Deuteronomio 5 - Dios Iwene

Dios domulataja jawa weina Moises israel jojodönö yöawina jawa

¹ Ja̧danö, jobe Jordan ojwetjö jawo̧ ichobekwöchobe ja̧nö, Moisesma okobe deinö israel jojodönö o̧ko̧kodinobe, ja̧danö ko̧ko̧dajo̧, jobadönö yöawinobe: —Chömöledö israel jojodö, otiwanö kwa̧ja̧kwaduwo, Dios ökwödönö wei̧, ja̧bö kwö̧jaduwobö wei̧ma, babe ökwödönö chö̧ba̧jadonö. Ja̧ wei̧ma otiwanö kwöwaisachaduwo, ja̧danö waisachibajadö, jwaikwöda otiwanö wei̧danö a̧ja̧kwö kwö̧jaduwo.

² Damötjö Sinai mösa'otjö dö̧jenama, Duluwo̧ Isabenö Jo̧ Diosma ökwödönö iteda wei̧ yöbawö ujuninobe ökwödönö, –Weti̧ a̧ja̧kwö kwö̧jaduwitjö̧ma, isabenö otiwanö teada̧lö pjatatakwo̧sa, –jö̧ba̧lö, jö̧tö?

³ Jau chömöledö, sule da'dödönödama yöbawö ujuninokobe, ökwödö babe mölȩ ina 'ya̧baladönöda yöbawö ujuninobe.

⁴ —Jau chömöledö, ja̧ möle döbabiyakwena yöda̧lakwawi̧danö, mösa'otjö iwene ökwölatjö ökwöinö ökwödönö yöawinobe.

⁵ Ja̧ möle ökwödöma mösa'o yö̧ne kwichibaduwobö yekabiduwijatö, ökwöla edö yekabinaduwobetjö̧, ja̧danö jejenö yekabiduwitjö̧, ötjöma ökwödötjö Isabenö Jo̧tjö kwö'da̧deduwinö chö̧jijatö, Isabenö Jo̧ yöawi̧ ökwödönö yötawobö. Ja̧danö, jobe dö̧jonö, baikwö yöawinobe Isabenö Jo̧ma:

⁶ –Ötjöma kwösödaduwökwe Isabenö Jo̧ Diossa, usula emawö tjömöayedö kwö̧jinaduwelö Egiptotjö labebö ichejebinasa.

⁷ Ötjödasa kwösödaduwo jö̧ka̧laduwökwema, jelo̧ tjösödökwe bakwo̧nöbi kwösödaduwoko.

⁸ –Ökwödöma o̧'wo jawa kwotidaduwoko, kwösödaduwoböma, mölejebe ju̧kwadötjö jelo̧ o̧'wo jawabi, bö̧jenö ju̧kwadötjö jelo̧ o̧'wo jawabi, ojwenö ju̧kwadötjö bakwo̧ o̧'wo jawabi otidö kwösödaduwoko.

⁹ La'akatjöda o̧'wo jawa bȩbachibö kwösödaduwoböma jwiobe, baikwö yötawa: Ötjödasa Isabenö Jo̧ Diosma, ja̧danö kwösödaduwi̧ a̧'delo̧sa, ötjönöda kwösödaduwo jö̧ba̧lö. Ju'wibi isabenö lȩbebo̧sa, baikwö yötawa: Ötjönö öpöjödadönö isabenö lȩbebo̧sa̧, öpöjödadönöbi, tji̧tji̧munöbi, tjö̧'dödönöbi, tjö̧'dö̧dö tji̧tji̧munöbi lȩbebo̧sa, tja'dödö ötjönö tjöpöjödobetjö̧.

¹⁰ Jo̧kwaijayonö ötjönö öpöjödadönö lȩtebijayonö, jwaikwöda ösödö pjabato̧sa, ötjönö ösödö, weti̧danö ja̧bö ju̧kwadönöma. Jau, isabenö jobadönö pjabato̧sa, baikwö yötawa, ötjönö ösödadönöbi, tjitji̧munöbi, tjö̧'dö̧dönöbi, tupakwö bajalenö la'akatjöda 'dö̧jibajökenanö jobadönö pjatatakwo̧sa, tja'döma ötjönö ösödö weti̧ a̧ja̧kwö ö̧jinobetjö̧.

¹¹ –Ja̧danö, ju'wibi wetaduwakwö: Ötjö kwuluwo̧duwi Isabenö Jo̧ Dios chimima sulabenö omukwatö yöka̧laduwoko. Ötjö Isabenö Jo̧ma, chimi sulabenö omukwatö yöba̧lo̧nö lȩtebakwo̧sa.

¹² –Ja̧danö ju'wibi wetaduwakwö: Ötjö kwuluwo̧duwi Isabenö Jo̧ Diosma wainö 'da̧batö chujunajabe otikwökö mölema, Ja̧ möle kwotidaduwoko, jö̧ba̧lö. Jo̧kwajabetjö̧ wetinadanö ja̧ möle wainö 'da̧batö kwujunaduwo, Duluwo̧ Dios wei̧ a̧ja̧kwö dö̧jaduwo, jö̧ba̧lö.

¹³ Jau, jelemutjö bakwöta möle baledibanö, okobe jwiinö kwotidaduwo jö̧ka̧laduwi̧ kwotidaduwobö jo̧be.

¹⁴ Jo̧kwaijayonö, jelemutjö̧ dötölataja mölema kwotidaduwobö jwiobe. Ja̧ otikwökö mölema, otidökönö ötjö kwuluwo̧duwi Isabenö Jo̧ Diosnö kwomukwataduwobö ji̧ möle, jo̧kwajabetjö̧ ja̧ möle kwotidaduwobö jwiobe. Jau, ökwödöbi, kwitji̧muduwibi, kwömöayedöbi, kwotidaduwobö jwiobe, ja̧danö ju'wibi ja̧ möle kwajwimu pa̧ka̧yadöbi, bu̧lu̧döbi, ju'wedö kwa̧jwi̧mubi tjotidobö jwiobe, ja̧danö israel jojodöböködö, jelobetjö ichajadö kwiteboduwinö ju̧kwadöbi tjotidobö jwiobe otikwökö mölema, –jö̧ba̧lö weinobe. Jau chömöledö, kwömöayedö ömadöbi, ya̧döbi otidökönö ja̧ möle tjö'wachobö jo̧be, baikwö yötawa:

¹⁵ Jobadö babe kwömöayedö tjö̧ji̧danö, damötjö̧ ökwödöbi Egipto jojodö tjömöayedö kwö̧jinaduwobe, usula emawö. Jo̧kwaijayonö tjömöayedö kwö̧jinaduwelö, kwuluwo̧duwi Isabenö Jo̧ Diosma, iteda inesö ujulunö ökwödönö labebö, baikwö ichejebinobe. Jo̧kwajabetjö̧, jejenöobetjö̧, okobe deinö ökwödöbi, kwömöayedöduwibi otikwökö möle otidökönö kwö̧jaduwobö jo̧be.

¹⁶ —Tupakwö weinobe Diosma chömöledö: –Ötjö kwuluwo̧duwi Isabenö Jo̧ Dios ökwödönö wetinadanö, Kwabe'donö, kwojo'donö otiwanö omukwatö yebabinö kwö̧jaduwo. Jejenö otiwanö kwomukwataduwo, lekwe wene jwiinö kwuju̧kwaduwakobetjö̧ niji chiyakwemi nijinö, ötjö kwuluwo̧duwi Isabenö Jo̧ Dios kwiteboduwi baibanö chiyakwemima.

¹⁷ –Ja̧danö, ju'wibi wetaduwakwö: Jojodönö kwabö loköbaduwoko.

¹⁸ –Ja̧danö ju'wibi wetaduwakwö: Ju'wedö tji̧lekwamukwö sulabenö kwö̧jaduwoko.

¹⁹ –Ja̧danö ju'wibi wetaduwakwö: Kwönaukwaduwoko.

²⁰ –Ja̧danö ju'wibi wetaduwakwö: Kwömöledöso̧nö omöna yöka̧laduwoko, sulabenö ja̧ököjayonö, Bitema sulabenö ja̧bo̧, jö̧ba̧lö.

²¹ –Ja̧danö ju'wibi wetaduwakwö: Kwömöledöso̧ ilekwonö ösödöma kwomukwataduwoko, Jo̧ba ilekwonö ötjöda chujuna̧lowe, jö̧ba̧lö. Ju'wibi, kwömöledöso̧ ejubi, öbatjobi, ömöayedönöbi, ajwi̧mu pakayadönöbi, bu̧lu̧dönöbi, ju'wi jaye ujuna̧litjöbi ösödö kwomukwataduwoko, Ötjöda chömöledöso̧ ujuna̧li̧ chujuna̧lowe, jö̧ba̧lö –weinobe Diosma.

²² —Jau chömöledö, jobekwö laebobe Isabenö Jo̧ yöawinama, okobe deinö ökwödö israel jojodö mösa'o badeibö kwö̧jaduwenama. Jejenö yöawenama, ojwiyo'wo li̧nobe, ja̧danö inesö yȩa'wo li̧nobe, ja̧danö ökwöla okwatjö, kwa̧ja̧kwa̧laduwonö iwene labinö ökwöinö ja̧ domulataja weawa ökwödönö webö yöawinobe. Ja̧ domulataja jawada kwa̧ja̧kwala̧duwonö yöawinobe, ja̧danö ju'wibi döbalataja inawiyanö i̧wȩyudinobe, ja̧danö wȩyudajo̧, ötjönö iyinobe.

²³ —Ja̧danö Dios iwene yȩa'wo okwatjö ökwöobe kwa̧ja̧kwaduwenama, mösa'o ökwöla̧nö ubonö ökwöi̧ kwa̧ja̧kwaduwenama, ökwödötjö bakwasokwena luwedöma chöjobekwö kwichinaduwobe,

²⁴ Ja̧danö ichibajadö yöka̧linaduwobe: –Moises, duluwo̧ Isabenö Jo̧ Diosma iteda ujulu, iteda inesö salöinö ujuluma ökwödönö i̧sȩbajabe, ja̧danö iteda iwene ökwölatjö ökwöobe da̧ja̧kwajabe. Babe möle edö döwaisachibajabe, Dios iwene ökwöinö jojonö yöa̧lonö, debö 'yö̧könö ina 'ya̧alena, jö̧ba̧lö.

²⁵ Jo̧kwaijayonö, yedabobe, Bemi tupakwö ina jo̧ba iwene ökwöi̧ da̧ja̧kwitjö̧ma, debö di̧'yena, bola inesö Dios ö̧jemi i̧sȩkwola ökwölatjö debö di̧'yena, jö̧ba̧lö yedabobe.

²⁶ Jau Moises, okobe deinö bö̧jȩ jojodötjö bakwo̧bi deobe, 'yaba̧lo̧ Dios yöawobe ökwöi̧ a̧ja̧kwina, ina 'yaba̧lo̧ma, jo̧kwajabetjö̧ tupakwö Dios iwene ökwöi̧ da̧ja̧kwitjö̧ma, dedemi ö'wö badibena.

²⁷ Ja̧danö, jejenö yedabobetjö̧, ökwönö adebakwö Moises, Ökwöda duluwo̧ Isabenö Jo̧ Dios ö̧jobekwö jo̧dawa'ye kwi̧'yo, ökwöda okobe jwiinö yöawi̧ kwa̧ja̧kwobö. Ikenama a̧ja̧kwajo̧, okobe jwiinö duluwo̧ Isabenö Jo̧ Dios ökwönö yöawaja̧ jawa, ökwöda tupakwö ökwödönö yökawo. Ja̧danö, isabenö yökawakwa̧ da̧ja̧kwakwedösa, ja̧danö a̧ja̧kwajadö, yökawaja̧danö ja̧dakwedösa, –jö̧ba̧lö akebinaduwobe.

²⁸ —Jejenö akebinaduwiökwe, Isabenö Jo̧ma yöka̧laduwina a̧ja̧kwinobe, ja̧danö a̧ja̧kwajo̧, ötjönö yöa̧linobe Isabenö Jo̧ma: –Bidö jojodö ökwönö abebö yötja̧laja̧ma, cha̧ja̧kwajabe, ja̧danö yötawakwö, Yötja̧laja̧ma, jweinö omukwatö yötja̧lajabe.

²⁹ Isabenö yöta̧lakwö, babe yebabinö tjo̧mukwati̧danö ba̧kwelöjatebö ötjönö yebabinö omukwatö, weti̧ ja̧bö tjö̧jobö tjomukwatitjö̧ma, isabenö jwiinö otiwo jö̧a̧lena, ba̧kwelöjatebö jejenö tjomukwatowe. Ba̧kwelöjatebö jejenö omukwatö tjö̧jitjö̧ma, jobadöbi tji̧tji̧mu tupadanö jojodöbi ba̧kwelöjateböda otiwanö tjö̧jo jö̧tja̧lena. Otiwanö omukwatö yötja̧lajabe Moises.

³⁰ Babema tjö̧jobekwö ȩwa̧bijö, weköbodönö, Okobe deinö kwejuduwibe kwȩwa̧jaduwo, jö̧balö.

³¹ Jo̧kwaijayonö jobadö tjȩwa̧jonö, ökwöda ötjökwö ji̧bi, ja̧danö ökwönöda yötawocha israel jojodönö weti̧ma, ja̧bö tjö̧jo jö̧ba̧lö jobadönö weti̧ma. Ja̧danö, yötawaja̧ma, ökwöma jobadönö kwö̧ba̧ja̧dakwo̧ja, jobadönö chiyakwa̧ nijinö ja̧nö, wetaja̧danö ja̧bö tjö̧jakobetjö̧, –jö̧ba̧lö yöa̧linobe.

^32-33 —Jobekwö baledinobe chömöledö, mösa'otjö Dios iwene ökwöi̧ kwa̧ja̧kwadwuwenama. Jo̧kwajabetjö̧ isabenö yöka̧linaduwadanö kwuluwo̧duwi weina ja̧bö kwö̧jaduwobö jo̧be chömöledö, teada̧lönö kwö̧jaduwo, jwaikwöda kwuluwo̧duwi Isabenö Jo̧ Dios weina ja̧bö kwöjaduwakobetjö. Wanedö yötawa chömöledö, kwuluwo̧duwi Isabenö Jo̧ Dios ökwödönö wei̧ma: Mana öninobe, jweinö önina mananöda kwekachaduwobö, jo̧kwajabetjö̧ jweinö ja̧ma mananöda kwekachaduwobö jo̧be, kwöwaisobekwöchobebi, wajwiköbobekwöchobebi jalachibökönö. Jweinö Dios önina mananö kwi̧'yaduwobö jo̧be, debö kwi̧'yaduwapji jö̧ba̧lö, ja̧danö lekwe möle wene jwiinö Dios iyakwa̧ kwiteboduwinö kwö̧jaduwakobetjö̧, —jö̧ba̧lö yöawinobe Moisesma, israel jojodönö.