Deuteronomio 4 - Dios Iwene

Dios wei̧ a̧ja̧kwö kwö̧jaduwo jö̧ba̧lö Moises yöawina jawa

¹ Moises ina yöawinobe israel jojodönö: —Jobekwö Dios ökwödönö pjaatina jawa yötawajabe chömöledö. Ja̧danö, babema baikwö yötawaduwakwö: Ökwödönö chö̧ba̧jadobe Dios ökwödönö wei̧, ja̧bö kwö̧jaduwobö wei̧ma. Ja̧ chöba̧ja̧di̧ jawama otiwanö a̧ja̧kwö kwö̧jaduwo, ina 'yaka̧laduwayi Dios iyakwa̧ nijibe tekachaduwakobetjö̧, ja̧danö kwiteboduwi baibanö kwemaduwakobetjö̧. Jau chömöledö, kwa'dödö tjösödinökwe Isabenö Jo̧ Diosma ja̧ niji iyobe, jo̧kwajabetjö̧ isabenö jo̧ba wei̧ a̧ja̧kwö kwö̧jaduwo.

² Jwaikwöda bi̧ya ökwödönö weti̧ jawada ja̧bö kwö̧jaduwo chömöledö, ja'yubebi balewö lobökönö. Jau chömöledö, 'yayi jawakwö pjabacha̧lökönö, ja̧danö ja'yubebi söbebö lobökönö, jwaikwöda bi̧ya kwuluwo̧duwi Isabenö Jo̧ Dios wei̧ babe ökwödönö yötawi̧ jawada a̧ja̧kwö kwö̧jaduwo.

^3-4 Jau chömöledö, Baal Peortjö baledina kwomukwataduwo, ökwödö kwöbajaleduwinö kwedinaduwa jawama. Jobe ökwödö israel jojodötjö ju'wedöma o̧'wo jawa Baal ötjabökwenö tjösödinobe, jö̧tö? Ja̧danö, jejenö sulabenö tjösödiökwe, kwuluwo̧duwi Isabenö Jo̧ Diosma okobe deinö Baalnö ösödadönö söbebö loinobe, jö̧tö? Ja̧danö okobe deinö jobadö debö tji̧'yonö, okobe deinö jwaikwöda kwuluwo̧duwi Isabenö Jo̧ Diosnö ösödadöma, ina 'ya̧ba̧ladö kwö̧jaduwobe, ¿jö̧tö? Jejenö öwawinö kwedinaduwobe, –Wei̧ a̧ja̧kwöködönö lȩebonö, wei̧ ösödö a̧ja̧kwadönö tjö̧jibinö pjabato̧ Isabenö Jo̧ma, –jö̧ba̧lö, jö̧tö?

⁵ —Isabenö ökwödönö yötawi̧ a̧ja̧kwö kwö̧jaduwobö jo̧be chömöledö, baikwö yötawa: Okobe jwiinö chuluwo̧ Isabenö Jo̧ Dios ötjönö weinama, jweinö balewö lobökönö ökwödönö webö yötawobe, baikwö ja̧bö kwö̧jaduwo, jö̧ba̧lö, kwiteboduwinö kwö̧jaduwenama, Dios wei̧danö otiwanö a̧ja̧kwö kwö̧jaduwakobetjö̧.

⁶ Isabenö teada̧lönö yötawi̧ jawa a̧ja̧kwö kwö̧jaduwobö jo̧be chömöledö, suli̧ jawa öpöjödö, waisanö otiwi̧ jawada do̧balö̧ kwö̧jaduwi̧ wene öwawakobetjö̧. Jau chömöledö, otiwanö Dios wei̧ ökwödönö yötawi̧ jawa a̧ja̧kwö kwö̧jaduwitjö̧ma, ju'wedö tjitebokwena jojodöma Dios wei̧ a̧ja̧kwö kwö̧jaduwi̧ma tja̧ja̧kwakwedö. Ja̧danö, a̧ja̧kwö, ökwödönö yötja̧lakwedö, –Israel jojodöma isabenö waisanö omukwatadötjobetjö̧, Dios wei̧ otiwanö a̧ja̧kwadö, –jö̧ba̧lö.

⁷ —Isabenö ökwödö israel jojodödanöbedöma deobe bö̧jetjö̧ma chömöledö, baikwö yötawa: Ökwödö israel jojodö duluwo̧ Isabenö Jo̧ Diosma isabenö ökwödökwö yö̧ne jo̧ chömöledö, jo̧banö pjaatobö adebenama, juluwanö pjaatakobetjö̧, jö̧tö? Ju'wedö bö̧je jojodöja? Jobadö tjösödawö̧tjö̧ bakwo̧bi ö̧jobeji̧, dösödökwe Diosdanö yöne jo̧ma? Deobe chömöledö, inesö juluwadö tjitebo jojodö tjösödawö̧tjöbi deobe duluwo̧ Isabenö Jo̧danöbo̧ma chömöledö.

⁸ Ja̧danö bi̧ya ökwödönö yötawi̧, duluwo̧ Dios ökwödönö wei̧ jawa kwomukwataduwo chömöledö. Duluwo̧ Diosma okobe jwiinö iteda wei̧ jawa ökwödönö iyö weajabe, okobe jwiinö otiwanö ja̧bö dö̧jakwa̧ otiwanö döwaisakobetjö̧, jö̧tö? Ju'wedöja? Inesö juluwadö tjitebo jojodöbi jwitjobe chömöledö, ökwödö israel jojodöda inesö otiwi̧ weawa juna̧ladösa chömöledö, a̧ja̧kwö dö̧jakobetjö̧, —jö̧ba̧lö yöawinobe Moisesma, israel jojodönö.

⁹ Tupakwö yöawinobe Moisesma, israel jojodönö: —Teada̧lönö kwö̧jaduwo chömöledö, ökwödö kwedinaduwa jawama kwo̧'wo jwikibaduwapji jö̧ba̧lö. Jau chömöledö, ba̧kwelöjatebö kwo̧'woduwi jwibibökönö, ina kwö̧jaduwayi ja̧ jawa omukwatö kwö̧jaduwobö jo̧be, ja̧danö kwitji̧muduwinöbi, kwö̧'dödöduwinöbi yökawaduwobö jo̧be, jobadöbi ba̧kwȩlöjatebö omukwatö tjö̧jakobetjö̧.

¹⁰ Ja̧ kwomukwataduwo jö̧ka̧laduwi̧ yöta̧laja̧ma, bi̧ya chömöledö: Damötjö ökwödö israel jojodöma kwuluwo̧duwi Isabenö Jo̧ Dios öba a'o kwö̧jinaduwobe, Sinai mösa'otjö, jö̧tö? Jau chömöledö, ja̧ möle Isabenö Jo̧ma ötjönö weinobe, –Moises, ko̧ko̧dö kwujuno israel jojodönö, chöba a'o ja̧nö ötjö yötawi̧ tja̧ja̧kwobö, yötawi̧ a̧ja̧kwö, ba̧kwelöjatebö ina 'yatja̧layi ötjönö yebabinö ösödö tjö̧jakobetjö̧, ja̧danö ju'wibi tjitji̧munöbi ötjönö yebabinö tjösödobö tjö̧ba̧jadokobetjö̧, –jö̧ba̧lö weinobe.

¹¹ Ja̧danö, jejenö weiawö̧, ökwödöma yöne ichibö, mösa'o la'aka kwöjamatinaduwobe, Dios yöawi̧ kwa̧ja̧kwaduwobö. Jejenö mösa'o la'akatjö kwö̧jaduwenama, ökwöla ubobedanö mösa'o ubinobe, ökwöla mölejȩbe ichibanö, ja̧danö owjiyo'wo inesö yȩa'wo tjöekwinobe, mösa'o öwawökönö.

¹² Ja̧danö, jobe kwö̧jaduwonö, Isabenö Jo̧ma ökwödönö yöawinobe, iwene ökwöla okwatjö ökwöinö. Ja̧ möle Isabenö Jo̧ iwene kwa̧ja̧kwinaduwobe chömöledö, jo̧kwaijayonö iteba'oma kwedinaduwokobe, sule a̧ja̧kwöda iwene kwa̧ja̧kwinaduwobe.

¹³ Jejenö ökwödönö yöawenama, iteda ökwödönö wei̧ jawa yöawinobe: Bi̧ya weti̧ a̧ja̧kwö kwö̧jaduwitjö̧ma, isabenö ökwödönö pjatatakwo̧sa jö̧ba̧lö. Jau chömöledö, ja̧ möle iteda wei̧ domulataja jawa weawama ökwödönö yöawinobe, ja̧danö ju'wibi inaba döbalatajanö i̧wȩyudinobe.

¹⁴ Ja̧danö ja̧ möle Isabenö Jo̧ma ötjönö weinobe, okobe jwiinö ja̧bö kwö̧ja̧duwakwa̧ jawa ökwödönö ba̧ja̧dö yötawobö, ökwödönö iyakwa̧ nijinö ja̧nö, otiwanö ja̧bö kwö̧jaduwakwa̧ weawama. Jau chömöledö, kwiteboduwinö ja̧nö, ja̧bö kwö̧jaduwakwa̧ yötawobö weinobe, ja̧danö tjo̧wi, babema juluwanö ojwe pebibö, ja̧ iyakwa̧ nijibe kwichibaduwakwedöja, ja̧danö kwiteboduwi baibanö jobe kwö̧jaduwakwedöja, —jö̧ba̧lö yöawinobe Moisesma.

O̧'wo jawa ösödökönaduwi, jö̧ba̧lö Moises yöawina jawa

¹⁵ Tupakwö yöawinobe Moisesma, israel jojodönö: —Chömöledö, ja̧ möle Isabenö Jo̧ Sinai mösa'otjö yöawina möle kwomukwatibaduwo. Ja̧ möle ökwöla okwatjö Isabenö Jo̧ ökwödönö yöawenama, iteba'o kwedinaduwokobe, sule iwene ökwöi̧da kwa̧ja̧kwinaduwobe, jö̧tö? Jo̧kwajabetjö̧ ja̧ jawa omukwatö, teada̧lönö ja̧nö kwö̧jaduwo,

¹⁶ sulabenö ja̧bö o̧'wo jawa kwösödaduwakwo̧nö kwotidaduwapji jö̧ba̧lö. Jau chömöledö, o̧'wo jawa kwösödakwo̧nö kwotidaduwobö jwiobe yelösöda, jojodanö ichejekwo̧ o̧'wo jawabi, jojosujudanö ichejekwuju jo̧'wo jawabi,

¹⁷ tebonö ju̧kwadötjö bakwo̧ o̧'wo jawabi, mö köba̧ladötjö bakwo̧ o̧'wo jawabi,

¹⁸ nijinö töbawadötjö bakwo̧ o̧'wo jawabi, ojwenö ju̧kwadö bai̧ o̧'wo jawabi, bakwo̧bi o̧'wo jawa otidö kwösödaduwobö jwiobe.

¹⁹ Ja̧danö mölejȩbe edö, mölejȩnö la̧jadönö jawo̧nöbi, yö̧te jawo̧nöbi, si̧li̧'idönöbi kwösödaduwoböma omukwatökönaduwi. Ju'wedöma ö'öbönö kwomukwataduwobö öbibö yötja̧lena, –Mölejȩnö la̧jadönö dösödobö otiwa, –jö̧ba̧lö, jo̧kwaijayonö sulabenö öbibö yötja̧li̧ma ösödökönaduwi, ja̧danö jobadönö bȩbachibö ösödökönaduwi. Jau chömöledö, duluwo̧ Isabenö Jo̧ Diosma bö̧jȩ ba̧kwemeachibanö ju̧kwadönö pjabatö, jobadö mölejȩnö la̧jadönö jobe tjö̧lobö öninobe, jo̧kwaijayonö ja'yubebi jobadönö kwösödaduwobö jwiobe, Diosnöda kwösödaduwobö jo̧be.

²⁰ Jau chömöledö, damötjö̧ ökwödö israel jojodöma Egipto nijinö ja̧nö usula emawö kwotidinaduwobe, 'dii jawa otikweju otidadö tubinö usula emawö otidö tjö̧ji̧danö, jö̧tö? Jo̧kwaijayonö jejenö usula emawö kwö̧jinaduwelö lakebaduwinö ichejebinobe Isabenö Jo̧ma, ökwödö israel jojodöma iteda ömöledö bakibaduwakobetjö̧, ja̧danö babe möle ökwödöma jo̧ba Isabenö Jo̧ Diosda ömöledöja, —jö̧ba̧lö yöawinobe Moisesma, israel jojodönö.

²¹ Tupakwö yöawinobe Moisesma, israel jojodönö: —Ja̧danö chömöledö, ökwödö iteda ömöledönö ile niebobetjö̧, Isabenö Jo̧ma ötjönö ödameakwinobe, ja̧danö ötjönö yöbawö ujuninobe, –Bidö israel jojodö tjöba a'o sulabenö ja̧köbajobetjö̧, la'akatjöda Jordan ojwe pebibö, inesö otiwemi israel jojodönö chiyakwemi nijibe kwichibökakwo̧ja, –jö̧ba̧lö yöbawö ujuninobe ötjö Moisesnö.

²² Jau chömöledö, ötjöma belö babe dö̧jelö debö chi̧'yakwo̧sa, Jordan ojwe pebibökönö, jo̧kwaijayonö ökwödöma isabenö ojwe pekibaduwakwedöja, ja̧danö inesö otiwemi Dios iyakwa̧ niji̧ma, kwiteboduwi baibanö kwemaduwakwedöja.

²³ Jo̧kwajabetjö̧ teada̧lönö kwö̧jaduwo, a̧ja̧kwö kwö̧jaduwo jö̧ba̧lö kwuluwo̧duwi Isabenö Jo̧ Dios ökwödönö weina kwo̧'wo jwikibaduwapji jö̧ba̧lö. Ja̧danö teada̧lönö kwö̧jaduwo, kwuluwo̧duwi Isabenö Jo̧ Dios weöködanö, ju'wi jaye o̧'wo jawa kwösödaduwobö kwotidaduwapji jö̧ba̧lö.

²⁴ Jau chömöledö, kwuluwo̧duwi Isabenö Jo̧ Diosma, a̧'dȩlö ile nibebo̧ ökwödönö, –Ju'wedönö ösödökönö, jwaikwöda ötjönöda tjösödo jö̧ba̧ladö, –jö̧ba̧lö, ja̧danö ju'wibi ökwöla söbebö lobö ubi̧danö lȩbebo̧ kwuluwo̧duwi Diosma. Jo̧kwajabetjö̧ teada̧lönö kwö̧jaduwo, jo̧ba Diosnöda ösödö kwö̧jaduwakobetjö̧.

²⁵ —Chömöledö, kwiteboduwibe ichibajadö, jobetjö kwitji̧muduwinöbi, kwö̧'dö̧döduwinöbi kwujuna̧laduwakwedöja, ja̧danö jobe ja̧nö pöyakwö kwö̧jaduwakwedöja. Ja̧ mölebi ina jwaikwöda Dios wei̧ kwomukwataduwobö ja̧kobe chömöledö, ökwödönö lȩebapji jö̧ba̧lö. Baikwö yötawaduwakwö chömöledö: Kwiteboduwinö ja̧nö, ju'wi jaye o̧'wo jawa kwösödaduwakwo̧nö kwotidaduwitjö̧ma, jejenö ja̧bö isabenö kwuluwo̧duwi Isabenö Jo̧ Dios öpöjödi̧ jawa ja̧köbaduwena, kwuluwo̧duwi Dios ödameakwinö.

²⁶ Ja̧danö, jejenö ja̧köbaduwitjö̧ma, isabenö lȩebakwo̧ Diosma ökwödönö chömöledö. Jau chömöledö, mölejȩnö ju̧kwadöbi, bö̧jenö ju̧kwadöbi tja̧ja̧kwalonö, babe isabenö yötawaduwakwö, jejenö Dios öpöjödi̧nö o̧'wo jawa kwösödaduwobö kwotidaduwitjö̧ma, isabenö ökwödönö lȩebakobe. Jau chömöledö, babe Jordan ojwe pebibö, kwiteboduwi baibakwa̧ nijibe kwi̧'yaduwobe, jobe kwö̧jaduwobö, jö̧tö? Jo̧kwaijayonö sulabenö o̧'wo jawa kwösödaduwitjö̧ma, lekwe kwö̧jaduwökakwedöja ja̧ nijinö, o̧'wo jawa kwösödaduwitjö̧ma, lȩebakobe Isabenö Jo̧ma. Ja̧danö iyinemi nijitjö söbebö loakobe ökwödönö, jobetjö deinö bakibaduwinö.

²⁷ Jau chömöledö, ökwödönö söbebö lobö, ju'wedö tjitebokwena jojodö tjö̧'da̧de bakibaduwanö kwipjelekwachaduwinö a'dewö loakobe Isabenö Jo̧ma, ja̧danö jejenö a'dewö loawö̧ sule o̧bukwedöda debö 'yö̧könö, ju'wedö tjitebo jojodö tjö̧'da̧denö kwö̧jaduwena.

²⁸ Ja̧danö, ju'wedö tjitebonö ja̧nö, ju'wedö tjösödawö̧ diosbedö ötjabawö̧nö kwösödaduwena, jojodö tjotidinawö̧ diosbedönöda, towitjöbi, inawiyatjöbi tjotidinawö̧nö. Ja̧danö jobadö ju'wedö tjitebonö ja̧nö kwösödaduwakwa̧wö̧nö baikwö yötawa, jobadöma isabenö juluwöködö, edöbi edöködö, ja̧danö a̧ja̧kwöbi a̧ja̧kwöködö, ja̧danö kwanöbi kwöködö, ja̧danö 'dö̧batöbi 'dö̧batöködö.

²⁹ —Jau chömöledö, Diosnö ösösödökönö kwö̧jaduwiökwe, ökwödönö a'dewö loakobe, ju'wedö tjitebonö kwö̧jaduwobö. Jemi ikenama, ju'wedö tjitebonö kwö̧jaduwemi ja'ötjö, kwuluwo̧duwi Isabenö Jo̧ Diosnö omukwatö, kwisakwaduwakwedöja, ja̧danö isabenö bakwainö omukwatö, jwaikwöda jo̧banö kwisakwaduwitjö̧ma, isabenö jo̧banö kwöbadekwaduwakwedöja.

³⁰ Jau chömöledö, okobe jwiinö yötawaja̧ jawa baledenama, jwiinö kwo̧'wo tjo̧bekwö usula emawö kwö̧jaduwakwedöja, ja̧danö kwo̧'wo tjo̧bekwö ja̧nö, tjebachajö kwuluwo̧duwi Isabenö Jo̧ Diosnö kwösödaduwakwedöja, ja̧danö wei̧ kwa̧ja̧kwaduwakwedöja.

³¹ Ja̧danö chömöledö, jejenö tjebachajö Diosnö kwösödaduwiökwe, isabenö lȩlöinö edakobe ökwödönö, kwuluwo̧duwi Isabenö Jo̧ Diosma lȩlöjinö edo̧ Diosobetjö̧. Jo̧bama la'akatjöda kwa'dödönö yöbawö ujunina jawa o̧'wo jwiibökakwo̧, ba̧kwelöjatebö kwa'dödönö yöbawö ujunina jawa omukwatakobe chömöledö. Ja̧danö, yöbawö ujunina omukwatö, la'akatjöda ökwödönö le'dedibö loökakwo̧, ja̧danö la'akatjöda söbebö loökakwo̧ ökwödönö jwiinöma, ba̧kwelöjatebö ökwödötjö ji̧badö tjö̧jibobö pjaatakobe, —jö̧ba̧lö yöawinobe Moisesma, israel jojodönö.

Isabenö Jo̧ Diosda ömöledönö yöbawo̧, jö̧ba̧lö Moises yöawina jawa

³² Tupakwö yöawinobe Moisesma, israel jojodönö: —Chömöledö, Dios ökwödönö pjaatina jawa kwomukwataduwo. Dios jojodönö otidinemi möletjö, baikwö baibanö, Dios ökwödö israelnö pjaatinajaye, ju'wedö tjösödökwema ösödadönö Dios ökwödönö pjaatinadanö pjaatinaji̧? Bö̧je ba̧kwemeachibanö ju̧kwadö tjösödawö̧tjö bakwo̧bi deobe, Dios ökwödönö pjaati̧danö pjabato̧ma, jö̧tö?

³³ Jau chömöledö, Diosma ökwöla okwatjö ökwödönö yöawinobe, ja̧danö jejenö yöne ja̧nö yöawijayonö, ina 'yaka̧laduwobe, jö̧tö? Okobe deinö ju'wedö bö̧je jojodötjö, jeleso jojodö, Dios ökwöla okwatjö yöa̧li̧ a̧ja̧kwajadö, ina yaba̧ladö tjö̧jibinaji̧? Deobe, ökwödö israel jojodöda chömöledö.

³⁴ —Ja̧danö Dios ökwödönö Egipto jojodö tjö̧'da̧de kwö̧jaduwemi ja'ötjö, iteda ömöledö bakibaduwanö lakebaduwinö pjaatina kwomukwataduwo. Ja̧ ökwödönö pjaatinajaye jelo̧ tjösödökwe ömöledönö pjaatinaji̧? Tjösödawö̧tjö bakwo̧bi ju'wedö tjitebo jojodö tjö̧'da̧de ju̧kwadönö iteda ömöledö batjibobö labebö eminaji̧? Kwöwaisaduwa chömöledö, kwuluwo̧duwi Isabenö Jo̧ Diosma Egipto jojodönö lȩebinobe, ja̧danö iteda ujulunö jojodö edajitjökö jawa i̧sȩbinobe, ja̧danö iteda ujulunö jobadönö ölakwabikwawö ujuluwinobe, isabenö iteda inesö ujulu öwaetjöda öwawinö i̧sȩbinobe, ökwödö Egipto jojodötjö kwö̧jibaduwobö, jö̧tö? Ja̧jaye pjaatakwawa bö̧je jojodö tjösödawö̧tjö bakwo̧bi pjabato̧ ö̧jobeji̧? Deobe.

³⁵ —Ja̧ Isabenö Jo̧ pjaatina baikwö labebö lobö yötawa: Jejenö iteda ujulu i̧sȩbenama, i̧sȩbinobe, jo̧banö kwöwaisachibaduwakobetjö̧, –Isabenö Jo̧ Diosda dösödo jö̧da̧lökwema, jelo̧ Diosbo̧ma deobe, –jö̧ba̧lö kwöwaisachibaduwobö i̧sȩbinobe.

³⁶ —Ja̧danö mölejȩbetjö ökwödönö yöawina jawa, baikwö labebö lobö yötawa: Bö̧jetjö iteda inesö ökwöla kwedaduwobö weinobe, ja̧danö iwene ökwölatjö ökwöi̧ kwa̧ja̧kwaduwobö weinobe, ja̧nötjö̧ ökwödönö ba̧ja̧dö jweebobö, jweinö omukwatadö kwö̧jaduwakobetjö̧.

³⁷ —Jau chömöledö, Diosma da'dödönö ile niebinobe, ja̧danö jobadönö ile nibebö, ökwödö jobadö tji̧tji̧mu tupadanö jojodönö omudawö ujuninobe, iteda ömöledö kwö̧jaduwobö. Ja̧danö, omudawö junajo̧, jo̧bada Egiptobe i̧'yinobe, ja̧danö 'ya̧jo̧, ökwödönö jobetjö laebinobe, iteda inesö ujulunö.

³⁸ Ja̧danö ökwödöma kwiteboduwi kwujuna̧laduwakobetjö̧, jo̧bama ju'wedö tjitebo jojodönö a'dewö loinobe, jobadö tjiteboinemi nijinö ökwödöda kwö̧jaduwobö. Jau chömöledö, jobadö a'dewö loinawö̧ma ökwödö israel jojodötjö bajalekwönönö juluwadö tjö̧jinobe, jo̧kwaijayonö yayonö iteda ujulunö jobadönö ujuluwinobe, ja̧danö tjö̧jinemi niji ökwödöda kwiteboduwi baibanö iyinobe. Ja̧u chömöledö, babe möle ja̧ niji juna̧ladöja, ökwödöda kwiteboduwi ji̧nö.

³⁹ —Jejenö inesö otiwanö ökwödönö pjaati̧ jawa yötawaduwakwö chömöledö, jweinö kwomukwataduwakobetjö̧. Jau chömöledö, ja̧ jawa omukwatö, jweinö kwomukwataduwobö jo̧be, –Isabenö Jo̧ Diosda mölejetjöbi, bö̧jetjöbi Diosbo̧ma, jelo̧ma deobe, –jö̧ba̧lö kwomukwataduwobö jo̧be.

⁴⁰ Ja̧danö jejenö omukwatö, jwaikwöda jo̧ba wei̧, ja̧bö kwö̧jaduwobö wei̧ma a̧ja̧kwö kwö̧jaduwobö jo̧be chömöledö, babe ökwödönö weawa yötawi̧ma. Jau chömöledö, kwuluwo̧duwi Isabenö Jo̧ Diosma ökwödönö kwiteboduwi niji iyobe, ba̧kwelöjateböda kwiteboduwi jo̧bö, ja̧danö isabenö ökwödöbi, kwitji̧mu tupadanö jojodöbi yötawi̧ weawa a̧ja̧kwö kwö̧jaduwobö jo̧be, lekwe möle kwiteboduwinö kwö̧jaduwakobetjö̧, —jö̧ba̧lö yöawinobe Moisesma.

Tjöeba̧lakwawa comunidad baibanö Moises 'da̧batö ujunina jawa

⁴¹ Jemi ikenama Moisesma Jordan ojwetjö jawo̧ ichobekwöchobe nijitjö, wapötakwa comunidadbiya 'da̧batö ujuninobe, tjöeba̧lakwawa comunidad baibanö.

⁴² Ja̧ comunidad labebö loawama baikwö laebobe, Bakwo̧ sulabenö omukwatökönö, kwabö loobö omukwatökönö, öpöjojo ö̧jö̧köjayonö a̧dekwanö jelo̧nö ö'wö baibinö ja̧itjö̧ma, ja̧ tjöeba̧lakwawa comunidadbe döibajobö jȩna, ö'wö babibina ömöledöma jo̧banö kwabö lotjapji jö̧ba̧lö.

⁴³ Ja̧ Moises 'da̧batö ujunina comunidadbiyama, bi̧ya: Rubensaso nijitjö mö ba̧ba̧lawobe niji comunidad Beser 'da̧batö ujuninobe. Ja̧danö Gadsaso nijitjö Ramot de Galaad comunidad 'da̧batö ujuninobe. Ja̧danö, Manasessaso nijitjö, Basan niji comunidad Golan 'da̧batö ujuninobe.

Moises Dios wei̧ jawa israel jojodönö yöawina jawa

^44-45 Moises israel jojodönö yöawinobe Dios wei̧ma, a̧ja̧kwö tjö̧jobö wei̧ma. Ja̧danö ja̧ jobadönö yöawina möle labebö loawama baikwö laebobe: Ja̧ möle jobadönö yöawenama, Egipto nijitjö labebajadö,

⁴⁶ Jordan ojwe ö'öbö Bet Peor badeibö tjö̧jena jobadönö yöawinobe. Ja̧danö ja̧ nijinö tjö̧ji̧ labebö loawama, baikwö laebobe: Ja̧ nijima ajayinö Hesbon comunidadnö ji̧na, amorreos jojodö la'aka tjuluwo̧ Sijon mikwo̧ iteboinemi, jo̧kwaijayonö Egipto nijitjö ichajadö, Moisesma ju'wedö israel jojodökwö ujuluwinobe Sijonnö, ja̧danö iteboinemima idöda tjitebo baibanö jobe tjö̧jinobe.

⁴⁷ Jo̧ba Sijonbi, Basan niji la'aka luwo̧ Og mikwo̧bi amorreo jojodötjö Jordan ojwetjö jawo̧ ichobekwöchobe ju̧kwadö la'aka luwedö tjö̧jinobe, jo̧kwaijayonö jobadönö tjujuluwinobe israel jojodöma, ja̧danö tjiteboinemi idöda tjitebo baibanö tjeminobe, ja̧danö emajadö jobe tjö̧jinobe.

⁴⁸ Ja̧ tjemina nijima, bi̧ya: Arnon ojwe ö'öbö ji̧ comunidad Aroertjö, Sirion mösa'o, ju'wi imi Hermon mösa'obe ichibanö,

⁴⁹ ja̧danö okobe jwiinö Jordan ojwetjö jawo̧ ichobekwö Araba nijima, a̧likwö jwaibalawabe ichibanö, ja̧danö Pisga mösa'o ö'öböbe ichibanö.