Deuteronomio 32 - Dios Iwene

¹ Baikwö laebobe Moises israel jojodönö lo̧awa yöawina: Mölejenö ju̧kwadöma tja̧ja̧kwobö jo̧be, yötawakwa̧ tja̧ja̧kwobö, ja̧danö bö̧jenö ju̧kwadöbi yötawakwa̧ tja̧ja̧kwobö jo̧be.

² Lo̧bö yöta̧li̧ma, ojwiyo o̧bi̧ pjaati̧danö ichejekwobö chösöda, baikwö yöta̧la̧: Si̧'i̧lidö ti'olibi, tjo'omanö ojwiyo o̧bi̧bi meje'ye pokwobö pjaati̧, ja̧danö ojwiyo obi̧ yayinö pokwi̧ otiwanö da̧peachobö pjaati̧, jö̧tö? Lo̧bö yötali̧bi jejenö kwö̧da̧peachaduwinö yöta̧lobö chösöda.

³ Jau, otiwanö ösödö yöta̧locha Isabenö Jo̧nö, duluwo̧ Dios inesö ujulu yötawocha, jo̧kwajabetjö̧ lo̧bö yöta̧li̧ma ojwiyo o̧bawa paati̧danö, kwö̧da̧peachaduwinö pjaatobö jo̧be.

⁴ Jo̧ba Diosma inesö tjöeba̧la̧wa inawadanöbo̧, ja̧danö okobe jwiinö ja̧bö ö̧ji̧ma, otiwanö ja̧bö jo̧. Jojodönö wainökwena edökönö, bakwainö jweinö edo̧ jojodönö. Jo̧ba dösödökwe Diosma omöna yöba̧lö̧kö̧, ba̧kwelöjatebö jö̧a̧li̧danö ja̧bo̧, ja̧danö la'akatjöda sulabenö ja̧bö̧kö̧.

⁵ Jo̧kwaijayonö ökwödö israel jojodöma, jo̧ba kwabe'doduwi Dios otiwo̧ ö̧ji̧danöböködöja. Dios itji̧muköbaduwijayonö, jo̧ba itji̧mu otiwanö ja̧bö tjö̧ji̧danöma ja̧bö jö̧ködöja. Jau, kwabe'doduwi Diosnö öpöjödö, ökwödöma omöna yöba̧ladö ja̧danö jwiinö sulabedöja.

⁶ Ökwödöma wajwibadö omukwatöködödanöbedöja chömöledö, baikwö yötawa: Isabenö Jo̧ma kwabe'doduwibo̧, jo̧bada ökwödönö otidinobetjö̧, ja̧danö ju'wibi ökwödönö otidajo̧, kwiteboduwisaso juluwaso bakibaduwanö ujuninobe, jö̧tö? Isabenö otiwanö pjaatinobe chömöledö, ja̧danö jejenö pjaatiawö̧ balekwa mikwa jo̧banö kwöpöjödaduwobö otiwenaji̧? Sula chömöledö, jo̧banö kwösödaduwo jö̧ba̧ladöja.

⁷ Damötjö baledina kwomukwataduwo, kwa'dödöduwi tjö̧jinena baledina jawa kwomukwataduwo. Ja̧ baledina jawa kwabe'doduwinö abebö kwa̧ja̧kwaduwitjö̧ma, kwöwaisachibaduwobö yöawakobe, damönö abebö kwa̧ja̧kwaduwitjö̧ma, ja̧ baledina yötjawakobe.

⁸ Jau chömöledö, okobe deinö la'aka luwedötjö inesö La'aka Luwo̧ Diosma jojodönö 'da̧batö ujuninobe, tjitebokwena jojodö batjibanö, ja̧danö tjitebo bakwachobekwena omukwatö ujuninobe. Jau, teada̧ladö angeledö tjö̧ba̧jekwi̧danö, tjitebokwena jojodönö 'da̧'yö ujuninobe.

⁹ Ja̧danö, jejenö 'da̧batö junajo̧, Isabenö Jo̧ma iteda ömöledö batjibakwedönöbi 'da̧batö ujuninobe, ökwödö israel jojodönö 'da̧batö ujuninobe, iteda ömöledö dö̧jobö.

¹⁰ Ja̧danö, israel jojodöma, jojodö deobe inesö labobe tjö̧jenama, ökwödönö tjöbeba̧lö iteada̧linobe, bakwo̧ iteda öbajale iteada̧li̧danö, otiwanö tjöbeba̧lö iteada̧linobe.

¹¹ Ökwödönö iteada̧lina wiyuli itji̧munö iteada̧li̧danö iteada̧linobe, baikwö wanedö yötawa: Wiyulima apa wiwodö, itji̧mu tjöwame ja̧nö iteada̧lobe, ja̧danö kötjenama pjaatobe, ja̧danö kötjobö jö̧tja̧li̧ waekwena, ö̧wa̧piyanö do̧atobe, ja̧danö e'ewö köobe, nijakwö metjapji jö̧ba̧lö.

¹² Isabenö Jo̧bi ja̧danö chömöledö, jo̧bada israel jojodönö öibinobe, jo̧bada jejenö öibenama, ju'wedö tjösödawö̧tjö bakwo̧bi deinobe, jobadönö pjaatobö.

¹³ Ja̧danö inesö otiwemi mösa'o jȩmi nijinö tjö̧jobö ujuninobe, ja̧danö otiwanö batjo waji̧ tjukwobö iyinobe, ja̧danö inawiya jȩlö wayo̧ netjobö iyinobe, ja̧danö inawiya 'diawa jȩmibi olivo towibiya pokwobö weinobe, olivo o̧te otiwanö tjujuna̧lakobetjö̧.

¹⁴ Ja̧danö tja̧jwi̧mu pa̧ka̧yadötjö lechesa'be tjowobö iyinobe, ja̧danö tja̧jwimu chivodötjö leche tjowobö iyinobe, ja̧danö obejadö o̧tewadönö tjukwobö iyinobe. Jau, Basan nijitjö ajikwakwawedö inesö otiwadö pakayadönöbi, obejadönöbi tjujuna̧lobö iyinobe, ja̧danö inesö otiwi̧ trigo tjukwobö iyinobe, ja̧danö inesö otiwobö ubasobu tjowobö iyinobe.

¹⁵ Jejenö iyiawö̧, tjomeawinö tjukwinobe israel jojodöma, o̧tewadö batjibanö. O̧tewadö babibö, nötja̧chibinobe, inesö o̧tewadö batjibanö, ja̧danö jobadönö otidina Diosnö katjatibinobe, tjö̧jibinö pjabato̧ inawadanöbo̧ Diosnö obö katjatibinobe.

¹⁶ Wajwitjawö̧ ju'wedö tjösödawö̧ o̧'wo jawanö tjösödinobe, inesö suli̧ jawa ja̧bö tjö̧jinobe, Dios jobadönö ödameakwawenanö kabatö.

¹⁷ Diosnö iyökönö, sulabedö angeledönö tjiyinobe, tja'dödö wajwitjinawö̧ ju'wedö tjösödawö̧nö. Jau, tja'dödö tjösödinökö̧wö̧ yabayedönö tjösödinobe, sulabenö.

¹⁸ Jejenö ja̧bö inawadanöbo̧ jobadönö tjöbeba̧lö pjabatina Diosnö tjo̧'wo jwitjibinobe, ajayinö jobadönö otidinanöma.

¹⁹ Jejenö sulabenö ju'wedönö tjösödiökwe, jobadönö ödameakwinobe Isabenö Jo̧ma, –Chitji̧mu ömadöbi ya̧döbi sulabenö ju'wedönö ösödadö, –jö̧ba̧lö israel jojodönö öpöjödinobe.

²⁰ Sulabenö ja̧tji̧ökwe, –Bidö chi̧tji̧muma jwiinö sulabedö, ja'yubebi ja̧tjo̧ jö̧tja̧li̧danöma ja̧böködö, jo̧kwajabetjö̧ jobadönö pjabatökönö chö̧ja̧kwo̧sa, jobadönö baledakwa̧ma dakwö baledakwojobö jö̧ba̧lö.

²¹ Jobadöma isabenö diosböködönö ösödö, chödameakwi̧nö ja̧tjajabe, jo̧kwajabetjö̧ balekwa mikwa jobadönö tjödameakwi̧nö ja̧takwo̧sa. Jau, mikwawöködö wajwibadönö pjatatocha, jobadönö tjujuluwobö, tjödameakwakobetjö̧.

²² Ökwöla labinö ubi̧danö chödameakwakwo̧sa israel jojodönö, wanedö yötawa, chödameakwi̧ ökwölama okobe jwiinö juwö loola, bö̧je okwa ö'wö babibinadö tju̧ju̧kwemibi, okobe jwiinö bö̧jebi, bö̧jenö pokwi̧bi, mösa'iju la'akabi juwö loola ökwöladanö chödameakwakwo̧sa israel jojodönö.

²³ Jwiinö wene tjujuna̧lobö wetocha, jobadönö nayunö 'bötobedanö ichejekwi̧nö, baikwö yötawa,

²⁴ a̧wi̧chi̧tjöbi, nia'otjöbi, ju'wi inesö labi̧ tjö'wöchi̧tjöbi debö tji̧'yakobe, ja̧danö tebonö ju̧kwadö labidönö jobadönö yö̧yö̧tjobö wetocha, ja̧danö a̧ko̧'dö̧ nibadö jobadönö yö̧tjobö wetocha.

²⁵ Tjejutjö labebö mananö ju̧kwadöma, kwölöte'otjö debö tji̧'yakwedö, ja̧danö o̧do okwa ju̧kwadöma, jwiinö yebabinö tjö̧bawö tjö̧jakwedö, juluwadö ömadöbi, ya̧döbi, ina o̧do'bi owadöbi, damöbi.

²⁶ Jwiinö jobadönö chödameakwobetjö̧, bakobenö jobadönö tjipjelekwachibanö söbebö lotobö jö̧ta̧lijatö, bakwo̧bi jobadönö omukwatibobö jwienanö.

²⁷ Jo̧kwaijayonö, bakobe israel jojodönö söbebö lotitjö̧ma, tjöpöjojodöma idöda tjujulu tjomukwatena, –Isabenö Jo̧ma israel jojodönö lȩebinokobe, ökwödöda dujulunö jobadönö söbebö lodajabe, –jö̧ba̧lö. Jo̧kwajabetjö̧, tjöpöjojodö jejenö juluwadösa jö̧ba̧lö tjomukwatapji jö̧ba̧lö, bakobenö söbebö lotokobe israel jojodönö, –jö̧ba̧lö laebobe, Dios israel jojodönö dameakwö yöa̧li̧ma.

²⁸ Isabenö omukwatöködö israel jojodöma, tjö̧'da̧detjö waisanö omukwatadöma deobe.

²⁹ Isabenö waisanö omukwatadö tjö̧jitjö̧ma, jobadönö lȩtebakwa̧ tjöwaiso jö̧tja̧linena, –Dios wei̧ a̧ja̧kwökönö dö̧jitjö̧ma, isabenö ökwödönö lȩebakwo̧, –jö̧ba̧lö.

³⁰ Jau, öwaetjöda öwawobe, Isabenö Jo̧ israel jojodönö pjabatökönö ö̧ji̧ma, baikwö yötawa: Inesö tjöeba̧lawa inawadanöbo̧ Diosma ina israel jojodönö pjabatö ö̧jitjö̧ma, döpöjojodöma la'akatjöda ökwödönö tjujuluwoko jö̧tja̧lena. Jo̧kwaijayonö, israel jojodönö pjaatokobetjö̧, tjöpöjojodötjö bakwo̧da milbedö israel jojodönö a'dewö loobe. Ja̧danö tjöpöjojodötjö du̧ju̧tajada inesö ba̧jȩkwadö israel jojodö dötjibajenanö tjujuluwobe. Isabenö yötawaduwakwö chömöledö, Isabenö Jo̧ ökwödönö pjaatitjö̧ma, la'akatjöda baledoko jö̧a̧lena jejenöma.

³¹ Jobadö döpöjojodö tjo̧'wo tjöwana̧lawö̧ma, ökwödö duluwo̧ inesö inawadanöbo̧ ujuluwi̧danöma juluwöködö, döpöjojodöbi edö tjöwaisobe, ökwödö dösödökwe Diosma jobadö tjösödawö̧tjö bajalekwönönö juluwo̧, jö̧ba̧lö.

³² Jobadö israel jojodö tjöpöjojodönö baikwö wanedö yötawa, jobadöma Sodoma Gomorrabi ubasa'badanö ichejekwadö, waji̧ma jwiinö lei, ja̧danö niekwa ji̧.

³³ Ja̧danö ja̧'ba ubasa'batjö otikwa ubasobuma, a̧ko̧nö, jwiinö nibadö a̧ko̧'dö tjomadebadanö niekwa ji̧, jö̧ba̧lö wanedö yötawa israel jojodö tjöpöjojodönö.

³⁴ Baikwö yöawobe Diosma: –Ötjöma israel jojodönöbi, tjöpöjodönöbi omukwatö chujunajabe, jobadönö lȩtebakwa̧ma, ja̧danö wanedö yötawa, bakwo̧nökwena lȩtebakwa̧ jawa chitea teada̧lakwawejunö pje'datö chujunajabe, lȩtebakwa̧ möle badekwachenanö kabatö.

³⁵ Isabenö ötjödasa sulabenö ja̧tji̧ balekwa mikwa lȩbebo̧ma, ja̧danö lȩtebobö badekwachenama, lȩtebocha. Baikwö wanedö yötawa: Ja'yubenö lekwajabetjö dusachibö metja̧kwedö, ja̧danö wene tjöbaledakwa̧ma juluwanö badekwachakobe, ja̧danö juluwanö jobadönö söbebö lotakobe, –jö̧ba̧lö yöawobe Diosma.

³⁶ Jau chömöledö, Isabenö Jo̧ma iteda ömöledö israel jojodönö isabenö lȩebakobe, tjujulu jwitjenanö baibanö. Jemi ikenama, israel jojodötjö ju'wedö tjömöayedöbi, tjömöayedöböködöbi sule o̧bukwedöda tjö̧jibenama, jobadö iteda ömöayedö israel jojodönö lȩlöinö edakobe Isabenö Jo̧ma.

³⁷ Ja̧danö, tjujulu jwibadö tjö̧jenama, jobadö israel jojodönö abebö a̧ja̧kwakobe: –¿O̧'wo jawa kwösödaduwinawö̧ja? Jobadönö kwösödinaduwobe, Isabenö inawa tjöeba̧li̧danö ökwödönö tjöbeba̧lakwedö, jö̧ba̧lö,

³⁸ ja̧danö jobadönö ösödö kwajwimuduwitjö o̧tewadönö tjukwobö kwabö juwö kwiyinaduwobe, ja̧danö ubasobö tjowobö kwiyinaduwobe. Jobadö kwösödinaduwawö̧da a̧la̧ibö ökwödönö pjatjato jö̧ba̧ladö, jobadö kwösödinaduwawö̧da ökwödönö tjöbeba̧lö pjatjato jö̧ba̧ladö, jobadönö kwösödinaduwobetjö̧, jö̧tö?

³⁹ Jo̧kwaijayonö, a̧la̧ibö pjatjatokobetjö̧, babe ötjönö edö kwöwaisaduwobö jo̧be, isabenö ötjödasa Diosbo̧ma, jelo̧ ötjödajayo̧ma deobe, jö̧ba̧lö. Jau, kwabö lotoböbi juluwo̧sa, ja̧danö ja̧kwawa tjujuna̧lobö pjabato̧sa. Ja̧danö inia tötjinö kwatobö juluwo̧sa, ja̧danö kwakwatjaja̧ niemi otidö lotoböbi juluwo̧sa. Jau, isabenö jwiinö juluwo̧sa, ja̧danö ju'wedönö lȩtebenama, bakwo̧bi deobe, lȩtȩbi̧tjö tjö̧jibanö pjabato̧ma.

⁴⁰ Ötjöma isabenö ba̧kwȩlöjatebö jo̧ Diossa, ja̧ ba̧kwelöjatebö jo̧ chö̧ji̧ wenema, isabenö ji̧ wene, ja̧danö ja̧ wene isabenö ji̧danö, ju'wibi isabenö yöbawö chujunobe, Bakwo̧bi lȩtebi̧tjö tjö̧jibanö pjabato̧ma deobe, jö̧ba̧lö.

⁴¹ Jau, baikwö yöbawö chujunaduwakwö: Jojodönö lȩtebotö jö̧ba̧lö chitea kwölöte'o salöinö dewa'o sȩtebenama, isabenö chöpöjojodönö lȩtebakwo̧sa. Sulabenö ja̧tji̧tjö̧, balekwa mikwa jobadönö kwabawö lotakwo̧sa, ja̧danö jobadönö lȩtebakwo̧sa, ötjönö tjöpöjödi̧ mikwawa baibanö.

⁴² Jobadö chöpöjojodönö chölakwabikwawi̧ma baikwö wanedö yötawa: Nayunu 'bötenama, nayunuma nöinö chöpöjojodö tjökwösobö owakobe, 'dukwachanu baibenanö kabatö, ja̧danö chitea kwölöte'oma nöinö itebia ukwobedanö ichekwakobe, jwiinö ba̧jȩkwadö tjiteba'iju dȩdȩbö loobetjö̧. Jau, chöpöjojodönö chölakwabikwawenama, jwiinö söbebö lotakwo̧sa, okobe deinö do̧batö chujuluwajawö̧nöbi, tjuluwedönöbi kwabawö lotenanö kabatö, –jö̧ba̧lö yöawobe Diosma.

⁴³ Isabenö okobe deinö tjo̧'wo ösöwanö Diosnö tjösödobö jo̧be, Dios ömöledö israel jojodöbi, ju'wedö tjitebokwena jojodöbi, isabenö iteda ömöledönö pjabato̧obetjö̧. Jau, iteda ömöayedönö kwabö lobadönöma balekwa mikwa kwabö lobo̧ Diosma, sulabenö ja̧tji̧ökwe lȩbebo̧ öpöjojodönöma. Jo̧banö öpöjojodö sulabenö tjöpöjödiökwe, balekwa mikwa lȩbebo̧, ja̧danö iteda ömöledö tjitebo niji dichö lobo̧, tjitebo niji otiwemi suli̧ jwiemi baibanö, —jö̧ba̧lö lo̧awa yöawinobe Moisesma, israel jojodönö.

⁴⁴ Okobe jwiinö ja̧ lo̧awa yötjawinobe, Moisesbi, Josuebi, ju'wedö israel jojodö tja̧ja̧kwa̧lonö.

⁴⁵ Ja̧danö okobe jwiinö ja̧ lo̧awa jawa israel jojodönö yöbawajo̧,

⁴⁶ Moisesma jobadönö yöawinobe: —Chömöledö, babe möle otiwanö yöbawö lȩtebaduwakwö, otiwanö omukwatö kwö̧jaduwo jö̧ba̧lö, ja̧danö yötawaja̧ jawa di̧inö do̧ba̧lö kwö̧jaduwo, kwo̧'wo jwikibaduwapji jö̧ba̧lö. Ja̧danö, kwi̧tji̧muduwinö yötawaja̧ jawa weköbaduwo, jobadöbi ba̧kwelöjatebö Dios wei̧ yötawaja̧danö ja̧bö tjö̧jakobetjö̧.

⁴⁷ Jau chömöledö, inesö mikwawi̧ ji̧ ökwödönö weti̧ma, mikwawökö ji̧ weawamaökö, isabenö mikwawobe 'yaba̧ladö kwö̧jaduwobö. Juluwanö Jordan ojwe pebibö, kwiteboduwibe kwi̧'yaduwakwedöja chömöledö, ja̧danö jobe ja̧nö yötawaja̧ omukwatö kwö̧jaduwitjö̧ma, isabenö lekwe möle otiwanö kwiteboduwinö kwö̧jaduwakwedöja, —jö̧ba̧lö yöawinobe Moisesma.

Dios Moises ö'wö baibakwa̧ yöawina

⁴⁸ Ja̧danö, i̧yada möle Isabenö Jo̧ma Moisesnö yöa̧linobe:

⁴⁹ —Moises, babema Moab niji mösa'o, Abarin mösa'ijutjö Nebo mikwa'o kwönöchobö jo̧be. Jau Moises, ja̧'oma Jerico comunidad badeibösa'o, ja̧danö ja̧'o kwönöcho, nöchajo̧ mötjö israel jojodönö chiyakwa̧ niji canaan niji kwedobö.

⁵⁰ Ja̧danö, edajo̧, jobetjö ö'wö bakibobö ja̧kobe, kwa'dödökwö bakibanö. Jau Moises, kwöpöe Aaron Hor mösa'otjö ö'wö baibinadanö, ökwöbi canaan nijibe ichibökönö ö'wö bakibobö ja̧kobe,

⁵¹ belö Meriba ojwese'dotjö israel jojodö tjöba a'otjö sulabenö ja̧köbinaduwobetjö̧. Jobetjö weti̧ a̧ja̧kwö, otiwanö weti̧nadanö ja̧köbaduwo jö̧ka̧linaduwobe, –Diosma otiwo̧, suli̧ jwibo̧, jo̧banö otiwanö omukwatö wei̧ da̧ja̧kwaduwo, –jö̧ba̧lö i̧sebö. Jo̧kwaijayonö, jejenö i̧sȩbökönö, weti̧ a̧ja̧kwökönö ja̧köbinaduwobe israel jojodö tjöba a'otjö.

⁵² Jo̧kwajabetjö̧, mösa'o nöchajo̧, israel jojodönö chiyakwa̧ niji ödötjö kwedobö wetocha, jo̧kwaijayonö jobe israel jojodönö chiyakwa̧ nijibe kwi̧'yökakwo̧ja Moises, —jö̧ba̧lö yöali̧nobe Diosma.