Efesios 2 - Dios Iwene

Pablo yöawina wene: —Dios jwiinö ile niebobetjö̧ wobajaletjö dö̧jibanö pjabatijetö— jö̧ba̧lö

¹ Chömöledö, Diosma ökwödö wobinadödanö ju̧kwadönöma yemidanö 'yakibajaduwinö ja̧inobe, kwo̧'wo̧ luwo̧duwinöma. Jau chömöledö, ökwödöma ajayinöma Dios wei̧ öpöjödö, sulabe kwösödaduwi̧da ja̧bö kwuju̧kwaduwobetjö̧ wobinadödanö kwuju̧kwinaduwobe, kwo̧'wo̧ luwo̧duwinöma.

² Jejenö ja̧böda ju̧kwiaköbinaduwobe ökwödöma, Diosnö wajwibadö sulabenö ja̧tji̧danö ja̧bö. Ja̧danö, Awetja ösödi̧da ja̧bö ju̧kwiaköbinaduwobe. Jo̧bama iteda ömöayedönö, öwawöködönö webo̧. Ja̧danö, babema böjȩnö ju̧kwadönöbi webo̧, Dios wei̧ öpöjödadönö.

³ Jau chömöledö, ajayinöma Diosnö öpöjödadö ja̧tji̧danö ökwödöbi okobe deinö sulabenö ja̧bö ju̧kwiadinobe, Diosnö öpöjödö, domajade okwanö sulabe wei̧da ja̧bö. Ökwödö sulabe dösödi̧da, sulabe domukwati̧da ja̧bö ju̧kwiadinobe. Jo̧kwaobetjö̧ ökwödöma Diostjö 'da̧bachibö ja̧döma Dios lȩebi̧tjö lȩebakwawö̧da ji̧nadösa, chömöledö, okobe deinö Diostjö 'da̧bachibö böjȩnö ju̧kwadödanö.

⁴ Jejenö Diostjö 'da̧bachibö dö̧jonöbi Diosma ökwödönöma jwiinö lȩlö̧jino edinobe chömöledö. Isabenö, jwiinö ile nibebo̧ Diosma ökwödönöma. Jo̧bama ökwödönö lȩlö̧jino edö, jwiinö ile niebobetjö̧

⁵ sulabenö ja̧bö dö̧jijayonö pjaatinobe Diosma. Ökwödöma do̧'wo̧ luwo̧nöma wobinadödanö dö̧jijayonö Diosma, do̧'wo̧ luwo̧nö 'yadibajinö ja̧inobe, Cristokwöda dö̧jobö. Chömöledö Diosma mikwa jwiinö otiwa jawa iyö dö̧jibanö pjaatinawö̧sa.

⁶ Ja̧danö, Diosma ökwödönöma, wobinadö yemidanö tjedachajinö ja̧inobe, Cristokwöda dö̧bajobö mölejȩbe. Chömöledö, Diosma Jesúsnö yemidanö tjeachajinö ja̧enama ökwödönöbi, Cristo Jesús tjeachaji̧danö tjedachajinö ja̧inobe.

⁷ Jejenö ja̧bijetö Diosma ba̧kwȩlö̧jatebö i̧sebobö iteda jwiinö otiwanö pjaatinama ökwödönö, mikwa jwiinö iyö, Cristo Jesúsnö weinama.

⁸ Isabenö chömöledö, Diosma lȩlö̧jino edobetjö̧, Jesúsnö kwösödaduwenama, Jesúsma dö̧jibanö pjabato̧, jö̧ba̧lö, ökwödöma ji̧bakwawanö kwö̧jibinaduwobe. Chömöledö ji̧bakwawanö kwö̧jibaduwoböma ¿ökwödöda ja̧köbakwawinaduwaji̧, kwujuluduwinö? Jejenöma ja̧awakwawinöködöja. Ja'yubebi ji̧bakwawanö kwö̧jibaduwobö ja̧köbakwawaduwoböma jwiobe. Diosda mikwa jwiinö otiwa jawa iyö kwö̧jibaduwinö pjaatinobe chömöledö, otiwanö ja̧bö kwö̧jaduwököjayonö.

⁹ Jau chömöledö, ökwödöma ja'yubebi kwö̧jibaduwoböma ja̧köbakwawinaduwokobe. Bakwo̧bi deobe, iteda ujulunö, ö̧jibobö ja̧bawakwawo̧ma. Deobe yelösöda, Ötjöma otiwanö ja̧bö chö̧jobetjö̧ chö̧jibanö ja̧bawakwawo̧sa, jö̧ba̧lo̧ma. Jejenö jö̧a̧loböma jwiobe.

¹⁰ Chömöledö, Diosma ökwödönö otiwanö pjabatijetö yemidanö do̧'wo̧ luwo̧nö 'yabibajadö badibanö. Ja̧danö, otiwanö pjabatijetö, Cristo Jesúskwö bakobe dötewadö badibanöma. Diosma jejenö pjabatijetö ökwödönöma, otiwanö ja̧bö dö̧jobö. Ajayitjöda omukwatijetö ökwödönöma, do̧'wo̧ luwo̧nö 'yabibajadö, Cristo Jesúskwö dötewadö otiwanö ja̧bö dö̧jakwa̧ma.

Pablo judío jojodöböködönö yöawina wene: —Ajayinöma Diostjö 'da̧bachibö kwö̧jinaduwajayonö babema Cristo Jesúskwö bakobe dötewanö kwö̧jaduwobe— jö̧ba̧lö

^11-12 Jo̧kwaobetjö̧ ökwödö judío jojodöböködönöma yötawaduwakwö. Omukwataduwi ajayinö, Cristonö wajwiböda kwö̧jinaduwama. Judío jojodöma jobadöda tjötade bajalesado̧ 'wibekwadötjobetjö̧, Ökwödöda otiwadösa, ökwödöda Dios i̧tji̧musa, jö̧ba̧lö, omukwatinadö. Jejenö omukwatö ökwödö judío jojodöböködönö öpöjödö ötjabinawö̧ja, Tjötade bajalesado̧ 'wibekwöködö, jö̧ba̧lö. Jejenö tjomukwatinajayonö jobadö tjötade bajalesado̧ 'witjekwi̧ma böjȩ jawada ji̧. Ja̧ 'wibebö jojodöda ja̧tji̧. Tjo̧'wo̧ luwo̧ jawamaökö. Chömöledö, omukwataduwi, ajayinöma Cristonö wajwiböda ju̧kwinadöja. Ökwödöma judío jojodököbaduwokobetjö̧, ja̧danö, Abrahamtjö tupadanö jojodököbaduwokobetjö̧ ökwödöma judío jojodötjöma wainö ju̧kwinadöja. Diosma iteda isabenö pjaatakwa̧ yöbawö ujunina wenema, judío jojodönö yöbawö ujunina wenema, yöbawö ujuninököwö̧ja ökwödöma. Dios isabenö otiwanö pjaatakwa̧ wenema yöbawö junijökötö ökwödönöma. Judío jojodöma Diosnö tjomukwatinobe, jo̧ba yöbawö ujunina wene omukwatö, ja̧danö, jo̧ba pjaatakwa̧ te'ada̧lö. Jo̧kwaijayonö ökwödöma Diosnö omukwatökönö, jo̧ba otiwanö pjaatakwa̧ te'ada̧lökönö ju̧kwinadöja.

¹³ Ja̧danö, ajayinöma Diostjö 'da̧bachibö, jo̧ba ö̧jelöma ödöda kwö̧jinaduwobe, chömöledö. Ödö kwö̧jinaduwajayonö babema Cristo Jesúskwö bakobe dötewanö kwö̧jaduwinö bakibinaduwobetjö̧ Diosma iteda ö̧jobekwö kwichibaduwobö ja̧inobe. Chömöledö, Cristo Jesús, iteda ökwösobu ebawinö imidawinobetjö̧ Diosma iteda ö̧jobekwö kwichibaduwobö ja̧inobe.

¹⁴ Ja̧danö, Cristo Jesúsda ökwödö judío jojodöböködö, judío jojodö Jesúsnö ösödadökwö bakwaibedödanö badibanö ja̧inobe. Jejenö bakwaibedödanö badibinobetjö̧ do̧'wo̧ ösöwanö dö̧jobe chömöledö. Wanedö yötawa chömöledö: Judío jojodötjöma judío jojodöböködötjöma ö'weje tjöekwemidanö ji̧nobe, judío jojodöma judío jojodöböködönö tjöpöjödobetjö̧. Jo̧kwaijayonö Cristo Jesús midawö woenama jemi tjöekwemima 'dobö lotjobedanö baibinobe, bakobe dö̧jobö, judío jojodöma judío jojodöböködökwö, bakwaibedödanö.

¹⁵ Cristo Jesús midawö woinobetjö̧ Dios wei̧, Moisés iwȩyudinama mikwawökönö baibijetö. Jejenö ja̧bijetö Cristo Jesúsma, judío jojodöma judío jojodöböködökwö öpöjödakwawökönö tjö̧jobö, wainö ja̧bö jö̧könö. Ja̧danö, Jesúsma ja̧bijetö judío jojodöma judío jojodöböködökwö bakwaibedödanö batjibanö. Ja̧danö, Jesúskwö bakobe dötewanö ja̧nö, 'yaba̧ladödanö, tjo̧'wo̧ ösöwanö ja̧dö batjibinö ja̧bijetö Jesúsma.

¹⁶ Ja̧danö, Jesús midawö woinobetjö̧ ökwödö, Jesúsnö ösödadöma, ajayinö Diostjö 'da̧bachibö ju̧kwinadöma, babema Dios ömöledö babibinadöja. Ja̧danö, ökwödö judío jojodöbi ökwödö judío jojodöböködöbi bakwaibedödanö babiböma, do̧'wo̧ ösöwanö ölakwabikwawökönö duju̧kwobe.

Pablo judío jojodöböködönö yöawina wene: —Dios O̧'wo̧ Luwo̧ma ökwödö judío jojodöböködönöbi tebachibö öjamatinawö̧ja— jö̧ba̧lö

¹⁷ Ja̧danö, Cristo Jesús, böjȩkwö ichinama, ökwödö ju'wedökwö tjo̧'wo̧ ösöwanö ja̧kwawa wene yöbawö ichijetö. Ökwödödajayedönö yöbawiabijetö, Diostjö 'da̧bachibö jo̧ba ö̧jelö ödöda ji̧nadönö, judío jojodöböködönöma. Ja̧danö, bakwainö yöbawiabijetö tjo̧'wo̧ ösöwi̧ ja̧kwawa wenema judío jojodönöbi, Dios ö̧jelö yöneawinö ji̧nadönöma.

¹⁸ Chömöledö, Jesúsma midawö woinobetjö̧, ökwödö judío jojodönöbi ökwödö judío jojodöböködönöbi, Dios O̧'wo̧ Luwo̧ma, bakwo̧da tebachibö öjamatinawö̧sa. Ja̧danö, bakwo̧da tebachibö öjamatinawö̧dobetjö̧ ökwödöma okobe deinö Dabe'do Diosnö abebadösa.

¹⁹ Jo̧kwaobetjö̧ babema ökwödö judío jojodöböködönöma yötawaduwakwö. Ajayinöma ökwödöma wainö ju̧kwinadöja, jelobetjö ichinadödanö ji̧nadöja, judío jojodököbaduwokobetjö̧. Jo̧kwaijayonö babema ökwödöma Dios ömöledöda babibinadöja. Ju'wedö Dios ömöledökwö ju̧kwadöja. Babema ökwödöbi Diosnöma, Dabe'do, jö̧ba̧lö, öbabidöja, ju'wedö Diosnöma Dabe'do, jö̧ba̧lö, ötjabi̧danö.

Pablo wanedö yöawina wene: —Jesúsnö ösödadöma Dios ejudanö babibinadö— jö̧ba̧lö

²⁰ Chömöledö, wanedö yötawa: Ökwödöma Dios ejudanö bakibinaduwobe. Kwöwaisaduwa, o̧do, inawiyatjö otikweju tjotidakwedöma, inawiya tjujunakwa̧ abönöma, niji sobö lödö 'dibatadö, la'aka 'diinö baibanö ja̧bö. Ja̧danö, Dios ejuma jo̧be, chömöledö. La'akama Jesús webawedö yötjawinakwö, Dios iwene yöbawadö yötjawinakwö jo̧be, la'aka jawama. Ikenama, Cristo Jesús itedama abönö tjujunawadanö jo̧, jwiinö otiwawa ji̧danö, jweawa ji̧danö. Ikenama ökwödöma, Jesúsnö ösödadöma jo̧bakwö, otiwawa ji̧danö jo̧kwö bakobe babibinadösa.

²¹ Ja̧danö, ökwödöma ju'wedö Jesúsnö ösödadökwö, ju'wi inawiya tjujuni̧danö ju̧kwadökwö, bakobe babibinadösa, jwiinö otiwo̧ Jesucristokwö. Ja̧danö, Duluwo̧ eju, jwiinö otiwejudanö ja̧dösa.

²² Jau chömöledö ökwödö judío jojodöböködöbi, Dios O̧'wo̧ Luwo̧ kwo̧'wo̧ luwo̧duwinö tebachibö öjamatinobetjö̧ Jesúskwö bakobe babibö Dios ejudanö ja̧döja, Dios ö̧jejunö.