Efesios 6 - Dios Iwene

Pablo tjemunöbi tjabe'dodönöbi yöawina wene

¹ Babema tjemunö yötawa. Tjemu, kwabe'doduwi, kwojo'doduwi wetji̧ a̧ja̧kwö ja̧duwi, Duluwo̧ma jejenö jobadö wetji̧ a̧ja̧kwö kwö̧jaduwobö weobetjö̧.

^2-3 Ja̧danö, Moisés damötjö Dios domulataja jawa wei̧ iwȩyudinatjö, baikwö yöawobe, Dios tjemunö weinama: Kwabe'doduwinöbi kwojo'doduwinöbi otiwanö omukwataduwi, jö̧ba̧lö laebobe. Ja̧danö, baikwöbi yöawobe: Kwabe'doduwinöbi kwojo'doduwinöbi otiwanö omukwatö kwuju̧kwaduwitjö̧ma, Diosma ökwödönö, Pjatatakwo̧sa, jö̧a̧lobe, lekwe möle kwuju̧kwaduwobö böjȩnö, Dios iyinöjȩnö. Jejenö yöawobe. Ja̧danö chömöledö, Dios domulataja jawa weinatjö, biya̧ tjemunö weawama, ajayinö yöbawö junijetö Diosma, iteda pjaatakwa̧ma, kwabe'doduwinöbi kwojo'doduwinöbi otiwanö omukwatö kwuju̧kwaduwitjö̧ma pjatatakwo̧sa, jö̧ba̧lö.

⁴ Babema tjemu tjabe'dodönö yötawa. Kwi̧tji̧muduwinö labinö jwökeba̧laduwa, jobadö tjo̧'wo̧ sulachibanö baibanöma. Otiwanöda, tjöda̧peachinö yöbawö ju̧kwaduwi kwi̧tji̧muduwinöma. Jobadö jweinö tjomukwatökötjö̧ma otiwanö jwebeba̧lö yöbawaduwidönö, Duluwo̧ iwene ba̧ja̧dö. Jejenö kwöba̧ja̧daduwo, Dios ösödi̧ jawa tjöwaisachibanö.

Pablo tjuluwedönöbi tjömöayedönöbi yöawina wene

⁵ Babema jojodö tjömöayedö, midö tjeminawö̧nö, bakwo̧nökwena yötawa. Böjȩtjö kwuluwo̧duwi wei̧ a̧ja̧kwö, otiwanö omukwatö, Chotido, jö̧ba̧lö, ösödanö otidaduwi. Ja̧danö, böjȩtjö kwuluwo̧duwi wei̧danö kwotidaduwenama omukwataduwi, Böjȩtjö chuluwo̧ wei̧ chotidi̧danö Cristo wei̧bi ja̧danö chotidobe, jö̧ba̧lö.

⁶ Ja̧danö, böjȩtjö kwuluwo̧duwi wei̧ kwotidaduwena Cristonö omukwatö otidaduwi. Jejenö otidaduwi, kwomajadeduwi okwanö, Duluwo̧ wei̧da chotida, Dios ösödi̧da, jö̧ba̧lö. Chömöledö, jojodöda ökwödö kwotidaduwi̧ tjösödoböma otidaduwökönuwi. Dios ösödoböbi otidaduwi.

⁷ Ja̧danö, Duluwo̧nö omukwatö kwotidaduwena otiwanö kwo̧'wo̧duwi ösöwanö ja̧nö otidaduwi, böjȩtjö kwuluwo̧duwi wei̧danö Cristo wei̧da kwotidaduwobetjö̧.

⁸ Ökwödöma kwöwaisaduwa, Okobe jwiinö böjȩtjö ja̧di̧ma, Duluwo̧ma, otiwojobö sulojobö yöbawö loakwo̧. Otiwanö ja̧bö dö̧jitjö̧ma Duluwo̧ Cristoma otiwa jawa iyakwo̧. Ja̧danö, midö tjeminawö̧nöbi, midö tjeminököwö̧nöbi, okobe deinö bakwainö edö iyakwo̧, otiwanö ja̧bö dö̧ji̧ edö.

⁹ Babema midö tjeminawö̧ tjuluwedönö yötawa. Ökwödöbi otiwanö, omukwatö ju̧kwaduwi, midö kweminaduwawö̧nöma otiwanö te'ada̧lö. Kwöwaisaduwa ökwödöbi ökwödö kwömöayedöduwibi, mölejȩbe jo̧ Kwuluwo̧duwima, bakwo̧da. Jo̧bama okobe deinö jojodönö bakwainö edo̧. Jejenöobetjö̧ ökwödö jojodö tjuluwedöma, otiwanö omukwatö ja̧duwi kwömöayedöduwinöma. Ja̧danö, labinö jwöbeba̧lö yetjaibinö ja̧böma ja̧köbaduwadönö, kwuluwo̧duwima bakwo̧daobetjö̧.

Pablo yöawina wene: —'Bötjabikwawakwedö 'dii̧ jawa 'dutjawi̧danö tjöbeba̧lakwawö ju̧kwaduwi— jö̧ba̧lö

¹⁰ Babema bajaleapo yöbawö chiwȩyuda, chömöledö. Duluwo̧ma jwiinö juluwo̧ ¿jö̧tö? Ja̧danö, iteda ujulunö pjaatobetjö̧ kwo̧'wo̧ luwo̧duwinö jemi tupakwö juluwachibanö kwi̧'yaduwo.

¹¹ Chömöledö, Awetja, omöna yöba̧lo̧ma ökwödönö jelobe kwi̧'yaduwobö, öikwa jö̧ba̧lo̧. Jo̧bama jejenö öibenama ¿dakwö bakibaduwobeda, jelobe omukwatadö bakibaduwokoböma? Biya̧ chömöledö. Dios ujulunöda tjöbeba̧lakwawö ju̧kwaduwi. Wanedö yötawa: 'Bötjabikwawakwedö 'dii̧ jawa 'dutjawaja̧ tjöbeba̧lö ji̧danö ökwödöma tjöbeba̧lakwawö ju̧kwaduwi, okobe jwiinö Dios ujulunöda.

¹² Chömöledö, ökwödönö tjujuluwo jö̧ba̧ladöma böjȩ jojodöböködö. Awetja ömöayedötjö la'aka luwedö, mölejȩbe ju̧kwadö öwawöködö. Jobadöma ba̧jekwadö. Yelösöda juluwadö. Jojodö, böjȩtjö yȩa'wo okwa kwebachadö tjuluwedö.

¹³ Jo̧kwaobetjö̧ chömöledö, 'böbabikwawadö 'dii̧ jawa 'dutjawaja̧ tjöbeba̧lö ji̧danö ökwödöbi tjöbeba̧lakwawö ju̧kwaduwi, Dios okobe jwiinö ujulunöda. Jejenö kwö̧jaduwitjö̧ma kwo̧'wo̧ luwo̧duwinö jemi tupakwö juluwachibanö kwi̧'yaduwakobe, Awetja ömöayedö tjujuluwotö jö̧ba̧lö ja̧tjenabi. Ja̧danö, Dios ujulunö tjöbeba̧lakwawö kwö̧jaduwenama Awetjama ujuluwotö jö̧ba̧lö ja̧ijayonö öwaekwena chömöledö. Ökwödöma jo̧ba ömöayedönö kwujuluwakwedöja chömöledö, Dios ujulunöda tjöbeba̧lakwawö kwö̧jaduwobetjö̧.

¹⁴ Jo̧kwaobetjö̧ yötawaduwakwö. Dios jawa, otiwa jawa wene, isabenö wene, kwo̧'wo̧ luwo̧duwinö do̧batö omukwata̧lö ju̧kwaduwi chömöledö, ba̧kwȩlö̧jatebö, jemi tupakwö juluwachibanö kwi̧'yaduwo. Wanedö yötawa: 'Bötjabikwawakwedöma koleasö̧jȩma 'diinö di̧batakwawadö, otiwanö tji̧'yobö. Ja̧danö ökwödöbi, chömöledö. Dios iwene, otiwa jawa iwene, isabenö iwenema, kwo̧'wo̧ luwo̧duwinö 'diinö do̧ba̧lakwawö 'ya̧duwi. Jejenö otiwanö kwi̧'yaduwakwedöja, kwo̧'wo̧ luwo̧duwima juluwachibanö jemi tupakwö. Ja̧danö chömöledö, ju'wibi yötawaduwakwö. Jweinö, otiwanöda omukwatö ju̧kwaduwi. Jejenö kwö̧jaduwena Awetjama sulabe ujuluwotö jö̧ba̧lö weijayonö tjöbeba̧lakwawö kwö̧jaduwakwedöja. Ju'wi wanedö yötawa: 'Bötjabikwawakwedöma 'dii̧ jawa wamenö 'dubawadö, tjomuko tjöeba̧linö. Ja̧danö, jobadö tjomuko tjöeba̧li̧danö, ökwödöma, Awetja sulabenö wei̧ma tjöbeba̧lakwawö ju̧kwaduwi, jweinö, otiwanöda omukwatö.

¹⁵ Chömöledö Dios iwene, otiwa jawa iwenema omukwata̧lö ju̧kwaduwi. Ja̧ iwene tjo̧'wo̧ luwo̧ ösöwachibanö pjaati̧ wenema. Ju'wi wanedö yötawa: 'Bötjabikwawakwedöma otiwanö, mebökönö tji̧'yo jö̧ba̧löma, bota 'dubawadö. Ökwödöbi ja̧danö, bota 'dutjawi̧danö, Dios iwene 'dubawaduwi, tjo̧'wo̧ luwo̧ ösöwachibanö pjaati̧ iwenema. Jejenö 'dubawaduwi jemi tupakwö otiwanö, mebökönö kwi̧'yaduwobö.

¹⁶ Ju'wi jawabi tjöbeba̧lakwawö kwö̧jaduwobö yötawaduwakwö. Chömöledö, sulabo̧ Awetjama ökwödönö sulabenö ja̧otö jö̧ba̧lö webo̧ ¿jö̧tö? Jo̧kwaijayonö Jesúsnö kwösödaduwobetjö̧, jo̧banö kwo̧'wo̧duwi wana̧lö tjöbeba̧lakwawö kwuju̧kwaduwobe, Awetja wei̧ teachibökönö. Ju'wi wanedö yötawa: 'Bötjabikwawakwedöma 'dii̧ jawatjö otikwapi do̧ba̧lö tjöbeba̧lakwawö 'ya̧dö, tjöpöjojodö 'bötjena tjöeba̧lapi. Ja̧danö, ökwödöbi Jesúsnö kwo̧'wo̧duwi kwöwana̧laduwi̧nöda tjöbeba̧lakwawö 'ya̧duwi chömöledö, Awetja wei̧ma teachibökönö.

¹⁷ Ju'wibi yötawaduwakwö. Chömöledö, Jesús kwö̧jibaduwinö pjaatina omukwata̧lö ju̧kwaduwi. Ba̧kwȩlö̧jatebö, ja̧ kwomukwataduwi̧ma tjöbeba̧lakwawö ju̧kwaduwi, ju'wi jaye 'dii̧ tjöeba̧linö tjö̧ji̧danö. Ju'wi wanedö yötawa: 'Bötjabikwawakwedöma 'dii̧ jawatjö otikwöse butjawadö, tjuu tjöeba̧linö. Ökwödöbi ja̧danö 'bötjabikwawakwedö tjuu tjöeba̧li̧danö Jesús kwö̧jibaduwinö pjaatina omukwatö tjöbeba̧lakwawö ja̧duwi, Awetja wei̧ma teachibökönö tjöeba̧linö. Ju'wibi chömöledö. 'Bötjabikwawakwedö tjökwölöte'iju tje'ewi̧danö e'ewaduwi Dios iwenema, iteda O̧'wo̧ Luwo̧ öba̧ja̧da̧li̧ma. Ja̧danö, 'böbabikwawadö tjöpöjojodönö dȩdȩbö lotji̧danö Awetjanö kwujuluwaduwo, Dios iwene juluwi̧ wenenöda.

¹⁸ Ja̧danö chömöledö, ba̧kwȩlö̧jatebö Dios O̧'wo̧ Luwo̧ ökwödö kwo̧'wo̧ luwo̧duwinö öba̧ja̧da̧lonö a̧ja̧kwö akebaduwo Diosnöma, okobe jwiinö pjaataduwokwö. Kwö'wachibaduwoko chömöledö, Diosnö aekwama. Ba̧kwȩlö̧jatebö, ö'wachibökönö akebaduwo Diosnöma, iteda ömöledö babibadönöma pjaatobö.

¹⁹ Chömöledö, ötjönöbi akebaduwo Diosnöma, ötjönö öba̧ja̧da̧lo, iteda iwene yötawena otiwanö yötawakobetjö̧. Akebaduwotjö yebabökönö yötawakobetjö̧, jojodö otiwanö tjöwaisachibobö Dios iwene, otiwa jawa wene, ajayinö tojö ujunina wenema.

²⁰ Jau chömöledö, ötjöma Jesús weina ja̧bö jo̧sa, iteda iwene, otiwa jawa wene yöbawö. Jejenö yötawobetjö̧ bejunö, ka̧lena ba̧kwaweju okwama bo̧sa. Diosnö akebaduwotjö jemi bajalekwö yebabökönö yötawakobetjö̧. Bena ka̧lena ba̧kwaweju okwa chö̧bijayonö ina Dios iwenema yöbawo̧sa. Diosnö akebaduwotjö, ka̧lena ba̧kwaweju okwa ba̧nö iteda iwene yebabökönö yötawobö, yötawobö jo̧betjö̧.

Pablo kabatakwawö yöawina wene

²¹ Chömöledö, döjawo̧ Tíquico mikwo̧, Duluwo̧ weina ja̧bo̧ma yöawakobe okobe jwiinö ötjö chö̧ji̧bi, ja̧ti̧bi bena chö̧jobema, kwöwaisachibaduwobö ötjönö baledi̧ma.

²² Ökwödönö yöawobö weta Tíquiconöma, kwöwaisachibaduwobö ökwödönö baledi̧ma, bena dö̧jobe. Kwo̧'wo̧ ösöwachibanö kwö̧jaduwobö weta jo̧banöma, ökwödönö yöawobö.

²³ Chömöledö, Dabe'do Diosnöbi, Duluwo̧ Jesúsnöbi atebobe ökwödönöma, kwo̧'wo̧ ösöwanö kwö̧jaduwobö. Ja̧danö, Jesúsnö kwo̧'wo̧duwi kwöwana̧laduwobetjö̧, kwömöledökwö otiwanö ösödabikwawö kwö̧jaduwobö atebobe Dabe'do Diosnöbi, Duluwo̧ Jesúsnöbi.

²⁴ Ja̧danö, atebobe Diosnöma lȩlö̧jino edö pjaatobö okobe deinö Jesucristonö 'diinö do̧ba̧lakwawö, kabatibökönö ösödö ju̧kwadönöma. Tjo̧wi̧ta, biya̧da yöbawö chiwȩyuda.