Deuteronomio 31 - Dios Iwene

Moises Josuenö 'da̧batö ujunina jawa, israel jojodö tjuluwo̧ baibanö

^1-2 Okobe jwiinö ja̧ jawa yöbawajo̧, tupakwö yöawinobe Moisesma, israel jojodönö: —Chömöledö, ötjöma ida̧ökö jwiinö pöesa, ciento veinte o̧bia junalo̧sa. Ja̧danö, ida̧ökö pöechobetjö̧, bemi tupakwö otiwanö ökwödönö ötiboböma jwibo̧sa, ja̧danö ju'wibi Isabenö Jo̧ma ida̧ökö ötjönö yöawinobe, –Jordan ojwe pekibökakwo̧ja, –jö̧ba̧lö.

³ Jo̧kwaijayonö, ötjöma ökwödökwö chi̧'yököjayonö, kwuluwo̧duwi Isabenö Jo̧ Diosma ökwödökwö i̧'yakwo̧ chömöledö, jo̧bada kwabönöduwi 'ya̧nö peibakobe chömöledö. Jo̧bada Jordan ojwe bakwachödö ju̧kwadö tjitebokwena jojodönö ujuluwakwo̧ chömöledö, ja̧danö jejenö jobadönö ujuluwobetjö̧, ökwödö israel jojodöma tjiteboinemi niji kwemaduwakwedöja, kwiteboduwi baibanö. Ja̧danö chömöledö, ötjöma ökwödönö öbibö chi̧'yököjayonö, Josuema kwuluwo̧duwi ja̧nö ökwödönö öibakwo̧. Isabenö Jo̧ma damötjö̧ yöbawö ujuninobe Josue ökwödönö öibakwa̧ma, ja̧danö yöbawö ujunina badekwachinö Josuema ökwödönö öibakobe.

^4-5 —Ja̧danö chömöledö, Jordan ojwe pekibaduwenama, Isabenö Jo̧ma isabenö jobe ju̧kwadönö ujuluwakobe chömöledö. Kwöwaisaduwa chömöledö, amorreos jojodötjö inesö la'aka luwedö Sijonnöbi, Ognöbi ujuluwinama, jwiinö jobadönö söbebö loinobe, ja̧danö söbebö lobajo̧, tjiteboinemi niji ökwödönö iyinobe, jö̧tö? Jobadönö ujuluwinadanö bakwainö ujuluwakwo̧ Isabenö Jo̧ma, Jordan bakwachödö ju̧kwadönöbi chömöledö. Ja̧danö, jejenö jobadönö ujuluwenama, okobe deinö jobe ju̧kwadönö kwabawö loköbaduwo chömöledö, kwabö loköbaduwobö yöbawö wetina badekwachinö.

⁶ Kwujuluwaduwachibanö, yebabökönö kwö̧jaduwo chömöledö. Ja'yubebi jobe ju̧kwadönö yekabiduwobö jwiobe chömöledö, baikwö yötawa: Kwuluwo̧duwi Isabenö Jo̧ Diosda ökwödökwö i̧'yakwo̧, ja̧danö jo̧bama la'akatjöda waekwökakwo̧, ja̧danö ökwödönö le'dedibö loökakwo̧, jo̧kwajabetjö̧ jobe ju̧kwadönö yekabiduwoböma jwiakobe, —jö̧ba̧lö yöawinobe Moisesma.

⁷ Jejenö yöbawajo̧, Moisesma Josuenö jwöinobe, ö̧jobekwö ichobö, ja̧danö okobe deinö jobe ko̧ko̧kwadö israel jojodö tjöba a'otjö, Moisema jo̧banö yöawinobe: —Josue, yebabökönö kwujuluwachibanö kwö̧jo, ökwöda bidö israel jojodönö Isabenö Jo̧ iyakwa̧ nijibe ökibakobetjö̧. Jau Josue, Isabenö Jo̧ma tja'dödönö yöbawö ujuninobe, jobadönö niji iyakwa̧ jawama, ja̧danö ja̧ yöbawö ujunina jawa badekwachinö ökibakwo̧ja, ja̧ niji tjitebo baibanö tjö̧jenanö.

⁸ Ja̧danö, baikwö yötawakwö Josue, Isabenö Jo̧ Diosda kwabönö i̧'yakwo̧ma, jo̧bama ökwökwö ö̧jakwo̧, ja̧danö la'akatjöda waekwökakwo̧, ja̧danö la'akatjöda ökwönö le'dedibö loökakwo̧, jo̧kwajabetjö̧ yebabinö kwö̧joko, ja̧danö –Dakwö dichibakwajö, –jö̧ba̧löma omukwatö kwö̧joko, —jö̧ba̧lö yöawinobe Moisesma Josuenö.

Dios wei̧ yötja̧lobö Moises israel jojodönö weina jawa

⁹ Ja̧danö, Moisesma okobe jwiinö Dios wei̧ israel jojodönö yöawaja̧ jawa kwiyalu'ye dö'yelatajanö i̧wȩyudinobe, ja̧danö wȩyu̧dajo̧, Dios wei̧ wȩyukwa öbiya döbölataja a̧ja̧pjo kwebatadö Levisaso jojodötjö Diostjö jojodötjö tjö̧'da̧de pjabatadönö bakwa'ye iyinobe, ja̧danö jele'ye israel jojodötjö luwedönö iyinobe.

^10-12 Jejenö iyö, Moisesma jobadönö weinobe, —Chömöledö, kwöwaisaduwa, kwiteboduwi kwö̧jaduwenama, jelemutjö dötölataja o̧bakwenama, tjumusidi söbebö loawa o̧ba ja̧kobe, jö̧tö? Ja̧ tjumusidi söbebö loawa o̧bakwena, okobe deinö ökwödö israel jojodö Dios omudawö ujunakwemibe ichö, jo̧ba öba a'o ichibö, löwötenö ja̧kwawa ba'ali kwujunaduwobö ja̧kobe, ja̧danö ja̧ ba'ali kwujunaduwenama, bi'ye yöka̧laduwobö ja̧kobe. Jau chömöledö, ja̧ ba'ali kwujunaduwenama, okobe deinö israel jojodönö kwo̧ko̧ko̧daduwobö ja̧kobe, ömadönöbi, ya̧dönöbi, tjemunöbi, ja̧danö ju'wibi israel jojodöböködö kwiteboduwi comunidadnö ju̧kwadönöbi kwo̧ko̧kodaduwobö ja̧kobe, ja̧danö okobe deinö tja̧ja̧kwa̧lonö, bi'ye Dios wei̧ wȩyukwa'ye tjöba a'otjö yöka̧laduwobö ja̧kobe. Jau chömöledö, okobe deinö bi'yenö laebi̧ jawa kwa̧ja̧kwaduwobö jo̧be, otiwanö yebabinö kwuluwo̧duwi Isabenö Jo̧ Diosnö kwösödaduwobö kwöwaisachibaduwakobetjö̧, ja̧danö bi'yenö laebi̧ jawa a̧ja̧kwö, teada̧lönö laebi̧danö ja̧bö kwö̧jaduwakobetjö̧.

¹³ Jau chömöledö, tjumusidi söbebö loawa o̧bakwena jejenö yöka̧laduwobö ja̧kobe, ökwödö ida̧ökö bi'yenö laebi̧ jawa a̧ja̧kwajadö omukwatö kwö̧jaduwakobetjö̧, ja̧danö ju'wibi, kwitji̧muduwi tupadanö jojodö, ina bi'yenö laebi̧ a̧ja̧kwöködöma, a̧ja̧kwö kwuluwo̧duwi Isabenö Jo̧ Diosnö yebabinö omukwatö tjösödobö tjöwaisachibakobetjö̧. Babe juluwanö Jordan ojwe pekibaduwakwedöja chömöledö, Dios iyakwa̧ nijinö kwö̧jaduwobö, ja̧danö ja̧ niji ökwödö israel jojodö kwö̧jaduwonö, ba̧kwelöjatebö otiwanö Diosnö ösödö kwö̧jaduwakobetjö̧, yötawaja̧danö bi'ye yöka̧laduwobö ja̧kobe, —jö̧ba̧lö yöawinobe Moisesma.

Israel jojodö tjöpöjödakwa̧ Dios Moisesnö yöawina jawa

¹⁴ Jemi ikenama Isabenö Jo̧ma Moisesnö yöa̧linobe, —Moises, ö'wö bakibakwa̧ mölema ida̧ökö yöneawachibobe. Jo̧kwajabetjö̧ Josuenö jwököbo, kwö̧jobekwö ichobö, ja̧danö jo̧bakwö chejube chöba a'o kwi̧sȩkwaduwobö kwicho, israel jojodö tjuluwo̧ baibanö Josuenö 'da̧batö chujunakobetjö̧, —jö̧ba̧lö. Yöa̧liawö̧, Moisesbi, Josuebi Dios ejube tji̧'yinobe, Dios öba a'o tji̧sȩkwobö,

¹⁵ ja̧danö tjichibiökwe, Isabenö Jo̧ma jobadönö ojwiyo'wo ja'da'da'wonö öwawachinobe jobadönö, ja̧danö ojwiyo'woma Dios eju teachakwawena lamatinobe.

¹⁶ Ja̧danö, Isabenö Jo̧ma yöawinobe: —Moises, ökwöma juluwanö kwa'dödökwö bakibanö ö'wö bakibakwo̧ja. Ikenama, ö'wö bakibaja̧ ikenama, bidö kwömöledö israel jojodöma juluwanö sulabenö ja̧tja̧kwedö, baikwö wanedö yötawa, bakwuju jilekwamuböködökwö sulabenö 'da̧'da̧bakwawö jalewi̧danö, bidö israel jojodöma juluwanö ju'wedö tjösödawö̧ o̧'wo jawanö tjösödakwedö. Jau Moises, bakobe jobadökwö isabenö ötjönöda tjösödobö yöbawö dujuninajayonö, juluwanö ötjönö kabatibö, tjitebonö tjö̧'da̧de ju̧kwadö tjösödawö̧nöda tjösödakwedö, sulabenö.

¹⁷ Jejenö baledi̧tjö̧, ja̧ möle chödameakwakwo̧sa jobadönö, ja̧danö jobadönö le'dedibö, jobadönö pjabatö katatibakwo̧sa. Jejenö jobadönö pjatatokobetjö̧, tjöpöjojodöma juluwanö jobadönö tjujuluwakobe, ja̧danö nöinö wene baledakobe jobadönö, jwiinö usula tjemawinö. Jejenö balediawö̧, ja̧ möle yötja̧lakwawakobe, –Babe wene dujuna̧li̧ma, duluwo̧ Dios dö̧'da̧de deobetjö̧ baledobe, –jö̧ba̧lö yötja̧lakwawakobe.

¹⁸ Ja̧ möle jwiinö sulabenö ja̧bö ju'wedö tjösödawö̧nö ösödö tjö̧jobetjö̧, isabenö jobadönö pjabatökönö chö̧jakwo̧sa̧ Moises.

¹⁹ —Jo̧kwajabetjö̧, ja̧ möle baledakwa̧ omukwatö, baikwö lo̧awa kwi̧wȩyudobö yötawakwö Moises, wȩyudö, israel jojodönö kwö̧ba̧jadobö. Jejenö kwö̧ba̧jadobö wetakwö Moises, tupakwö sulabenö ja̧tjenama, ja̧ lo̧awa sulabenö omukwatö tjö̧ji̧ i̧sȩbakobetjö̧, –Diosnö kwa̧ja̧kwaduwo jö̧ka̧linaduwobe, –jö̧ba̧lö.

²⁰ Jau Moises, baikwö baledakwa̧ yötawakwö: Damötjö̧ israel jojodö tja'dödönö yöbawö chujunina badekwachinö, babe juluwanö inesö otiwemi, ajikwakwawedöbi otiwanö tjajikwemi, ja̧danö batjobi otiwanö wa̧jemi nijibe israel jojodönö ötibocha, jobe tjö̧jobö. Ja̧danö, jobe chiyaja̧ nininö ja̧nö, nöinö kwakwawa tjujuna̧lakobe israel jojodöma, tjomeawinö tjukwobö. Jemi ikenama, jejenö ida̧ökö otiwanö tjujuna̧lenama, ötjö tjuluwo̧ Diosnö öpöjödö kabatibö, ju'wedö tjösödawö̧nö tjösödakobe. Jau Moises, bakobe israel jojodökwö yöbawö chujunijatö, –Isabenö weti̧ a̧ja̧kwö tjö̧jobö jo̧be, –jö̧ba̧lö, jo̧kwaijayonö weti̧ kabatibö, ju'wedö tjösödawö̧nö tjösödakobe, –Jo̧badö wetji̧da da̧ja̧kwaduwo, –jö̧ba̧lö.

²¹ —Bi̧ya lo̧awa ökwönö yötawakwa̧ lo̧awama, israel jojodöma la'akatjöda tjo̧'wo jwitjibökakwedö Moises, jobadöbi, tji̧tji̧mu tupadanö jojodöbi ba̧kwelöjatebö bi̧ya lo̧awa tjomukwatibakwedö. Jo̧kwajabetjö̧, ötjönö kabatibajadö, nöinö inesö labi̧ jawatjö usula emawö tjö̧jenama, bi̧ya lo̧awama yöawakwawadanö ja̧kobe, –Diosnö kakatibaduwobetjö̧ baledobe, –jö̧ba̧lö. Jau Moises, chöwaisa israel jojodö sulabenö ja̧bö tjö̧jakwa̧ma, ina yöbawö chujuninemi nijibe tjichibanö ötibököjayonö, ida̧ökö tjichibaja̧ ikena sulabenö ja̧bö tjö̧jakwa̧ wene chöwaisa, ja̧danö ja̧ baledakwa̧ omukwatö, lo̧awa babe kwi̧wȩyudobö wetakwö, —jö̧ba̧lö yöawinobe Diosma, Moisesnö.

²² Ja̧danö, iya̧da möle Moisesma Dios yöawaja̧ lo̧awa i̧wȩyudinobe, ja̧danö ju'wibi israel jojodönö ö̧ba̧jadinobe.

²³ Jemi ikenama Diosma Josuenö 'da̧batö ujuninobe, israel jojodö la'aka tjuluwo̧ baibanö, ja̧danö jo̧banö 'da̧batö junö yöawinobe: —Josue, kwujuluwachibanö yebabökönö kwöjobö jo̧be, ökwöda yöbawö chujunina nijibe tjichibanö israel jojodönö ökibakobetjö̧. Jau Josue, damötjö̧ israel jojodönö chiyakwa̧ jawa yöbawö chujunijatö, –Isabenö chiyakwo̧sa, –jö̧ba̧lö, ja̧danö ja̧ yötawina badekwachinö jobadönö ökibakwo̧ja, ja̧danö ötjöma ökwökwö chö̧jakwo̧sa, —jö̧ba̧lö yöawinobe Diosma, Josuenö.

²⁴ Moisesma okobe jwiinö Dios weaja̧ jawa bi'yenö laebi̧ jawa i̧wȩyudinobe, okobe jwiinö wȩyudö kaatakwawenanö baibanö.

²⁵ Ikenama, wȩyudö kabatajo̧, Moisesma Levisaso jojodötjö Dios wei̧ wȩyukwa öbiya döbölataja a̧ja̧pjo kwebatadönö iyö weinobe,

²⁶ —Bi'ye Dios wei̧ wȩyukwa'ye emö, kwuluwo̧duwi Isabenö Jo̧ Dios wei̧ wȩyukwa öbiya döbölataja a̧ja̧pjo ö'öbö kwujunaduwo. Ja̧danö, jobe ja̧nö, bi'yema ba̧kwelöjatebö i̧sȩkwadanö ja̧kobe, –Isabenö israel jojodöma Dios wei̧ tja̧ja̧kwobö jo̧be, –jö̧ba̧lö.

²⁷ Jau chömöledö, isabenö ökwödö israel jojodönö chöwaisawöja, –Tjuu 'dibadö weawa a̧ja̧kwöködö, –jö̧ba̧lö, baikwö yötawa: Ina yaba̧lö, kwö̧'da̧deduwinö chö̧jayi, ba̧kwelöjatebö Isabenö Jo̧ wei̧ öpöjödabidö kwö̧jinaduwobe ida̧ökö, jö̧tö? Jo̧kwajabetjö̧ ju'wibi chöwaisaduwakwö chömöledö, —Ina yaba̧lö chö̧jayi Dios wei̧ öpöjödabinö kwö̧jinaduwobema, ö'wö batibaja̧ okobe ja̧tjö bajalekwönönö isabenö Dios wei̧ kwöpöjödaduwakwedöja, –jö̧ba̧lö.

²⁸ —Babe okobe deinö israel jojodötjö la'aka luwedöbi, ju'wedö luwedöbi tjo̧ko̧kokwobö jwököbaduwo, tja̧ja̧kwa̧lonö okobe jwiinö bi̧ya lo̧awa jobadönö yötawakobetjö̧. Wanedö yötawa, jejenö jobadönö lo̧awa yöbawö, mölejenö ju̧kwadöbi, bö̧jenö ju̧kwadöbi jobadönö yötawaja̧ a̧ja̧kwö tjöwaisakobe, Isabenö israel jojodöma Dios wei̧ tja̧ja̧kwo jö̧ba̧ladö, jö̧ba̧lö, ja̧danö bemi tupakwö sulabenö a̧ja̧kwökönö kwö̧jaduwenama, mölejȩnö ju̧kwadöbi bö̧jenö ju̧kwadöbi yötjawobö ja̧kobe, –Israel jojodöma Dios wei̧ tja̧ja̧kwinatjö̧bö, –jö̧ba̧lö.

²⁹ Jobekwö yötawobe ökwödönö chömöledö, isabenö ö'wö batibaja̧ okobe sulabenö ja̧köbaduwakwa̧ chöwaisobetjö̧. Jau chömöledö, ökwödönö chöwaisa, –Ö'wö batibaja̧ okobe isabenö sulabenö ja̧köbaduwakwedöja, jweinö ja̧bö kwö̧jaduwobö yöbawö wetijayonö, jalachibö wainö ja̧köbaduwakwedöja, –jöba̧lö chöwaisa. Ja̧danö ju'wibi chöwaisa, jejenö Isabenö Jo̧ öpöjödi̧ jawa sulabenö ja̧köbaduwiökwe, ökwödönö ödameakwakwo̧ Diosma, ja̧danö ökwödönö ödameakwobetjö̧ nöinö wene kwöbaledaduwakwedöja, —jö̧ba̧lö yöawinobe Moisesma, israel jojodönö.

Moises Dios weina lo̧awa israel jojodönö yöawina jawa

³⁰ Jemi ikenama, okobe deinö israel jojodö ko̧ko̧kwadö tja̧ja̧kwa̧lonö, Moisesma okobe jwiinö biya̧ lo̧awa yöawinobe, lo̧awa yöbawö kaatenanö baibanö.