Deuteronomio 30 - Dios Iwene

Tjebachajö Diosnö kwösödaduwitjö̧ma, isabenö pjaatakwo̧, jö̧ba̧lö Moises yöawina jawa

¹ Tupakwö yöawinobe Moisesma: —Chömöledö, ökwödönö yötawajabe, Dios ökwödönö pjaatakwa̧ jawabi, lȩebakwa̧ jawabi, –Dios wei̧ a̧ja̧kwö kwö̧jaduwitjö̧ma, isabenö otiwanö pjaatakwo̧, ja̧danö a̧ja̧kwökönö kwö̧jaduwitjö̧ma, isabenö lȩebakwo̧, –jö̧ba̧lö. Ja̧danö, a̧ja̧kwökönö kwö̧jaduwitjö̧ma, a̧ja̧kwökönö kwö̧jaduwiökwe, kwuluwo̧duwi Isabenö Jo̧ Dios ökwödönö lȩebena, ja̧danö ju'wedö tjitebokwena jojodö tjö̧'da̧de bakibaduwanö kwipjelekwachaduwinö a'dewö loena, ökwödönö yötawaja̧danö. Jejenö balediawö̧, yötawaja̧ jawa omukwatibö,

² tjebachajö kwuluwo̧duwi Isabenö Jo̧ Diosnö ösödö, ökwödöbi, kwitji̧muduwibi babe ökwödönö weti̧danö jwaikwöda okobe jwiinö kwomajadeduwinöbi, kwo̧'woduwinöbi Dios wei̧ a̧ja̧kwö kwö̧jaduwitjö̧ma,

³ isabenö lȩlöjinö edakwo̧ kwuluwo̧duwi Isabenö Jo̧ Diosma chömöledö. Ja̧danö, ökwödönö lȩlöinö edö, ju'wedö tjitebotenia kwö̧jaduwelö, ökwödönö ko̧ko̧dö tjeatakobe kwiteboduwibe, ja̧danö yemidanö otiwanö ökwödönö iyö pjaatakobe, ajayinö kwujuna̧linaduwadanö otiwanö kwujuna̧laduwobö.

⁴ Jau chömöledö, jwiinö ödö, bö̧jȩ bakwachö̧jȩ kwö̧jaduwitjö̧bi, kwuluwo̧duwi Isabenö Jo̧ Diosma jobe kwö̧jaduwelö ökwödönö o̧ko̧kodakobe, ja̧danö ko̧ko̧dajo̧, ökwödönö tjeatakobe,

⁵ kwiteboduwi, kwa'dödö tjö̧jinemi nijinö yemidanö kwö̧jaduwobö. Kwuluwo̧duwi Isabenö Jo̧ Diosma ökwödönö ichejebö ujunakobe ja̧ kwiteboduwi nijinö chömöledö, ja̧danö jobe otiwanö kwöjaduwobö pjaatakobe, ja̧danö kwö̧ba̧jȩkwachaduwinö pjaatakobe, kwa'dödömine tjö̧ba̧jȩkwinatjö bajalekwönönö kwö̧ba̧jekwachaduwakobetjö̧, ja̧danö tjujuna̧linatjö bajalekwönönö otiwanö kwujuna̧laduwakobetjö̧.

⁶ —Ju'wibi kwuluwo̧duwi Isabenö Jo̧ Dios ökwödönö pjaatakwa̧ yötawaduwakwö chömöledö, okwanö kwöbalewachaduwinö pjaatakwo̧, wanedö yötawa, kwomajadeduwi wamesa̧do̧, Diosnö kwösödaduwapji jö̧ba̧lö tjöekwa̧do̧ma, ökwödö kwomajadeduwitjöbi, kwitji̧muduwi tjomajadetjöbi 'wibebö loakobe, jwaikwöda okobe jwiinö kwomajadeduwinöbi, kwo̧'woduwinöbi kwuluwo̧duwi Isabenö Jo̧ Diosnö ile nibebö kwösödaduwakobetjö̧. Jejenö ökwödönö pjaatakwo̧ Diosma chömöledö, 'ya̧ba̧ladö kwö̧jaduwakobetjö̧.

⁷ Ja̧danö, ju'wibi chömöledö, okobe jwiinö lȩebakwa̧ jawa ökwödönö yötawaja̧ jawama, kwöpöjojodöduwinöda balekwa mikwa baledobö weakwo̧ kwuluwo̧duwi Isabenö Jo̧ Diosma, ajayinö usula kwemawaduwinö ja̧binadönöma.

⁸ —Ja̧danö chömöledö yemidanö Isabenö Jo̧ wei̧ a̧ja̧kwö kwö̧jaduwakedöja, okobe jwiinö jo̧ba wei̧ babe ökwödönö yötawi̧ jawa a̧ja̧kwö kwö̧jaduwakwedöja,

^9-10 ja̧danö jejenö a̧ja̧kwö kwö̧jaduwiökwe, okobe jwiinö kwö̧jaduwi̧ jawatenia pjaatakobe kwuluwo̧duwi Isabenö Jo̧ Diosma chömöledö, otiwanö kwö̧jaduwakobetjö̧. Baikwö yötawa: Ba̧jȩkwadö kwitji̧muduwinö 'yakebaduwakwedöja, ja̧danö kwajwimuduwibi ba̧jȩkwadö batjibanö tjö̧ba̧jekwakwedö, ja̧danö kwöbatjoduwibi otiwanö nöinö wa̧jakwayu, kwuluwo̧duwi Dios ökwödönö pjaatobetjö̧. Jau chömöledö, kwuluwo̧duwi Isabenö Jo̧ Dios wei̧ a̧ja̧kwö ja̧nö, bi'ye wȩi wȩyukwa'yenö laebi̧ jawa ja̧bö kwö̧jaduwobö wei̧bi, ju'wi wei̧ jawabi a̧ja̧kwö kwö̧jaduwiökwe, kwa'dödönö pjaatobö ösödinadanö, bakwainö ökwödönöbi pjaatobö ösödakwo̧ Isabenö Jo̧ma chömöledö, jwaikwöda okobe jwiinö kwomajadeduwinöbi, kwo̧'woduwinöbi kwuluwo̧duwi Isabenö Jo̧ Diosnö kwösödaduwobetjö̧, —jö̧ba̧lö yöawinobe Moisesma.

Isabenö Dios wei̧ kwa̧ja̧kwaduwo, ja̧kwawa kwujuna̧laduwakobetjö̧, jö̧ba̧lö Moises yöawina jawa

¹¹ Tupakwö yöawinobe Moisesma: —Chömöledö, Dios wei̧ babe ökwödönö yötawi̧ma wayökö, a̧ja̧kwö kwö̧jaduwobö, ja̧danö wȩyukwa'yema ökwödötjö ödöokobe.

¹² Jau chömöledö, Dios wei̧ wȩyukwa'ye mölejȩbeda ji̧tjö̧ma, kwöwaisaduwobö wayena, ja̧danö abebö kwa̧ja̧kwaduwena, –Tida mölejebe kabekwö i̧'yakwajö, Dios wei̧ emibö ichejebobö, wei̧ a̧ja̧kwö wei̧danö ja̧bö dö̧jakobetjö̧? –jö̧ba̧lö. Jo̧kwaijayonö mölejebeda jo̧kobe chömöledö, jobekwö abebö kwa̧ja̧kwaduwobö.

¹³ Ja̧danö jwaibalawa bakwachobube ji̧tjö̧ma, abebö kwa̧ja̧kwaduwena, –Tida jwaibalawa bakwachobube i̧'yakwajö, Dios wei̧ emibö ichejebobö, wei̧ a̧ja̧kwö wei̧danö ja̧bö dö̧jakobetjö̧? –jö̧ba̧lö. Jo̧kwaijayonö jwaibalawa bakwachobu jo̧kobe chömöledö, jobekwö abebö kwa̧ja̧kwaduwobö.

¹⁴ Jobekwö abebö kwa̧ja̧kwaduwobö jwiobe chömöledö, Dios wei̧ma ida̧ökö ökwödökwö yöne jo̧betjö̧ chömöledö, baikwö yötawa: Ida̧ökö jo̧ba wei̧ kwineneduwinö jo̧be, ida̧ökö Dios wei̧ yöka̧laduwobetjö̧, ja̧danö ida̧ökö kwomajadeduwinö kwöwaisaduwobe, otiwanö wei̧ a̧ja̧kwö kwö̧jaduwobö. Jo̧kwajabetjö̧ isabenö wayökö chömöledö, Dios wei̧ a̧ja̧kwö kwö̧jaduwobö.

¹⁵ —A̧ja̧kwaduwitjö chömöledö, babe möle kwöba a'oduwitjö yöbawö chi̧sȩbajabe, –Dios wei̧ kwa̧ja̧kwaduwitjö̧ma, ja̧kwawabi, nöinö kwiteaduwibi kwujuna̧laduwakwedöja, –jö̧ba̧lö. Ja̧danö –Dios wei̧ a̧ja̧kwökönö kwö̧jaduwitjö̧ma, woawabi, nöinö wenebi kwujuna̧laduwakwedöja, –jö̧ba̧lö yöbawö chi̧sȩbajabe. Di̧ya omudawö kwösödaduwakwojobö jö̧ba̧lö, jobekwö yöbawö chi̧sȩbajabe chömöledö.

¹⁶ Yötawaja̧danö yemidanö yötawaduwakwö: Kwuluwo̧duwi Isabenö Jo̧ Dios wei̧, babe ökwödönö yötawi̧ jawa a̧ja̧kwö ja̧nö, kwuluwo̧duwi Isabenö Jo̧ Diosnö ile nibebö ösödö ja̧nö, wei̧danö ja̧bö ja̧nö, ja̧bö kwö̧jaduwobö wei̧bi, ju'wi wei̧bi a̧ja̧kwö kwö̧jaduwitjö̧ma, isabenö otiwanö kwö̧jaduwakwedöja, ja̧danö kwö̧ba̧jekwachaduwinö kwö̧jaduwakwedöja. Jau chömöledö, babe juluwanö Dios iyakwa̧ nijibe tekachaduwakwedöja, ja̧danö yötawaja̧danö ja̧bö kwö̧jaduwitjö̧ma, jobe kwiteboduwinö otiwanö kwö̧jaduwobö pjaatakwo̧ kwuluwoduwi Isabenö Jo̧ Diosma.

¹⁷ Jo̧kwaijayonö Dios wei̧ a̧ja̧kwökönö ja̧nö, jo̧banö kabatibö, ju'wedö sulabenö ötjibi̧danö ju'wedö tjösödawö̧nö, –Duluwedö diosbedö, –jö̧ba̧lö kwösödaduwitjö̧ma,

¹⁸ juluwanö debö kwi̧'yaduwakwedöja. Jau chömöledö, kwöba a'oduwi ja̧nö, babe möle isabenö yötawaduwakwö, babe juluwanö Jordan ojwe pebibö, Dios iyakwa̧ niji kwiteboduwi baibanö kwö̧jaduwobö kwi̧'yaduwijayonö, Diosnö kabatibö ju'wedönö kwösödaduwitjö̧ma, kwiteboduwi nijitjö juluwanö debö kwi̧'yaduwakwedöja.

¹⁹ Mölejenö ju̧kwadö tjöba a'otjöbi, bö̧jenö ju̧kwadö tjöba a'otjöbi öwaetjöda öwawinö yöbawö chi̧sȩbajabe, ja̧kwawa jawa ichejebi̧ jawabi, woawa jawa ichejebi̧ jawabi, ja̧tjö di̧ya kwomudawaduwakwojobö jö̧ba̧lö. Jau chömöledö, mölejȩnö ju̧kwadöbi, bö̧jenö ju̧kwadöbi edö waisadö, isabenö jweinö baledakwa̧ jawa ökwödönö lȩbebö yötawajabe jö̧ba̧lö, ja̧danö kwujuluwaduwachibanö pjabatö yötawaduwakwö: Isabenö ja̧kwawa jawada kwomudawaduwo chömöledö, ökwödöbi kwitji̧mu tupadanö jojodöbi debö 'yö̧könö otiwanö kwö̧jaduwakobetjö̧.

²⁰ Ja̧kwawa jawa omudawö, kwuluwo̧duwi Isabenö Jo̧ Diosnö ile nikebaduwo chömöledö, ja̧danö jo̧banö 'diinö do̧ba̧lö, wei̧ a̧ja̧kwö kwö̧ja̧duwo. Jo̧batjöda ichi̧ chömöledö, ja̧kwawa kwö̧jaduwi̧bi, lekwe möle kwö̧jaduwakwa̧bi, jo̧kwajabetjö̧ jo̧banö 'diinö do̧ba̧lö kwö̧jaduwo, Isabenö Jo̧ kwa'dödö Abrahamnöbi, Isaacnöbi, Jacobnöbi yöbawö ujunina nijinö kwiteboduwi baibanö lekwe kwö̧jaduwakobetjö̧, —jö̧ba̧lö yöawinobe Moisesma, israel jojodönö.