Éxodo 10 - Dios Iwene

Isabenö Jo̧ domulataja lȩebi̧ jawa weinatjö jelemutjö wa̧pötakwa jawa lȩebina jawa, ma̧la̧ka̧yu̧nö tjichobö webö

¹ Ikenama Isabenö Jo̧ma Moisésnö webijetö: —Moisés, yemidanö faraón ö̧bobekwö 'yawi. Ja̧danö, jo̧ba omajade 'diinö ji̧nö, ipjea jojodö ömöayedönöbi tjomajade 'diinö ji̧nö wetobe, chujulu chi̧sebi̧ma tjedakobetjö̧.

² Ja̧danö, Moisés ökwö kwi̧tji̧mu̧nö, kwö'dö̧dönö chujulu chi̧sebina yökawakobetjö faraón, iteda ömöayedö tjomajade 'diinö ji̧nö wetobe. Ja̧danö, yökawakobetjö̧, Isabenö Jo̧ iteda ujulu i̧sebiawö̧ tjo̧'wo jwibadödanö batjibinobe Egipto la'aka luwedöma, jö̧ba̧lö, jobadö tjomajade 'diinö ji̧nö wetobe. Jejenö ökwödö okobe deinö babe ju̧kwadöbi, ökwötjö tupadanö jojodöbi tjöwaisakobe ötjönöma, Isabenö Jo̧ma bakwo̧da, jö̧ba̧lö— yöbawijetö Isabenö Jo̧ma Moisésnöma.

³ Jo̧kwaobetjö̧ Aarón, Moisés faraón ö̧bobekwö 'ya̧nö jo̧banö yöbawijadötö: —Isabenö Jo̧ma, hebreo jojodö tjuluwo̧ Diosma ökwönö baikwö yöawobe: —¿Dokwa lekwe ötjö weti̧ kwomajadenö jwiinö öpöjödö kwa̧ja̧kwökakwa̧da? Chömöledönö kabatakwawi ötjönö ösödö iyö tji̧'yo.

⁴ Yemidanö kakatakwawökötjö̧ma ¡a̧ja̧kwitjö! itekwayima ma̧la̧ka̧yö̧nö kwitebonö metji̧nö wetocha.

⁵ Jobadö ma̧la̧ka̧yö̧ma ba̧jȩkwadö metjobetjö̧ okobe jwiinö nijima öwawökönö ja̧kobe. Ja̧danö, okobe jwiinö pokwi̧, inawiyadanö ichejekwi̧ tjoduwena u'yukwina tjukwakwedö jobadö ma̧la̧ka̧yö̧ma. Towibiya ö̧jiya yemidanö pokwi̧ öjiyama okobe jwiinö tjukwibakwedö.

⁶ Faraón, ökwö kwejubiyanöbi, okobe deinö kwömöayedö tjejunöbi okobe deinö Egipto jojodö tjejunöbi su̧'bȩ baibinö tetjachakwedö. Faraón ökwö ajayinö jinadöbi la'akatjöda, kwitebonö ajayinö tjö̧jinemitjö̧ babe baibanö edaitjökenanö jejenö ba̧jȩkwadö ma̧la̧ka̧yö̧ metji̧ma. Jejenö yöawobe Isabenö Jo̧ma ökwönöma, faraón— yöbawijetö Moisésma faraónnö. Ikenama jalachibö labebijetö Moisésma, Aarónkwö.

⁷ Ikenama faraón ipjea jojodöma jö̧ba̧lijadötö tjuluwo̧nö: —Duluwo̧ ¿dokwa lekwe ite sulabo̧ma yöawakwa̧da ökwödönö jwiinö usula demawakwa̧ma? Israel jojodötjö ömadönö kabatakwawi Isabenö Jo̧nö, idöda tjuluwo̧ Diosnö ösödö iyö tji̧'yo. ¿Kwedajöki̧ji̧? Diteboma söbebö loinobe— jö̧tja̧liökwe

⁸ jwöbijetö Moisésnö Aarónnö yemidanö tjichobö. Ichajadönö jö̧ba̧lijetö: —Jao kwatjö̧ma kwi̧'yaduwobö weta Isabenö Jo̧nö, Kwuluwo̧duwi Diosnö ösödö iyö. Kwi̧'yaduwakwedöma ¿tidöda?— jö̧a̧lökwe:

⁹ —Ökwödö okobe deinö di̧'yobö jo̧be, tjemubi damöbi okobe deinö. Ditji̧mu̧ ömadönöbi ya̧dönöbi öbibö di̧'yobö jo̧be, ja̧danö da̧jwi̧mu̧nö o̧bȩja̧dönöbi chi̧wo̧dönöbi pa̧ka̧yönöbi öbibö di̧'yobö jo̧be. Okobe deinö di̧'yobö jo̧be, Isabenö Jo̧nö ösödö ba'ali dujunakobetjö̧—

¹⁰ jö̧a̧lökwe: —¡Omöna yöka̧la! ¿Dakwö cha̧ja̧kwobö akebi̧ma? Isabenö Jo̧da belö lakebaduwobö pjaatakwo̧ma, ötjöma ökwödö, kwi̧tji̧muduwi okobe deinö lakebaduwobö la'akatjöda wetokobetjö̧. Öwaitjöda cheda, baikwö tjekachajaduwokobö omukwatö kwujunaduwajabe.

¹¹ ¡Chöpöjöda! Wetokobe okobe deinö kwi̧'yaduwoböma. ¿Isabenö Jo̧nö ösödö kwiyaduwobö kwösödaduwiji̧? Jao kwatjö̧ma, ömadöda kwi̧'yaduwobö wetena— jö̧a̧laja̧ ikena farónma Moisésnö Aarónnö iteda ö̧jelö a'dewö lobijetö.

¹² Ikenama Isabenö Jo̧ma webijetö Moisésnö: —Moisés, kwotokwa'o do̧ba̧lö kwömamu kabebö i̧sebi okobe jwiinö Egipto nijinö kwi̧sebi̧danö baibanö. Jejenö kwi̧sebena ma̧la̧ka̧yö̧ metji̧nö wetocha, okobe jwinö nijitjö̧ pokwi̧ma tjukwobö, inawiyadanö ichejekwi̧ tjoduwena u'yukwinama— weökwe

¹³ otokwa'o do̧ba̧lö ömamu kabebö i̧sebijetö, okobe jwiinö Egipto nijinö i̧sebi̧danö baibanö. Jejenö i̧sebena Isabenö Jo̧ma webijetö jwa̧lȩ'ȩpjo ja̧wo̧ laebobekwötjö ichobö. Japjoma yö̧tebi mölebi baledibanö jwa̧lȩ'ȩwijetö. Ja̧danö, ju'wi dewachö yȩayi ida̧ökö mebijadötö ma̧la̧ka̧yö̧ma ja̧wo̧ laebobekwötjö ichajapjo jwa̧lȩ'ȩpjonö.

¹⁴ Ja̧danö, ma̧la̧ka̧yö̧ma ichö okobe jwiinö Egiptonö mebijadötö. Ja̧ möle baledi̧ma, ma̧la̧ka̧yö̧ ba̧jȩkwadö metji̧danöma la'akatjöda edaitjö̧kö̧. Ja̧danö, jejenö metjinadanö yemidanöbi tjedökakobe jojodöma, ma̧la̧ka̧yö̧ ba̧jȩkwadö metji̧ma.

¹⁵ Ja̧danö, okobe jwiinö Egipto niji wame ojwiyo'wo yȩa'wodanö köba̧lijadötö ma̧la̧ka̧yö̧ma, nijibi öwawökö. Jejenö köba̧lö omönanö kwibijadötö okobe jwiinö pokwi̧ma, ja̧danö towibiya ö̧jiya yemidanö pokwi̧ öjiyabi, inawiyadanö ichejekwi̧ tjoduwena u'yukwinama. Okobe jwiinö Egiptonö 'yayi̧ ö̧ji̧ya kwibijadötö, okobe jwiinö nijitjö pokwi̧bi, ja̧danö towibiyatjö pokwi̧bi.

¹⁶ Jejenö balediökwe juluwanö jwöbijetö faraónma Moisésnö Aarónnö tjichobö. Ichajadönö: —Ötjöma sulabenö ja̧tobe Isabenö Jo̧nö, Kwuluwo̧duwi Diosnöma, ja̧danö ökwödönöbi.

¹⁷ Jo̧kwaobetjö̧ Moisés, babeda bakwötanöda ökwönö ateba̧la: Ja̧ sulabenö ja̧taja̧ma söbebö loköbo. Ja̧danö, Isabenö Jo̧nö, Kwuluwo̧ Diosnö akebo bi̧ya ötjönö lȩebitjö chö̧jibinö pjaato— weökwe

¹⁸ faraón ö̧jelö labebö abebijetö Moisésma Isabenö Jo̧nö.

¹⁹ Jejenö aebiökwe ja̧wo̧ meajobekwötjö jwa̧lȩ'ȩpjo ichobö webijetö Isabenö Jo̧ma. Jejenö ichajapjo jwa̧lȩ'ȩpjonö okobe deinö ma̧la̧ka̧yö̧nö emibö o̧pesobu okwa loijetö, duwobu mikwobunö. Malakayu̧ bakwo̧bi ö̧jibökötö Egipto nijinö.

²⁰ Jo̧kwaijayonö Isabenö Jo̧ma faraónnö, ina omajade 'diinö ji̧nö weobetjö̧ Israel jojodönö latjebobö webijökötö faraónma.

Isabenö Jo̧ domulataja lȩebi̧ jawa weinatjö jelemutjö ö'wejemu jawa lȩebina jawa, Egiptonö yȩatibanö webö

²¹ Ikenama Isabenö Jo̧ma Moisésnö webijetö: —Moisés, kwömamu möakwö kabebö i̧sebi yȩi̧da nijakwö meobö okobe jwiinö Egiptonö, jwiinö yȩobe— weökwe

²² ömamu kabebö i̧sebemi jwiinö yȩatibijetö okobe jwiinö Egiptonö. Yö̧tebi wa̧pötakwa yö̧te, mölebi wa̧pötakwa möle jenanö yȩijetö Egiptonö.

²³ Egipto jojodöma edijöködötö bakwo̧ma jelo̧nöma. Jo̧kwaobetjö̧ tjejutjöma apetubema labebijöködötö yȩobetjö̧. Jo̧kwaijayonö Israel jojodö tjö̧jemima yȩijökötö. Dewijetö.

²⁴ Jejenö balediökwe faraónma Moisésnö ichobö jwöbijetö. Ichajo̧nö jö̧ba̧lijetö: —Jao kwatjö̧ma, Isabenö Jo̧nö ösödö iyö kwi̧'yaduwobö weta, kwilekwoduwikwö, kwi̧tji̧mu̧duwikwö. Jo̧kwaijayonö kwa̧jwi̧mu̧duwinöma, o̧bȩja̧dönöbi, chi̧wo̧dönöbi, pa̧ka̧yö̧nöbi benada junibö kwi̧'yaduwo— jö̧a̧lökwe:

²⁵ —Chöpöjöda. Jejenömakö̧, ökwödöma da̧jwi̧mu̧nö öbibö di̧'yobö jo̧be, jobadötjöda juwö diyobö Isabenö Jo̧nö, Duluwo̧ Diosnö ösödö.

²⁶ Da̧jwi̧mu̧ pa̧ka̧yönöbi okobe deinö öbibö di̧'yobö jo̧be, bakwo̧nöbi junibökönö. Jobadötjö ju'wedönö Isabenö Jo̧nö ösödö iyö diyakobe. Ina wajwida didötjö diyakwajö, jobe 'ya̧nö dichibenama— atadijetö Moisésma faraónnöma.

²⁷ Jo̧kwaijayonö Isabenö Jo̧ma faraónnö ina omajade 'diinö ji̧nö weobetjö̧ Israel jojodönö latjebobö webijökötö.

²⁸ Moisés aebi̧ma öpöjödö a'dewö lobö jö̧ba̧lijetö: —Chö̧jelöma labebö da̧jaduwi. Kwomukwatoko chö̧bobekwö yemidanö tekachobö. Yemidanö edawa chöpöjöda ökwönöma. Yemidanö tekachitjö̧ma ö'wö bakibakwo̧ja— jö̧ba̧lijetö faraónma Moisésnöma.

²⁹ Jejenö jö̧a̧lökwe: —Jao, yöka̧li̧danö yemidanöma edöma chichökakobe— atadijetö Moisésma.