Deuteronomio 7 - Dios Iwene

Ökwödö israel jojodöma, Dios iteda ömöledö bakibaduwanö 'da̧batö ujuninawö̧ja jö̧ba̧lö Moises yöwawina jawa

¹ Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Diosma ökwödönö öibakobe, tekachaduwakwa̧ nijibe, jobe tebachajadö kwiteboduwi baibanö kwö̧jaduwobö. Ja̧danö, köbaduwi a'otjö, jelemutjö dötölataja tjitebokwena jojodönö a'dewö loakobe, hititas jojodönöbi, gergeseos jojodönöbi, amorreos jojodönöbi, cananeos jojodönöbi, ferezeos jojodönöbi, heveos jojodönöbi, jebuseos jojodönöbi. Jobadöma kwujuluduwitjö bajalekwönönö juluwadö, ja̧danö kwö̧ba̧jȩkwaduwi̧tjö bajalekwönönö ba̧jȩkwadö chömöledö,

² jo̧kwaijayonö kwuluwo̧duwi Isabenö Jo̧ Diosma ökwödönö iyakobe, jobadönö kwujuluwaduwobö chömöledö, ja̧danö jejenö kwujuluwaduwobö pjaatena, baikwö wetaduwakwö chömöledö: Jwiinö jobadönö söbebö loköbaduwobö ja̧kobe. Jobadökwö dösölö̧jinö ölakwabikwawökönö kwö̧jaduwakwa̧ wenema jobadökwö yöbawö kwujunaduwoko, ja̧danö jobadönö lȩlöjinöma kwedaduwoko, jwaikwöda kwabö loböda jobadönö söbebö loköbaduwo, bakwo̧bi ö̧jibökenanö.

³ Jobadökwö ja̧nö, jobadötjö kwilekwamuduwi batjibanö kwemaduwoko chömöledö, kwitji̧muduwi ya̧dönö jobadö tji̧tji̧munö tjemobö webökönaduwi, ja̧danö tji̧tji̧mu ya̧dönö kwi̧tji̧mu tjemobö webökönaduwi.

⁴ Jau chömöledö, kwitji̧muduwi jobadö tjitji̧munö tjemobö weköbaduwitjö̧ma, jobadöma kwitji̧muduwinö ötjibena, ötjönö kabatibö, idöda tjösödawö̧nö tjösödobö, ja̧danö jejenö ja̧köbaduwiökwe, Isabenö Jo̧ma ökwödö israel jojodönö ödameakwena, ja̧danö juluwanö ökwödönö söbebö loena.

⁵ —Jejenö baledapji jö̧ba̧lö, baikwö wetaduwakwö: Tjösödawö̧nö iyawemi 'dobö pjolö loköbaduwo, ja̧danö tjösödawö̧nö ösödakwawa inawasa'o 'dobö 'dalachajibanö loköbaduwo, ja̧danö tjösödoko Aseranö ösödakwa'o towi jawa o'ijubi jubö loköbaduwo, ja̧danö tjösödawö̧ o̧'wo jawanö juwö loköbaduwo.

⁶ Ja̧ tjösödi̧ jawa söbebö lobö, wainö kwö̧jaduwobö jo̧be chömöledö, ökwödöma kwuluwo̧duwi Isabenö Jo̧ Dios ömöledököbaduwobetjö̧. Jau chömöledö, okobe deinö bö̧jȩ ba̧kwemeachibanö ju̧kwadötjö, kwuluwo̧duwi Isabenö Jo̧ Diosma ökwödö israel jojodönöda 'da̧batö ujuninobe, iteda ömöledö, ile niebawö̧ ömöledö bakibaduwobö, jo̧kwajabetjö̧ ju'wedö sulabenö tjösödi̧tjö wainö 'da̧bachibö kwö̧jaduwobö jo̧be.

⁷ —Chömöledö, Isabenö Jo̧ ökwödönö omudawö ujunina kwomukwataduwo. Ju'wedö bö̧jȩ jojodötjö bajalekwönönö kwö̧ba̧jekwachaduwiökwe, ökwödönö pjaatobö omudawö ujuninaji̧? Ja̧maökö chömöledö, kwöwaisaduwa, ju'wedötjö baikwönönö o̧bukwedöda kwö̧jaduwonö ökwödönö omudawö ujuninobe, jö̧tö?

⁸ Baikwö yötawaduwakwö chömöledö, Isabenö Jo̧ ökwödönö ile niebobetjö̧, ja̧danö ökwödönö pjaatakwa̧ wene kwa'dödönö yöbawö ujuninobetjö̧, ökwödönö pjaatobö omudawö ujuninobe chömöledö. Jo̧kwajabetjö̧ Egipto niji la'aka luwo̧ Faraon ömöayedö kwö̧jinaduwelö ökwödönö laebinobe Isabenö Jo̧ma, iteda inesö ujulunö ökwödönö Egiptotjö öibinobe, Faraon ujulutjö kwö̧jibaduwinö.

⁹ —Ja̧danö chömöledö, jejenö pjaatinobetjö̧, baikwö kwöwaisaduwobö jo̧be kwuluwo̧duwi Isabenö Jo̧ Diosnö, –Dösödökwema isabenö Diosbo̧, –jö̧ba̧lö, ja̧danö –Dösödökwe Diosma isabenö yöbawö ujuninadanö ja̧akwo̧, –jö̧ba̧lö. Ja̧danö, ju'wibi kwöwaisaduwobö jo̧be, –Diosnö ösödö, wei̧danö a̧ja̧kwö ju̧kwadönö ile nibebo̧ Diosma, ba̧kwelöjatebö 'dö̧ibajökenanö jobadönöbi, tji̧tji̧mu tupadanö jojodönöbi ile nibebo̧, –jö̧ba̧lö.

¹⁰ Ja̧danö ju'wibi kwöwaisaduwobö jo̧be, –Diosnö öpöjödadö tjöpöjödiökwe, balekwa mikwa öpöjödadönö lȩbebo̧ Diosma, juluwanö jobadönö lȩbebö, söbebö loakwo̧, –jö̧ba̧lö kwöwaisaduwobö jo̧be.

¹¹ Jejenö bo̧ kwuluwo̧duwi Diosma chömöledö, jo̧kwajabetjö̧ ö'wiyakwawönö Dios wei̧ a̧ja̧kwö kwö̧jaduwo, ja̧bö kwö̧jaduwo jö̧ba̧lö wei̧bi, ju'wi wei̧bi. Ja̧ Dios wei̧ jawa babe mölȩ webö yötawaduwakwö chömöledö, ja̧danö isabenö teada̧lönö kwö̧jaduwobö jo̧be, wei̧danö ja̧bö kwö̧jaduwakobetjö̧, —jö̧ba̧lö yöawinobe Moisesma, israel jojodönö.

Dios wei̧ kwa̧ja̧kwaduwitjö̧ma isabenö Dios pjaatakwo̧ jö̧ba̧lö Moises yöawina jawa

¹² Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Diosma kwa'dödönö yöbawö ujuninobe, jobadönöbi, tji̧tji̧mu tupadanö jojodönöbi ile nibebö pjaatakwa̧ wenema, ja̧danö baikwö yötawaduwakwö: Ökwödönö yötawi̧ Dios wei̧ teada̧lönö a̧ja̧kwö kwö̧jaduwitjö̧ma, Diosma isabenö ökwödönö ile nibebö pjaatakobe, jobadönö yöbawö ujuninadanö.

¹³ Jau chömöledö, ökwödönö ile nibebö, otiwanö pjaatakobe. Kwö̧ba̧jȩkwachaduwinö, ba̧jȩkwadö kwitji̧muduwinö 'yakebaduwobö pjaatakobe. Ja̧danö kwöbatjiju otiwanö pokwobö pjaatakobe, nöinö kwakwawabi, ubasobubi, olivo o̧tesobubi kwujuna̧laduwakobetjö̧. Ja̧danö kwajwimu pakayadönöbi, obejadönöbi tjö̧ba̧jekwachobö pjaatakobe, ba̧jȩkwadönö kwajikwaduwakobetjö̧. Jau chömöledö, Diosma kwa'dödönö yöbawö ujunibe, niji ökwödönö iyakwa̧ wenema, ja̧danö wei̧ a̧ja̧kwö kwö̧jaduwitjö̧ma, jejenö otiwanö iyakwa̧ nijinö kwö̧jaduwobö pjaatakwo̧.

¹⁴ Jau chömöledö, okobe deinö ju'wedö bö̧jȩ ba̧kwemeachibanö ju̧kwadötjö bajalekwönönö ökwödönöda pjaatena, ja̧danö jejenö pjaatobetjö̧, bakwo̧bi, bakwujubi kwitji̧muduwi debadö kwö̧jaduwökena, ja̧danö kwa̧jwi̧muduwitjö̧bi tji̧tji̧mu debadö deena, wei̧ a̧ja̧kwö kwö̧jaduwobetjö̧.

¹⁵ Ja̧danö ökwödönö tjöbeba̧lö pjaatakobe Isabenö Jo̧ma, tjö'wöchi̧tenia ökwödö kwö'wöchaduwapji jö̧ba̧lö. Jau chömöledö, kwöwaisaduwa Egipto nijitjö inesö tjö'wöchina jawama, jö̧tö? Ja̧ tjö'wöchi̧ jawa kwö'wöchaduwapji jö̧ba̧lö, otiwanö tjöeba̧lakobe Diosma, jo̧kwaijayonö ja̧tjö ökwödö kwö'wöchaduwokonö, okobe deinö kwöpöjojodöda ja̧jaye tjö'wöchobö weakobe, ökwödönö pjabatö.

¹⁶ —Chömöledö, kwiteboduwibe kwichibaduwenama, kwuluwo̧duwi Isabenö Jo̧ Diosma iyakobe, jobe ju̧kwadönö kwujululuwadobö, ja̧danö jejenö kwujuluwaduwobö iyenama, jwiinö jobadönö söbebö loköbaduwobö ja̧kobe. Jau chömöledö, lelö̧jinöma edökönaduwi jobadönö, ja̧danö tjösödawö̧nö ösödökönaduwi, 'daliwadanö kwö̧libaduwapji jö̧ba̧lö, —jö̧ba̧lö yöawinobe Moisesma.

¹⁷ Tupakwö yöawinobe Moisesma, israel jojodönö: —Chömöledö, kwiteboduwinö ju̧kwadönö edö, yekabiduwoko, –Ayö, bidöma ökwödötjö bajalekwönönö ba̧jȩkwadö, dakwö jobadönö juluwö, tjitebo 'dödebakwajö, –jö̧ba̧lö.

¹⁸ Jau chömöledö, jobadönö yekabiduwoböma jwiobe, baikwö yötawa: Kwuluwo̧duwi Isabenö Jo̧ Dios Faraonnöbi, ju'wedö Egipto nijinö ju̧kwadönöbi ujuluwina jawa kwomukwataduwo chömöledö.

¹⁹ Ökwödöma kwöbajaleduwinö kwedinaduwobe usula tjemawinö Dios lȩebinama, ja̧danö iteda ujulu i̧sȩbö jojodö edajitjökö jawa i̧sebina kwedinaduwobe, ja̧danö iteda ujulunö jobadökwö ölakwabikwawö ujuluwina kwedinaduwobe. Jau chömöledö, ja̧ jawa i̧sebö, kwuluwo̧duwi Isabenö Jo̧ Diosma Egipto nijitjö lakebaduwinö öibinobe, ja̧danö isabenö yötawaduwakwö, jobadö Egipto jojodönö ujuluwinadanö babe yekabiduwawö̧nöbi ujuluwakwo̧.

²⁰ Ja̧danö ju'wibi ja̧akobe kwuluwo̧duwi Isabenö Jo̧ Diosma, bajwö̧nö weakobe, jwiinö yetjaibanö. Jejenö kwöpöjojodöduwinö ujuluwakobe chömöledö, ji̧bajadöbi, döbibajadöbi okobe deinö debö tji̧'yenanö baibanö.

²¹ —Jobadönö yekabiduwoböma jwiobe chömöledö, baikwö yötawa: Inesö okobe deinö yetjaibo jö̧tja̧lökwema, ökwödö kwuluwo̧duwi Isabenö Jo̧ Diosda chömöledö, ja̧danö jo̧bada ökwödökwö ö̧jobetjö̧, ju'wedönö yekabiduwobö jwiobe.

²² Ja̧danö chömöledö, kwuluwo̧duwi Isabenö Jo̧ Diosma tjo̧'omanö kwöpöjojodönö kwöba a'oduwitjö a'dewö loakobe. Juluwanö bakobenö okobe deinö jobadönö kwujuluwaduwoböma weökakobe, niji suli̧ waekwapji jö̧ba̧lö, baikwö yötawa: Juluwanö ökwödö israel jojodö ina o̧bukwedöda kwö̧jaduwonö, okobe deinö kwöpöjojodö debö tji̧'yitjö̧ma, jelobekwena jojodö deena. Ja̧danö jejenö jojodö deobetjö̧, tebonö ju̧kwadö labidöma tjö̧ba̧jekwachibena, ja̧danö tjö̧ba̧jekwobetjö̧ kwiteboduwi labena.

²³ Jo̧kwaijayonö kwuluwo̧duwi Isabenö Jo̧ Diosma isabenö tjo̧'omanö jobadönö bakwasokwena kwujuluwaduwobö pjaatakobe. Jwiinö yetjaibobö weakobe, bajaliyanö okobe deinö jobadönö söbebö loköbaduwenanö kabatö.

²⁴ Ja̧danö tjuluwedö inesö la'aka luwedönöbi kwujuluwaduwobö weakobe, jadanö jejenö kwujuluwaduwobö weenama, jobadö luwedönöbi tjömöledönöbi kwabawö loköbaduwo, tji̧tji̧mu tupadanö jojodötjö bakwo̧bi tjö̧jibökönö. Isabenö jobadö kwöpöjojodötjö bakwo̧bi kwöba a'oduwi ö̧joböma jwiakobe, okobe deinö jobadönö kwabawö loköbaduwenanö kabatö.

²⁵ —Ja̧danö jobadö tjösödawö̧ o̧'wo jawanöbi söbebö loköbaduwo, ökwölanö juwö loköbaduwo tjösödawö̧ o̧'wo jawanö. Ja̧danö, o̧'wo jawanö tjö̧nönawi̧ orobi, platabi lo̧be kwedaduwijayonö, ja̧ jawa kwujuna̧laduwotö jö̧ba̧lö ösödökönaduwi. Jau chömöledö, o̧'wo jawajaye jawama jwiinö öpöjödobe kwuluwo̧duwi Isabenö Jo̧ Diosma, jo̧kwajabetjö̧ kwemaduwoböma ösödökönaduwi, ökwödönö 'daliwadanö baibapji jö̧ba̧lö.

²⁶ Ja̧danö inesö suli̧ o̧'wo jawanö kwejuduwibe tebatökönaduwi chömöledö. Diosma ja̧jaye jawa 'da̧batö ujuninobe, söbebö lotjakwa̧ jawa, jö̧ba̧lö, jo̧kwajabetjö̧ ja̧ jawa kwemaduwitjö̧ma, ökwödönöbi söbebö lotjakwa̧wö̧ bakibaduwanö 'da̧batö ujunakobe. Isabenö ja̧jaye jawa kwöpöjödaduwobö jo̧be chömöledö, –Inesö suli̧ jawa, –jö̧ba̧lö, Diosma ja̧jaye jawa söbebö loawa weobetjö̧, —jö̧ba̧lö yöawinobe Moisesma, israel jojodönö.