Efesios 4 - Dios Iwene

Pablo budekwö lȩebina wene: —Dios ösödi̧ jawada ja̧bö ju̧kwaduwi— jö̧ba̧lö

¹ Jo̧kwaobetjö̧ chömöledö, Diosma ökwödönö otiwanö pjaatobetjö̧ budekwö lȩtebaduwakwö, Otiwanö Dios ösödi̧ jawada ja̧bö ju̧kwaduwi, jö̧ba̧lö. Ötjöma Duluwo̧ weina yötawobetjö̧ ka̧lena ba̧kwaweju okwama bo̧sa. Bena ba̧nö budekwö lȩtebaduwakwö, baikwö: Diosma ökwödönö jwöinobe iteda ömöledö bakibaduwobö. Jo̧kwaobetjö̧, iteda ömöledö bakibinaduwobetjö̧ otiwanö ja̧bö ju̧kwaduwi, iteda ösödi̧ jawada ja̧bö, chömöledö.

² Ja̧danö, chömöledö, baikwö ja̧bö ju̧kwaduwi: Ökwödödadama kwomukwataduwa, Aaa, ötjöma ju'wedötjö o̧penönö jo̧sa, jö̧ba̧löma. Chömöledö, otiwanö omukwatö, jojodökwö ösödabikwawö ju̧kwaduwi. Ju'wibi yötawa. Kwösödaduwökö jawa baledenama kwo̧'wo̧ luwo̧duwinö tjöbeba̧lakwawö kwuju̧kwaduwo chömöledö, kwo̧'wo̧ luwo̧duwinö suli̧ teachibökönö. Ju'wedö ökwödö kwöpöjödaduwi̧ jawa ja̧tjenabi, jobadönö kwösödaduwo, kwo̧'wo̧ luwo̧duwinö sulabenö omukwatökönö.

³ Chömöledö, Dios O̧'wo̧ Luwo̧ma ökwödönö pjabato̧, ju'wedökwö bakwainö omukwatö, ösödabikwawö kwö̧jaduwobö. Ja̧danö, jo̧ba pjaatobetjö̧ bejenö omukwataduwi, Bakwainö omukwatöda, ölakwabikwawökönö dö̧jo, jö̧ba̧lö. Jejenö tjiteba'o bakwa'odanö bakibinaduwobetjö̧ omukwataduwi, Bakwainö omukwatöda, ölakwabikwawökönö dö̧jo, jö̧ba̧lö.

⁴ Chömöledö, ökwödöma bakwaso jojodödasa do̧'wo̧ luwo̧ma. Bakwa'odanö babibinadösa, Jesúsda iteba'obedösa. Ja̧danö, bakwo̧da Dios O̧'wo̧ Luwo̧da tebachibö öjamatinawö̧sa. Ja̧danö, ökwödöma Dios bakwainö jwöinawö̧sa, iteda iyakwa̧ dite'ada̧lobö, iteda yöbawö ujunina, Otiwa jawa chiyocha, jö̧ba̧lö, yöbawö ujuninama. Chömöledö, dite'ada̧lakwa̧ma, bakwöta jawada, Dios iyakwa̧da bakwainö te'ada̧ladösa.

⁵ Ja̧danö, Duluwo̧ Jesúsma bakwo̧da, jelo̧ma deobe. Ökwödöma jo̧ba iwene, ji̧bakwawa wene, bakwainö ösödinadösa, Jesúsma dö̧jibinö pjabato̧, jö̧ba̧lö. Ökwödöma bakwo̧nökwena Jesúsnö dösödi̧ i̧sebö ojwenö bu̧dachibinadösa, bakwainö.

⁶ Ja̧danö, Diosma bakwo̧da. Jo̧bama ökwödö okobe deinö Dabe'do. Jo̧bama inesö La'aka Luwo̧. Jo̧bama okobe jwiinö iteda otidawa ja̧dobö pjabato̧, ökwödönöma. Jo̧bama ökwödö do̧'wo̧ luwo̧ okwa jo̧.

Pablo yöawina wene: —Cristo itenöda ösödadönö tjotidawakwena iyo̧— jö̧ba̧lö

⁷ Chömöledö ökwödöma tjiteba'o bakwa'odanö babibinadö dö̧jijayonö Cristoma ökwödönö bakwo̧nökwena dotidawakwena wainö iyobö omukwato̧. Ja̧danö, ökwödönö bakwo̧nökwena otiwanö pjabatö iyo̧, dotidawakwena, Dios weina otiwanö dotidobö.

⁸ Jejenö laebobe Dios iwenetjö, baikwö: Mölejȩbe kaekwajena ujuluwajawö̧nö öbibö kabekwajijetö. Jobetjöma ömöledönöda otiwa jawa iyabijetö. Jejenö laebobe Dios iwenetjöma.

⁹ Chömöledö, ja̧ iwȩyudina ¿dakwö jö̧ba̧lö iwȩyudinada? Biya̧ chömöledö. Mölejȩbe kaekwajakwo̧ma, abönöma böjȩ teebenö baledibijetö.

¹⁰ Chömöledö, böjȩ teebenö baledibinabi mölejȩbe, jwiinö möobe kabekwajinabi bakwo̧da. Ja̧danö, jo̧bama okobe jwiinö jo̧.

¹¹ Chömöledö, jo̧bama, mölejȩbe kabekwajinama, damötjö Dios iwenenö iwȩyudinökwe. Jo̧ba iwȩyudinökwe iyabinadanö, otiwa jawa iyabijetö. ¿Dakwö yöawobeda, otiwa jawa iyabijetö, jö̧ba̧löma? Biya̧ chömöledö: Cristoma jo̧banö ösödadönöma bakwo̧nökwena wainökwena jelo̧nö ju'wi, jelo̧nö ju'wi, tjo̧'wo̧ luwo̧ jawa tjotidawakwena iyabinobe, jojodönö pjabatö, Dios wei̧ tjotidobö. Jo̧banö ösödadötjö ju'wedönöma 'da̧batö ujuninobe iteda weawö̧ batjibinö ja̧bö. Ja̧danö, ju'wedönö 'da̧batö ujuninobe Dios iwene yötjawobö Jesúsnö ösödadönö. Ja̧danö, ju'wedönö ji̧bakwawa wene yötjawobö 'da̧batö ujuninobe. Ja̧danö, ju'wedönö Jesúsnö ösödadönö tjite'ada̧loböbi, tjöba̧ja̧doböbi 'da̧batö ujuninobe Cristoma.

¹² Jejenö Cristoma Dios ömöledö babibinadönö, bakwo̧nökwena, iyabinobe tjotidawakwena, okobe deinö Dios ömöledö babibinadönö öbibö tjöba̧ja̧dobö. Jejenö öbibö tjöba̧ja̧do jö̧ba̧lö, iyabinobe Cristoma, okobe deinö Dios ömöledö babibinadöma otiwanö tjotidobö Dios weinama. Ja̧danö, okobe deinö Cristo iteba'obedöma tjo̧'wo̧ luwo̧nö jemi tupakwö juluwachibanö tji̧'yobö iyabinobe tjotidawakwenama.

Pablo yöawina wene: —Cristo dotidawakwena iyabina dotidobetjö̧ da̧peachadö badibakwedösa— jö̧ba̧lö

¹³ Ja̧danö, ökwödönöma bakwo̧nökwena Cristoma dotidawakwena iyö pjaatinobetjö̧ tjo̧'omanö Dios Itji̧nö bakweminö do̧'wo̧ wana̧lö dichibakwedösa. Ja̧danö, bakweminö jo̧banö waisachibö dichibakwedösa. Ja̧danö, ökwödöma bakwo̧nökwena dömöledönö pjadatobe, Jesús dotidawakwena iyabina dotidobetjö̧. Jejenöma otiwanö da̧peachadö badibakwedösa. Ökwödöma ja̧danö, tjo̧'omanö Cristodanö, jwiinö otiwanö Jo̧danö badibakwedösa.

¹⁴ Jejenö da̧peachadö badibenama, ökwödöma tjemu wajwibadödanö dö̧jökena, Dios iwenema. Ja̧danö, waisanö ja̧nö, ju'wedö wainö omukwatö yötjawi̧ma da̧ja̧kwökena. Wanedö yötawa chömöledö: Isowi, tjolanö nubökönö nönawowi, jwa̧lȩ'epjo ichobe balawa loobö jwa̧lȩ'epjo e'ewibobekwö 'yo̧wi. Ökwödöma jejenö dö̧jaduwoko. Jowi isowi balawa loobö jwa̧lȩ'epjo e'ewibidanöma e'ewibököwö̧sa, do̧'wo̧ luwo̧nö da̧peachö dö̧jenama. Ja̧danö ju'wedökwöma, ökwödönö tjo̧'wo̧ sulinö edö, sulabenö doma'a o̧pekwönö ja̧badöma tje'ewibököwö̧sa, isowi tjolanö nubökönö nönawowidanöma.

¹⁵ Chömöledö do̧'wo̧ luwo̧ döda̧peachaduwo tupakwö, dömöledönö jwiinö ösödö, jweinö yöba̧lö Dios jawa. Ja̧danö, do̧'wo̧ luwo̧ jemi tupakwö juluwachibanö okobe jwiinö döda̧peachaduwo, Cristo omukwati̧danö omukwatö. Wanedö yötawa: Ökwödöma Cristo iteba'obedösa ¿jö̧tö? Ja̧danö, Cristoma uudanö jo̧ma, jojo iteba'o öbibö ji̧danö. Jau chömöledö, Cristoma, uu öibobedanö iteda iteba'obedönö öbibö jo̧.

Pablo wanedö yöawina wene: —Cristoma uudanö jo̧, iteda iteba'obedönö öbibö— jö̧ba̧lö

¹⁶ Ja̧danö, ökwödö okobe deinö jo̧ba iteba'obedöma, ba̧jekwadö dö̧jobe, jojo iteba'onö nöinö ji̧danö. Iteba'onöma nöinö jo̧be, iwe'ijubi. Ja̧danö, iwe'iju otiwanö bakweminö 'yo̧bö u̧yu̧ki̧ju junekwemibi jo̧be. Ja̧danö jo̧be ökwödö Jesús iteba'obedöma. Ju'wedö Jesúsnö ösödadökwö bakweminö pjabatakwawö di̧'yobö jojo u̧yu̧ki̧ju junekwi̧danö junekwadösa. Ja̧ma ¿dakwö jö̧ba̧lö jö̧a̧lobeda? Biya̧, chömöledö: Bakwo̧nökwena otiwanö pjabatö ja̧nö, bakwo̧ jelo̧nö pjabatö, bakwo̧ jelo̧nö pjabatö, ja̧danö dö̧jitjö̧ma otiwanö bakweminö dichibakwedösa, do̧'wo̧ luwo̧ma. Ja̧danö tupakwö juluwachibanö 'ya̧nö döda̧peachena, do̧'wo̧ luwo̧ma. Ja̧danö, bakwo̧nökwena ösödanö pjabatakwawanö dotiditjö̧ma, do̧'wo̧ luwo̧ma jemi tupakwö bakweminö dichibakwedösa, jojodönö jwiinö ösödakwawanö.

Pablo yöawina wene: —Ajayinö kwomukwatinaduwa kabatö balewachö, Dios otiwanö omukwati̧ jawa omukwatö ja̧duwi— jö̧ba̧lö

¹⁷ Jo̧kwaobetjö̧ chömöledö, Duluwo̧ma ötjönö weinadanö yötawaduwakwö. Diosnö wajwibadö sulabenö omukwatö tjuju̧kwi̧danöma omukwatö kwuju̧kwaduwa. Jobadöma Diosnö wajwitjobetjö̧ mikwa jwii̧ jawada omukwatö ja̧bö ju̧kwadö.

¹⁸ Jobadöma yȩa'wo okwada ja̧dö, tjo̧'wo̧ luwo̧nöma, tjo̧'wo̧ luwo̧ jawa wajwitjobetjö̧. Ja̧danö, tjomajade 'ditjobetjö̧ Dios jawa tjöwaisachiboböma jwibadö. Jo̧kwaobetjö̧ Dios ba̧kwȩlö̧jatebö ja̧kwawa iyi̧ma jwibadö, wajwitjobetjö̧.

¹⁹ Ja̧danö, jobadö Diosnö wajwibadöma jwiinö taba̧lö̧ji jawa ja̧badö babibadö. Okobe jwiinö sulabe jawa ja̧tjobö jö̧tja̧li̧da omukwatadö. Ja̧danö, taba jwiinö ja̧tji̧ma ja'yubebi omukwatöködö. Aaa, biya̧ ja̧di̧ma jwiinö taba̧lö̧ji jawa ja̧dobe, jö̧ba̧löma, omukwatöködö.

²⁰ Ja̧danö ¿ökwödöja? Sulabenö ja̧bö kwö̧jaduwo, jö̧ba̧lö, ¿yötjawinaji̧, Cristo weinama? Jejenö kwa̧ja̧kwinaduwokobe chömöledö.

²¹ Ökwödöma Jesús jawa, isabenö yötjawi̧ wene a̧ja̧kwinadöja. Jo̧banö isabenö yötjawi̧ tjöba̧ja̧dinawö̧ja.

²² Chömöledö, ajayinöma kwomajadeduwinö ju'wida ba̧kwȩlö̧jatebö omukwatö ju̧kwiaköbinaduwobe. Ja̧danö, sulabenö ja̧köbaduwoböda jelobe omukwatinadöja, Aaa, sulabenö ja̧titjö̧ma otiwena, jö̧ba̧löda. Chömöledö, ja̧ kwomukwatinaduwama omönada kwomukwatinaduwobe. Babema ja̧ ajayinö kwomukwatinaduwama kabatakwawaduwi, balekwa, otiwi̧, 'yayi̧ jawa omukwatakwawa omukwatö.

²³ Ja̧danö, ajayinö kwomukwatinaduwa kabatö balewachaduwi. 'Yayi̧ otiwa jawada omukwataduwi.

²⁴ Ja̧danö, ju'wi, 'yayi̧ jawa, otiwanö omukwataduwi chömöledö, Dios otiwanö omukwati̧danö. Dios otiwanö omukwati̧ma, isabenö suli̧ jwii̧ omukwati̧, wainö ji̧ jawa omukwati̧ma.

Pablo yöawina wene: —Ju'wedökwö ösödabikwawö kwö̧jaduwo, otiwanö pjabatö, omönanö yöba̧lökönö, naukwökönö, kwo̧'wo̧ luwo̧duwinö söbekwa̧lö— jö̧ba̧lö

²⁵ Jo̧kwaobetjö̧, Dios isabenö omukwati̧danö omukwatö kwö̧jaduwobetjö̧, sulabenö omukwatö, omöna yöba̧löma kwö̧jaduwa chömöledö. Ökwödöma bakwo̧nökwena omönama yöka̧laduwoko kwö̧jaduwemi ju̧kwadönöma. Jobadönö, Jesúsnö ösödadönö, jweinö yöka̧laduwo, ökwödöma bakwainö Jesús iteba'obedö dö̧jobetjö̧.

²⁶ Ja̧danö, chömöledö, kwo̧'wo̧ sulachibaduwenama sulabenö ja̧köbaduwoko. Lekwema kwo̧'wo̧ kwusulawaduwa. Yi̧ibakwa̧ abönö kwo̧'wo̧ sökibaduwo kwo̧'wo̧ suladuwi̧ma.

²⁷ Jau chömöledö, kwo̧'wo̧ suladuwi̧ma kwo̧'wo̧ sököbaduwo. Lekwe kwo̧'wo̧ kwusulawaduwenama Awetja iteda ösödi̧da ja̧köbaduwinö weobö jo̧be. Chömöledö ja̧bökönaduwi Awetja ökwödönö sulabenö ja̧köbaduwinö weobö ji̧ma.

²⁸ Ja̧danö, ökwödötjö bakwo̧ naukwabo̧ma naukwabikwawatjö kabatibö, Otiwanö chotido, jö̧ba̧lö, itedada naukwabökönö u̧kwa emawabi, jwibadönö iyöbi iyö ö̧jobö jö̧ba̧lo̧.

²⁹ Ja̧danö, sulabema yöka̧laduwa chömöledö. Pjabatö yöa̧lakwawada yöka̧laduwo, bakwo̧ o̧'wo̧ tjo̧bekwö jo̧nö pjabatö. Jejenö yöka̧laduwi̧ a̧ja̧kwadönö pjakataduwakobe, tjo̧'wo̧ luwo̧ ösöwachibawö̧ jö̧tja̧lobö, Bidöma otiwanö pjabatö yöba̧ladö, jö̧ba̧lö.

³⁰ Ju'wibi yötawa chömöledö, ökwödönöma. Dios O̧'wo̧ Luwo̧ o̧'wo̧ tjo̧ekwinöma ja̧köbaduwoko. Ökwödöma seyu dobawedödanöbedösa Dios O̧'wo̧ Luwo̧ tebachibö öjamatinobetjö̧. Ja̧danö, Dios O̧'wo̧ Luwo̧ ökwödö do̧'wo̧ luwo̧nö ö̧ji̧ma i̧sebobe, Bidöma Dios ömöledö babibinadö, Dios lȩebi̧tjö emökönö, ba̧kwȩlö̧jatebö Dioskwö tjuju̧kwakwedö, jö̧ba̧lö. Jo̧kwaobetjö̧, Dios O̧'wo̧ Luwo̧ o̧'wo̧ tjo̧ekwinöma ja̧köbaduwa.

³¹ Chömöledö ja̧danö, ökwödönö sulabenö baibenama kwo̧'wo̧ suladuwi̧ baibanö omukwatöma kwuju̧kwaduwa. Kwo̧'wo̧ suladuwi̧ma omukwatökönö kwo̧'wo̧ luwo̧duwinö söbekwa̧lö ju̧kwaduwi. Labinö sulabenö jö̧ba̧liböma jö̧ba̧liköbaduwa. Ja̧danö, labinö sulabenö jwöbeba̧löbi jwökeba̧laduwa. Ja̧danö, kwömöledöduwinö ju'wedönö, Sulabenö ja̧badö, jö̧ba̧löma, jö̧ba̧liköbaduwa. Ja̧danö, okobe jwiinö sulabenö omukwatö ja̧awama, ja̧bökönö kwuju̧kwaduwo.

³² Chömöledö, kwömöledöduwinö otiwanö ja̧böda ja̧duwi. Kwömöledöduwinö ösödöda ja̧duwi. Jau chömöledö, Diosma ökwödö kwusuladuwi̧ omukwatökönö söbebö loinobe ¿jö̧tö? Ja̧danö, ökwödöbi kwömöledöduwi sulabenö ja̧tji̧ma kwomukwataduwoko, kwo̧'wo̧ söbibö ju̧kwö.