Deuteronomio 3 - Dios Iwene

Israel jojodö la'aka luwo̧ Og mikwo̧nö tjujuluwina jawa

¹ Tupakwö yöawinobe Moisesma, israel jojodönö: —Ja̧danö, Sijonnö dujuluwaja̧ ikenama, tupakwö u'dakwöchobe di̧'yijatö, Basan niji̧ jo̧bekwö. Ja̧danö, jejenö di̧'yiökwe, Basan niji la'aka luwo̧ Og mikwo̧ma, okobe deinö ömöayedö ölakwabikwawa jojodönö öbibö Edrey comunidadbe ichinobe, ökwödökwö ölakwabikwawobö.

² Ja̧danö, jejenö ökwödökwö ölakwabikwawobö ichenama, Isabenö Jo̧ma ötjönö yöawinobe, –Jo̧ba Ognö yekaboko, jo̧banöbi, okobe deinö ömöayedönöbi, itebo nijibi kwujuluwaduwobö chiyajobetjö̧. Jo̧kwajabetjö̧ Hesbon comunidadnö ji̧na amorreos jojodö la'aka tjuluwo̧ Sijonnö söbebö lököbinaduwa̧danö, Ognöbi, okobe deinö ömöayedönöbi söbebö loköbaduwo, –jö̧ba̧lö yöawinobe Diosma.

³ Ja̧danö, yöa̧linadanö, duluwo̧ Isabenö Jo̧ Diosma la'aka luwo̧ Ognöbi, okobe deinö ömöayedönöbi dujuluwobö pjaatinobe. Ja̧danö, okobe deinö jobadönö kwabawö lodijatö, ömöayedötjö bakwo̧bi ö̧jibökenanö baibanö.

⁴ Ja̧ möle jenanö, okobe jwiinö Og itebo comunidadteniama, dujuluwijatö. Isabenö okobe jwiinö Og iteboinemima dujuluwijatö chömöledö, itebo tjöbebö tjotidinemi comunidadma, sesenta comunidadbiya ji̧nobe, ja̧danö bakwöta comunidad jojodöbi dujulutjö tjö̧jibinokobe. Okobe jwiinö ja̧ Argob ötjabemi, Basan niji Og iteboinemima dujuluwijatö.

⁵ Isabenö okobe jwiinö ja̧ sesenta comunidadbiyama 'diinö tjöekwinobe, möakwö bajalenö, ja̧danö comunidad apjudebiyama, dödelatajanö tjutumatinobe, a̧petukwöchobesadenöbi, okwakwöchobesadenöbi, ja̧danö 'diinö tjipje'datinobe apjudebiyama, towisa'onö. Jo̧kwaijayonö okobe jwiinö ja̧ comunidadbiya dujuluwijatö, ja̧danö ju'wibi nöinö tjöekwa jwii̧ comunidadbiyabi dujuluwijatö.

⁶ —Ja̧danö, Og itebo dujuluwenama, Hesbon la'aka luwo̧ Sijon itebo ju̧kwadönö söbebö lodinadanö söbebö lodijatö. Comunidadkwena dujuluwenama, okobe deinö jojodönö kwabawö lodijatö, ömadönöbi, ya̧dönöbi, tjemunöbi.

⁷ Jo̧kwaijayonö jojodönö kwabawö lodijayonö, tja̧jwi̧mubinadönö kwabawö lodijöjökötö, tja̧jwi̧munöbi, ju'wi tjiteainabi do̧datijatö, ökwödöda da̧jwi̧mu, ja̧danö ökwödöda ditea baibanö.

⁸ —Jobekwö laebobe jobadönö dujuluwinama chömöledö. Baikwö laebobe ja̧ möle ditebo baibanö niji do̧datinama: Jobadö du̧ju̧taja amorroes la'aka luwedötjö, Jordan ojwe jawo̧ ichobekwöchobe ni̧ji̧ demijatö, Arnon ojwetjö̧, Hermon mösa'obe ichibenanö.

^9-10 Ja̧danö okobe jwiinö jobe ba̧ba̧lawobe jȩmi comunidadtenia do̧datijatö, ja̧danö okobe jwiinö Galaad niji, ja̧danö okobe jwiinö Basan niji, Og itebo comunidadbiya Salca comunidadbebi, Edrey comunidadbebi ichibanö, —jö̧ba̧lö yöawinobe Moisesma. Ja̧ Moises yöawina'o Hermon mösa'oma Sidon jojodöma Sirion jö̧ba̧lö ötjaba'o, ja̧danö amorreos jojodöma Senir jö̧ba̧lö ötjaba'o.

¹¹ Ja̧danö, la'aka luwo̧ Ogma, ja̧ nijinö ju̧kwadö inesö ödöbaedö refaitas ötjabawö̧tjö bajaleapo ji̧na. Jo̧bama isabenö nöbo̧inobe, iteapjo camapjoma 'dii jawatjö otikwapjo ujuna̧linobe, ö'wejemu jawa metro jenanö ödöapjoma, ja̧danö jakwölakwö dötölajata metro jenanö ödöapjo. Ja̧ Og iteapjo camapjoma, ina amonitas jojodö tjitebo comunidad Rabanö jo̧be, ja̧pjo edö, isabenö nöbo̧ ö̧jina edö tjöwaisobö.

Moises israel jojodötjö wa̧pösokwa jojodönö tjitebo baibanö 'da̧batö iyina jawa

¹² Tupakwö yöawinobe Moisesma, israel jojodönö, —Ja̧danö, ja̧ möle demina nijima, ja'ö Rubensaso jojodönöbi, Gadsaso jojodönöbi chiyijatö, idöda tjitebo niji baibanö. Ja̧ jobadönö chiyinama, bi̧ya: Arnon ojwe ö'öbö comunidad Aroer nijitjö, u'dakwö bajalenö niji, ja̧danö mösa'iju jȩmi Galaad niji ja'ö, ja̧danö jobe pjeanö ji̧ comunidadbi̧yabi jobadönö chiyijatö, tjitebo baibanö.

¹³ Ja̧danö ju'wi Galaad nijibi, okobe jwiinö Og iteboinemi Basan niji Argob ötjabemi nijibi, Manasessaso ja'ö jojodönö chiyijatö, —jö̧ba̧lö yöawinobe Moisesma. Ja̧ Manasessaso jojodönö iyina niji labebö loawama, baikwö laebobe: Okobe jwiinö Basan nijima, ajayinö inesö ödöbaedö refaitas tjitebo jö̧ba̧lö ötjabinobe.

¹⁴ Ja̧danö, Manasesaso jojo Yair mikwo̧ma, ömöledönö öbibö, okobe jwiinö Basan niji Argob ötjabemi ujuluwinobe, guesureos jojodö tjitebo ö'öböbe ichibanö, ja̧danö macateos jojodö tjitebo ö'öböbe ichibanö. Ja̧danö, jemi ikenama ja̧ ujuluwaja̧ niji Basanma, iteda iminö imidinobe, Javot Yair jö̧ba̧lö. Jo̧kwajabetjö̧ babe mölebi ina ja̧ nijima imidinadanö Javot Yair jö̧ba̧lö mikwobe.

¹⁵ Tupakwö yöawinobe Moisesma, israel jojodönö: —Galaad niji ja'ö u'dakwöchobe nijima, Manasessaso jojodötjö Machirsaso jojodönö chiyijatö, tjitebo baibanö.

¹⁶ Ja̧danö Rubensaso jojodönöbi, Gadsaso jojodönöbi Galaad niji ja'ö a̧li̧kwöchobe niji chiyijatö, a̧li̧kwöchobe Arnon ojwebe ichibanö, ja̧danö jakwölakwö Jaboc ojwebe ichibanö. Jobadönö chiyina niji a̧li̧kwöchobe bakwachobema, Arnon ojwe ja'ö, ja̧danö jakwölakwö bakwachobema Jaboc ojwe ja'ö. Ja̧ Jaboc ojwema, amonitas jojodö tjitebo bakwachobe jo̧be.

¹⁷ Ja̧danö ju'wibi, Araba ötjabobe niji jobadönö chiyijatö, u'da Galilea o̧pesobutjö, Araba o̧pesobu, ju'wi imi Mar Muerto mikwobube ichibanö, ja̧danö jemi tupakwö, Pisga mösa'o ö'öböbe ichibanö. Jobekwö laebobe jobadönö chiyina niji jawo̧ meajobekwö bakwachobema, —jö̧ba̧lö yöawinobe Moisesma.

¹⁸ Tupakwö yöawinobe Moisesma, —Ja̧danö, ja̧ möle ökwödö niji chiyinawö̧nö wetijatö, baikwö: –Kwuluwo̧duwi Isabenö Jo̧ Diosma ökwödönö iyajabe, bemi nijinö kwö̧jaduwobö, kwiteboduwi baibanö. Jo̧kwaijayonö, ida̧ökö jejenö kwiteboduwi kwujuna̧laduwijayonö, yayonö ökwödötjö ölakwabikwawadöma Jordan ojwe pebibö, tjölakwabikwawobö ja̧kobe. Jau, okobe deinö ökwödötjö ölakwabikwawadöma, ju'wedö kwömöledöduwi israel jojodö tjabönö, ölakwabikwawa jawa kwebatö pekibaduwobö ja̧kobe.

¹⁹ Jo̧kwaijayonö jejenö ökwödö ölakwabikwawa jojodö kwi̧'yaduwonö, kwömöledöduwibi, kwa̧jwi̧muduwibi, tjö̧jibena. Jau chömöledö, chöwaisa, isabenö ba̧jȩkwadö kwa̧jwi̧muduwinö ajikwadöja, ja̧danö ojwe pebibajadö kwölakwabikwawaduwonö, kwilekwamuduwibi, kwitji̧muduwibi, kwa̧jwi̧muduwibi okobe kwiteboduwi comunidadnö tjö̧jibakwedö.

²⁰ Ja̧danö, kwuluwo̧duwi Isabenö Jo̧ Dios ökwödönö iyinadanö, Jordan bakwachödö ju'wedö bakwasokwena kwömöledö israel jojodönö tjitebokwena niji iyö, lekwe möle kwebachö tjö̧jinatjö̧ tjö'wachobö iyenama, jenada kwiteboduwibe kwȩwa̧jaduwobö ja̧kobe, ökwödönö chiyina nijibema, –jö̧ba̧lö wetijatö.

²¹ —Ja̧danö, ju'wibi ja̧ möle otiwanö Josuenö wetijatö, baikwö: –Josue, ökwöda kwöbajalebiyanö otiwanö kwedijatö, okobe jwiinö Kwuluwo̧ Isabenö Jo̧ Dios bemi nijinö ji̧nadö du̧ju̧taja la'aka luwedönö ölakwabikwawö ujuluwinama, ¿jö̧tö? Ja̧danö, baikwö yötawakwö, Jordan ojwe pekibenama, jobadönö ujuluwinadanö okobe deinö bakwachödö tjitebokwena la'aka luwedönöbi ujuluwakwo̧.

²² Isabenö jobadönö yekabobö jwiobe Josue, kwuluwo̧ Isabenö Jo̧ Diosda jobadönö ölakwabikwawakobetjö̧, –jö̧ba̧lö Josuenö wetijatö, —jö̧a̧linobe Moisesma.

Dios Moises niji teachokobö weina jawa

²³ Tupakwö yöawinobe Moisesma, —Ja̧danö chömöledö, ja̧ möle ötjöma Isabenö Jo̧nö ateba̧lijatö, baikwö:

²⁴ –Chuluwo̧ Isabenö Jo̧ Dios, inesö jwiinö juluwo̧ kwö̧ji̧ma, ja'yubenö ötjö kwömöayo̧nö jamatö kwi̧sȩbajabe. Jau chuluwo̧, bö̧jetjöbi, mölejȩtjöbi bakwo̧bi ökwödajayo̧ tjösödökwe diosma deobe, ökwö inesö kwujulu i̧sȩbö, tjöbajale jalaka baibanö julu̧wi̧ jawa kwi̧sȩbi̧danö i̧sȩbo̧ma, deobe.

²⁵ Ja̧danö, atebakwö, ojwe pebibö, inesö otiwemi niji, Jordan ojwe bakwachödö mösa'iju jȩmi nijibi, Libano ötjabobe nijibi chedobö, pebibö chedobö atebakwö, weköbakwa̧ji̧? –jö̧ba̧lö atebijatö.

²⁶ Jejenö chedowe jö̧ba̧lö atebökwe, Isabenö Jo̧ma öpöjödinobe, ökwödö israel jojodönö ile nibebö ötjönö ödameakwobetjö̧. Ja̧danö, atebökwe, –Pekiboböma wetökö. Tjo̧wita, bemi tupakwö la'akatjöda pekiboböma abebökönui.

²⁷ Pekibobö wetököjayonö, Pisga mösa'o kwönöchobö wetakwö, ja̧danö nöchajo̧, otiwanö jawo̧ meajobekwöbi, jakwölakwöbi, jakwölakwöbi jawo̧ ichobekwöbi otiwanö kwedo, kwömöledönö chiyakwemi niji kwedobö. Jobetjöda otiwanö kwedo, la'akatjöda ojwe pebibö, kwichibökakobetjö̧.

²⁸ Jo̧kwaijayonö, ökwö kwi̧'yököjayonö, Josuenö öbibö ö̧jakwa̧ jawa weköbonö, ja̧danö otiwanö jo̧banö yöba̧lö, ujuluwachibanö pjakatonö, jo̧bada bidö israel jojodönö öbibö i̧'yakobetjö̧. Jo̧ba Josueda mösa'otjö kwedaja̧ nijibe tjichibanö israel jojodönö öibakobe, ja̧danö jo̧bada tjitebo baibanö tjemobö pjaatakobe, jo̧kwajabetjö̧ otiwanö jo̧ba öbibö ö̧jakwa̧ jawa yöbawö, ujuluwachibanö pjakatonö, –jö̧ba̧lö atadinobe Diosma, ötjö Moisesbi petibobö atebenama.

²⁹ Ja̧danö, jejenö weobetjö̧, jobetjö labebökönö, Bet Peor comunidadtjö badeibö wabekonö dö̧jijatö, Jordan ojwe wabekonö, —jö̧ba̧lö yöawinobe Moisesma, israel jojodönö.