Deuteronomio 9 - Dios Iwene

Dios ökwödönö ösödi̧ma, iteda ösödobö omudawö ujuninobetjö̧ ösödo̧, jö̧ba̧lö Moises yöawina jawa

¹ Tupakwö yöawinobe Moisesma, israel jojodönö: —Chömöledö israel jojodö, a̧ja̧kwaduwitjö: Ökwödöma juluwanö Jordan ojwe pekibaduwakwedöja, ju'wedö tjitebo niji 'döbebö, ökwödöda kwiteboduwi baibanö kwemaduwakobetjö̧. Jobadöma ökwödötjö bajalekwönönö tjö̧ba̧jekwijayonö, ja̧danö ökwödötjö bajalekwönönö tjujuluwijayonö, ja̧danö tjitebo comunidad möakwö mölejebe ichibanö 'diinö tjöekwijayonö, jobadönö kwujuluwaduwobö pekibaduwakwedöja.

² Jobe ju̧kwadöma isabenö juluwadö, jobadötjö ju'wedöma kwöwaisaduwawö̧, inesö ödöbaedö anaquitas jojodönö. Jobadönö yötja̧li̧ a̧ja̧kwinadöja chömöledö, –Ayö, jobadö ödöbaedö anaquitas jojodönö ti ujuluwakwajö, –jö̧ba̧lö yötja̧li̧ a̧ja̧kwinadöja.

³ Ja̧danö, yötja̧li̧danö isabenö juluwadö chömöledö, jo̧kwaijayonö bi̧ya̧ wenebi kwöwaisaduwobö jo̧be chömöledö, ojwe pekibaduwenama, kwuluwo̧duwi Isabenö Jo̧ Diosma kwabönöduwi peibakobe. Ja̧danö jo̧bama, ökwöla okobe jwiinö ubola juwö loi̧danö, jo̧ba kwuluwo̧duwi Diosda jobadönö ujuluwakobe, ja̧danö jo̧bada tjujulu 'döebakobe, juluwanö jobadönö kwujuluwaduwobö, ja̧danö juluwajadö, tjitebo niji̧ 'dökebaduwobö. Jau chömöledö, iteda yöbawö ujuninadanö, jejenö kwöpöjojodönö ölakwabikwawö ujuluwakobe kwuluwo̧duwi Isabenö Jo̧ma.

⁴ —Ja̧danö, kwuluwo̧duwi Isabenö Jo̧ Dios jejenö kwöba a'oduwitjö a'dewö loaja̧ ikena, tjiteboinemi kwiteboduwi baibanö jobe kwö̧jaduwenama, kwomukwataduwoko chömöledö, –Aaa, ökwödö israel jojodöma otiwadö sulabenö ja̧böködö dö̧jiökwe, bemi nijinö ditebo baibanö dö̧jobö ichejebajabe, –jö̧ba̧lö. Baikwö yötawaduwakwö chömöledö, jejenö jobadö tjiteboinemi kwö̧jaduwi̧ma, ökwödö israel jojodö otiwanö ja̧bö kwö̧jaduwobetjö̧ baledokobe. Ju'wida, jobadö ja̧ niji̧ ju̧kwadö sulabenö ja̧bö tjö̧jiökwe, jobadönö kwöba a'oduwitjö a'dewö lobo̧ Isabenö Jo̧ma, tjiteboinemi nijinö kwö̧jaduwobö.

⁵ Jau chömöledö, jobe kwi̧'yaduwakwa̧ma, ökwödö jawamaökö. Ökwödöda otiwanö ja̧bö kwö̧jaduwobetjö̧, ja̧danö ökwödöda jwaikwöda otiwanö kwomajadeduwinö omukwatö kwö̧jaduwobetjö̧ baledokobe, baikwö labebö lobö yötawa chömöledö: Damötjö̧ Isabenö Jo̧ma kwa'dödö Abrahamnöbi, Isaacnöbi, Jacobnöbi yöbawö ujuninobe, tji̧tji̧mu tupadanö jojodönö niji iyakwa̧ wenema. Ja̧danö, ju'wibi, ja̧ nijinö ju̧kwadöma jwiinö sulabenö ja̧bö tjuju̧kwobe. Jo̧kwajabetjö̧, ja̧ nijinö ju̧kwadö sulabenö ja̧bö tjö̧jiökwe, iteda kwa'dödönö yöbawö ujunina omukwatö, kwuluwo̧duwi Isabenö Jo̧ Diosma weakobe, ja̧ nijinö kwö̧jaduwobö.

⁶ Jau chömöledö, jobe kwö̧jaduwakwa̧ma, ökwödö israel jojodö otiwanö ja̧bö kwö̧jaduwiökwe jobe kwö̧jaduwobö weokobe kwuluwo̧duwi Isabenö Jo̧ Diosma, la'akatjöda. Kwöwaisaduwa chömöledö, ökwödöma otiwanö ja̧bö jö̧ködöja, la'akatjöda. Ökwödöma kwuuduwi 'dibadöja, ja̧danö Dios wei̧ kwa̧ja̧kwaduwobö öpöjödadöja, —jö̧ba̧lö yöawinobe Moisesma.

Israel jojodö o̧'wo jawa tjotidina Moises yöawina jawa

⁷ Tupakwö yöawinobe Moisesma, israel jojodönö: —Jau chömöledö, isabenö kwuluwo̧duwi Isabenö Jo̧ Dios ödameakwobö sulabenö ja̧badöja. Kabatökönö Isabenö Jo̧ wei̧ öpöjödö ji̧nadöja, Egipto nijitjö lakebinaduwelö baikwö bemi nijibe dichibenanö kabatö. Ja̧ wene isabenö kwomukwataduwobö jo̧be chömöledö, kwo̧'wo jwibibö, –Aaa, otiwadösa, –jö̧ba̧lö kwomukwataduwapji jö̧ba̧lö.

⁸ Isabenö Dios öba a'otjö sulabenö ja̧binadöja chömöledö, Sinai mösa'otjö Dios öba a'o dö̧jinenabi Isabenö Jo̧ ödameakwobö ja̧binadöja, ja̧danö sulabenö ja̧köbaduwiökwe, jwiinö ökwödönö ödameakwinobe Isabenö Jo̧ma, ökwödönö söbebö loobö jö̧a̧lenanö baibanö.

⁹ Jau chömöledö, jobe Sinai mösa'otjö Isabenö Jo̧ma ökwödönö weinobe domulataja jawa ja̧bö kwö̧jaduwobö wei̧ma, ja̧danö webajo̧, inaba döbalatajanö i̧wȩyudinobe, jö̧tö? Ja̧danö ötjöma mösa'o chönöchijatö, Dios iyakwa̧ wȩyukwaba chemobö, ja̧danö nöchajo̧, jobe mösa'onö Dioskwö chö̧jijatö, cuarenta möle baledibanö kwakwawabi kwökönö, ojwiyobi owökönö, jobe mösa'onö Dioskwö chö̧jijatö, jö̧tö?

¹⁰ Ja̧danö, jobe jo̧bakwö chö̧jonö, Isabenö Jo̧ma ötjönö iyinobe, iteda wei̧ wȩyukwaba döbalatajama, Diosda ötö'anö wȩyukwabama. Jau chömöledö, ko̧ko̧kwö Dios öba a'o mösa'o la'aka kwöjamatinaduwena, Isabenö Jo̧ma ökwödönö yöawinobe iteda wei̧, iwene ökwöla okwatjö ökwöinö, ja̧danö ja̧ ökwödönö yöawina jawa, inaba döbalatajanö i̧wȩyudinobe.

¹¹ Ja̧danö, cuarenta mölebi, cuarenta yö̧tebi jobe mösa'onö chö̧jaja̧ ikenama, Isabenö Jo̧ma ja̧ wȩyukwaba ötjönö iyinobe, ja̧bö kwö̧jaduwobö wȩi̧ wȩyukwabama.

¹² Ja̧danö iyajo̧, Isabenö Jo̧ma ötjönö weinobe, –A̧la̧ibi, juluwanö belö yutubajö, kwömöledö israel jojodö tjö̧jobekwö da̧ji̧. Jau Moises, kwömöledö Egipto nijitjö baikwö ökibajawö̧ma, jwiinö sulabenö ja̧tjajabe, juluwanö jobadönö wetina kabatibö, o̧'wo jawa orotjö tjotidajabe, jo̧kwajabetjö̧ juluwanö tjö̧jobekwö yutuköbajo, –jö̧ba̧lö weinobe.

¹³ —Ju'wibi ja̧ möle Isabenö Jo̧ ötjönö yöa̧lina yötawakwö chömöledö, sulabenö ja̧köbaduwiökwe yöa̧linama: –Moises, bidö israel jojodönö chedajabe, isabenö tjuu 'dibadö a̧ja̧kwöködö tjö̧ji̧ma.

¹⁴ Jo̧kwajabetjö̧ jobadönö tjökeba̧loko Moises, ja̧danö tjöbeba̧lökönö kwö̧jonö, jwiinö jobadönö söbebö lotakwo̧sa, jobadötjö bakwo̧bi ö̧jibökenanö baibanö. Jemi ikenama, jobadönö söbebö lobajo̧, jobadö chömöledö tjö̧jo jö̧tja̧linemi ökwö Moises kwitji̧mu tupadanö jojodönö ötjö chömöledö bakibaduwanö 'da̧batö chujunocha. Ja̧danö, ökwö kwitji̧mu tupanö jojodötjö israel jojodö tjujulutjö bajalekwönönö inesö juluwaso batjibanö pjatatocha, ja̧danö israel jojodö tjö̧ba̧jekwi̧tjö bajalekwönönö ba̧jekwaso batjibanö pjatatocha, –jö̧ba̧lö yöa̧linobe Isabenö Jo̧ma.

¹⁵ —Jejenö yöa̧li̧tjö̧, juluwanö jalachibö jobetjö yutuchajijatö, kwö̧jaduwobekwö. Ja̧danö jejenö yutuchajonö, mösa'oma ökwölanö ubinobe, ja̧danö yutubajö, Dios wei̧ wȩyukwaba chömamijunö do̧ba̧lö yutuchajijatö.

¹⁶ Ja̧danö, yutubajo̧, chedijatö, isabenö Dios yöa̧laja̧danö, kwuluwo̧duwi Isabenö Jo̧ Dios wei̧ a̧ja̧kwökönö, pakaya itji̧ o̧'wo jawa orotjö kwotidinaduwama. Jau chömöledö, Isabenö Jo̧ma jweinö ökwödönö o̧'wo jawa kwotidaduwokobö weinajayonö, juluwanö jo̧ba wei̧ kakatibinaduwobe.

¹⁷ Ja̧danö, sulabenö o̧'wo jawa kwotidaduwaja̧ edajo̧, kwöba a'odwuwitjö ötjöma döbalataja Dios wei̧ wȩyukwaba che'ewabama nijakwö ikwö lotijatö, Dios wei̧ wȩyukwaba 'dalachajibanö.

¹⁸ —Jemi ikenama ajayinö Isabenö Jo̧ öba a'o chöbamatinadanö, yemidanö chöba nijakwö Isabenö Jo̧ öba a'o bamatö chö̧bijatö. Kwakwawa kwökönö, ja̧danö ojwiyo owökönö, jobe cuarenta mölebi, cuarenta yö̧tebi chö̧bijatö, Diosnö abeba̧lö. Jau chömöledö, ökwödöma isabenö nöinö sulabenö ja̧köbinaduwobe. Isabenö Jo̧ inesö öpöjödi̧ jawa sulabenö ja̧bö, ökwödönö ödameakwobö ja̧köbinaduwobe, ja̧danö jejenö ja̧köbinaduwi̧tjö̧,

¹⁹ yetabijatö, –Isabenö Jo̧ma israel jojodönö ödameakwi̧ma, jobadönö söbebö loenanö baibanö ödameakwena, –jö̧ba̧lö yetabijatö. Jo̧kwaijayonö, ja̧ mölebi ökwödönö lȩlöjinö edobö atebökwe a̧ja̧kwinobe Isabenö Jo̧ma.

²⁰ Ja̧danö ja̧ möle Aaronnöbi jwiinö ödameakwinobe Isabenö Jo̧ma, jo̧banö kwabö loobö jö̧a̧lenanö baibanö. Jo̧kwaijayonö Aaronnöbi lȩlöjinö edobö atebijatö, ja̧danö atebökwe jo̧banöbi lȩlöjinö edinobe.

²¹ —Ja̧danö chömöledö, inesö Dios öpöjödinö sulabenö kwotidinaduwökwe pakaya itji̧ o̧'wo jawa edajo̧, ötjöma o̧'wo jawa juwö lotijatö, ja̧danö juwö lobajo̧, pjewö̧ko̧pja̧da baibanö 'do'dochijatö. Ikenama ja̧ o̧'wo jawa iso̧pja ojwenö ikwö lotijatö, mösa'otjö isuwödönö.

²² —Jemi ikenama yemidanöbi, yemidanöbi kwuluwo̧duwi Isabenö Jo̧ ökwödönö ödameakwobö ja̧köbinaduwobe chömöledö, Taberatjöbi, Masatjöbi, Quibrot Hatavatjöbi.

²³ Ja̧danö ju'wibi Cades Barneabe dichibaja̧ ikenama, Isabenö Jo̧ ökwödönö, –Tjo̧wi, babe kwiteboduwi ökwödönö chiyakwa̧ nijibe 'ya̧duwi, kwiteboduwi baibanö jobe kwö̧jaduwobö, –jö̧ba̧lö weenama, yemidanö kwuluwo̧duwi Isabenö Jo̧ Dios wei̧ kwöpöjödinaduwobe chömöledö. Jau chömöledö, Dios yöawi̧ kwösödaduwo jö̧ka̧linaduwobe, –Yöbawö ujuninadanö isabenö pjaatakwo̧, –jö̧ba̧lö, jo̧kwaijayonö yöbawö ujunina kwöpöjödinaduwobe, ja̧danö wei̧ kwa̧ja̧kwinaduwokobe.

²⁴ Jau chömöledö, la'akatjöda Isabenö Jo̧ wei̧ öpöjödadöja, ökwödönö ajayinö chöwaisinelö babe möle baibanö, jo̧kwajabetjö̧ la'akatjöda kwomukwataduwoko, –Otiwadö dö̧jiökwe ditebo iyo̧ Diosma, –jö̧ba̧lö.

²⁵ —Jau chömöledö, sulabenö ja̧köbaduwiökwe, Isabenö Jo̧ ökwödönö söbebö loobö jö̧a̧linobe, jo̧kwajabetjö̧ cuarenta mölebi yö̧tebi jo̧ba öba a'o ba̧nö ateba̧lijatö ökwödönö. Ja̧ ateba̧lina jawa baikwö yötawaduwakwö chömöledö:

²⁶ Isabenö Jo̧nö abebö yöta̧lijatö, –Chuluwo̧ Isabenö Jo̧ Dios, bidö israel jojodöma, ökwöda kwömöledö, ökwöda inesö kwujulunö, kwömöledö batjibanö Egipto nijitjö labebö ökibinawö̧. Jo̧kwajabetjö̧, ökwöda kwömöledötjobetjö̧, jobadönö söbebö loköboko.

²⁷ Jau chuluwo̧, bidö tjuu 'dibadö a̧ja̧kwökönö tjö̧ji̧bi, sulabenö ja̧badö tjö̧ji̧bi, babe sulabenö ja̧tja̧ja̧bi omukwatökönö, tja'dödö kwömayedöbinadö Abrahamnöbi, Isaacnöbi, Jacobnöbi kwomukwato, ja̧danö jobadönö omukwatö tji̧tji̧mu tupadanö jojodönö söbebö loköboko chuluwo̧.

²⁸ Jau chuluwo̧, jobadönö söbebö loköbitjö̧ma, Egipto jojodöma söbebö loköbaja̧ wene tja̧ja̧kwena, ja̧danö a̧ja̧kwö yötja̧lena, Aaa, Isabenö Jo̧ma ujuluwinokobe, yöbawö ujuninemi tjichibanö israel jojodönö öiboböma, jö̧ba̧lö. Ja̧danö tjitebotjö lakebina jawa yötja̧lena, Isabenö Jo̧ma israel jojodönö öpöjödinobe, ja̧danö jwiinö öpöjödinobetjö̧, ditebotjö jojodö deobe öibinobe, jobe jojodö deobe ja̧nö ö'wö batjibakobetjö̧, jö̧ba̧lö yötja̧lena chuluwo̧. Jo̧kwajabetjö̧ jejenö omukwatö yötja̧lapji jö̧ba̧lö, israel jojodönö söbebö loköboko.

²⁹ Jau chuluwo̧, jobadö israel jojodöma ökwöda kwömöledö, okobe deinö bö̧je jojodötjö, jobadö israel jojodöda kwömöledö tjö̧jobö 'da̧batö kwujuninawö̧ma chuluwo̧, ja̧danö ökwöda inesö kwujulunö, jobadönö labebö ökibijatö Egipto nijitjö chuluwo̧, jo̧kwajabetjö̧ jobadönö söbebö loköboko, –jö̧ba̧lö Diosnö atebijatö, ökwödönö söbebö loobö jö̧a̧lenama, —jö̧ba̧lö yöawinobe Moisesma israel jojodönö.