Éxodo 11 - Dios Iwene

Moises yöawina jawa, Isabenö Jo̧ Egipto jojodö tji̧tji̧mutjö̧ abönö pöe wotjobö weakobe, jö̧ba̧lö

¹ Ja̧danö, Isabenö Jo̧ma yöbawijetö Moisésnö: —Moisés, yada bakwötanöda lȩekwa jawa wetocha faraónnö, Egipto jojodönö. Ja̧ weti̧ baledaja̧ ikena lakebaduwobö kaatakwawakobe faraónma. Yelösöda, a'dewö loakobe ökwödönö, okobe deinö.

² Jo̧kwaobetjö̧ te'ada̧lökönö yöbawaji okobe deinö Israel jojodönö atjebo Egipto jojodönö, yö̧ne ju̧kwadönöma, ömadönöbi ya̧dönöbi tjitea platatjö otikwa, ja̧danö orotjö otikwa tjiyo— webijetö Isabenö Jo̧ma.

³ Ja̧danö, Isabenö Jo̧ma Egipto jojodönöma Israel jojodönö ösödanö tjedobö junijetö. Ja̧danö, Moisésnö otiwanö omukwatijadötö Egipto jojodöma. Faraón ipjea jojodö, ja̧danö okobe deinö Egipto jojodöma Moisésnö edö, inesö jojo, jö̧ba̧lö omukwatijadötö.

⁴ Ikenama Moisésma faraón ö̧bobekwö 'ya̧nö tebachajo̧ yöbawijetö: —Isabenö Jo̧ma ökwönö baikwö yöawobe: Makö yö̧te ja'ö Egiptobe okobe jwiinö chi'ya̧kwo̧sa

⁵ okobe deinö Egipto jojodö tji̧tji̧mu ömadönö, abönö damönö kwabawö lobö. Faraón ökwö, inesö la'aka bo̧ kwi̧tji̧ abönö pöenöbi, ja̧danö kwömöayuju trigo 'dobö otiduju ji̧tji̧ abönö pöenöbi, ja̧danö okobe deinö tja̧jwi̧mu̧tjö̧ abönö yatjebinawö̧nö kwabawö lotakwo̧sa. Jejenö yöawobe Isabenö Jo̧ma ökwönö.

⁶ Ina ökwönö yöawobe: Jejenö balediawö̧ Egipto jojodöma labinö tjubudekwakobe okobe jwiinö Egiptonö. Tjubudekwi̧ma la'akatjöda jejenö budekwajitjökenanö, damötjö̧bi babebi, bemi bajalekwöbi.

⁷ Ja̧danö, Egipto jojodö tjubudekwi̧ labinö ökwöonö Israel jojodö tjuju̧kwelöma wi̧achakobe, jojodöbi tjubudekwökakobe, ja̧danö awili bakwo̧bi ubudekwökakobe. Tjubudekwökakobe Israel jojodöma tji̧tji̧mu ö'wö batjibokobetjö̧. Jejenö edö jweinö kwöwaisachibakobe, Isabenö Jo̧ma iteda ömöledönö wainö 'da̧batö juno̧, ökwödö Egipto jojodönö lȩebi̧danö baledökönö, jö̧ba̧lö. jejenö yöawobe Isabenö Jo̧ma ökwönöma, faraón— yöbawijetö Moisésma.

⁸ Ikenama yöba̧lijetö Moisésma: —Faraón, jejenö baledaja̧ ikena bidö kwömöayedöma okobe deinö kwö̧bobetjö jwibachibö ötjönö ichibö tjöba bȩtja̧chibakwedö tjuu nijakwö, Adebokwö ditebotjö labebö kwi̧'yo, kwömöledö Israel jojodönö öbibö, jö̧ba̧lö. Jemi tupakwöma belö latebocha chömöledönö öbibö— labinö yöba̧lijetö Moisésma. Ikenama jwiinö dameakwö faraón ö̧belö labebijetö Moisésma.

⁹ Ikenama Isabenö Jo̧ma yöba̧lijetö Moisésnö: —Faraónma ökwö yökawi̧ma öpöjödö a̧ja̧kwökakobe. Jejenö baledobe chujulu ju'wi jawabi ju'wi jawa chi̧sebakobetjö̧ Egiptonö— yöba̧lijetö Isabenö Jo̧ma.

¹⁰ Ja̧danö, faraónma okobe jwiinö Aarón Moisés tji̧sebi̧ma eda̧lijetö, ajayinö ichö tji̧sebemitjö bajaliyanö tji̧sebi̧ baibanö, Isabenö Jo̧ ujulunö tji̧sebi̧ma. Jo̧kwaijayonö Isabenö Jo̧ma faraón omajade 'diinö jinö weinobetjö̧ Israel jojodönö itebotjö latjebobö ina kabatakwawijökötö.