Deuteronomio 33 - Dios Iwene

Moises bajaleapo israel jojodönö yöawina

¹ Ja̧danö, Dios ömöayo̧ Moises ö'wö baibakwa̧ abönö, israel jojodönö yöawinobe, Dios jobadönö pjaatakwa̧ jawama,

² baikwö: —Sinai mösa'otjö Isabenö Jo̧ma ichö, ökwödö israel jojodönö yöawinobe. Ökwödönö ichö yöawina baikwö wanedö yötawa, möle jawo̧ dewachö, Seir mösa'otjö kabekwö dewobedanö, ja̧danö Paran mösa'otjö dewobedanö, otiwanö ökwödönö yöbawö ichinobe. Iteda ömöayedö angeledö diez milbedökwö ichinobe, ja̧danö ichenama, ömamu öwaisobekwöchobesamunö dejatinö ubola ökwöla kweatinobe.

³ —Isabenö iteda ömöledönö ösödo̧ Isabenö Jo̧ma, ja̧danö iteda ömöledö batjibanö 'da̧batö ujuninawö̧ israel jojodönö tjöbeba̧lö pjabato̧. Jejenö pjaatiawö̧, jo̧ba öba a'otjö bȩbachibö tjösödobe israel jojodöma, ja̧danö jobadönö wei̧ a̧ja̧kwö tjö̧jobe.

⁴ Jau, ötjö Moisesma israel jojodönö webö yötawijatö Dios wei̧ma, ja̧danö yötawiawö̧ tjösödinobe, –Bi̧ya Dios wei̧ma inesö mikwawi̧, ökwödö Jacob itji̧mu tupadanö jojodö dujuna̧lobö, –jö̧ba̧lö.

⁵ —Jo̧kwajabetjö̧, jejenö tjösödobetjö̧, Isabenö Jo̧ma iteda ömöledö israel jojodötjö inesö la'aka tjuluwo̧ baibinobe, okobe deinö israel jojodötjö luwedöbi, ju'wedö israel jojodöbi tjo̧ko̧ko̧kwenama, inesö la'aka tjuluwo̧ baibanö tjösödinobe Diosnö.

⁶ —Baikwö yöta̧la Rubensaso jojodönö, Rubensaso jojodö o̧bukwedöda tjö̧jijayonö, debö 'yökönö, 'yatja̧lobö chösöda.

⁷ —Ja̧danö Judasaso jojodönö yöta̧la baikwö: Chuluwo̧ Isabenö Jo̧, Judasaso jojodö ökwönö pjakatobö jwötjenama, kwa̧ja̧kwobö atebakwö, ja̧danö yemidanö ju'wedö tjömöledö israel jojodökwö batjibinö pjakatobö atebakwö. Ja̧danö tjöpöjojodökwö tjölakwabikwawenama, jobadönö pjakatobö atebakwö, jobadönö pjabatö ökwöbi kwölakwabikwawobö atebakwö.

⁸ —Ja̧danö Levisaso jojodönö baikwö yöta̧la: Chuluwo̧ Dios, weköbi̧ i̧sȩkwawa inawiya Levisaso jojodönö kwiyobö atebakwö, ökwö kwösödi̧ tjöwaisakobetjö̧. Jau chuluwo̧, belö jojodö deobe ja̧nö, ojwese'dotjö dö̧jena, Meriba ojwese'dotjö dö̧jenama, Levisaso jojodö dakwö ja̧tja̧kwojobö jö̧ba̧lö kwedijatö,

⁹ ja̧danö jobadöma otiwanö weköbi̧ tja̧ja̧kwinobe. Jau chuluwo̧, sulabenö omukwatadö tjabe'donöbi tjojo'donöbi, tji̧tji̧munöbi omukwatökönö, jwaikwöda ökwö weköbi̧da tjösödinobe, ja̧danö yö̧ne tjömöledönö ösödökönö tjö̧jinobe, –Dios wei̧ma bidö dömöledötjö bajalekwönönö mikwawi̧, –jö̧ba̧lö. Ja̧u jejenö omukwatö weköbi̧ a̧ja̧kwö tjö̧jinobe, ökwöda weköbi̧danö ja̧bö.

¹⁰ Jobadö Levisaso jojodöda ökwö weköbi̧ tjö̧ba̧jadakobe ju'wedö israel jojodönö, otiwanö ja̧bö tjö̧jakwa̧ jawa tjö̧ba̧jadakobe. Ju'wibi jobadöda omewi̧ jawa kwöba a'otjö tjujuwakwedö, ja̧danö jobadöda jwiinö ubinö iyawa ökwönö iyawötenö tjujuwakwedö.

¹¹ Jobadö Levisaso jojodö tjotidi̧ pjakatobö atebakwö Isabenö Jo̧, ja̧danö jobadö otidö tjiyi̧ emö kwösödobö atebakwö. Ja̧danö tjöpöjojodökwö tjölakwabikwawenama, jwiinö tjöpöjojodönö söbebö loköbobö atebakwö, yemidanö tja̧la̧ibökenanö batjibanö jwiinö tjöpöjojodönö söbebö loköbobö atebakwö.

¹² —Ja̧danö Benjaminsaso jojodönö baikwö yöta̧la: Isabenö Jo̧ ösödawö̧ Benjaminsaso jojodöma, ja̧danö otiwanö jobadönö tjöeba̧lobe. Ba̧kwelöjatebö jobadönö tjösawinö tjöeba̧lobe, ja̧danö jobadönö a̧pjö̧alö iteada̧lobetjö̧, otiwanö tju̧ju̧kwobe Benjaminsaso jojodöma.

¹³ —Ja̧danö Jose itji̧mu sasokwena jojodönö baikwö yöta̧la: Isabenö Jo̧ otiwanö jobadö tjitebo niji pjaatobö chösöda, mölejebetjö si̧li̧'idö tji'oli weobö chösöda, ja̧danö niji teebe ojwiobi otiwanö weobö chösöda,

¹⁴ ja̧danö möle jawo̧ otiwanö idejatinö weobö chösöda, tjöbatjiju otiwanö pokwakobetjö̧, batjo wajo̧ jö̧a̧lenama otiwanö e'dö tjemobö.

¹⁵ Ja̧danö tjitebo mösa'iju, lekwe möle ji̧na mösa'ijutjö towibiya otiwanö wa̧jobö chösöda, mösa'ijutjö towi waji̧ nöinö tjujuna̧lobö.

¹⁶ Jau, jejenö nijinö pokwi̧ jawatjö, okobe jwiinö inesö otiwi̧ jawa tjujuna̧lobö chösöda, ösötje ubinötjetjö öwawachina Diosma jobadönö ösödö pjaatobetjö̧. Josema okobe deinö öjawo̧dötjö la'aka luwo̧danöbo̧ma, ja̧danö ja̧ yötawaja̧danö Dios jo̧ba itji̧mu tupadanö jojodönö iyobö chösöda.

¹⁷ —Isabenö tjujuluwakwedö Jose itji̧mu tupadanö jojodöma, baikwö wanedö yötawa: Pakayaso̧ abönö jemökwe ujuluwi̧danö tjujuluwakwedö, ja̧danö tjöpöjojodönö tjölakwabikwawenama, tebonö jo̧ pakayaso̧ ju'wedö tebonö ju̧kwadönö i'yekiyanö tibatö lo̧idanö, tjöpöjojodönö mebibö tjujuluwakobe, ja̧danö jobadönö lutjakobe, bö̧je bakwachöjȩ tjichibenanö kabatö. Jobekwö tjujuluwakwedö Jose itji̧mu tupadanö jojodöma, Efrainsaso jojodötjö inesö ba̧jȩkwadöbi, Manasessaso jojodötjö ba̧jȩkwadöbi.

¹⁸ —Ja̧danö Zabulonsaso jojodönöbi, Isacarsaso jojodönöbi baikwö yöta̧la: Zabulonsaso jojodö jwaibalawanö kwetjachenama, otiwanö tjitea tjemobö chösöda, ja̧danö Isacarsaso jojodö tjejubiyanö ja̧nö tjotidonö, otiwanö tjemobö chösöda.

¹⁹ Jobadöma ju'wedö israel jojodötjö sasokwena jojodönö tja̧debakwedö, mösa'obe, Diosnö iyawa'obe tjichobö, jobetjö otiwanö tjiyo jö̧tja̧li̧danö Diosnö tjiyakobetjö̧. Jau, jobadöma isabenö otiwanö tjujuna̧lakwedö, jwaibalawatjö ji̧ nöinö mikwawi̧ jawa tjemobetjö̧, ja̧danö so̧biapu okwa ji̧ mikwawi̧ jawa tjemobetjö̧.

²⁰ —Ja̧danö Gadsaso jojodönö baikwö yöta̧la: Gadsaso jojodönö pjabatina, tjitebo jalobe tjö̧jobö pjabatina Diosnö dösödo, –Otiwanö pjabato̧, –jö̧ba̧lö. Jobadö Gadsaso jojodö tjöpöjojodönö tjö̧lakwabikwawi̧ma baikwö wanedö yöta̧la, Didiba meibotö jö̧ba̧lö bȩbachö ö̧jidanöbedö, labinö tjöpöjojodönö mebibö tjujuluwakobetjö̧.

²¹ Jobadö Gadsaso tjitebo baibakwa̧ niji tjomudawenama, la'aka luwo̧ emo jö̧a̧lemi niji tjomudawinobe, la'aka luwo̧ emobö 'da̧batö tjujuninemi nijima. Jau, israel jojodötjö luwedö tjo̧ko̧ko̧kwenama, omukwatö tjujuninobe, ja̧ niji Gadsaso jojodö tjemobö. Isabenö otiwanö Isabenö Jo̧ wei̧ a̧ja̧kwö tjö̧jinobe Gadsaso jojodöma, –Israel jojodö baikwö ja̧bö tjö̧jo, –jö̧ba̧lö wei̧ma, otiwanö a̧ja̧kwö, wei̧danö ja̧bö tjö̧jinobe.

²² —Ja̧danö Dansaso jojodönö baikwö yöta̧la: Dansaso jojodöma didiba itji̧danö ichejekwadö, Basan nijitjö tjöpöjojodönö metji̧botö jö̧ba̧lö tjiteada̧lobetjö̧.

²³ —Ja̧danö Neftalisaso jojodönö baikwö yöta̧la: Isabenö Jo̧ otiwanö pjaatawö̧, Neftalisaso jojodönö. Jobadönö dösölöjinö ösödo̧ Isabenö Jo̧ma, ja̧danö tjitebo tjemakwa̧ nijima, Galilea o̧pesobu nijibi, jemi a̧li̧kwö nijibi tjemakwedö.

²⁴ —Ja̧danö Asersaso jojodönö baikwö yöta̧la: Ju'wedö bakwasokwena jojodönö pjaati̧tjö bajalekwönönö otiwanö pjaatakwawö̧ Asersaso jojodönö. Jelesokwena jojodö otiwanö Asersaso jojodönö tjomukwatobö chösöda, ja̧danö otiwanö tjujuna̧lobö chösöda, olivo o̧tesobunö tjömasapiyabi 'do̧tjawenanö baibanö.

²⁵ Tjitebo comunidadkwena 'dii jawanöbi, broncenöbi, tjöbekwö tjotidakobe, ja̧danö ina 'yatja̧layi wene jwiinö tjö̧jakwedö.

²⁶ —Baikwö yötawaduwakwö ökwödö israel jojodönö: Ju'wedö tjösödawö̧tjö bakwo̧bi deobe, ökwödö kwösödaduwökwe Diosdanöbo̧ma. Jo̧bama mölejebenö kwebacho̧, ökwödönö pjabatö, iteda dejatinö ujulunö, mölejebenö kwebacho̧.

²⁷ Ba̧kwelöjatebö jo̧ Diosma ökwödönö tjöbeba̧lö pjabato̧, jo̧bakwö wene jwiinö kwö̧jaduwobö, ja̧danö ökwödönö do̧ba̧lö ö̧jobe, meköbaduwapji jö̧ba̧lö. Kwiteboduwibe kwi̧'yaduwonö, kwöpöjojodöduwinö kwabönöduwitjö a'dewö loobe, ja̧danö ökwödönö weobe, –Bidönö söbebö lobaduwi, –jö̧ba̧lö.

²⁸ Jo̧kwajabetjö̧, israel jojodöma wene jwiinö tjö̧jobe, Jacob itji̧mu tupadanö jojodöma labokobe otiwanö tjö̧jobe. Israel nijima, si̧li̧'idö ti'oli otiwanö tjoduwemi, ja̧danö trigojaye waji̧bi, ubasobubi nöinö jȩmi niji̧.

²⁹ —Isabenö kwo̧'woduwi ösöwanö kwö̧jaduwobö jo̧be israel jojodö, ju'wedö bö̧je jojodötjö bajalekwönönö Isabenö Jo̧ma otiwanö pjaatobetjö̧. Jau chömöledö, ökwödödanöbedö Dios otiwanö pjaatawö̧ma deobe bö̧jetjö, baikwö yötawa: Isabenö Jo̧ma ökwödönö kwö̧jibaduwinö pjaatinobe, ja̧danö tjöekwapi ji̧danö ökwödönö tjöbeba̧lö pjaatobe, ja̧danö kwölöte'o ji̧danö ölakwabikwawö kwujuluwaduwobö pjaatobe. Jo̧kwajabetjö̧ kwöpöjojodöduwima kwö̧jaduwobekwö bȩbachibö atjeba̧lakwedö, jobadönö lȩlö̧inö kwedaduwobö, ja̧danö jobadönö juluwajadö tjiteboinemi niji mösa'ijunö kwekachaduwakwedöja, —jö̧ba̧lö yöawinobe Moisesma, israel jojodönö.