Deuteronomio 6 - Dios Iwene

Diosnöda ösödö kwöjaduwo jö̧ba̧lö Moises yöawina jawa

¹ Tupakwö yöawinobe Moisesma, israel jojodönö: —Chömöledö, kwuluwo̧duwi Isabenö Jo̧ Diosma ötjönö weinobe, iteda wei̧ jawa ökwödönö chö̧bajadobö, kwiteboduwi ja̧kwa̧ nijinö ja̧nö, a̧ja̧kwö kwö̧jaduwobö. Ja̧danö, babema juluwanö ojwe pebibö, kwiteboduwinö kwö̧jaduwobö tekachaduwakwedöja chömöledö, jo̧kwajabetjö̧ Dios chö̧ba̧jadobö weinadanö, baikwö yötawaduwakwö Dios wei̧ma, a̧ja̧kwö kwöjaduwo jö̧ba̧lö.

² Jau chömöledö, Dios wei̧ jawa chö̧ba̧ja̧daduwakwö, ba̧kwelöjatebö ökwödöbi, kwitji̧muduwibi, jobadö tji̧tji̧mubi kwuluwo̧duwi Isabenö Jo̧ Diosnö yebabinö omukwatö kwösödaduwakobetjö̧, ja̧danö wei̧ ösödö, jwaikwöda ina 'ya̧ka̧laduwayi okobe jwiinö wei̧danö ja̧bö kwö̧jaduwakobetjö̧. Jejenö a̧ja̧kwö kwö̧jaduwobö isabenö mikwawobe chömöledö, a̧ja̧kwö kwö̧jaduwitjö̧ma lekwe möle otiwanö kwö̧jaduwakobetjö̧.

³ Jo̧kwajabetjö̧ baikwö yötawaduwakwö ökwödö israel jojodönö, yötawi̧ jawa otiwanö kwa̧ja̧kwaduwo, ja̧danö Dios wei̧ a̧ja̧kwajadö, teada̧lönö omukwatö kwö̧jaduwo, Dios wei̧danö ja̧bö kwö̧jaduwakobetjö̧. Jau chömöledö, da'dödö tjösödinökwe Isabenö Jo̧ Diosma ökwödönö yöbawö ujuninobe, inesö otiwemi, ajikwakwawedöbi otiwanö tjöbötjachemi, ja̧danö batjobi otiwanö wa̧jemi niji ökwödönö iyobö, jö̧tö? Ja̧danö, isabenö jo̧ba wei̧ a̧ja̧kwö kwö̧jaduwobö jo̧be, iyakwa̧ nijinö otiwanö kwö̧jaduwakobetjö̧, ja̧danö jobe otiwanö ja̧nö, jwiinö kwö̧ba̧jekwachaduwakobetjö̧. Jobekwö yöbawö ujuninobe Diosma chömöledö, jo̧kwajabetjö̧ isabenö a̧ja̧kwö kwö̧jaduwobö jo̧be.

⁴ —Chömöledö israel jojodö, a̧ja̧kwaduwitjö: Ökwödö israel jojodö dösödo jö̧da̧lökwema bakwo̧da, Isabenö Jo̧ Diosda. Jo̧bada Isabenö Jo̧ma chömöledö.

⁵ Jwaikwöda kwuluwo̧duwi Isabenö Jo̧ Diosnö ile nibebö kwösödaduwobö jo̧be chömöledö, okobe jwiinö kwo̧'woduwinö, okobe jwiinö kwomajadenö, okobe jwiinö kwujuluduwinö jwaikwöda jo̧banöda kwösödaduwobö jo̧be.

⁶ Ba̧kwelöjatebö babe ökwödönö weawa yötawi̧ omukwatö kwö̧jaduwo chömöledö, la'akatjöda kwo̧'wo jwikibaduwoko.

⁷ Kabatökönö yötawi̧ jawa kwitji̧muduwinö yökawaduwo, ja̧danö ba̧kwelöjatebö ja̧ jawa yöka̧laduwo, kwejuduwinö kwö̧jaduwenabi, jelobe kwö̧jaduwenabi, kwabobö kwöbamataduwenabi, kwa̧la̧ibaduwenabi.

⁸ Ba̧kwelöjatebö ja̧ jawa omukwatö kwö̧jaduwo chömöledö, baikwö yötawa, yötawi̧ jawa wȩyudajadö, kwöbaduwinöbi, kwömamijuduwinöbi di̧katakwawaduwo, ba̧kwelöjatebö edinö kwomukwataduwakobetjö̧,

⁹ ja̧danö kweju apjudesa'onöbi, comunidad apjudesa'onöbi kwi̧wȩyudaduwo, ba̧kwelöjatebö edö kwomukwatibaduwakobetjö̧, —jö̧ba̧lö yöawinobe Moisesma, Dios ökwödönö wei̧ma isabenö inesö mikwawi̧ jö̧ba̧lö.

Isabenö Diosnö kakatibaduwoböma jwiobe jö̧ba̧lö Moises yöawina jawa

¹⁰ Tupakwö yöawinobe Moisesma: —Chömöledö, kwuluwo̧duwi Isabenö Jo̧ Diosma kwa'dödömine Abrahamnöbi, Isaacnöbi, Jacobnöbi yöbawö ujuninobe, isabenö ökwödö israel jojodönö niji iyakwa̧ wenema, jö̧tö? Ja̧ yöbawö ujunina nijima, baikwö yötawa chömöledö, Ja̧ nijinö ida̧ökö otiwi̧ comunidadbiya jȩmi, jalobe comunidadbiyama. Ja̧ comunidad kwotidinaduwököjayonö, otiwanö jobe kwö̧jaduwobö ja̧kobe.

¹¹ Ja̧danö jobe kwichibaduwenama, ida̧ökö kwejuduwi jobe ja̧kobe, ja̧danö kwichibaduwena kwiteaduwi ida̧ökö okwa ja̧kobe, ökwödöda kwiteaduwi kwujuninaduwököjayonö, ida̧ökö ju'wedö tjununina teama ja̧kobe, kwejuduwi kwö̧jaduwakwejubiyanöma. Ja̧danö ju'wibi ojwiyo jȩatakwawemi ida̧ökö jobe ja̧kobe, ökwödö kwotidinaduwökemima. Ja̧danö ju'wibi jobetjö kwöbatjijuduwi kwujuna̧laduwakobe, kwotidinaduwököjayonö, uba batjijubi, olivo towi batjijubi kwujuna̧laduwakobe. Jobekwö ökwödönö iyakobe Diosma chömöledö, ja̧danö baikwö wetaduwakwö chömöledö: Jejenö iyajawö̧, kwo̧'wo ösöwanö kwomeawaduwinö kwukwaduwajenama,

¹² teada̧lönö kwö̧jaduwo, kwuluwo̧duwi Isabenö Jo̧nö kwo̧'wo jwikibaduwapji jö̧ba̧lö. Jau chömöledö, Isabenö Jo̧ma ökwödönö pjabatö, ju'wedö tjömöayedö kwö̧jinaduwelö Egipto nijitjö baikwö ichejebinobe, ja̧danö wene jwiinö kwiteboduwinö kwö̧jaduwenama, teada̧lönö kwö̧jaduwo, jo̧banö kwo̧'wo jwibibö kakatibaduwapji jö̧ba̧lö.

¹³ —Chömöledö, kwuluwo̧duwi Isabenö Jo̧ Diosnö yebabinö kwomukwataduwo, –Isabenö Dios wei̧ cha̧ja̧kwobö jo̧be, –jö̧ba̧lö. Jo̧banöda ösödö kwö̧jaduwobö jo̧be, ja̧danö isabenö ja̧köbaduwakwa̧ wene yöbawö kwujunaduwenama, kwuluwo̧duwi Isabenö Jo̧ iminöda wanedö yöbawö kwujunaduwo, –Yöta̧löködanö sulabenö ja̧titjö̧ma, Isabenö Jo̧ ötjönö lȩebobö jȩna, –jö̧ba̧lö.

¹⁴ —Ju'wedö tjitebokwena ju̧kwadö tjösödawö̧nö kwösödaduwoko, sule kwuluwo̧duwi Diosnöda kwösödaduwo, baikwö yötawa:

¹⁵ Kwuluwo̧duwi Isabenö Jo̧ Diosma ökwödökwö jo̧, ja̧danö ju'wibi ökwödö kwösödaduwi̧ a̧'dȩlö omukwato̧, –Chömöledö israel jojodöma ötjönöda tjösödo jö̧ba̧ladö, –jö̧ba̧lö. Jo̧kwajabetjö̧ ju'wedö tjösödawö̧nö kwösödaduwoko, kwuluwo̧duwi Isabenö Jo̧ Dios ökwödönö ödameakwapji jö̧ba̧lö, ja̧danö ökwödönö dameakwö ja̧nö, jwiinö ökwödönö söbebö loapji jö̧ba̧lö, bö̧jetjö debö kwi̧'yaduwinö.

¹⁶ —Ja̧danö sulabenö ja̧köbaduwoko, kwuluwo̧duwi Isabenö Jo̧ Dios isabenö lȩebakwojobö jö̧ba̧lö. Jau chömöledö, belö Masatjö jejenö sulabenö ja̧köbinaduwobe, Dios isabenö lȩebakwojobö jö̧ba̧lö, jo̧kwaijayonö jejenö ja̧köbinaduwadanöma ja̧köbaduwoko.

¹⁷ Jwaikwöda teada̧lönö kwö̧jaduwo, okobe jwiinö kwuluwo̧duwi Isabenö Jo̧ Dios wei̧danö ja̧bö kwö̧jaduwakobetjö̧, ju'wi weawabi, baikwö ja̧köbaduwo jö̧ba̧lö wei̧bi, jwaikwöda wei̧danö a̧ja̧kwö kwö̧jaduwo.

¹⁸ —Kwuluwo̧duwi Isabenö Jo̧ ösödi̧ jawa, Bi̧yama jwea, bi̧yama otiwa, jö̧ba̧lö ösödi̧ jawama ja̧bö kwö̧jaduwo chömöledö. Jejenö ja̧bö kwö̧jaduwitjö̧ma, isabenö otiwanö kwö̧jaduwakwedöja, ja̧danö otiwanö Dios iyakwa̧ nijibe tekachaduwena, kwiteboduwi baibanö. Jau chömöledö, Isabenö Jo̧ma kwa'dödönö yöbawö ujuninobe, inesö otiwemi niji ökwödönö iyakwa̧ma, ja̧danö Dios ösödi̧danö ja̧bö kwö̧jaduwitjö̧ma,

¹⁹ isabenö yöbawö ujuninadanö kwöpöjojodöduwinö kwabönöduwitjö a'dewö loakobe, tjiteboinemi nijinö otiwanö kwö̧jaduwobö.

²⁰ —Ja̧danö chömöledö, tupakwö kwitji̧muduwima ökwödönö abebö tja̧ja̧kwena, –Okobe jwiinö duluwo̧ Dios ökwödönö weinama, ja̧bö dö̧joböbi, ju'wi weawabi weinama, ¿tajawedö weinadaja? –jö̧ba̧lö abebö tja̧ja̧kwena. Jejenö abebö tja̧ja̧kwenama,

²¹ Baikwö kwatadaduwo chömöledö, –Damötjö ökwödöma Egipto nijinö ja̧nö, Faraon ömöayedö dö̧jijatö, jo̧kwaijayonö jejenö dö̧jemi ja'ötjö, Isabenö Jo̧ma iteda ujulunö ökwödönö Egipto nijitjö laebinobe.

²² Jau ditji̧mu, döbajale a'otjö Isabenö Jo̧ma inesö juluwi̧ jawa i̧sebinobe, döbajale jalaka baibanö inesö labi̧ jawa lȩebinobe Faraonnöbi, Faraon yöne ömöledönöbi, ju'wedö Egipto jojodönöbi.

²³ Ikenama, jobadönö lȩbebajo̧, ökwödönö baikwö ditebobe ichejebinobe, ditebo baibanö bemi niji iyobö. Damötjö da'dödönö yöawinobe, isabenö niji chiyakwo̧sa jö̧ba̧lö, ja̧danö yöbawö ujuninadanö baikwö dichibanö öibinobe.

²⁴ Ja̧danö ditebobe dichibanö öbibajo̧, Isabenö Jo̧ma bi̧ya weawa ökwödönö weinobe, Ba̧kwelöjatebö kwuluwo̧duwi Isabenö Jo̧ Diosnö yebabinö omukwatö kwösödaduwo, jö̧ba̧lö. Ja̧danö jejenö weinama, ökwödönö pjaatobö weinobe, lekwe möle otiwanö dö̧jakobetjö̧. Ja̧danö, jejenö wei̧ a̧ja̧kwö dö̧jobetjö̧, babe otiwanö dö̧jobe.

²⁵ Ja̧danö jwaikwöda okobe jwiinö bi̧ya ökwödönö wei̧ jawa, duluwo̧ Isabenö Jo̧ Dios öba a'o ja̧nö, weinadanö ja̧bö dö̧jitjö̧ma, duluwo̧ Diosma isabenö ökwödönö ösödakobe, Bidöma otiwadö, jö̧ba̧lö. –Jobekwö kwatadaduwena kwitji̧muduwinö, ökwödönö abebö tja̧ja̧kwenama, —jö̧ba̧lö yöawinobe Moisesma, israel jojodönö.