Efesios 5 - Dios Iwene

Pablo yöawina wene: —Cristo otiwanö ja̧bö ö̧jinadanö ja̧duwi— jö̧ba̧lö

¹ Jo̧kwaobetjö̧ chömöledö, Dios ösödawö̧ i̧tji̧mu bakibinaduwobetjö̧ jo̧badanö ja̧duwi.

² Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

³ Chömöledö, Dios ömöledö bakibinaduwobetjö̧ sulabe ja̧bökönö ja̧duwi. Ja̧danö, bakwo̧ ilekwo debo̧, jeluju jelujunöma ja̧böma kwö̧jaduwa. Ja̧danö, bakwuju jilekwe debujuma, jelo̧ jelo̧nöma ja̧böma kwö̧jaduwa. Ja̧danö, chömöledö, ju'wi taba̧lö̧ji jawabi ja̧köbaduwa. Ja̧danö, ju'wedö tjujuna̧li̧bi edö jwiinö ösödö, Chujuna̧lobö jö̧ta̧la, jö̧ba̧löma kwomukwataduwa. Chömöledö, Dios ömöledö bakibinaduwobetjö̧, ja'yubebi biya̧ sulabe jawa yötawaja̧ma kwi̧sebaduwoko.

⁴ Ja̧danö, ju'wi taba̧lö̧ji jawabi yöka̧laduwa, ja̧danö pjaatakwawökö jawabi, mikwawökö jawabi, yöka̧laduwa. Ja̧ jawama ¿tajawedö yöka̧laduwobö ökwödö Dios ömöledö babibinadöma? Ökwödöma Dios ömöledö babibinadöma jo̧banö otiwanö ösödöda yöda̧laduwo, Diosma otiwanö pjabato̧, jö̧ba̧löda.

⁵ Babema öwaitjöda yötawa chömöledö. Bakwo̧ ilekwobökujukwö jo̧bi, bakwuju jilekwebö̧kö̧kwö ju̧jubi, ju'wi jwiinö taba̧lö̧ji jawa ja̧badöbi Dios Cristokwö webö tjö̧jobekwöma yelösöda tetjachökakwedö. Ja̧danö, bakwo̧, böjȩ jawada ösödanö edö, Diosnö omukwatökönö böjȩ jawada ösödö edo̧ma Dios Cristokwö webö tjö̧jobekwö teachökakwo̧.

⁶ Chömöledö omöna yöba̧ladönöma a̧ja̧kwaduwökönuwi, Biya̧ taba̧lö̧ji jawama taba̧lajökö, jö̧ba̧lö, yöba̧ladönöma. Jweinö yötawa, Dios iwene a̧ja̧kwöködönö, ja̧ suli̧ jawa ja̧badönöma Diosma lȩebakwawö̧.

⁷ Jejenöobetjö̧, jobadökwöma pjakacha̧laduwa chömöledö.

Pablo wanedö yöawina: —Ökwödöma Dios dewinö idejatena kwebachö sulabenö ja̧badö ja̧tji̧ kwidejataduwobe, öwaitjöda öwawobö— jö̧ba̧lö

⁸ Wanedö yötawa: Ökwödöma ajayinöma yȩa'wo okwada ji̧nadöja, kwo̧'wo̧ luwo̧duwinöma, Diosnö wajwibö. Jo̧kwaijayonö babema ida̧ökö Duluwo̧ ömöledö bakibinaduwobetjö̧, kwo̧'wo̧ luwo̧duwinöma jo̧ba dewinö idejatenada ju̧kwadöja. Jo̧kwaobetjö̧ dewinö idejatenada kwebachö ja̧duwi, chömöledö.

⁹ Ja̧danö, Duluwo̧ dewinö idejatena kwekachaduwobetjö̧ otiwanö omukwatö kwö̧jaduwobe, jweinö yöba̧lö, Dios öba a'otjö otiwanö ja̧bö.

¹⁰ Chömöledö, Duluwo̧ ösödi̧ kwöwaisachibaduwobö chösöda.

¹¹ Yȩa'wo okwa kwebachö ja̧dö sulabenö ja̧tjijayonö ökwödöma jobadökwöma pjabacha̧löma kwö̧jaduwa chömöledö. Jobadö sulabenö ja̧badönö jweinö yöka̧laduwo, Ökwödöma sulabenö ja̧köbaduwobe, jö̧ba̧lö. Jejenö ja̧bö ökwödöma dewinö dejati̧danö kwidejataduwakobe, jobadö sulabenö ja̧tjobema, öwaitjöda öwawobö.

¹² Chömöledö, jobadö sulabenö ja̧badöma, jojodö tjedokonö sulabenö ja̧badö. Tabakwadö, jwiinö taba̧lö̧ji jawa ja̧tjobetjö̧. Jobadö ja̧tji̧ma yöba̧löbi yöka̧laduwa, ja̧ma jwiinö taba̧lö̧ji jawaobetjö̧.

¹³ Jo̧kwaijayonö ökwödö jweinö yökawaduwitjö̧ma, Sulabenö ja̧köbaduwobe, jö̧ba̧lö, dewinö dejati̧danö kwidejataduwakobe, jobadö taba̧lö̧ji jawa ja̧tji̧ma öwaitjöda öwawinö. Ja̧danö, sulabenö ja̧badöma tjöwaisachibena, Aaa ja̧di̧ma sulabe, jö̧ba̧lö.

¹⁴ Jejenö omukwatö bakwo̧ma damötjö wȩyudijetö biya̧, damötjö lo̧awadanö: Wilubaduwi ökwödö aba̧ladödanö ju̧kwadöma. Yemidanö 'yabibajaduwi ökwödö wobinadödanö ju̧kwadöma. Cristoma ökwödö kwo̧'wo̧ luwo̧duwi okwanö dewinö idejatakobe kwöwaisachibaduwobö. Jejenö wȩyudijetö damötjö.

¹⁵ Jo̧kwaobetjö̧ chömöledö kwo̧'wo̧ luwo̧duwi okwanö otiwanö omukwatö jweinö 'ya̧duwi. Ökwödöma Dios iwene kwöwaisaduwobe. Jo̧kwaobetjö̧ ju'wedö Dios iwene wajwibadö tjuju̧kwi̧danöma kwuju̧kwaduwa.

¹⁶ Babe möle ju̧kwadötjöma ba̧jekwadö jwiinö sulabenö ja̧böda tjuju̧kwobe. Jo̧kwaijayonö jejenömaökö ökwödö kwö̧jaduwi̧ma. Ökwödöma jejenö sulabenö ja̧bö jö̧könö bakwöta möle jwiinö otiwanö ja̧bö kwö̧jaduwo jö̧ba̧laduwi.

¹⁷ Jo̧kwaobetjö̧ mikwawökö jawama ja̧köbaduwa chömöledö. Dios ösödi̧da ja̧bö kwöwaisachibaduwo jö̧ba̧laduwi.

¹⁸ Ja̧danö, ju'wibi yöbawö wetaduwakwö chömöledö. 'Dukwachinöma kwowa̧laduwa. Owa̧lo̧ma o̧'wo̧ luwo̧nö omukwatökönö ju'wida sulabenö ja̧bö jo̧, okobe jwiinö ö̧ji̧ma. Wanedö yötawa chömöledö: Nio ojwiyo 'dukwachinö kwowa̧laduwa, ja̧da tupakwö kwuluwo̧duwi baibanö 'ya̧nöma. Dios O̧'wo̧ Luwo̧da ökwödö kwuluwo̧duwima, nio ojwiyo owa̧lakwawamaökö. Jo̧kwaobetjö̧ jo̧bada öba̧ja̧da̧lonö ja̧bö ju̧kwaduwi chömöledö.

Pablo yöawina wene: —Dios O̧'wo̧ Luwo̧ öba̧ja̧da̧lonö Diosnö ösödö lo̧baduwi— jö̧ba̧lö

¹⁹ Jejenö, ökwödö bakwo̧nökwena Dios O̧'wo̧ Luwo̧ öba̧ja̧da̧lonö, bakobe ko̧ko̧kwa̧lö pjabatakwawö, lo̧bö ju̧kwaduwi chömöledö. Dios iwenetjö, Salmos mikwawa'ye jawabi lo̧köbaduwo. Ju'wi lo̧awabi Diosnö ösödö otiwa jawa wene lo̧köbaduwo. Ja̧danö, Dios O̧'wo̧ Luwo̧ kwo̧'wo̧ luwo̧duwinö öba̧ja̧di̧bi lo̧köbaduwo. Jejenö, Dios a̧ja̧kwa̧lonö kwo̧'wo̧ luwo̧duwinö ösöwanö omukwatö lo̧köbaduwo, Diosnö ösödö.

²⁰ Jejenö lo̧bö Diosnö kwösödaduwo ba̧kwȩlö̧jatebö, jwiinö sulabenö baledenabi, otiwanö jenabi. Jesucristoma ökwödö kwuluwo̧duwiobetjö̧, Diosnö kwösödaduwo, Dabe'do ökwönö dösöda, otiwanö pjabato̧ja, jö̧ba̧lö.

Pablo yöawina wene ilekwonö jo̧nöbi, jilekwenö jujunöbi

²¹ Chömöledö, ökwödöma, bakwo̧nökwena, kwömöledöduwi wetji̧ a̧ja̧kwö kwö̧jaduwo, Cristonö otiwanö, yebabinö kwomukwataduwobetjö̧.

²² Babema ya̧dönö yötawa, bakwujukwena. Kwilekweduwi ökwödönö weenama a̧ja̧kwö wei̧danö ja̧köbaduwo. Duluwo̧ Jesús wei̧ a̧ja̧kwö ja̧köbaduwi̧danö, kwilekweduwi wei̧danö a̧ja̧kwö ja̧köbaduwo.

²³ Isabenö yötawaduwakwö. Kwilekweduwima ökwö kwuudanö jo̧, ökwönö öbibö. Cristo, iteda iteba'obedönö, dö̧jibanö ja̧inawö̧nöma öibobedanö, tjuu öibobedanö, kwilekweduwima kwuudanö jo̧ ökwönö öbibö.

²⁴ Jejenöobetjö̧ yötawa ya̧dönöma, Kwilekweduwi okobe jwiinö wei̧ma a̧ja̧kwö ja̧köbaduwo, jö̧ba̧lö, Cristo wei̧ a̧ja̧kwö ja̧di̧danö.

²⁵ Babema, ömadönö yötawa, bakwo̧nökwena. Kwilekwoduwinöma ile nibebaduwi, Cristo, itenöda ösödadönö ile niebi̧danö, itedada iyawö dö̧jibinö pjabatö.

²⁶ Jejenö Cristoma, ökwödönö 'da̧batö ujuninobe, suli̧ jwibadö badibinö. Wanedö yötawa chömöledö: Ökwödöma ojwe dibenama otiwanö didewachibobe. Ja̧danö, Cristoma itedada iwenenö ökwödönö dichö loinobe didewachibinö. Jau chömöledö, Cristo iwene a̧ja̧kwö dösödena ökwödönö dichö loinobe, didewachibinö.

²⁷ Jejenö ökwödönö dichö loinobe Cristoma, jwiinö otiwadönöda, dewamachibadönöda emobö. Ja̧danö, Cristoma dichö loinobe itenöda ösödadönöma, iteda ömöledö batjibinö 'da̧batö junö, ja'yubebi suli̧ jwibadö batjibinö.

²⁸ Jejenö, Cristo ökwödönö jwiinö ile niebinadanö ökwödöbi, ömadönö bakwo̧nökwena yötawa, Kwi̧lȩkwa̧muduwinö ökwödöda ile nibekwö kwö̧jaduwi̧danö otiwanö te'ada̧lö kwö̧jaduwo. Ökwödöma kwi̧lȩkwa̧muduwikwö bakwo̧da bakibinaduwobetjö̧, kwi̧lȩkwa̧muduwinö ile nikebaduwenama, ökwödöda ile nikekwaduwi̧danö jo̧be, ökwödö bakwo̧da bakibinaduwobetjö̧.

²⁹ Chömöledö, öwaitjöda yötawaduwakwö. ¿Tida iteda iteba'o ile nibekwö̧kö̧ma? Bakwo̧bi deobe chömöledö. Ökwödö jojodöma, bakwo̧nökwena, te'ada̧lakwawadösa, diteba'oma, kwakwawa kwanö, ojwiyo owö. Jejenö Cristoma ökwödönö te'ada̧lö jo̧, itenöda ösödadönöma.

³⁰ Chömöledö ökwödöma, Cristo iteba'obedödobetjö̧ jo̧bama ökwödönö te'ada̧lö jo̧.

³¹ Baikwö yöawobe Dios iwenema, damötjö Dios yöawi̧ iwȩyudinama: Bakwo̧ abe'dotjöbi ojo'dotjöbi labebö 'da̧bachibö ilekwokwöda ö̧jo jö̧ba̧lö. Jobadö du̧ju̧tajama bakwo̧da babibadö. Jejenö yöawobe Dios iwenema.

³² Chömöledö, jejenö, ilekwokwö jilekwekwö du̧ju̧tajama bakwo̧da batjibi̧danö, ökwödö Cristonö ösödadöma Cristokwö dö̧jobe, bakwo̧da babibö. Chömöledö, biya̧ yöbawö chiwȩyudi̧ma wame jawamaökö, sule tjo̧'wo̧ luwo̧ jawada. Biya̧ma Dios ajayinö tojö junö omukwatina.

³³ Jo̧kwaobetjö̧ ömadönö bakwo̧nökwena yötawa. Kwi̧lȩkwa̧muduwinö ökwödöda ile nikekwaduwi̧danö ile nibebö ju̧kwaduwi. Ja̧danö, ya̧dönöbi bakwujunökwena yötawa. Kwilekweduwinö otiwanö edö, jo̧ba wei̧ a̧ja̧kwö ju̧kwaduwi.