Éxodo 12 - Dios Iwene

Isabenö Jo̧ Aarónnö Moisésnö weina jawa, kwö̧jibaduwinö wame chöbaledina omukwatö ba'ali kwujunaduwo, jö̧ba̧lö

¹ Isabenö Jo̧ma Moisésnö, Aarónnö Egiptonö ja̧dönö yöba̧lijetö:

² —Bemi tupakwöma bite jawo̧ma okobe deinö ja̧wo̧dötjö ajayi̧ ja̧wo̧ baibanö kwujunaduwo.

³ Ja̧danö, baikwö yökawaduwo okobe deinö Israel jojodönö, ötjö jobadönö weti̧ma: Bakwöta o̧bakwena, bite ja̧wo̧ domulataja möle baibenanö ökwödötjö o̧do luwedöma kwa̧jwi̧mu̧duwitjö 'da̧batö kwujunaduwo. Kwa̧jwi̧muduwitjö obeja itji̧nöbi 'da̧batö kwujunaduwena, jadanö chiwo itji̧nöbi 'da̧batö kwujunaduwena. Bakwo̧nökwena kwujunaduwökwenöma yöne kwömöledöduwikwena kwukwaduwakwo̧.

⁴ Ja̧danö, ökwödötjö ju'wedöma yöne kwömöledöduwi kwö̧ba̧jȩkwaduwökötjö̧ma okobe jwiinö itebiyama kwukwaduwökena. Jejenö jenama ju'wedö kwömöledöduwi, kwipjeaduwinö ju̧kwadönö pjabatö itebiyama e'ewö tjiyo, jobadöbi tjukwo. Jo̧kwaobetjö̧ ajayinö obejanö 'da̧batö kwujunaduwena omukwatö kwujunaduwobö jo̧be, dokwa ba̧jȩkwadö tjukwakwa̧da, ja̧danö bakwo̧nökwena dokwa nöinö itebiya tjukwakwa̧da, jö̧ba̧lö, obejama dokwa nöbo̧da kwujunaduwobö kwöwaisaduwanö.

⁵ Ja̧danö, obejanö, chiwonö 'da̧batö kwujunaduwenama iso̧nöda, o̧ba bakwaba juna̧lo̧nö, suli̧ jwibo̧nöda 'da̧batö kwujunaduwo.

⁶ Jobadö 'da̧batö kwujunaja̧duwawö̧ma ö̧dö̧lö̧jinö kwite'ada̧laduwo 'da̧batö kwujunaduwemi möletjö̧ a̧li̧tjö̧samutjö̧ ö'wejemu möle baibenanö. Ja̧ möle yi̧bena baibena okobe deinö Israel jojodö yöne kwömöledökwenama kukwaduwakwawö̧nö kwabö, tjö̧kwö̧la̧ 'wibebö loköbaduwo.

⁷ Ja̧danö, 'wibebö kwaköbajaduwawö̧ tjökwösobutjö apjudesötenö dukebaduwo, apjude jawa ö'diyanöbi bakwachakwadanö, möakwöchobe jawanöbi itebiya kukwaduwakwa̧ ejubiyanöma.

⁸ Ikenama, te'ada̧lökönö sököbaduwo ja̧ yö̧teda itebiya kwukwaduwobö. Sököbaduwaja̧ itebiyama pan 'ye'yeachö̧kö̧ pankwö, lei öjiyakwö kukwaduwo.

⁹ Ja̧ itebiyama ja'yubebi o'diyinöma kukwaduwoko, ja̧danö toböbi toköbaduwoko itebiyama, söböda sököbaduwo. Ja̧danö, okobe deinö 'wibebö kwaköbaja̧duwawö̧nöma okobe jwiinö a̧tjȩba̧yedönö sököbaduwo, tjuubiyakwö, tjömasapiyakwö, tjö'yapiyukwöda.

¹⁰ Itebiyama ja'yubebi kwu'yudaduwoko ju'wi dewachö baibanöma. Dewachena u'yukwitjö̧ma juwö loköbaduwobö jo̧be.

¹¹ Ja̧danö, kukwaduwenama juluwanö labeibö kwi̧'yaduwakobetjö̧ 'dubawiböda kukwaduwo. Sapatijuduwibi 'dubawibö, ja̧danö kwotokwa'ijuduwibi do̧ba̧lö ja̧nö kwukwaduwo. Ja̧nöda juluwanö kwukwaduwo labeibö kwi̧'yaduwakobetjö̧, juluwanö. Ja̧ ba'ali kwanö kwujunaduwakwa̧ma ötjö Isabenö Jo̧nö omukwatö kwujunaduwakobe, ökwödö kwö̧jibaduwinö pjabatö kwö̧jaduwejubiya wame chöbaledi̧ omukwatöma.

¹² Ja̧ yö̧tema Egipto niji okobe jwiinö kwebachö okobe deinö Egipto jojodö tji̧tji̧mu ömadönö, abönö damönö kwabö lotakwo̧sa, ja̧danö tja̧jwi̧mu̧ tji̧tji̧mutjöbi abönö damönö. Jejenö lȩtebemi okobe jwiinö Egipto jojodö tjo̧'wo tjöwa̧na̧lawö̧nöma lȩtebocha. Jejenö lȩtebobö juluwo̧sa, Isabenö Jo̧chobetjö̧.

¹³ Ja̧danö, 'wibebö kwaköbaja̧duwawö̧ tjökwösobu apjudebiya dukebaja̧duwama ötjönö i̧sebakobe, beju okwa Israel jojodöda tjö̧jobe, jö̧ba̧lö. Ja̧ edinö ja̧ ejubiyama wame chöbaledocha, ökwödönö lȩbebökönö. Jejenö Egipto jojodönö jwiinö lȩbebö kwetachijayonö ökwödönö lȩtebima baledökakobe.

¹⁴ Ja̧danö, ökwödöma ba̧kwȩlö̧jatebö bakwöta o̧bakwena ötjö, Isabenö Jo̧ pjatatina, kwejubiya wame chöbaledinama omukwatö ba'ali kwujunaduwo, ötjö babe möle weti̧danö. Ja̧danö, weawa baibanö kwiweyudaduwo ba̧kwȩlö̧jatebö ökwödötjö jojodöbi ja̧ ba'ali tjujunobö, jobadöbi, jobadötjö tupadanö jojodöbi, ötjö pjatatina omukwatö.

Isabenö Jo̧ Moisésnö Aarónö ju'wi ba'ali, pan 'ye'yeachö̧kö̧kwö̧ ba'ali mikwi̧ tjujunobö weina jawa

¹⁵ Isabenö Jo̧ma ina yöba̧lijetö Moisésnö Aarónnö: Kwejubiya wame chöbaledina omukwatö ba'ali kukwaja̧duwa ikena möle, ju'wi fiesta kwujunaduwo. Ja̧ ba'ali jelemutjö dötölataja möle baledibanö kwujunaduwo. Ja̧ fiesta kwanö pan kwukwaduwakwa̧ma 'ye'yeachö̧kö̧ panda kukwaduwo. Ida̧ökö ja̧ jelemutjö̧ dötölataja mölebiyatjö ajayi mölema kwejubiyaduwi okwa pan otikwa 'ye'yeachi̧ma loköbaduwo kwejuduwitjö okobe jwiinö 'ye'yeachi̧ jawa jwiakobetjö̧. Isabenö, bakwo̧ panpja̧ 'ye'yeachi̧kwö kwo̧nöma kwö̧jaduwemitjö a'dewö loköbaduwonö.

¹⁶ Ja̧danö, ja̧ ba'ali jelemutjö̧ dötölataja mölebiyatjö ajayi mölebi, ja̧danö 'dö̧ibaji̧ mölȩbi wainö kwujunaduwo, ötjönö ösödö kwo̧ko̧ko̧kwaduwobö. Ja̧danö, ja̧ ba'ali̧ ajayi mölebi, 'dö̧ibaji̧ mölebi kwo̧ko̧ko̧kwaduwi mölema kwotidaduwoko, kwu̧kwaduwakwa̧da kwotidaduwoböma otiwa.

¹⁷ Bakwöta o̧bakwena, ba̧kwȩlö̧jatebö ja̧ ba'ali, pan 'ye'yeachö̧kö̧, jö̧ba̧lö ötjabi ba'alima ökwödöbi, ökwödötjö tupadanö jojodöbi kwujunaduwo ötjö pjatatina kwomukwataduwobö. Ökwödö Israel jojodönö okobe deinö bakwasokwena jojodönöma Egiptotjö lakebaduwobö pjatatijatö. Ja̧ pjatatina omukwatö pan 'ye'yeachö̧kö̧ ba'alima kwujunaduwo. Ba̧kwȩlö̧jatebö ökwödötjö tupadanö jojodöbi ja̧ ba'ali tjujunobö webö kwujunaduwo, jobadöbi, jobadötjö tupadanö jojodöbi ba̧kwȩlö̧jatebö ja̧ ba'ali tjujunobö.

¹⁸ Ja̧danö, jo̧ba ja̧wo̧, ajayinö ja̧wo̧ a̧li̧nösamutjö ö'wejemu mölema, ja̧wo̧ meaja̧ ikena pan 'ye'yeachö̧kö̧kwöda kukwaduwo. Jejenö kukwaduwo ja̧ möle jamatö jelemutjö̧ dötölataja möle baledenanö kabatö, ja̧wo̧ meajena.

¹⁹ Jejenö jelemutjö dötölataja möle jenanö kwejubiyaduwi okwa pan otikwa 'ye'yeachi̧ jawa okobe jwiinö jwiobö jo̧be. Isabenö, bakwo̧ panpja̧ 'ye'yeachi̧kwö kwo̧nö, jelobetjö ichö ökwödökwö jo̧nöbi, ja̧danö Israel jojonöbi kwö̧jaduwemitjö a'dewö loköbaduwonö.

²⁰ Ja'yubebi 'ye'yeachi̧kwö panpja̧ kukwaduwoko. Kwejubiyaduwinö ba̧nö pan 'ye'yeachö̧kö̧ panda kukwaduwo. Jejenö yökawaduwo— Jejenö yötjawobö webijetö Isabenö Jo̧ma Moisésnö, Aarónnö Israel jojodönöma.

Moisés Israel jojodönö ba'ali kwanö tjujunakwa̧ yöawina jawa, Isabenö Jo̧ wei̧danö

²¹ Ikenama Moisésma jwöbijetö okobe deinö Israel jojodötjö la'aka luwedöbedönö tjichobö. Ichajadönö yöbawijetö Isabenö Jo̧ weaja̧ma: —Ökwödönö yötawa Isabenö Jo̧ weaja̧ma, baikwö: Ökwödötjö o̧do luwedöma kwa̧jwi̧duwitjö 'da̧batö kwujunaduwo, obeja itji̧nöbi, chiwo itji̧nöbi jenanö, ökwödötjö o̧do luwedöma yöne kwomoledö kwukwaduwakwa̧ma. Ikenama, 'da̧batö kwujunaja̧duwawö̧nö kwabö, tjö̧kwö̧la̧ 'wibebö loköbaduwo. 'Wibebö kwaköbaduwajawö̧nö ba'ali junö kukwaduwakobe. Ja̧ ba'ali̧ma, Isabenö Jo̧ ökwödö dö̧jibinö pjabatö dejubiya wame öbaledina omukwatö mikwi̧ ba'ali.

²² Ja̧danö, jobadö kwa̧jwi̧munö 'wibebö kwaköbaja̧duwaduwaja̧ ikena tjökwösobuma pa̧la̧ka̧'donö jȩkataduwo. Ikenama hisopo o̧bu̧biyanö tjökwösobunö bu̧data̧lö apjudesötenö dukebaduwo apjude jawa ö'diyanöbi bakwachakwadanö, möakwöchobe jawa ö'diyanöbi. Ikenama kwejuduwi tebachajadö okwada ba̧nö lakebaduwoko ju'wi dewachenanö baibanö. Bakwo̧bi lakebaduwoko.

²³ Ja̧ yö̧tema Isabenö Jo̧ma Egipto niji okobe jwiinö kwebachö okobe deinö Egipto jojodö tji̧tji̧mu ömadönö, abönö damönö kwabö loakobe. Ja̧danö, kweachena kwejubiyaduwi apjudebiya tjökwösobu dukebaja̧duwa edö ja ejubiyanöma tebachökönö wameda öbaledakobe. Ja̧danö, iteda weökwe ángel, ö'wö batjibanö lȩbebo̧nöma kwejuduwinö kwabö lobö teachobö weökakobe, Isabenö Jo̧ma.

²⁴ Ja̧danö chömöledö, ökwödöbi, ökwödötjö tupadanö jojodöbi ba̧kwȩlö̧jatebö weawa kwiwȩyudaduwi̧danö kwa̧ja̧kwaduwobö jo̧be. Ba̧kwȩlö̧jatebö Isabenö Jo̧ ökwödönö lȩbebökönö wame öbaledina omukwatö fiesta kwujunaduwobö jo̧be.

²⁵ Ja̧danö, ju'winö Isabenö Jo̧ma kwiteboduwi, chiyocha jö̧ba̧lö yöbawö ujuninemi kwuju̧kwaduwena iteda weaja̧danö ba'ali kwujunaduwo, bakwöta o̧bakwena.

²⁶ Ja̧danö, kwi̧tji̧mu̧duwima abebö tja̧ja̧kwena ¿tajawedö biya ba'ali dujunobeda? jö̧ba̧lö

²⁷ baikwö kwatadaduwodönö: Ökwödöma Isabenö Jo̧nö ösödö, dö̧jibinö pjaatina omukwatö o̧bȩja̧dönö 'wibebö kwadobe, ba'ali junö dukwakwawö̧nö. Ökwödöma Egiptonö dö̧jenama Isabenö Jo̧ma Egipto jojodö tji̧tji̧mu̧ ömadönö abönö damönö kwabö loonö ökwödö Israel jojodönö pjabatö dejubiya wame öbaledinobe. Ja̧ yö̧tema Egipto jojodö tji̧tji̧mu ömadönö, abönö damönö kwabö loijayonö ökwödö di̧tji̧mu̧nö tjö̧jibinö pjaatinobe Isabenö Jo̧ma— yöbawijetö Moisésma Israel jojodötjö la'aka luwedönöma. Yöba̧lö kaatena okobe deinö Israel jojodötjö la'aka luwedöma, tjöba bȩbachibö nijakwö tjuunö Isabenö Jo̧nö ösödijadötö.

²⁸ Jemi ikenama Israel jojodöma Isabenö Jo̧ wei̧danö a̧ja̧kwijadötö, Moisés, Aarón yötjawaja̧ma.

Isabenö Jo̧ okobe deinö Egipto jojodö tji̧tji̧mu̧ ömadönö, abönö damönö kwabö loina jawa

²⁹ Ja̧danö, yö̧te ja'ö Isabenö Jo̧ma okobe deinö Egipto jojodö tji̧tji̧mu̧ ömadönö, abönö damönö kwabö lobijetö. Faraón inesö la'aka bo̧ itji̧ abönö pöenöbi ja̧danö, ka̧lȩna ba̧kwaweju okwa bo̧ itji̧ abönö pöenöbi, ja̧danö okobe deinö Egipto jojodö tji̧tji̧mu̧ ömadönö abönö damönö kwabö lobijetö Isabenö Jo̧ma. Ja̧danö okobe deinö tja̧jwi̧mu̧tjö̧ ajayinö ömadönöbi kwabö lobijetö.

³⁰ Ja̧ yö̧tema faraónma, jo̧ba ipjea ömöayedöma, ja̧danö okobe deinö Egipto jojodöma wiluibö waisachibijadötö, ¡ayö tjö'wöchajabe! jö̧ba̧lö. Labinö budekwabijadötö, tji̧tji̧mu tjö'wöchaiawö̧. Egipto jojodö tjejubiyatjöma ömadö abönö damö okobe deinö wobawijadötö, ji̧beju jwiinö.

³¹ Jo̧kwaiökwe Moisésnö Aarónnö tjichobö jwöbijetö faraónma, ina yö̧te. Ichajadönö: —Tjo̧wi̧, ökwödöma kwömöledö Israel jojodökwö okobe deinö te'ada̧lökönö chitebotjö labebajaduwi. Akebaduwi̧danö Isabenö Jo̧nö ösödö iyö 'ya̧jaduwi.

³² Kwa̧jwi̧mu̧ o̧bȩja̧dönö, chi̧wo̧dönö, pa̧ka̧yö̧nö öbibö 'ya̧jaduwi. Ja̧danö, akebaduwo Kwuluwo̧duwi Diosnö ötjönöma, pjaatobö— webijetö faraónma Moisésnö, Aarónnö.

³³ Ja̧danö, Egipto jojodöma labinö webijadötö Israel jojodönö tjitebotjö juluwanö latjebobö, lakebaduwökötjö̧ma ökwödö Egipto jojodöma okobe deinö ö'wö badibena, jö̧ba̧lö.

³⁴ Jo̧kwaobetjö̧ juluwanö latjebobö Israel jojodöma pansa'be, 'ye'yeachi̧ pjaatakwawökö ö'bebiya emibö anijadötö deja'di̧ju yo̧awa'di̧junö. Ja o'di̧ju kamisi jwabibö tjubube'onö wanawö e'ewijadötö.

³⁵ Ja̧danö, Moisés atjebobö weaja̧danö ida̧ökö abebijadötö Israel jojodöma Egipto jojodönö tjiyobö orotjö otikwabi, platatjö otikwabi, kamisibi, Moisés ajayinö weaja̧danö.

³⁶ Ja̧danö, Isabenö Jo̧ma Egipto jojodönö Israel jojodönö ösödanö tjedobö junijetö okobe jwiinö atjebi̧ma tjiyakobetjö̧. Jejenö Israel jojodöma Egipto jojodö jwiinö mikwawi̧ tjitjeatjö emibö e'ewijadötö Egiptotjö.

Israel jojodö Egiptotjö labebö tji̧'yina jawa

³⁷ Ja̧danö, Israel jojodöma Egipto niji Ramesés comunidad mikwobetjö labekwö Sucot comunidadkwö 'yi̧jadötö. Ömadö damökwö möayedökwöma seiscientos mil jenanö, ja̧danö, ya̧döbi, tjȩmu̧bi 'yi̧jadötö.

³⁸ Tja̧jwi̧mu̧ o̧bȩja̧dönöbi, chi̧wo̧dönöbi, pa̧ka̧yö̧nöbi öbibö 'yi̧jadötö. Ja̧danö, ju'wedöbi jobadökwö 'yi̧jadötö, Israel jojodöböködöma.

³⁹ 'Ya̧jadöma ja'ö ö'wachö pansa'be tje'ewaja̧'be, 'ye'yeachi̧ pjaatakwawökö'betjö, panpja̧ söbijadötö. Egiptotjö te'ada̧lökönö latjebobö a'dewö lotjajabetjö̧ kwakwawa tjukwakwa̧ma otidijöködötö latjebakwa̧ abönöma, sule pan otikwa'be 'ye'yeachi̧ pjaatakwawökö'beda e'ewijadötö.

⁴⁰ Israel jojodöma lekwe möle ju̧kwijadötö Egiptonö, cuatrocientos treinta o̧bi̧ya.

⁴¹ Ja̧danö, Egiptonö tjuju̧kwaja̧ cuatrocientos trienta o̧bi̧ya̧ badekwachi̧ möle okobe deinö Israel jojodöma, Isabenö Jo̧ ömöledöma, bakwasokwena labekwijadötö Egiptotjö.

⁴² Ja̧ yö̧tema Isabenö Jo̧ma, iteda yöbawö ujuni̧danö otiwanö te'ada̧lijetö Israel jojodönö, Egiptotjö latjebinö pjabatö. Jo̧kwaobetjö̧ Israel jojodöma bakwöta o̧bakwena ja̧ yö̧te baibena Isabenö Jo̧ weinadanö wainö tjujunobö jo̧be, Isabenö Jo̧ ite'ada̧lina omukwatö. Ja̧danö, ba̧kwȩlö̧jatebö, Israel jojodötjö tupadanö jojodöma ja̧ yö̧te wainö tjujunobö jo̧be, Isabenö Jo̧ ite'ada̧lina omukwatö.

Isabenö Jo̧ Moisésnö Aarónnö yöawina, ba'ali tjujunakwa̧ weawa tjiwȩyudina jawa

⁴³ Ikenama Isabenö Jo̧ma yöbawijetö Aarónnö, Moisésnö: —Baikwö webö chujuna ötjö mö chöbaledina omukwatö ba'ali kwujunaduwakwa̧ma: Ju'wedö ökwödö kwö̧kö̧manö ichajadöma, Israel jojodöböködöma ja̧ ba'ali ji̧tjö tjukwoko.

⁴⁴ Jejenöijayonö ökwödö midö kweminaduwawö̧nöma, tjötade bajalesado̧ 'wibekwadöma ökwödökwö ba'ali tjukwo.

⁴⁵ Jo̧kwaijayonö jelobetjö ichajadö, lekwe jö̧kö̧dö̧ma, ja̧danö tjotidobö kwimidaduwawö̧ma tjukwoko ja̧ ba'alitjöma.

⁴⁶ Bakwejunö ju̧kwadöma tjeju okwa ba̧nö tjukwobö jo̧be ja̧ ba'ali kukwaduwökwenöma. Itebiyama apetube e'ewö lakebaduwoko. Ja̧danö, iwe'ijuma 'doköbaduwoko.

⁴⁷ Ja̧ ba'ali kukwaduwobö webö chujuni̧ma okobe deinö Israel jojodöma weti̧danö tja̧ja̧kwobö jo̧be.

⁴⁸ Ja̧danö, jelobetjö ökwödökwö ö̧jobö icho̧ma ökwödökwö kwejubiya wame chöbaledina omukwatö ba'ali ukwobö jö̧a̧litjö̧ma abönö okobe deinö jo̧ba ejunö ju̧kwadö ömadönöma tjötjade bajalesado̧ 'wibebö loo. Jejenö jobadöma kwömöledödanö batjibobetjö̧ ökwödökwö ba̧nö tjukwobö jo̧be. Jo̧kwaijayonö bakwo̧bi ötjadesado̧ 'wibekwö̧kö̧ma ukwobö weköbaduwoko.

⁴⁹ Bi̧ya webö chujuni̧ma okobe deinö tja̧ja̧kwobö jo̧be, ökwödö Israel jojodöbi, ja̧danö jelobetjö ökwödökwö tjö̧jobö ichinadöbi— yöbawijetö Isabenö Jo̧ma Aarónnö, Moisésnö, tjeju wame öbaledina omukwatö ba'ali junawa webö ujuni̧ma.

⁵⁰ Ja̧danö, Moisés, Aarón Isabenö Jo̧ webö ujuni̧ yöbawijadötö okobe deinö Israel jojodönö, Isabenö Jo̧ mö öbaledina omukwatö ba'ali tjujunakwa̧ma. Ja̧danö, yötjawawö̧ma okobe jwiinö a̧ja̧kwijadötö Israel jojodöma.

⁵¹ Ja̧ mölema Isabenö Jo̧ma Israel jojodönö Egiptotjö latjebinö pjabatijetö, okobe deinö bakwasokwenanöma.