ko̧ko̧kwaduwo, ba'ali kwanö.

⁷ Ja̧ jelemutjö̧ dötölataja möle baledibanö pan 'ye'yeachi̧kwö kukwaduwoko. Okobe jwiinö kwuju̧kwaduwemima pan 'ye'yeachi̧kwö jwiobö, ja̧danö 'ye'yeachi̧ otikwa jawabi jwiobö weta.

⁸ Ja̧ ba'ali ajayi mölema kwi̧tji̧mu̧nö yökawaduwo, biya ba'ali dujuni̧ma Isabenö Jo̧ ökwödönö pjaatina omukwatö junadösa, Egiptotjö ladebobö pjaatinama, jö̧ba̧lö.

⁹ Ja̧danö, ja̧ ba'ali kwujunaduwena Isabenö Jo̧ pjaatinama kwomukwataduwo, jo̧ba weina yökawaduwakobetjö̧. Wanedö yötawa: Ja̧ ba'ali kwujunabiduwakwa̧ma wȩyudö lödawobedanö ja̧kobe, ja̧ wȩyukwa edinö Isabenö Jo̧ weina kwomukwataduwakobetjö̧. Kwömamuduwinö, kwöbaduwinö wȩyu̧dö lödawobedanö ja̧kobe ja̧ ba'alima, Isabenö Jo̧ ökwödönö weina omukwatö ju'wedönö yökawaduwakobetjö̧. Chömöledö, Isabenö Jo̧ iteda ujulunö Egiptotjö lakebaduwobö pjaatobetjö̧ jo̧ba weina yökawaduwobö ja̧kobe.

¹⁰ Jo̧kwaobetjö̧ chömöledö ja̧ ba'ali kwujunaduwo bite ja̧wo̧ badekwachena, Isabenö Jo̧ wei̧danö— yö̧ba̧lijetö Moisésma.

Moisés Isabenö Jo̧ wei̧ yöawina jawa, Kwi̧tji̧mu̧duwi ömadötjö abönö damönö, ja̧danö, kwa̧jwi̧muduwi ömadötjö abönö damönö Isabenö Jo̧nö wainö kwujunaduwo, jö̧ba̧lö

¹¹ Ina yöbawijetö Moisésma, Isabenö Jo̧ weina: —Isabenö Jo̧ma ökwödönö cananeo jojodö tjitebobekwö öbibö, iyakobe jemi niji ökwödönö, kwa'dödönö chiyocha jö̧ba̧lö iteda iminö yöbawö ujuninemima. Jobe kwuju̧kwaduwena

¹² okobe deinö kwi̧tji̧mu̧duwi ömadötjö abönö damönö Isabenö Jo̧nö kabebö kwi̧sebaduwo, ökwö weköbi̧da otidobö ökwönö wainö chujunökwe, jö̧ba̧lö. Ja̧danö, kwa̧jwi̧mu̧duwi ömadötjö abönö damönöbi Isabenö Jo̧nöda iyawedö batjibanö wainö kwujunaduwo. Okobe deinö pa̧ka̧yö̧ tji̧tji̧mu̧tjö̧ ömadönö abönö damönö Isabenö Jo̧nöda iyawedö batjibanö wainö kwujunaduwo.

¹³ Ja̧danö, bu̧lu̧döma Isabenö Jo̧nö iyawö̧kö̧dötjobetjö̧ bu̧lu̧dö tji̧tji̧mu̧tjö̧ abönö pöe mikwa baibanö balekwo̧nö, obejanö kwiyaduwena. Jo̧kwayijayonö, jejenö obejanö kwiyaduwobö kwöpöjödaduwitjö̧ma bulunö kwabö u̧lu̧mȩ'a̧nö 'debatö loköbaduwobö jo̧be. Jejenöijayonö, bulu abönö pöenö ö̧jibobö kwösödaduwitjö̧ma balekwo̧nö, obejanö kwiyaduwo bulu abönö pöe Imikwa baibanö. Ja̧danö, ökwödö kwi̧tji̧mu̧duwi ömadötjö abönö damönö, Isabenö Jo̧nö kabebö kwi̧sebaduwajawö̧nö imikwanö kwimidaduwobö jo̧be.

¹⁴ Ju'winö kwi̧tji̧mu̧duwitjö bakwo̧ abebö a̧ja̧kwena ¿tajawedö kwimidobeda? jö̧ba̧lö baikwö kwatadonö: Isabenö Jo̧ma iteda ujulunö Egiptotjö ladebobö pjaatinobe, labinö dotidobö wetjanelö duju̧kwibanö.

¹⁵ Egipto inesö la'aka luwo̧ma omajade 'diinö ja̧nö jwiinö öpöjödinobe ladeboböma, lekwe möle kabatakwawökönö. Jo̧kwaobetjö̧ Isabenö Jo̧ma okobe deinö Egipto jojodö tji̧tji̧mu̧tjö abönö damönö kwabö loinobe, jojodö tji̧tji̧mu̧nöbi, tja̧jwi̧mu̧ tji̧tji̧mu̧nöbi abönö damönöma. Jejenöobetjö̧ babema da̧jwi̧mu̧ tji̧tji̧mu̧tjö̧ abönö damönö wainö dujunobe Isabenö Jo̧nö diyawö̧nöma. Jo̧kwaijayonö di̧tji̧mu̧tjö̧ ömadö abönö damönö imikwanö dimidobe Isabenö Jo̧nö. Jejenö yökawaduwo kwi̧tji̧nöma abebö a̧ja̧kwena.

¹⁶ Ja̧danö, yemidanö yöta̧laduwakwö: Dios weina ba'ali kwujunaduwena Isabenö Jo̧ pjaatinama kwomukwataduwo. Ja̧ ba'ali kwujunabiduwakwa̧ma kwömamuduwinö kwöbaduwinö wȩyu̧dö lö̧dawobedanö ja̧kobe, Isabenö Jo̧ ökwödönö pjaatina kwomukwatakobetjö̧, iteda ujulunö Egiptotjö ladebinö.

Isabenö Jo̧ Israel jojodönö Egiptotjö labebö öibina jawa

¹⁷ Ja̧danö, Diosma faraón a'dewö loajawö̧nö, Israel jojodönö öbibö 'yi̧jetö, Dios ajayinö yöbawö ujuninemi niji jo̧bekwö. Ja̧danö, jwai balawa ö'öbönö, filisteo jojodö tjitebobekwö 'ya̧kwawama jweinö 'yi̧jetö, okobe jwiinö 'ya̧kwawamatjö̧ o̧penönö jweinö. Jo̧kwaijayonö jamanö tji̧'yobö öpöjödijetö Diosma, jamanö 'ya̧nö tjöpöjojodöma ölakwabikwawö 'bötjabikwawena, jö̧ba̧lö. Ja̧danö, 'bötjabikwawiawö̧ ¡Ayö di̧'yökena! jö̧ba̧lö, Egiptobe tjetjachajapji jö̧ba̧lö, jamanö öbibö 'yi̧jökötö.

¹⁸ Jo̧kwaobetjö̧ jelobekwö öbibijetö Diosma Israel jojodönöma jojodö deenada tji̧'yobö, o̧pesobu duwobu mikwobu lo̧bekwö. Ja̧danö, Israel jojodö Egiptotjö labebajadöma kwakwaakwawakwö, ja̧danö 'böabikwawakwö tjömamijunö do̧ba̧lakwawö labebijadötö.

¹⁹ Ja̧danö, latjebakwa̧ abönö Moisésma webijetö Josémine iwe'iju jobadö tje'ewobö, José damötjö ö'wö baibakwa̧ abönö aebinadanö. Damötjö José ö'wö baibakwa̧ abönö ömöledönö yöbawö tjujunobö aebinobe, ju'wi möle ökwödötjö tupadanö jojodöma belö latjebakobe, Dios tjö̧jibinö pjaatobetjö̧. Jo̧kwaobetjö̧ isabenö kwiweneduwima yöbawö junaduwi babeda, jobadöma latjebena ötjö chiwe'iju tje'ewakobe, jö̧ba̧lö.

²⁰ Ja̧danö, Israel jojodöma Sucottjö labeibö Etam nijinö isa̧do̧tjö tjejudanö debatö otidijadötö, jobeda tjabobö, jojodö deemi ö'öbö.

²¹ Isabenö Jo̧ma jobadökwö 'yi̧jetö. Mölema ojwiyo'wo ja'da'daa'wonö 'yi̧jetö jobadönö i̧sebö. Ja̧danö, yö̧tema ökwöla nöola ubi̧danö jobadönö dejatö 'yi̧jetö, yö̧te tji̧'yobö. Jejenö 'yi̧jetö Isabenö Jo̧ma Israel jojodökwö, mölebi yö̧tebi otiwanö tji̧'yobö öbibö.

²² Isabenö Jo̧ma la'akatjöda kabatakwawijökötö mölema ojwiyo'wo ja'da'daa'wonö öbibö, yö̧tema ökwöla nöola ubi̧danö dejatinö öbibö.