Efesios 3 - Dios Iwene

Pablo yöawina wene: —Ajayinö Dios tojö junö omukwatijetö, Judío jojodöböködö Jesúsnö ösödadö judío jojodö Jesúsnö ösödadökwö bakwaso jojodödanö batjibakwedö— jö̧ba̧lö

¹ Diosma jejenö ökwödö judío jojodöböködönö otiwanö pjaatinobetjö̧ ökwödönö omukwatö atebobe jo̧banöma. Chömöledö, ötjöma Cristo Jesús webawo̧sa iteda weina yötawobö. Ja̧danö, ökwödönö yötawobö weina yötawobetjö̧ ka̧lena ba̧kwaweju okwa tjödinökwesa.

² Dios ötjönö 'da̧batö ujuninama kwa̧ja̧kwinaduwobe ¿jö̧tö? Diosma ötjö chotidawa otiwanö iyö 'da̧batö ujuninobe, ökwödö judío jojodöböködönö pjatatobö.

³ Ja̧danö, kwa̧ja̧kwinaduwobe ¿jö̧tö? Diosma iteda ajayinö tojö junö omukwatina labebö loinobe ötjönöma, chöwaisachibanö. Ida̧ökö ja'yubeda chiwȩyudajabe böjanö, Dios ötjönö labebö loinama, judío jojodöbi judío jojodöböködöbi bakwaibedödanö batjibinö ja̧ina chiwȩyudaja̧ma.

⁴ Ja̧danö, böjanö chiwȩyudaja̧ eda̧lö kwöwaisachibaduwakobe, Aaa, Pabloma Dios ajayinö tojö junö omukwatina waiso̧, jö̧ba̧lö.

⁵ Damötjöma Diosma iteda tojö junö omukwatinama labebö lobijökötö da'dödöminenöma. Jo̧kwaijayonö, ökwödö dö̧ji̧ma, Dios O̧'wo̧ Luwo̧ma Dios ajayinö tojö junö omukwatinama labebö loinobe Dios 'da̧batö ujuninawö̧nö, Jesús webawedönöbi, Dios iwene yöbawadönöbi.

⁶ Biya̧ wene labebö loinobe chömöledö: Ökwödö judío jojodöböködöma, Jesús jawa otiwa jawa wene a̧ja̧kwö kwösödinaduwobetjö̧ judío jojodö Jesúsnö ösödadökwö bakwaso jojodödanö babibinadöja. Ja̧danö, bakwaso jojodödanö bakibinaduwobetjö̧ ökwödöbi Dios otiwa jawa iyakwa̧tjö kwemaduwakwedöja. Ja̧danö, Jesús iteba'obedödanö babibinadöja, judío jojodö Jesúsnö ösödadökwö, tjiteba'o bakwa'odanö. Ja̧danö, tjiteba'o bakwa'o bakibinaduwobetjö̧ ökwödöbi Dios ajayinö yöbawö ujunina, iteda isabenö iyakwa̧ wene yöbawö ujuninama, kwemaduwakwedöja.

⁷ Diosma ötjönöma jwiinö lȩlö̧jino edö, iteda ujulunöda 'da̧batö ujuninökwesa, iteda wei̧ jawa chotidobö, iteda iwene otiwa jawa yötawobö.

⁸ Chömöledö, ötjöma ju'wedö Dios ömöledö babibinadötjö baikwönönöda jo̧sa. Jejenöijayonö Diosma ötjönö lȩlö̧jino edö 'da̧batö ujuninobe, judío jojodöböködönö yötawobö, Cristoma jwiinö pjabato̧, jwiinö otiwo̧, jwiinö juluwo̧, jö̧ba̧lö. Ja̧ jawa, Cristo pjaati̧, otiwi̧, ujuluwi̧ jawa kaatiboböma jwibo̧, jö̧ba̧lö, yötawobö 'da̧batö ujuninökwesa.

⁹ Ja̧danö, Diosma weinobe ötjönöma okobe jwiinö damötjö tojö junö omukwatinama labebö lobö yötawobö okobe deinö jojodönöma. Chömöledö, Diosma, okobe jwiinö otidina ¿jö̧tö? Ja̧danö, iteda tojö ujuninama tjo̧wi̧, labebö lobö yöbawo̧sa, jojodö tjöwaisachibanö. Jejenö yötawobö weinökwesa.

¹⁰ Ja̧danö, mölejȩnö ju̧kwadö juluwadö ángelesdöbi, ángelesdö tjuluwedöbi Jesúsnö ösödadönö edö jö̧tja̧lakobe, Aaa, judío jojodöma judío jojodöböködökwö babema bakwaso jojodödanö babibadö, jö̧ba̧lö. Ja̧danö, tjöwaisachibakwedö, Ayö, Diosma jwiinö waiso̧we, jö̧ba̧lö. Jobadöma jejenö edö tjöwaisachibobö ösödo̧, Diosma.

¹¹ Ja̧danö, Dios ajayinö omukwatö ösödinama tjo̧wi̧ badekwachinö ja̧bijetö Diosma, Duluwo̧ Cristo Jesús midawö ö'wö baibenama.

¹² Chömöledö ökwödöma Cristo Jesúsnö dösödobetjö̧ Dios ö̧jobekwö yebabökönö tebachibö abebadösa, Diosma ökwödö adebi̧ma isabenö a̧ja̧kwo̧, jö̧ba̧lö.

¹³ Jo̧kwaobetjö̧ chömöledö, kwo̧'wo̧duwi tjo̧kekwaduwa ötjönöma, ka̧lena ba̧kwaweju okwa ba̧nö inia tjötinö baledi̧ma. Ökwödönö kwö̧jibaduwinö pjabato̧nö yötawinobetjö̧, inia tjötinö baledobe, chömöledö. Jau, inia tjötinö ötjönö baledijayonö, ji̧bakwawa wene yötawina kwa̧ja̧kwinaduwobetjö̧ jejenö baledobe. Chömöledö, kwo̧'wo̧duwi ösöwanö ju̧kwaduwi otiwanö kwa̧ja̧kwinaduwobetjö̧.

Pablo yöawina wene: —Cristo ökwödönö ile niebi̧ma ba̧ja̧dakwawökenanö nöi̧— jö̧ba̧lö

¹⁴ Jo̧kwaobetjö̧ Diosma ökwödönö jwiinö otiwanö pjaatinobetjö̧ chu̧yu̧ki̧junö bamatö chösödobe Dabe'do Diosnöma.

¹⁵ Jo̧bada okobe deinö ja̧kwawa iyo̧ma, mölejȩnö ju̧kwadönöbi böjȩnö ju̧kwadönöbi.

¹⁶ Jo̧bama jwiinö juluwo̧obetjö̧ ökwödönö pjaatobö atebobe jo̧banö, Dabe'do Diosnöma. Iteda O̧'wo̧ Luwo̧ma ökwödö kwo̧'wo̧ luwo̧duwi juluwachibanö pjaatobö, ja̧danö, tupakwö kwi̧'yaduwobö atebobe chömöledö.

¹⁷ Ja̧danö, Diosnö atebobe, Cristo otiwanö ö̧jobö kwo̧'wo̧ luwo̧duwinö, jo̧banö kwösödinaduwobetjö̧. Ja̧danö Diosnö atebobe chömöledö, ökwödönö pjaatobö tupakwö, ba̧kwȩlö̧jatebö ösödabikwawö kwö̧jaduwobö ju'wedökwöbi Dioskwöbi.

¹⁸ Ja̧danö, atebobe Diosnöma pjaatobö tupakwö ökwödönöbi okobe deinö Dios ömöledö babibinadönöbi Cristo ökwödönö jwiinö ile niebi̧ma kwöwaisachibaduwobö. Cristoma ¿dokwa nöinö ile niebobeda ökwödönöma? Chömöledö, Cristo ile niebi̧ma ba̧ja̧dakwawökenanö nöi̧.

¹⁹ Jau chömöledö, Cristoma jwiinö ile niebobe ökwödönöma. Ökwödö jojodöma Cristo ile niebi̧ domukwati̧ma waiyobe, ¡Ayö! ¿dakwö jö̧ba̧lö ile niebobejö? jö̧ba̧lö, domukwatena. Do̧datibökönö ichejekwobe ¿jö̧tö? Chömöledö, yayonö Diosnö atebobe kwöwaisachibaduwobö jo̧ba jwiinö ile niebi̧ma ökwödönö. Jejenö, Dios ile niebi̧ kwöwaisachibaduwenama, itedadanö ösödabikwawö kwö̧jaduwakwedöja.

²⁰ Jo̧kwaobetjö̧ chömöledö, jo̧banö dösödaduwo, Diosma jwiinö otiwo̧, jö̧ba̧lö. Jo̧bama do̧'wo̧ luwo̧nö ö̧jobe, iteda ujulunö pjabatö ökwödönö. Jo̧banö adebenama pjabato̧, iteda ujulunö. Ja̧danö, Diosma otiwanö tupakwö pjaatobe. Ökwödö omukwatö adebi̧tjö bajalekwönönö otiwanö tupakwö pjaatobe.

²¹ Jo̧banö ba̧kwȩlö̧jatebö dösödaduwo, Diosma jwiinö otiwo̧, jö̧ba̧lö. Ökwödö Jesúsnö ösödadö, Jesúskwö bakobe dötewadöma Diosnö dösödaduwo ba̧kwȩlö̧jatebö.