Efesios 1 - Dios Iwene

Pablo Éfesonö ju̧kwadönö yöbawö iwȩyudinatjö ajayi jawa

¹ Ötjö, Pablo, böja kwialusöjanö yöbawö chiwȩyuda. Ötjöma Cristo Jesús webawo̧sa, Diosma jejenö omukwatö ösödinobetjö̧. Ökwödönö chiwȩyuda, Éfesonö ju̧kwadönö, Dios ömöledö babibinadönö, Cristo Jesúsnö kwo̧'wo̧duwi wana̧lö ja̧dönö.

² Chömöledö, Dabe'do Diosma ökwödönö lȩlö̧jino edobö chösöda. Ja̧danö, Duluwo̧ Jesucristobi ökwödönö lȩlö̧jino edobö chösöda. Ja̧danö, Dabe'do Diosbi Duluwo̧ Jesucristobi ökwödönö pjatjatobö chösöda, kwo̧'wo̧ luwo̧duwi ösöwachibanö bakibaduwinö.

Dios do̧'wo̧ luwo̧ jawa iyina wene

³ Chömöledö, Duluwo̧ Jesús Abe'do, iteda Uluwo̧ Diosnö dösödaduwo, Diosma jwiinö otiwo̧, jö̧ba̧lö. Ökwödöma Cristokwö bakobe dötewinö dö̧jobetjö̧ Diosma do̧'wo̧ luwo̧ jawa iyinobe ökwödönöma, okobe jwiinö mölejȩbe ju̧kwi̧ jawa, otiwa jawama.

⁴ Ja̧danö ajayinö, böjȩ ina otidapjii Diosma omudawö junijetö ökwödönöma iteda ömöledö babibö, Jesúskwö bakobe dötewinö badibakwa̧ma. Ja̧danö, omudawö junijetö iteda öba a'otjö suli̧ jwiinö, wene jwibadö badibakwa̧ma.

⁵ Chömöledö, Diosma ökwödönö ile niebobetjö̧ ida̧ökö ajayitjöda omukwatijetö ökwödönöma, Bidönöma ötjö chi̧tji̧mu batjibanö 'da̧batö chujunakwo̧sa, Jesús imidawakobetjö̧, jö̧ba̧lö. Jejenö omukwatö ösödinobetjö̧ Diosma omudawö junijetö ökwödönöma, iteda i̧tji̧mu badibobö.

⁶ Jo̧kwaobetjö̧ iteda i̧tji̧mu badibinobetjö̧ dösödonö, Lȩlö̧jino edo̧, jwiinö otiwo̧, jö̧ba̧lö. Chömöledö ökwödöma Jesúskwö, Dios Itji̧ ile niebökwekwö, dötewinö badibinobetjö̧ Diosma ökwödönö jwiinö lȩlö̧jino edobe.

⁷ Ja̧danö, Diosma ökwödönö jwiinö lȩlö̧jino edö webijetö itji̧ Jesucristonö, dö̧jibanö pjaatobö. Weinökwema ökwösobu ebawinö midawö dö̧jibanö pjaatinobetjö̧ ökwödö dusuli̧ma söbebö lobijetö Diosma.

⁸ Chömöledö Diosma otiwanö waisö, ökwödönö jwiinö lȩlö̧jino edö webijetö itji̧nö, ja'yubebi a'dȩlökönö iyö.

⁹ Ja̧danö, ajayinö omukwatö ösödinama tojö ujuninajayonö babema ökwödö do̧'wo̧ luwo̧ okwanö döwaischibanö i̧sebinobe Diosma, Cristonö dö̧jibanö pjaatobö weinanöma. Jejenö i̧sebinobe Diosma, ökwödönö i̧sebobö ösödobetjö̧.

¹⁰ Ja̧danö, Diosma baikwö omukwatö webijetö Jesúsnöma. Ju'winö, okobe jwiinö ajayinö omukwatö chösödina badekwachena, Cristoma okobe jwiinö böjȩ jawabi, mölejȩ jawabi, mölejȩnö ju̧kwadöbi, böjȩnö ju̧kwadöbi tjuluwo̧ baibakwo̧. Jejenö omukwatö webijetö Diosma, Cristonöma.

¹¹ Chömöledö, Diosma okobe jwiinö baledobö ösödi̧ma badekwachinö ja̧bo̧. Ja̧danö, ökwödönö, judío jojodönö omudawö junijetö Cristokwö bakobe dötewinö badibobö, jejenö badibobö omukwatö ösödinobetjö̧.

¹² Ja̧danö, Diosma ökwödö judío jojodönö, abönö Cristonö ösödinadönöma 'da̧batö junijetö itenöda ösödanö yöbawadö badibobö, Diosma jwiinö otiwo̧, jö̧ba̧lö.

¹³ Chömöledö ¿ökwödö judío jojodöböködöja? Ökwödöma Dios isabenö iwene yötjawi̧ a̧ja̧kwö kwösödinaduwobe. Jau chömöledö, kwö̧jibaduwinö ja̧awa, otiwa jawa wene yötjawi̧ a̧ja̧kwö, Jesúsnö kwösödinaduwobe, Jesúsma dö̧jibanö pjabato̧, jö̧ba̧lö. Ja̧danö, Jesúsnö kwösödaduwena Dios O̧'wo̧ Luwo̧ma tebachibö öjamatinobe ökwödö kwo̧'wo̧ luwo̧duwinöma. Jau chömöledö, Dios ajayinö yöbawö ujuninadanö, Ötjö Cho̧'wo̧ Luwo̧nö wetocha, jö̧ba̧lö, yöbawö ujuninadanö, iteda O̧'wo̧ Luwo̧nö weinobe ökwödö kwo̧'wo̧ luwo̧duwinö tebachibö öjamatobö. Ja̧danö jo̧ba tebachibö öjamatenama jweinö i̧sebinobe, Isabenö bidöma ötjö chi̧tji̧mu, jö̧ba̧lö.

¹⁴ Ja̧danö chömöledö, ajayinö Diosma ökwödönöma, Otiwa jawa chiyocha, jö̧ba̧lö, yöbawö junijetö. Ja̧ otiwa jawa iyakwa̧tjö ida̧ökö ja'yubeda iyinobe, iteda O̧'wo̧ Luwo̧nöma. Ja̧ ja'yubeda iyinama i̧sebobe, Diosma isabenö iteda ajayinö yöbawö ujunina ja̧bo̧, jö̧ba̧lö. Ju'winö okobe jwiinö iyakwo̧, jö̧ba̧lö, i̧sebobe. Ja̧danö, ökwödöma te'ada̧löda dö̧jobe, Isabenö ju'winö okobe jwiinö iyakwo̧, jö̧ba̧lö. Chömöledö, Diosma jejenö otiwanö ja̧inobetjö̧ jo̧banö dösödaduwo, Jwiinö otiwo̧, jö̧ba̧lö.

Pablo Éfesonö ju̧kwadönö Dios pjaatobö Diosnö aebina wene

^15-16 Chömöledö, Duluwo̧ Jesúsnö kwösödaduwi̧bi, ju'wedö Dios ömöledö babibinadökwö ösödabikwawö kwö̧jaduwi̧bi yötjawi̧ cha̧ja̧kwinobetjö̧ ba̧kwȩlö̧jatebö Diosnö ösödö yöta̧lobe, Chabe'do otiwanö pjakatinobe, jö̧ba̧lö. Ja̧danö, Diosnö atebena ba̧kwȩlö̧jatebö ökwödönö pjaatobö atebobe.

¹⁷ Chömöledö, Duluwo̧ Jesucristo Uluwo̧ Diosnö, iteda Abe'donö, Jwiinö Otiwo̧ Dabe'do Diosnö atebobe pjaatobö ökwödönö. Atebobe kwo̧'wo̧ luwo̧duwi jawa kwöwaisachibaduwobö. Ja̧danö, Dios omukwati̧ma kwöwaisaduwemitjö o̧penönö kwöwaisachibaduwobö atebobe chömöledö.

¹⁸ Ja̧danö, Diosnö atebobe kwo̧'wo̧ luwo̧duwinö do̧batö kwöwaisachibaduwobö Dios ökwödönö jwiinö otiwa jawa iyi̧ma, tjo̧'wo̧ luwo̧ jawa. Chömöledö, Diosma jwöbijetö ökwödönöma iteda ömöledö bakibaduwobö. Ja̧danö, ökwödönö, iteda ömöledö babibadönöma, jwiinö otiwi̧, kwo̧'wo̧ luwo̧duwi jawa iyobö jwöbijetö Diosma ökwödönöma.

¹⁹ Ja̧danö, Diosnö atebobe do̧batö kwöwaisachibaduwobö kwo̧'wo̧ luwo̧duwinö, Diosma jwiinö juluwo̧, jö̧ba̧lö.

²⁰ Jo̧bama iteda ujulunö ja̧bö i̧sebijetö, Cristonöma wobajo̧ yemidanö tjeachajinö ja̧bö. Ikenama, yemidanö tjeachajinö ja̧inökwenöma yemidanö mölejȩbe kaekwachajinö ja̧bijetö Diosma, iteda ipjeanö, öwaisobekwöchobe ö̧bobö.

²¹ Ikenama Diosma Jesúsnö kabebö wanijetö, inesö La'aka Luwo̧ baibanö. Chömöledö, jo̧badajayo̧ la'aka luwo̧ma deobe. Okobe deinö la'aka luwedötjö o̧penönö Jesúsma inesö La'aka Luwo̧ baibanö jo̧. Mölejȩnö ju̧kwadö tjuluwedötjöbi, böjȩnö ju̧kwadö tjuluwedötjöbi Jesúsma o̧penönö inesö La'aka Luwo̧. Jejenö jo̧be babema. Ju'winöbi jejenö ja̧kobe, Jesúsma ju'wedö la'aka luwedötjö o̧penönö inesö La'aka Luwo̧.

²² Ja̧danö, Diosma kabebö wanijetö Jesúsnöma okobe jwiinö Jesúsda weobö, böjȩ jawabi, böjȩnö ju̧kwadönöbi, mölejȩ jawabi mölejȩnö ju̧kwadönöbi. Ja̧danö Jesúsnö kabebö wanijetö Diosma, jo̧banö ösödadö tjuluwo̧ baibanö.

²³ Wanedö yötawa chömöledö: Ökwödö Jesúsnö ösödadöma iteda iteba'obedösa. Ja̧danö, Diosma kabebö wanijetö Jesúsnöma, jo̧ba iteba'obedönö öbibö jo̧ baibanö. Ja̧danö, jojo uu öibobedanö Cristoma itenöda ösödadönöma, iteda iteba'obedönöma, öbibö jo̧. Ja̧danö, uu wainö jö̧könö, iteba'o dötewinö ji̧danö Cristoma ökwödö, iteda iteba'obedökwö dötewinö jo̧. Ja̧danö ökwödöbi, Cristo iteba'obedöma jo̧dawa'ye jö̧könö, Cristokwö dötewinö ja̧dösa. Ja̧danö: Cristokwö bakobe babibö ökwödöma jwiinö otiwadö babibinadösa, Cristokwö dötewinö dö̧jobetjö̧.